Génesis 50 - Dupade Uruode

¹ Enga jé u uje José chimo uje dayé e topísi enga chisa ga chajo dayé aja re enga tagu uredie iji itoringai quigade.

² Enga José tibidi daijnane uje bisidode déji ore gari nanique uje que ayoré totique taratame bisidode udore. Enga chojningame ore: "Acayoi iapade uje toi enga anguñecho bisidode aja gai te jne uje que ayoré taratame gu."

³ Enga dirode guejnanie ayoré gare iji quigade nanique uje ore changuñéra bisidi taja gai gatuaque ujetiga ca tarata arione. Enga egíptogosode ore chosõripise uraque deduguéjnai José uje jnusipísi dai casé Israel uje topísi gu. Jecute ore guejnane dire 70 nanique uje ore poji José dai ejode to.

^4-5 Enga udojo quigade nanique enga José catecã́ri dojode eduguéjna ore uje jecucha ga ore chise Faraón iguíjna cuchábi iji dirode jnese to. Enga chojningame ore: –Ujetiga posõraquei déji uágome yu enga beyoi enga acatecãchoi Faraón ome yu ujetiga pota ga yi iapade údi aja ore uniri Canaán ga yijóchame iji uté to. Chamáñaje yai casica jecucha chijócha yajei údi ica gu ujetiga yi údi aja yai eru casica ga yĩrája eru casica ajei to. Enga iapade chojningame yu ica: "Asi ome baru iyiejájnane ome uyu to jne ga apésu yojningane cucha to jne ome yu." Jecute ajuéchome yu ujetiga yi yai údi aja ojningai casica eruque, enga yacãre gai tiji enga a yimánaja jnumi jne enga yajniápo uacabai to jne rĩ.–

⁶ Enga jé u uje Faraón chudute José uruode udore enga jĩraque chajnai uruode enga chojninga: –Be ga apésu bai ojningane cucha udore. Enga bo údi aja erui uté enga acosa gai tiji.–

⁷ Enga jé u uje José jno dayé údi aja dajei mu que gusu José, uje ujode eduguéjna uje jecucha ore chise Faraón iguíjna cuchábi iji dirode jnese ore nóna José to.

⁸ Enga Jacob jogasui ore nóna José jnese to, ga José nonapo dayade, desai ore jnese. Ga gusu ore gachidode, jé aja ore abode uje ore chácariji ore uniri Gosén.

⁹ Enga jiépisi Egíptogosode ore uje ore nóna José to, enga uñane ore choru buricade, jé basa ga uñane chacája guebéquedatéode. Jecute jiépisi ore iji dajei uje ore nóna José ore aja dajei.

¹⁰ Enga e ore chácare uje ore chise jogadi uje i tu Goren-ha-atad ome ore nanique uje jogadi uté déji tié Jordán dosate uñai. Ga jé u uje ore po jnese iji José dayé ejode iji uté. Enga José ore guejnane dire gare iji yijmanuñai ome dagoyedie iji ore charidi uté.

¹¹ Enga cananéogosode uje pañapísiji egíptogosode ore isocade enga ore tijapúsu ore isocade udore. Enga ore chojningame ore: "A egíptogosode ore jnusipísi darásai uté jõ, jecute jiei dirode uje ore po ejode." Enga ore pésu ore jnusiétigadatéi jogadi uté i ejoi enga ore chĩ́care Abel-mizraím aja to uje uruode qui tu gu "pujnusiétigadatéi chise ore iji uté."

¹² Enga Jacob ujnacarode que ore chimoque dayé ojningane cucha, mu ore pésu ojningane cucha jnese.

¹³ Enga e ore jno údi aja ore uniri Canaán. Enga ore chicha ode taja cucarã́tedó to uje déji Abraham casicaite gaidi jnupe pei to uje i tu Macpéla, uje doi oré tiji hitítagosi Efrón gari nanique ujetiga ape disi ejode gajnepite jne gaidi jnupe pei enga ore chicha dódedie aja jnese to jne. Enga jnumi pei tuté idógosipísiji ateta Mámre nanique iji guedé cacadi yui.

¹⁴ Enga jé u uje José e chimate dayé aja jnumi uje chijóchame, enga nóna dayade, jé aja darasade egíptogose ore, enga ore chajniapója daniri Egípto rĩ.

Uje ore dai topísi nanique enga José uyade ore todópisa gaté rĩ ujetiga jnutaque ome ore

¹⁵ Enga ore dai e topísi nanique enga José uyade ore todópisa gaté rĩ enga ore chojningame ñane: "A jnutaque José jne ome yoque uje yocai casé e topísi gu. Uje a chetaque yoque gu yoquetétiga casodica ome re."

^16-17 Enga ore chiroque datocaidode aja desai ga ore chojningame: "Acatecã́ri yoquesai uté jne enga ósi tome jne: 'Uje yocai casé qué eca diríca enga cho yoquiquique diríca ujetiga yijóchago bajei údi ome yoque ujetiga ca báyipie dépoji yoquetétiga cásodicáite ome ua to rĩ. Bamo gu uje e yicoi yocangureni Dupa adode to, jecute acadígui yoquisoca baja casodica ome ua to jne.'" Mu ore utocaidi e catecã́ri José ome ore uruode quigode, mu José chudute ojñane udore enga popísiji dejode.

¹⁸ Enga udojo quigade ga José uyade ore chisípise, enga ore chichaga dacurutedie aja jnumi iji iquei jnese enga ore chojningame: –Yẽco yógome ua iji de. Be ga o baróguiji yoque jnese to jne.–

¹⁹ Enga José que chuseguipise daruode ome dayade ore enga chojningame ore: –Jé ca atodóyopo yu rĩ, enga ayáyo achacho uacacurutedie aja jnumone iji yiquei. Que Dupade yu gotique ujetiga yajire uacasocade aja quigode gotique. Enga ayáyo uacajnusiétigadatéode ome uaque.

²⁰ Chamáñaje uacáyipiedie quigode gajnarenguipise ome yu nanique uje uaquẽcho yu ome ore nanique enga ore jno yúdi aja de nanique. Mu Dupade e chinoningase cuchade udore jnese enga nóña enga cucha omío iji quigade. Uje Dupade chorei uyu iji Egípto udé nanique ujetiga yátaja ore ome sequeré noñánguenie enga ore chapite gu yu, enga jiei yiquetade iji ore.

²¹ Jecute ayáyopúsu uacasadodéringane ome yu to. Uje a yátaja uaque jne enga a yisi ome cucha pibosode ome uaque, jé aja uacabode ore to jne rĩ.– Enga José isocade u udojo ome dayade ore uje chisi ome daru omone ome ore enga tijode chopo jnángome ore to rĩ, uyade ore.

José guejnanie sequerei e chise 110 nanique uje e topísi to

²² Enga José, uyade, desai uté, jé aja ore iguiosode jnese chácariji Egípto to nanique, enga ore chopise daniri iji uté to. Enga José guejnanie sequerei chise 110 años nanique uje e topísi to.

²³ Mu uje José uté qué eca nanique enga ujnacari uñai Efraín ájnamone e ore abode cuse to nanique enga José qué chimo ore to nanique. Enga José ujnacari uñai Manasés ujnacari Maquir abode e cusapo nanique rĩ, enga José jé chimópise udore ga chorase ujetiga uté abipísode u ore to nanique rĩ.

²⁴ Uje cáma José toi, mu e chapu re nanique enga jé u uje tibidi dayade ore ujetiga catecã́ri ore. Enga ore tibágui desai pijnane, enga jé u uje José catecã́ri ore enga chojningame ore: "E garósi jeta yitoi mu, a Dupade chátaja uaque jne iji yiquigáningo. A chise diri jne ujetiga Dupade chijnimápo uáguiji puniri Egípto udé to rĩ enga chichapo uágaja yocayode jnani bajácho ore gajnei casicaite jnupe rĩ uje Dupade chichagája ore yui nanique jeta ore gajneque nanique. Yojningane jnani bajácho udore u Abraham, Isaac, jé aja yocai casica Jacob ore jnese."

²⁵ Enga chutṍri dayade ore ome re ujetiga ore jno ajnoquéode údi to aja Canaán to ujetiga chise diri ujetiga Dupade chátaja ore enga chijnime ore iji egíptogosode ore jmainie, enga chichapo ore aja ore uniri Canaán to rĩ. Uje chojningame ore: "Asíyo uacaru iyiejájnane ome yu to jne uje qué yiqueca enga boyo yajnoquetígo údi to jeta e boyo iji de."

²⁶ Enga udojo quigade enga José e topísi iji Egípto to. Enga guejnanie sequerei e chise 110 nanique uje e topísi. Enga daijnane ore doi dajmapié ome to enga ore chanire bisidi aja gai to ujetiga ca tarata arione to. Enga jé u uje ore chiro cajón ome enga ore na José aja cajón uté ajei.