Génesis 49 - Dupade Uruode

Uje cáma Jacob toi nanique enga chisi ome daru iyiejájnane ome dajnacarode ore jnese

^1-2 Enga Jacob tibidi dajnacarode uñane ore enga chojningame ore: "Yujnacarode uaque á, ajoso uacai Israel uyu yi te á, enga angachopísi yuru iyiejájnane ome uaque jne ome cucha tocachugode ome uaque to jne:

³ "Rubén á, yape urẽjai tu ua ya, bajneque yuru bajade udojo jne. Ua u uje bajaque ua aja guesi ome yabode ore jnese nanique. Uje qué babasíji yúringai jnacaripise nanique, enga bajnua turásu cucha pacaque a utiedie uje utácai chimate daca utié tuaté aja guesi ga nínapúsu re ome. A jé tiógararása jeta picotaque ua ome yabode ore jnese ome betotiguei, báringárique cuchape ore.

⁴ Mu a ca bajneque cuchade udore jne gu uje bo cucha bisidéguiji yu ica enga basa yacoté yirogue iji yejode ica, enga que toc ujetiga paquĩraque ua ome badode udore ica. Enga bajnui tu guetṍrai ica, uje chejnapise cuchade iji daróbuchai ajesui.

⁵ "Simeón á, Leví á, e uacajnecho yuru ejode udojo to. Sijnanguipise uaque jnese ga jé oyopise ñane jnese ome uacasocárigo.

⁶ Iyiejapise uaquei uje yugúsi uaquejode ome uacájningane uje uacoyo cuchiso sijnángone gu ome uacájningadatéode. Chamáñaje jecucha uacasocabécho gu uje uacajéyo uacojode ayoréo. Uacoyo jnacarode uje ore canare aquirájna choquírique enga ore chatingare guídogoro toc, toc enga ore chimochẽre guídogorodíe enga ore cana damocherãi gai uje cho tatoc, tatoque aja dajesúode.

⁷ Gajnarenguipise uacadode udore. Gajnarenguipise uje que posongaquérique dépisiji uacajénique. Yipésupú ga pisidique uágaja quedéjnane iji uacarasade israélgose ore ujade enga ca cuchadaté uaque to jne jõ.

⁸ "Judá, e bajneque yuru ejode udojo to. Enga jé tiógarapísa báringárique picotaque jne ome bajorane. Enga a ua u jne ujetiga asa bamajosórone potogórodie, enga ajnuépise ore gáyode jnese jne. Enga bajorane a ore tangaripísi ua gu bátedatéode udore jne ome ua.

⁹ Yababi á, Judá, bajnua u caraté ababi uje chujé darosipétique enga quigade enga tagu enga chejna jnese, ga quigade enga mopóji darosipei ejoi te rĩ uje subudéji datigai gai. Enga moji jnumi ga cho caratédatédie ome dadode udore enga que chuseque re iji jnumi. Enga chojningame re: 'Que toc ujetiga punguráña uyu iji de.'

¹⁰ A ãrai bogué tiji gaté jne, enga obiréjna báringai eduguéjna cuchape ome bogué uaté. Enga a ca toc ujetiga pijnimé bogué tuaté iji bajmainie, jé iji bape disi ejode ore jmainie to rĩ, jé aja ujetiga bogué uaté gajnengoripísi di jne enga jé jogate uté jmanai iji deréjna pitade. Enga erámi unirisórone iji erámi údode jnese a ore cho deduguéjna cuchábi iji bogué isasṍri uté jne iji erámi údode jnese enga a ca ore chimoque iroquérique jeta ore dopísi quigode.

¹¹ A uté doi jne enga chigaru dachitique burica quedéjna abi aja erejna cuchátique jne uje erejna uté querupísome dojode erejna. Enga a uté chijose úvadie udire iji erejnai tuté jne, enga otadi iragupúsu udire ajéode enga a yore ore iguidedie gai jne enga cho jetiga ore chẽ́sariji yotique to jne ome cutejmane dotadéjna.

¹² Enga ijõripise uté jne. A edodie nanganata ome jne enga gajnunie u úvadie otadode uje gatípis enga nanganata iji ore jopidi ajei. Enga jé chome patarane to, cómejnapise to, enga gajnui tu ore jotai aquirájna iriso uje cómejnapise to.

¹³ "Zabulón á, a bape disi ejode a ore unirone u yote quedéjnai edógai jne. Enga cuco cuchábode diguiji yote quedéjnai tuté gai enga ore batigai u yote quedéjnai pijnanane to jne ome uaque iji uacaniri yote quedéjnai pijnana ome uaque. Enga uacaniri a chujé raja ore uniri uña eruei jne uje i tu Sidón.

^14-15 "Ísacar á, a bajnui tu burica quedéjnai jne uje ore chigaru dagúchade aja gai enga chijnoque ore ugúchade ome ore. Enga a ca oyo uacaguíjnane iji guiguíjnapísirique jne, mu uacaguíjnane a u uacarósorone gachidode iguíjnane jne, enga uacajnúone u udojo ore jne. Uje a amóño uje ueradéjnapise uacarósorone ore uniri, enga a apótayo jeta oyo uacaniri iji to, jecute ore chisa uaque mu que oyo chimíyimi iji ore jmainie, mu a beyoi ore iroquéode bisideque jne.

¹⁶ "Dan á, a eduguéjna ua to jne iji israélgosode ore uague uña gari.

¹⁷ Enga a bajnui tu ugai jne uje chijno buricai guídogoro, enga chãrai re iji gaté, enga jé u uje jnui ayoré cṍra aja ta enga cho po iji jnumi rĩ."

¹⁸ Enga Jacob qué cha dáringai casecasé ome dajnacarode ore enga qué catecã́ri Dupade ome re enga chojninga: "Yangarádejná, que yiya yangoroné ome bojningai yiquetangore ejo gotique yúode to ome yu to."

¹⁹ Mu e nararápo rĩ ome dajnacarode uñane ore enga chojningame ore: "Gad á, a bape disi ejode umajósõre dipesérigo a chuquéjnai ore jne, e mu a ajócãcho ore iji uaquejode to enga a ajnáñopo ore to jne rĩ.

²⁰ "Aser á, ueradéjnapise jnumi iji baniri to jne, ga ijõripise erámi tiji jne. Enga a jiei uacacatígo cucha iji jne, enga a pipesute arurégode iji cuchade udore jne. Enga uacabosode udore gajnúone u eduguéjnane ore posode úringane ueradéjna jne iji deréjnane jnese.

²¹ "Neftalí á, a ca pujurúgai ua jne, mu bajnua tu erámoro uje chisõre iji erámi enga chicho dore, chicho dore, chicho dore iji erámone, enga uaté abidie ueradéjnapisi to iji erámi.

²² "José á, bajnui tu pore ijoréjnaminie iji tié edógai uje choru ore idai ujuyaquéode iji aja gaté enga ueradéjna aja gaté enga obiréjna iji ta dajogadi ome idaisórone. Enga adie jiépisi iji dajogadi.

²³ Jecucha ga dimane ore ojigode jé aja ore ojodie ome ua ica, enga ore chicho ua gatuaque, enga jecucha ga ore chirote ua gatuaque to rĩ, mu que toc ujeta pujnuéngai ua to ome ore.

²⁴ Chamáñaje etoque ua ome boji, bojodie ore gu ujetiga adota ua aja gatuaque uje ore chirote ua. Yacaranguipísome Jacob uyu yangureni Dupa uje chãraque ua ome ore ojigode, ore ojodie udire. Uje Pujnéngaisṍre yangureni Dupa uté gu. Yacaranguipis uje yoquirodisṍri Dupade cho dachidé áyasa iji israélgosode ore uyoque enga chãraque yoque ome cuchade. Jecute yoco yoquirotangóri iji uté to.

²⁵ José á, bayé angureni Dupa u uje chatapísa cuchade aja ua gatuaque. Enga Dupa Pujnuéngaisṍri tuté u to uje a chatapísa cuchade aja ua to iji baquéningo to jne. Enga uté guẽratígo cucha ueradéjna a tṍraji gaté ome ua to jne. Enga a tṍrapóji yote quedéjnane ajedatéode ome ua to jne rĩ. Enga bape disi ejodie ore icárigui a tṍraji ore to rĩ ome ua ga ore chacucãre dape dipesérigo ore to jne.

²⁶ José á, bamo uje yuru iyiejájnane udojo ome ua suépise yai uru iyiejájnane ome yu uje cho darúja yu nanique. Enga cho ujetiga yuru iyiejájnane udojo chácariji babai iji deréjnane jnese, jé aja ujetiga cucarãte eyúgojmane íjnoque jnese iji erámi. Enga cho ujetiga Dupade ajegaidipise ua iji bayade ore ujade.

²⁷ "Benjamín á, bajnui tu cuchiso sijnátique uje chujé darosipei iji durasé, enga tagu darosipei péode jé aja guedéjnoringái, enga chãraque ejode ome dojode cuchiso ore."

²⁸ Yatatagode udojo u Israel uru iyiejájnane ome dajnacarode ore uje gare ore iji yirídai, enga ore gajnecho udojo nanique. Enga udojo quigade enga israélgosode ore cãra dáguedie ome ñane enga ore uáguedie jé chopise Jacob ujnacarode batigai uje gare ore iji yirídai to, enga ore cho dei iji dayode jnani bajaque ore íode nanique.

Uje Jacob chejna daruode guesi ome dajnacarode ore nanique enga chujépo raja damochápi gai enga jé u uje topísi

^29-32 Enga chise diri uje Jacob tibidápoi dajnacarode ome re gaté rĩ uje e garósi gu jetiga a toi jne. Enga catecã́ri ore ome re enga chojningame ore: "A e yitoi jne. Yipotapísa jetiga achayo yóderaque aja yocajnei jnupe pei uje yáqui casicaite Abraham doi oré tome nanique iji hitítagosi Efrón gari iji puniri Canaán nanique. Yojninga tu cucarã́tedó uaté uje déji ore idai Macpéla dosadode iji ateta tuaté uje i tu Mámre. Chamáñaje yáquide Abraham doi oré tome jnupe pei uté nanique gu ujetiga ape disi ejode uyoque yichago yocódedie aja uté to. Ga ore chijóchame yáqui casicaite Abraham iji cucarã́tedó uaté nanique, jé aja acoté Sára ore ga ore ódedie jogadi chojmára iji uté. Ga jé adi tupome yai casicaite Isaac, acoté Rebéca to rĩ, ore chicha ore ódedie aja uaté jnese to nanique. Jé basa ga yacoté bajé Léa ode dépoji to rĩ, enga yipota jeta yóderaque déji uaté ode ejórique to jne."

³³ Enga Jacob jé niji iji damochápi gai uje catecã́ri dajnacarode ore gu ome dóderaque jogatique to jne. Mu uje e chejna daruode udore aja guesi enga chujépo raja damochápi gai enga jé u uje topísi.