Génesis 48 - Dupade Uruode

Jacob cho darúja José abode nanique uje ore íode u Efraín, Manasés ore

¹ Ga udojo quigade ga ore tibidápoi José gaté rĩ uje ejnarétaque gu dai. Enga jé u uje José nóna dajnacare gatoidie aja dayé uje ore íode u Manasés, Efraín ore.

² Enga jé u uje José di ga ore chingome dayé enga ore chojninga: –Bajnacari José e di é, ga nóna dajnacare gatoidie aja ua yé.– Enga Jacob chojninga: –Yiraja.– Enga jé u uje chungurase re iji damochápi gai enga niji iji damochápi gai ga chácariji gai.

³ Enga catecã́ri dajnacari enga cho dojñame enga chojninga: –Dupa Pujnuéngaisṍri chiqueta raja yu nanique iji ore idai uje i tu Luz nanique iji ore uniri Canaán ajei. Ga Dupa Pujnuéngaisṍri cho darúja yu nanique.

⁴ Enga catecã́ri yu ga chósi tome yu nanique: 'A bape disi ejórigo jiépisi ore jne enga a ore pésu dáguerigui jne ga ore cãra dáguerigui ome ñane jne. Mu a ore cho daniripísi iji puniri Canaán jnese jne. Chamáñaje a yisi ome puniri uté ome bape disi ejórigo jne gu ujetiga ore gajneque uté iji deréjnane jnese.'–

⁵ Enga Jacob qué jno daruode údi rĩ enga chojninga: –José á, bajnacare gatoidie ore jé yajneque ore jnese to enga a yopise yujnacari iji ore to jne enga gajnui tu jeta ore chopise Rubén, Simeón ore to ome yu jne ujetiga ore gajneque yuru iyiejájnane udore to uje yabipísode ore gajnecho. Yojningane u bajnacare bajade Efraín, Manasés ore jnese uje ore basíji yiquei nanique iji Egípto udé uje cáma yico uáguiji de nanique.

⁶ Jé basa ga bape ejode jé bajneque ore. Mu quĩrique ore gajneque yuru iyiejájnane udore to. Chamáñaje Manasés, Efraín qué ore jorane u ore to gu.

⁷ Uje yicoji ore uniri Padan-áram nanique enga yicagóji Canaán yui nanique mu baté Raquel toji ore idai Efráta yuábi nanique. Enga yijóchame baté uaté iji ore idai tuté yuábi iji dajeque pajei nanique. Yojningai ore idai uté u uje ore chécãre i enga i ichai tu Belén.–

⁸ Uje Israel e chimate daruode udore aja guesi ome José enga chojninga: –Bajorane udore, ¿gosode a?–

⁹ Enga José chajnai dayé uruode enga chojninga: –Yujnacarode u ore arĩ́e, uje yocangureni Dupa chisíome ore ome yu iji Egípto udé.– Enga Israel chojningame José: –Be babode ga ajna ore aja gadoi enga yo yurúja ore.–

¹⁰ Enga e choquíjnapise Israel nanique jecute pota jeta José abode ore dépisi ejoi ga chimópise ore iji dejoi, chamáñaje ajirigode e íjnoque gu. Jecute José doi dayé uruode enga chijna dabode aja dayé ejópisi. Enga jé u uje Israel chisa ore ga chijnire ore aja dei enga tagu ore uredie jnese.

¹¹ Enga Israel catecã́ri dajnacari enga chojningame: –Yichaga ua aja togode nanique mu e Dupade chichapo ua aja yari rĩ, enga cháta ua aja babode ore to, enga e yimópise ore to rĩ.–

¹² Enga José abode ore chácariji dáquide etarúdode gai. Mu quigade ga José chisa ore enga chichapo ore aja jnumi rĩ. Enga jé u uje chichaga dacuruté aja jnumi iji dayé iquei.

¹³ Enga jé u uje José niji uje chichaga dacuruté taja jnumi iji dayé iquei enga chisa Efraín bajaque ome dãrachua, jé basa ga chisa Manasés iji quigade ome darasé enga jé u uje jno ore údi aja dayé iquei to. Jecute Efraín chácariji dáquide arasé, jé basa ga Manasés e chácariji dáquide ãrachua.

¹⁴ Mu ore dáqui chimere dajmanecade iji ñane iji ore yui. Jecute chisa José ape ejoi Efraín gatoi ome dãrachua bajaque, jé basa ga chisa José ape bajai Manasés ome darasé.

^15-16 Mu José dayé chisa dájnamone ore gatoidie ga chajo aja jnumone, mu José jé gajnenguipise dayé uru iyiejájnane. Enga narare enga chósi tome daruode ome: "Yipésupú ga Dupade chatapísaja babode udore jne jõ. Yojningai tu yáquide Abraham, jé aja yai Isaac ore angureni Dupa uté uje ore dopísi ojningane cucha jnese nanique. Enga yojningai tuté Dupa u to uje chañurupúsu yio nanique uje yibasíji ité nanique, jé aja dirode udojo to rĩ. Enga yiraja uje gaté unirísõri uté uje chiqueta raja yu nanique icaite enga jé Dupade upúsu to nanique. Enga jé uté upo rĩ uje chãraque yu ome yajnéone cucha dacacho jnese iji erámi tudé. Enga yangurenone u babode udore ore ujetiga ca ore chicadígui yoquíode jne enga yoquíode a pijogúsorone a u ore jne enga a yocape disi ejo gatéode ore jnusina yoquíode to jne ome udore ore. Yojningai tu yi, jé aja yai Isaac i, jé aja yáquide Abraham i to. Enga yipésupú ga babode udore ore ape disi ejode ape disi ejórigo ore quérã iji erámi jne enga jiépisi ore jne jõ."

¹⁷ Mu gajnaréngome José uje dayé chimere dajmanecade iji ñane enga dayé chisa ape ejoi gatoi ome dãrachua. Enga gajnui u gu ujetiga uté gajnenguipise dáquide uru iyiejájnane. Jecute José doi dayé ga chejñurase dayé jmanecade iji ñane enga chujérase ãrachua taja dape urẽjai gatoi gai ujetiga cho dajnéngu dáquide uru iyiejájnane.

¹⁸ Enga chojningame dayé: –Iapá, úngare. Bãrachua déji ejoi gatoi. Écãre bajmanecade quitígo ujetiga asa yape urẽjai gatoi ome bãrachua.–

¹⁹ Mu dayé chetaque enga chojningame José uruode: –Úngare. Jé dóji. Yiraja arĩ́e. Mu yajéode u ujetiga ejoi pijógome bajai uté jne ome ape disi ejórigo ore uatigájnaringo iji erámi jnese, uje a ore cãra dáguedie jogatígo ome ñane jne. A jiei bape bajai atígo, ape disi ejórigo ore to jne arĩ́e, enga a ore uague querújnapise, mu ejoi ga a ape disi ejórigo suépise bajai ape disi ejórigo gáyode jne.–

²⁰ Enga Jacob e chopo darúja dájnamone gaté rĩ enga chojningame ore: –Yipésupú enga israélgosode a ore cho darúja ñane jne enga jecucha ga ore áyipiedie doi uaquéode jne ome ñane jõ. Enga a ore cho darúja ñane enga a ore chojningame ñane jne: 'Yipésupú ga Dupade chatapísaja uaque jõ, enga uacadi a urásu uje chatapísaja Efraín, Manasés ore nanique.'– Enga Israel ĩcaraque bajai tu dájnami ejoi Efraín nanique ome daruode udore nanique.

²¹ Enga Jacob e catecãrápoi dajnacari te rĩ enga chojninga: –José á, bamo uje e garósi ujetiga yitoi. Mu a Dupade chátaja uaque jne iji yiquigade jne enga a ajnésachopo uacayode jnani bajácho ore uniri arode jne rĩ.

²² Enga yeranone udojo yuru iyiejájna ome ua suépise yeranone ome yape uñane ore gajnéone yuru iyiejájnane gáyode. Enga a bajneque puniri Siquem jne. Bamo gu uje yujnuéngo amorréogosode nanique iji ore uniri Siquem uté uje yipéco pocaningai ome ore nanique. Enga yijna yõrachade to nanique uje yicoi ore.–