Génesis 47 - Dupade Uruode

¹ Enga jé u uje José chajni to enga e chicáji Faraón yui jeta cho dojñame. Enga chatatame Faraón uje dayé, dayade e ore jnopísiji daniri Canaán enga e ore chise ore uniri pei Gosén. Enga chingome uje ore nóna dachidode aja to, áyasadie, jé aja aquirájnanie.

² Enga José ajegaidode chejna yijmanai iji dayade ore ujetiga ore nóna aja Faraón to. Enga pota gu ujetiga Faraón chimo ore to ga chiraja ore.

³ Enga jé u uje Faraón jé catecã́ri José uyade ore enga chojningame ore: –¿Ama uacasatique cucha pisaque jé gotíguiji de jne, yocuniri?– Enga José uyade ore chajnai Faraón uruode enga ore chojninga: –Yoqueduguéjná, cachi yoquisai jé u yoca cásodicáite ore isai cucha pisaque to arĩ́e, uje ore isai cucha pisaque u áyasadie nanique.

⁴ Yoqueduguéjná, yicagóji de gu uje chaguhéode socaripísome ore iji yocuniri Canaán údode jnese. Enga íjnongapo yocachidedie cucha posode to rĩ. Jetiga apota enga yácagoji uacaniri pei to uje i tu Gosén enga a yoco yocuniri iji uté jne.–

⁵ Enga Faraón e catecã́ri José enga chojninga: –Yimo uje bayé, bayade ore di iji de gu uje ore gaidi tu ua iji de, yocuniri udé.

⁶ José, e yingome ua ica jetiga bajneque yocuniri Egípto údode jnese ica. Jecute be bajéningo ome baguiosode ore. Bamo uje ueradéjnapise yocuniri pei uté Gosén, uje tiedie chiramísara ñane iji uté gu ga ueradipise ome ore gachidode cucha. Jé arec ujeta ore cho daniri iji uté.– Enga Faraón qué catecãrápoi José rĩ enga chojninga: –Acué jnaníringo iji baguiosode ujade jeta chaguesi ore enga ore jno yachidedie aquirájna uñanie údi to enga ore chajire udire yúode to iji Gosén.–

⁷ Enga udojo quigade enga José jnopo dai údi to rĩ ujetiga chingongara uté aja ore eduguéjnai Faraón to rĩ. Enga Jacob que chuseque re ome Faraón yui enga chojningame uté: "Yajéode u ujetiga bajneque Dupade acacáninga omone to."

⁸ Enga Faraón catecã́ri Jacob enga chojninga: –¿Cho rique bejnáringui sequerei iji batigárique?–

⁹ Enga Jacob chajnai Faraón uruode enga chojninga: –Yejnanie sequerei garósi, gusu chise 130. Jé basa ga yayode icaite ore guejnanie sequerei chãraja yejnanie sequerei udire. Jecucha ga yecãco yoquijogadode, yoquijogadode, yoquijogadode gatuaque iji erámi enga que yoquijogatique chojmára. Enga cucha dacate gajnaréngone jecucha chise yu iji yucuecaringuei udé, ga que ueradipise yadode gotique.–

¹⁰ Mu udojo quigade ga Jacob e chacacãrápo Faraón rĩ uje chojninga: –¡Yipésupú ga Dupade chatapísaja ua jne jõ!– Enga jé u uje Jacob jnoji ore eduguéjnai uté gari.

¹¹ Enga jé u nanique uje José chisi ome uraque daniri Egípto pei ome dayade ore uje i tu Gosén. Enga José dayé, dayade ore pésu dapáringane iji ore idai Ramsés ejode gaté rĩ iji puniri Gosén uté. Enga ueradipísome ore gachidode cuchiso uje tiedie chiramísara ñane iji gu.

¹² Enga José jecucha chisi ome cucha pibosode ome dayade jogasúode ore, chojmara, chojmarane jnese, ujetiga jé ca cuchárique chonapo uñeque jogasúrique rĩ.

José pésu dáyipiedie nanique ome egíptogosode enga que toc ujetiga uñeque chumuchase áyipieraque

¹³ Mu chise diri uje e íjnonguipíse ore posode iji punirone Canaán, Egípto ore jnese. Enga chiborátaja uje serẽrachugode jiépisi iji punirone udore jnese, uje ore chejnáreque dayaguhéode.

¹⁴ Enga José e chejna ore iplátadie uje jecucha ore doi trígoi iji José ica gu. Enga José e chimáta ore ipláta casidica iji Faraón iguíjnai enga Faraón e gajnei jnese.

¹⁵ Mu uje e íjnonguipíse ore iplátadie iji Canaán, Egípto ore, mu egíptogosode ore chicáji José enga ore chojningame: –Asi ome trígoi ome yoque ga yajo to. ¿Ama ca gajnaréngome ua to jne jeta yitogopísi jne ome chaguhéode uje yoquiplátadie íjnonguipíse gu a?–

¹⁶ Mu José chajnai ore uruode ome re enga chojninga: –Beyoi uacachidode cucha enga ẽchome yu ome trígoi ujetiga acho ome ore oredie to.–

¹⁷ Enga sequeré chojmara nanique uje ore tẽra dachidode cucha gatuaque iji sequeré chojmara iji José, enga ore tagu trígoi ome dachidode oredie. Enga ore di buricade údi iji José, jé aja áyasadie, jé aja aquirájnanie, jé aja burica quedéjnane ore. Enga ore chejna dachidode jnese aja José ore.

¹⁸ Mu chise sequeré uña nanique rĩ enga e ore tibágapoi José ome raque rĩ jeta ore catecãrápoi rĩ. Enga ore chojningame: –José á, ¿ama jé yoco ringome yoque jne? Uje e íjnoque yocachidode cucha, jé aja yoquiplátadie ore rĩ. Ga e gusu yocajnéone jnupe péode, jé aja yocaoi ore.

¹⁹ José á, bepoi oré tome yocajnéone jnumi pecho rĩ, jé aja uyoque to. Enga a yajo trígoi ome yocoredie to. Enga a ca yitogoi bisideque ome chaguhéode. Enga Faraón a cho daróguiji yoque jne, jé basa ga cho dajnenguíji yocajnéone jnupe péode to jne rĩ. Enga asíñome yoquijonatígo ome yoque to jne enga a yacágo yoquijonatígo iji yocajné casodica jnumío gaté jne rĩ. Gajnareque gu ujetiga déji sona bisideque. Mu yijóchago bajei údi ujetiga ca asi ome yógome pitoringai, enga jé ca yocajnéone jnupe déji sona bisideque.–

²⁰ Enga jé u uje José doi oré tome ore gajnéone jnupe péode jnese iji Egípto údode jnese. Enga e Faraón cho dajnéngu udore jnese. Chamáñaje chaguhéode chejnapise ore jnese gu ga que ore cájnarupo dajnéone cucha rĩ ome Faraón.

²¹ Mu que gusu ore gajnéone jnupe péode, mu jé u egíptogosode ore jnese ga ore tẽra rágome Faraón jnese, enga e cho daróguiji ore ga ore tagu doredie.

²² Enga gusu sacerdóteode ore jnese uje ore chacate darasade ome guedé edo adode uje que ore tẽra dajnéone jnupe péode to. Chamáñaje ore tagu Faraón gueranone cucha pibose bisideque gu enga que chaguhéode socárome ore to. Jecute José que doi oré tome ore gajnéone jnupe péode to.

²³ Enga jé u uje José catecã́ri Egíptogosode ore enga chojninga: –Eduguéjna cuchábi Faraón e gajneque uaque, jé basa ga e gajnengápo uacajnéone jnupe péode rĩ. E uacacho uacoredie gu, jé aja uacajnéone jnupe oredie to rĩ. Mu cajicho to uje e yisi ome uacajonane ome uaque bisideque jne.

²⁴ Acáyo, mu ujetiga e aráño árigo jne mu asecãcho bólsarigui to jne iji enga gagájniringui jogate uacari to jne, mu jé basa ga asíñome bólsa chojmara ome Faraón jnese ujetiga cho dajnenguíji to iji uaque jnese iji sequeredie údode jnese. Mu bólsa gagájninie, acho uñáringui petígo to jne, jé basa ga arochope sequeré ejo yui ome bólsa uñáringui rĩ ujetiga acayópo to jne rĩ.–

²⁵ Enga jé u nanique uje egíptogosode ore chajnai José uruode enga ore chojninga: –Caniranguipise ua ome yoque. Enga a yiquecágo gu cutejmai báyuquetotiguejná jne. Enga a Faraón isaque yoque jne enga jecucha ga yójigo gatéode jne ome yoquisatígo cucha pisacho ome yoqueduguéjnai Faraón uté jne.–

²⁶ Enga José áyipiedie udire e purusãrai bajaque ica enga que toc ujetiga uñeque qué chumuchase áyipieraque. Enga áyipiedie udire u ica ujetiga ore chisi ome dabólsa chojmara, chojmaranie ome Faraón ga gajnei, jé basa ga ore ibólsa gagájninie jé jogate ore gari gaté. Enga José áyipiedie udire jé jogate iji Egípto iji deréjnane udojo to. Mu gusu sacerdóteode ore uje ore chacate darasade ome guedé edo adode uje que ore tẽrája Faraón ome dẽratique cucha. Chamáñaje que ore tẽra dajnéone jnupe péode ome José nanique gu ujetiga Faraón cho dajnenguíji udore to.

Jacob chijócha José ajei údi ujetiga toi enga ca chijóchame iji puniri Egípto jne

²⁷ Enga israélgosode que ore jnopo iji puniri Egípto uté rĩ, mu ore chácariji peque uñai uje i tu Gosén. Enga ore quérã iji uté enga jiépisi ore iji nanique.

²⁸ Mu que Jacob toi míraque nanique iji Egípto mu qué sequeredie chejna yijmanáyone ga gare iji yirídai uñai uje topísi iji Egípto. Enga guejnanie sequeré chise 147 nanique uje topísi to nanique.

²⁹ Mu chise diri nanique uje Jacob uje i uñai u Israel e chapu re nanique uje chiraja gu uje a topísi jne. Enga jé u uje tibidi dajnacari José nanique. Enga catecã́ri enga chojningame: –José á, be enga asa yetarúdi tajíringai enga ãráji gaté enga ãrarare jne enga asi ome baru iyiejájnane ome yu jne enga be enga bepísi yojningane cucha jne. Ujetiga e yitoi enga ca ajóchame yu iji puniri Egípto udé.

³⁰ Bamo to nanique arĩ́e uje ore chijóchame yai, jé aja yáqui casicaite rĩ iji yocuniri casica Canaán, ga ore ódedie jé chojmarápise nanique. Jecute boyo yúdi aja ore jogadi to enga achayo yóderaque aja ore ódedie gai to jne iji ore ódedie jogadi.– Enga José chajnai dayé uruode nanique enga chojninga: –Ejẽ́, arĩ́e. Yipésu bajegaidode cucha jne.–

³¹ Mu José dayé chojninga: –Mu jé be ga asi ome baru iyiejájnane ome yu jne, jeta yiraja baru ũrepísode udore to jne.– Enga jé u uje José chajnai dayé uruode enga chojninga: –Bajneque yuru iyiejájnane udojo. A yi baruode jne enga a yiji bádi jne aja bojningai báqui, bayé ore ódedie jogadi ujetiga yicha bóderaque aja ore ódedie jogadi to.– Ga jec u uje Israel chudute José uruode udore enga chijnime dajñari enga tijode jé cho jnángome ujnacari uruode. Quigade ga cho darosate iji damochápi gai enga chorei datodé iji jnumi yui and chacãre Dupade gai te rĩ.