Génesis 46 - Dupade Uruode

Uje Jacob chudute dajnacari José ujnomei uje qué eca nanique enga jĩraque pésu dagúchade aja ñane enga jé u uje ore jno ga ore chicáji Egípto

¹ Enga jé u uje Jacob uje i uñai u Israel quejname dagúchade uje pésu aja ñane enga e ore chimate dagúchade jnese enga jé u uje ore jno. Enga uje e ore chise Beerséba enga Israel e tẽrája dai Isaac angureni Dupa ome degode cuchiso.

² Enga e ore mo enga Israel uté urigode chiqueta raja. Enga Dupade tibidi enga chĩ́care i bajai aja enga chojninga: "¡Jacob á!" Enga Jacob chajnai ga chojninga: –Yugúsi de é.–

³ Enga Dupade catecã́ri Jacob enga chojningame: –Bayé angureni Dupa uyu uje yicatecã́ri ua iji de. Enga ca atodo jetiga acáji Egípto. Enga a bape disi ejode quérãpísiji Egípto jne enga jiépisi ore iji jne.

⁴ A yijína ua aja Egípto jne. Mu a chise dínique jne jetiga yijnime bape disi ejórigo ore iji egíptogosode jmainie. Mu a atoji uté mu bajnacari José a déji bejoi iji uté ujetiga e atopísi.–

⁵ Udojo quigade enga e ore jnoji Beerséba. Enga Israel ujnacarode, ore dai, ore acotedie, ore ababode ore píode u guebéquedatéode uje Faraón guẽracho ome ore ica.

⁶ Uje ore cho daniri iji Canaán nanique enga ore chimáta dachidedie aquirájna, áyasa ore aja ñane ga jiépisi ore imátadie. Uje ore jnome Egípto enga ore nóna dachidode udore aja jnese.

⁷ Enga Jacob ujnacarode, urodie, ájnamone, ájnamenie ore íjnongaja doi jnese.

⁸ A qué yatataba israélgosode ore íode jne uje ore nóna Jacob aja ajesui ica uje e chicáji Egípto yui nanique. Yojningane u uté ape disi ejode ore íode. Enga u udojo: Jacob ujnacare bajai Rubén déji to nanique.

⁹ Enga Rubén uté ujnacarode déji to uje ore íode u: Hanoc, Falú, Hezrón, Cármi ore.

¹⁰ Jé basa ga Simeón ujnacarode ore déji to rĩ uje ore íode upo udojo rĩ: Jemuel, Jamín, Ohad, Jaquín, Zohar, Saúl ore. Enga cananéagoto Saúl uté daté nanique.

¹¹ Enga Leví ujnacarode ore déji to uje ujnacarode udore ore íode u udojo: Gersón, Coat, Merári ore.

¹² Enga Judá ujnacarode ore íode u udojo to: Er, Onán, Séla, Fáres, Zára ore. (Mu Judá ape bajade Er, Onán ore e ore topísi nanique iji ore uniri Canaán jecute que ore déji to uje Jacob ore jnome Egípto yui.) Enga Judá ujnacari Fáres abode déji to uje ore íode u udojo: Hezrón, Hamul ore.

¹³ Ísacar ujnacarode ore déji to uje ujnacarode udore ore íode u udojo: Tóla, Fúa, Job, Simrón ore.

¹⁴ Zabulón ujnacarode ore déji to uje ujnacarode udore ore íode u udojo: Sered, Elón, Jahleel ore.

¹⁵ Enga yatataque bajade udore ore daté jé chojmára jnese nanique enga Jacob acoté bajé Léa u nanique ore datépise. Enga ore batigai u ore uniri Padan-áram jnese nanique. Enga ore nero Dína jé batigai upo uté to nanique rĩ. Enga uje pisecarãte Léa uaté ape disi ejode, diyoquíode, diyequedíe ore aja ñane enga e chise 33 ore nanique.

¹⁶ Enga Gad ujnacarode ore dépoji to nanique rĩ uje ujnacarode udore ore íode u udojo nanique: Zifión, Hagui, Ezbón, Súni, Eri, Arodi, Areli ore.

¹⁷ Enga Áser ujnacarode ore dépoji to nanique rĩ enga ujnacarode udore ore íode u udojo nanique: Ímna, Isúa, Isúi, Bería, ore. Enga ore nero cuse to ga uaté i tu Séra. Enga Bería abode cuse to nanique uje ore déji ore to enga ore íode u udojo: Heber, Malquiel ore.

¹⁸ Enga yatataque ejode udore ore daté jé chojmára to jnese nanique enga Jacob acoté Zílpa u ore daté nanique uje Jacob acoté Léa irogué tu uaté nanique uje Léa dai Labán guerané uaté tome Léa nanique uje quene chisa dabai nanique. Uje yisecãco Zílpa uaté ape disi ejode enga ore chise 16 ore jnese.

¹⁹ Enga Jacob acoté Raquel abode gare nanique enga José u uñai, jé basa ga Benjamín u uñai.

²⁰ Enga José abode gare iji dacoté Asenat gari nanique. Enga ore íode u Manasés, Efraín ore. Enga ore batigai u Egípto jnese. Enga ore daté Asenat u óngosode ore angaráni Potiféra uro nanique uje uaté dai u nanique uje chacate ore ome guedé adode uje ore angurené u guedé edo nanique.

²¹ Enga Benjamín ujnacarode ore déji to uje ujnacarode udore ore íode u udojo to nanique: Béla, Béquer, Asbel, Géra, Naamán, Éhi, Ros, Mupim, Hupim, Ard ore.

²² Enga Jacob acoté Raquel ape disi ejode u yatataque ejode udojo jnese, enga yisecãco ore enga ore chise 14 jnese.

²³ Enga Dan ujnacari ore déji to enga ujnacari uté i tu Husim.

²⁴ Enga Neftalí ujnacarode ore déji to enga ujnacarode udore ore íode u udojo: Jahzeel, Gúni, Jezer, Silem ore.

²⁵ Enga yatataque ejode udore ore daté u Jacob acoté Bílha jnese nanique. Enga Raquel dai Labán guerané tu uaté ome Raquel nanique uje quene chisa dabai nanique. Uje yisecãco Bílha uaté ape disi ejode enga ore chise 7 jnese.

²⁶ Enga yatatagode udojo ore jnese ore chise 66 jnese uje ore nóna Jacob aja Egípto yui nanique iji taningai enga Jacob ape disi ejode u ore jnese. Mu que yatatago ore acotedie íode to enga que yisecãco ore to.

²⁷ Enga José abode gare ore nanique enga ore batigai u Egípto jnese nanique. Jecute uje Jacob e ore cháta raja José ore iji Egípto enga jé u uje ore chise 70 nanique.

²⁸ Enga jé u uje Jacob chiroque dajnacari Judá aja doi ujetiga bajagája ore iquei. Enga chojninga: "Bo ga acáji José ga chachai yoque jne enga a yutuãjóji yocunire uñai uje i tu Gosén uje déji Egípto ajéjonguei." Enga Jacob e ore chise dojningai danire uña.

²⁹ Ga José chudute ore ujnomei uje e idógosi ore iji ore unire uñai enga chiroque darógode ore aja guebéquedatéi ujetiga José choru uñeque ga jé chachai dayé ore. Enga chise ore enga jé u uje doi jnumi iji doruti guebéquedatéi enga chachẽre dayé ga chisa pajei taja re, enga chujé raja dayé naránucadói enga popise.

³⁰ Mu iyajmac uje José, dayé Israel ore chisa ñane pajéode aja ñane ga jé Israel narare enga chojninga: –Yababi á, e yimópise ua ome yedodie to uje qué baquecapise. Enga a e yitorási mu jé arégome yu uje e íjnoque yujnusiétigai uje yimongopise ñane gu.–

³¹ Enga jé u uje José chimáta dayé, dayade, jé aja ore abode aja ñane jnese enga catecã́ri ore enga cho quique ore bajaque enga chojningame ore: –A yiji bajaque jne enga a yicatecã́ri yeduguéjnai Faraón bajaque jne ome uaque. Enga a yingome uté jne uje e uacaríño iji de, uje uacórañoji Canaán diríca. Enga a yingome uje e yipota ujetiga yai, jogasui ore jnese ore cho daniri iji Egípto udé to ujetiga idógosi ore iji yu to.

³² Enga a yingo uacasatígo cucha pisacho aja uté to jne. Enga a yojningame jne: "Ore isai cucha pisaque jé u ore gachidedie áyasai, jé aja aquirájnanie ore to, enga ore nóna dachidedie udire jnese, jé aja uje ore chijnoque dagúchade uñane jnese."

³³ Enga yeduguéjnai Faraón a tibidi uaque jne enga a catecã́ri uágome uacasatique cucha pisaque jne iji uté, yocuniri udé.

³⁴ Enga ojnichome uté jne: "Cachi jé yoquisai cucha pisaque u yoca cásodicáite ore isai cucha pisaque arĩ́e uje ore irodedie u dachidedie áyasai nanique, jé aja aquirájnanie to rĩ. Jé iji yocúringai disi ga yajico yocachidedie udire yúode gatuaque, enga jé chuságaja dirode unojo to." Ujetiga baruode quigode jé u udore ome yeduguéjnai, enga uté a chiroque uágaja puniri Egípto peque uñai udé uje i tu Gosén, ujetiga ácayoji de enga arocho uacachidedie pojójnai iji udé. A uté cãra uacajogadi ome egíptogosode jogadi gu uje puyáguipísome egíptogosode ore ujetiga ore cháta rágaja áyasadie irodisóningo ore.–