Génesis 45 - Dupade Uruode

Uje José chingo raja dayade, desai ore enga chajuguipise ore agutedie jnese

¹ Enga José chudute Judá uruode udore enga que pógupo re rĩ ome dayade ore. Mu chejnapúsu daruode enga chojningame darógode: "¡Boyóji yoquejode jnese! Ga gusúpusu jnanione udore iji yejode jne." Enga jec u uje e ore jno jnese enga jé u uje José chingo raja dayade ore.

² Enga jé u uje José popísiji dejode. Ga irógode chudute agoyedie iji quedéjnai ga ore jno ga ore chingo Faraón ome José agoyedie.

³ Ga José catecã́ri dayade ga chojningame ore: –Cachi uaquesa casicaite José uyu arĩ́e. ¿Ama jé ũrepise enga yai qué eca ya?– Mu José uruode chajuguipise uyade agutedie jnese. Enga que ore chajnai José uruode míraque. Enga cho jetiga jé ca ũrepise eduguéjnai uruode ome ore.

⁴ Enga José catecãrápoi dayade ore rĩ enga chojninga: –Beyoi ga ajoso gadoi.– Enga uje e ore chose José yui enga José chojningame ore: –Uaquesa casica uyu, uje uacabeyoi oré tome yu ica, enga ore jno yúdi aja Egípto udé ica.

⁵ Mu ca oyópo uacáyugu uaque jne rĩ uje uaquẽcho yu bisideque ica ome ore. Uje a Dupade ajéode u ome yu ica ujetiga yugúsi de, enga yiqueta uágome chaguhéode to. Mu que gusu uaque, mu jé u ayoréode ore jnese iji yoquirosadode.

⁶ Sequeredie e gare iji de uje chaguhéode socárome ore, mu amirenie chejna yijmanai jeta ore chaca cuchade mu ca árigo cuse gatuaque.

⁷ Cho ujetiga Dupade chiroque yu aja uacaquei iji de ica ujetiga cucha pibosode déji de iji uacaquei. Jecute Dupade pota gu jeta chiqueta uaque enga chiquetápo uacape disi ejórigo ore to rĩ, ujetiga uru iyiejájnane jnese tocade ome ore. Jecute Dupade ajéode u jeta bajaque yu aja uacaquei ica. Enga cuchadaté ipesudode udore.

⁸ Jecute uacasoca casodica que u gotique uje yugúsi de, mu Dupade a jé ichajapite yu aja de ica. Enga Dupade ipesute to uje Faraón cho dangaráni iji yu to ome re. Enga juéga daguíjnai ome yu, jé aja daniri ore jnese ome yu ujeta yañuru guio. Enga egíptogosode e ore cho deduguéjnai iji yu to iji daniri.

⁹ Enga boyo ¡bu! ga acayoi yocai enga eso enga ojnichome: "Babi José qué eca enga egíptogosode e ore cho deduguéjnai iji. Enga chojningame ua: 'Bo ¡bu! ga abágui to. Uje yipotapísa jeta yimo ua.

¹⁰ Jetiga ese de enga a yisi ome puniri ome ua jne uje i tu Gosén, enga a apáyoji jne iji deréjnane jnese. Enga ajína babode, bacotedie, bájnamone, jé aja bachidode ore jnese. Chamáñaje yojningai Gosén idógosiji yu, ga a yimo uáguiji yejode gatuaque jne.

¹¹ Ujetiga e agúsoji de enga a jecucha acho yẽratígo cucha piboso jne ome uaque, jé aja uacabode, jé aja uacarógode ore jnese. Enga a jé ca cuchárique chonapo uaque jne rĩ iji de yari. Chamáñaje cáma yico chaguhéode eruénique gu, mu sequeredie amirenie qué chejna yijmanai uje socárome ore iji yocuniri dosadode."

¹² E uacadúcho yuruode udore jnese, Benjamín uhuaque jnese. Jecute ujetiga yocai chotigase uacaruode ome yúringai ueca jne, enga ajóyo uágaja uje qué yiquecapise, enga yuru yuruode udojo uje yibijnángaidí tu yai, uaque.

¹³ Enga angoñome yimenuringuei ome yocai jne uje egíptogosode ore cho deduguéjnapísi iji yu jnese iji de. Enga angoñome cucha dacadode jnese uje uacamóñopise ome uaquedodie iji de. Mu boyo ¡bu! ga beyobi yai ga yimope to iji de.–

¹⁴ Enga José chejna daruode guesi enga chisa Benjamín pajei taja re enga Benjamín chisa pajei taja re to rĩ. Enga ore popise iji ñane ejode.

¹⁵ Enga jé u uje José dopoi dayade ore rĩ enga chisapo ore pajéode aja re to enga tagu ore uredie enga popise to iji ore ejode. Enga ore chiraja uje José jé upúsu ga quene ore narare jnese uje ore chiraja ijnoraquei tome ore gu.

¹⁶ Enga jé u uje José uyade ujnomei chise Faraón iguíjnai jogosórone ore jnese. Enga jé u uje Faraón, ujode eduguéjna ore nína raque jnese uje José uyade ore chise, ome ore ujnomei.

^17-18 Enga jé u uje Faraón tibidi José nanique ujetiga ore catecã́ri ñane enga chojningame: –Angome bayade ujetiga ore chigaru dagúchade aja dachidode burica quedéjna enga ore jno, ga ore chicáji dai. Enga ore doi dai, dacotedie, dabode ore enga ore chijna ore aja de ga yimóngo ore to. Enga a yisi ome punire uñéngo ome ore jne ujetiga suépise punire uñane gáyode jnese ujetiga ore chirote dachidode cucha iji uté. Enga a ca yujuséjo ore jne ome ore pose uneréjnane jne iji udé yocuniri.

¹⁹ Enga asi ome guebéquedatéode ome ore ujetiga ore choru ga ore acotedie, ore abode, ore dai ore chacája to jne jeta ore chajniápo aja de jne rĩ.

²⁰ Ga angome ore ujeta ca ore cho dáyugu rágome dagúchade jeta ore noñome ore iji to. Uje e dimane ore gajnéone iji de gu enga suépise yocurasapísode ore ugúchade gáyode jne ome úringane ueradéjnapíso.–

²¹ Jecute Israel ujnacarode ore, ore tangaripísi dajnéone Faraón uruode ome raque enga ore dopísi uruode quigode. Enga jé u uje José chisi ome guebéquedatéode ome ore, jé aja cucha pibosode rĩ ujetiga ore tagu aja dajesúode.

²² Enga chisi ome ore iguidé ichadie ome ore jnese jeta ore chécãre daguidedie aja dajéode. Mu doi datéringane ome Benjamín uje cháta deranone aja daplátadie uje chise 300 iji pláta guebéode. Enga gueranenie chejna yijmanai ome desábabi iguidedie.

²³ Enga chisi ome deranone cucha uñane ome uraque dai to. Enga burica quedéjnane uje chejna yijmanáyone u uje ore chigaru José gueranone cucha aja gáyode enga chijnóngome dai. Enga ueradéjnapise gueranone udore cucha ome uraque dai uje ore ipesucho iji Egípto ga ueradéjnapiso. Mu chatapója burica quedéjna uñane rĩ uje chejnapo yijmanáyone rĩ ujetiga chijnoque trígoi, jé aja arurégode, jé aja cucha pibosode uñane to ujetiga ca cucha pibotique chona dai aja dajei.

²⁴ Enga e ore jno ga José catecã́ri dayade enga chojninga: –Boyo ga oyo parácho ome ñane aja uacajesui enga jé ca uacajénique dotárome ñane jne iji datã.– Enga jé u uje ore jno.

²⁵ Enga ore jnoji Egípto enga ore chise Canaán uje ore dai Jacob, ore apáringaméi déji.

²⁶ Enga jé u uje ore chingome José aja Jacob uje qué eca to. Enga ore chingome dai uje ore catecãraini eduguéjna casé jé u José, enga egíptogosode e ore eduguéjnai upúsu. Enga ore dai chudute ore ojñane mu chorase ujetiga ca ũrepise ore ojñane ome, enga jé u uje cho paraque enga que narare iji ore jmainie. Chamáñaje ore ojñane chajuque uté aguté gu.

²⁷ Mu e ore chingopísa José uruode ome uraque dai, enga ore chojninga: "José gueranone u cuchade udore, burica quedéjnane jnungórone udore cucha ome ua, jé aja guebéquedatéode ore rĩ." Enga quene Jacob changureta ore uruode ome re, enga quene nínapúsu re, enga chóji gaté ome doi jeta e jno.

²⁸ Enga qué Jacob narare enga chojninga: "Que yipota cucha uñeque. Gusu yipotigádi tu yujnacari ujnomei uje qué ecáji dínique. Boyo ga yico ga yajirape to uje cáma yitoi."