Génesis 44 - Dupade Uruode

José chiroque darógode ujetiga ore chicháji dajópidi aja desaque ejopísi ibólsa ajei uje ore chajni to aja daniri rĩ nanique

¹ Mu udojo quigade enga José uyade e ore chajnírase aja daniri enga José catecã́ri daroguipísi enga chojningame: –Be ore ibólsadie enga ãra trígo aja ore ibólsadie enga ãretapise, enga ãrapo ore iplátadie aja ore ibólsadie pijnanone ajéode.

² Mu ujetiga e ãreta ore ibólsadie jnese, enga be ore desaque ejopísi ibólsa to jne enga acháji yijopite oreránguejnai tudé jne aja ore desaque ejopísi ibólsa ajei, enga atire uté iplátadie gai jne enga yijópidi jé dóji ibólsa ajei jne.– Enga jé u uje José iroguipísi dopísi José uruode.

³ Enga e dire enga qué durasepise uje José juéga ome dayade ore ujetiga ore jno ga ore chajni aja daniri. Enga jé u uje ore chigaru dagúchade aja dachidode burica quedéjna gáyode enga ore jnome dajesui.

⁴ Enga e ore jno mu qué idógosi ore iji José ore idai. Enga José catecã́ri daroguipísi enga chojninga: –Be ga ajna ore. Ujetiga ese ore enga acatecã́ri ore enga ojninga: '¿Ama ca yirósõri chijnóra uaque ga adode ueradipísome uaque diríca? Jecute ¿gotique gu a uje uacaboyo ga uacoriayo jopite oreránguejnai aja uacajesui?

⁵ Ca arajáyo uje que cucha iyieque yirósõri jopidíringai tuté. Uje jecucha chóji cuchade aja uté, mu que gusu uje chóji dajódode cucha iji mu jé jõrai tu to uje chajire ajei ga toji gai enga chimo cucha piqueminórone iji ajei enga chiraja cuchade gu uté. Enga a oyopise uacaba uacoidi tuté jne.'–

⁶ Enga jé u uje José iroguipísi chise ore enga chingopísa José uruode aja ore enga José uruode jé upúsu atatagode ome ore.

⁷ Mu jĩraque ore chajnai José iroguipísi uruode enga ore chojninga: –¿Gotique gu a uje uacaguhétayo poriquéode yoquibai? ¡Uje jnani paraque yoque mu! ¡Ga que yoriago cuchárique gotique to!–

⁸ Enga ore jno daruode údi gaté ga ore chojninga: –Cachi bamo arĩ́e uje idája yocuniri Canaán ome uacaniri, mu qué yatiregópo yoquiplátadie uacabai que rĩ uje yico iji yoquibólsadie ajéode. ¿Ma yoriagórasa barósõri ugúcha oreránguejnarique ujetiga pipesudi iji óroraque, jeoga plátaraque?

⁹ Be enga ase yocugúchade ome barósõri jopite oreránguejnai gotique. Enga esíji yocuñeque ugúcharique jne enga ajépise uté gosi jne, jé basa ga asayo yoque enga oyo uacaróguiji yoque bisideque jne.–

¹⁰ Enga José iroguipísi chajnai ore uruode enga chojninga: –Ejẽ́. Ujetiga yise yirósõri jopidi iji uacuñeque ugúcharigo enga a yoquisai tu gosi jne enga yoco yoquiróguiji uté gosi jne. Jé basa ga uje déji gosi ugúcharique enga chácare, jé jorane ore jno enga ore chajni jnese aja ore uniri. Enga gusu uté jeta chácare iji de yocari.–

¹¹ Enga jé u uje ore doi dabólsadie iji dachidode burica quedéjna gáyode, enga ore chicháji jnumone enga ore chejñu dabólsadie pijnanone gáyode jnese.

¹² Enga jé u uje José iroguipísi ajirique bajai u urẽjai bólsa ajei bajac. Quigade ga dopoi uté quigaminóri ibólsa enga chajirápo ajei to rĩ, enga jé ate uje dopoi quigaminórone gatéode ibólsadie, enga chajire ore ibólsadie ajéode jnese. Quigade ga ejópise ore desai Benjamín ibólsa, enga chajire ajei to. Enga jé u uje chise José jopite oreránguejnai iji ore desai ibólsa ajei.

¹³ Enga Benjamín uyade ore chimo uje José jopite oreránguejnai déji ore desai Benjamín bólsa ajei enga ore chisa daguidedie jnese iji dabáyode ga ore chajningarase iji dabáyode, enga gajnui tu uje que ore chiraja dajnusiétigai quitique ome raque gu. Enga jé u uje ore chigaru dagúchade aja dachidode burica quedéjna gáyode enga ore chajniápo aja José, oridai te rĩ.

¹⁴ Enga Judá, jorane ore chise José iguíjnai, mu qué déji daguíjnai ajei. Enga jé u uje ore chichaga dacurutedie aja jnumi iji José iquei jnese.

¹⁵ Mu qué ore déji gai uje ore chichaga dacurutedie aja jnumone enga José catecã́ri ore enga chojninga: –Daijna cuchape yu ga ¿jé ca arajáyo a uje cuchade choqui guesode ome yu jnese ga yirajapise uacapesudode cucha?–

¹⁶ Enga Judá chajnai uruode enga chojninga: –Que yirajágo yoquisocáringome yoque jeta yĩraraco yoquibai ome ua. A ca toque jeta pangarate yoque ome yocúringane ũréo, chamáñaje bajópidi déji yocugúchade gu. Mu yoquisijnaringuédatéi cuse to uje Dupade chiraja enga cho ujetiga e cho dajuñame yoque to ome uté iji baquei. Be ga o baróguiji yoque bisideque, enga yoquijõrai tuté jé nóna yoque to jne uje piyaque bajópidi iji ibólsa ajei que.–

¹⁷ Mu José chajnai Judá uruode enga chojninga: –Úngare. Que yipota jeta ácayoji de jnese. Gusu yipota uté uje yiroi chise yijópidi iji ugúchade ajei te que. Enga u jeta chácariji de jne enga yo yiróguiji uté jne iji de. Mu uaque ga ajníño jnese aja uacai. Enga a ca pijocayaque uaque jne aja uacajesui.–

Judá chijócha José ajei údi ome desai Benjamín ujetiga ca José chisa

¹⁸ Ga jé u uje Judá chose José yui enga catecã́ri enga chojninga: –Yeduguéjná, ajuéga darai ome yu. Ga yicatecãrami ua. Enga ca etaque yúringai casecasé ome ua jne. Bamo uje bajnué yibai enga bajnui tu eduguéjna cuchábi Faraón ome yoque. Enga que yajnei tu jeta yicatecã́ri ua, mu ajuéga ome yu jeta yicatecã́ri ua.

¹⁹ Bacatecã́ri yoque ica ome yocai uje yico ua ica iji taningai. Enga bacatecãrápoi yoque to ome yoquesai ica.

²⁰ Enga yatatagome ua ica uje yoquesai base nanique uje yocai e choquíjnapise nanique. Enga yingongome ua ica uje yocai chijnorapise dape ejoi tuté. Yocai tuté chijnorapise dacoté nanique gu, mu e toi nanique. Enga yocai chijnorapise dabode iji uaté gari to nanique, chamáñaje gare ore abode nanique mu uñai e toi nanique enga gusúpusu Benjamín, yocaríjogonóri uté ome yocai.

²¹ Mu baroque yoque ica ujetiga yijínango uté aja ua ica, jeta ajirape to.

²² Mu iji taningai nanique enga yetájo baruode gu ujetiga yocai torási ome dajnusiétigarique ujetiga yoquesai cho jmíti, jmíti ome yoque.

²³ Mu bojningame yoque ica: 'Ujetiga uaquesai ca nóna uaque aja de, enga a ca esópo uyu to jne rĩ.'–

²⁴ Judá qué jno daruode údi ome José enga chojninga: –Uje yiríngo iji yocai ica enga yatatago baruode jnese ica ome yocai.

²⁵ Mu yocai chetaque yocojñane ica enga que pota doi ome Benjamín. Mu chise diri uje chaguhéode chejnapise yoque, enga yocai quene chiroque yógaja doi tica enga chojninga: 'Boyo enga beyoi oré tome trígoi iji Egípto ga yajo uaquetígo to jne.'

²⁶ Mu yetájo yocai uruode diríca ome yoque enga yojnijome: 'A jé ca yicagopóji Egípto rĩ, ujetiga jé ca yijínango yoquesaque ejoi. Jeta ca yoquesai déji yocari enga a ca jnani tuté juégarása dari ome yoque ujetiga yutágoi trígoi iji gari ome yoque.'

²⁷ Mu yocai chajnai yocuruode enga chojninga: 'Uacamóño uje yijnorapise yacoté Raquel uaté ica. Jecute yijnorapise uaté abode to uje gare ica.

²⁸ Mu uacarajáyo uje yabode udore uñai bijna ome yu ica, enga cuchiso sijnátique a tagu iji dajesúrique erámio iji sañeque nanique. Enga que yimópo rĩ iji yoquejórique.

²⁹ Mu ujetiga boyo yabi amiri údi rĩ enga a uacabai tu jne ujetiga cucha dacatique tṍrapóji rĩ iji sañeque. Enga uacabai a u to yujnusiétigai iji quigade. Enga a ca yapite jne ome yujnusiétigarigo. Chamáñaje e choquíjnapise yu gu.'

^30-31 Jecute ujetiga yoquesai ca nónarása yógaja yocai te jne rĩ, ga a torási ome dajnusiétigadatérique ome re. Enga a yocorase yoquiba itoringárique jne. Chamáñaje choquíjnapise gu enga a ca chapidirase ome dajnusiétigarique jne jetiga ca chimopo dabi tuté rĩ.

³² Mu uyu u diríca uje yicatecãripísi yocai diríca ga yojningame: "Ujetiga ca yatiregópo babai te rĩ, enga yibai tu jne jec aja yitoringai iji yeruénique."

³³ Jecute yijóchapise bajei údi enga nóna yijorane ore enga ore jno. Jé basa ga yácariji jogadi iji de ga yiji baroquéode iji de bisideque jne.

³⁴ Bamo arĩ́e uje que yipotapísa jeta yisápo yai rĩ ujetiga uté qué chácariji de. Uje e choquíjna yocai gu enga cachi toi ome dajnusiétigarique jne ujetiga ca chimopo yoquesai tuté iji dejórique rĩ.–