Génesis 43 - Dupade Uruode

Benjamín nóna dayade aja Egípto nanique uje ore dopoi oré tome cucha pibosode iji uté rĩ

¹ Mu jé u nanique uje chaguhéode socaripísome Jacob uáguedie, urasade ore iji Canaán. Mu que gusu Jacob ore mu socárome Canaán jogosórone uñane ore jnese to.

² Uje chise diri nanique uje Jacob e ore tagu dagaidi casodé trígoi enga chejna daringuíone enga Jacob catecã́ri dajnacarode enga chojningame ore: –Boyo ga acayópoi Egípto rĩ ga beyopoi trígoi iji to rĩ, ujetiga beyoi oredie ome to rĩ ga yajopo uaquetígo to rĩ.–

³ Mu Judá chajnai uraque dai uruode enga chojninga: –Ore eduguéjna cuchábi uté ga yipáñangopísiji uruode quigode diríca uje chojninga: 'Ujetiga ca ajnáño uaquesaque ejoi aja ne to jne, ga a ca esópo udé to jne rĩ.'

⁴ Jecute ajuéga yoquesai Benjamín uté ome yoque ga yijínango aja Egípto ga yicopoi oré tome trígoi to jne rĩ.

⁵ Mu jetiga ca ajuéga ome yoque enga a ca yicagóji Egípto jne jeta yicoi oré tome ore posode iji uté to. Chamáñaje ore eduguéjnai uruode u udojo ica gu uje chojninga: 'Ujetiga ca uaquesaque ejoi nóna uaque jne enga a ca esópo yóguiji de rĩ.'–

⁶ Enga jé u uje ore dai Israel chajnai ore uruode enga chojninga: –¿Gotique gu a uje angoño uaquesai ome jnani uté diríca? Ga gajnarenguipise uacadode ome yu, uje uté chutai uaquesai jeta ajínaño aja uté iji uacaríringa ejoi.–

⁷ Mu ore chajnai uraque dai uruode enga ore chojninga: –Uté catecã́ri yocúdode diríca gu. Uje uté chojningame yoque diríca: '¿Uacai qué eca to a? ¿Uaquesaque ejórique cuse to a?' Uté catecã́ri yoque bajaque ome cuchade, enga yichajnángoi uté iji uruode quigade. Enga jé u uje chiraja uje yoquesai cuse. Que yirajagopise uté ajéode diríca gu uje yingongo yoquesai taja. Enga uruode chajuque yocagutedie to diríca uje chojninga: 'Ajínaño aja ne uaquesai tuté.'–

^8-9 Enga Judá e chijócha uraque dai Israel ajei údi ujetiga juéga ga Benjamín nóna ore. Enga chojningame: –Iapá, ajuéga ujetiga qué yiquecágo jne ome chaguhéode, jé aja ua, jé aja yocabode ore to rĩ. Ga yico jne ga Benjamín nóna yoque to jne aja yocajesui. Enga yicoi trígoi iji Egípto to enga yajo yoquitígo to jne rĩ. Ujetiga Benjamín nóna yoque enga a yañurupúsu guio iji datã. Ujetiga ca yatirépo babai jne rĩ, enga a yo yiba uté jne, jé aja yeruénique jeta yitopísi. Ga a jé tiógara jne jeta o máranguiji yu.

¹⁰ Ujetiga ajuégarása Benjamín ica ome yoque ga yoquiríringáringo a e garerase ome trígoi jeta yijnángo aja ne to, enga a ca chaguhei chejnárase yoque iji de.–

^11-13 Enga jé u uje Jacob chajnai Judá uruode enga chojninga: –Que toc eti qué yipésu uacajuréraque. A Benjamín nóna uaque gu jne aja uacajesui. Mu yipota jeta boyo ga ajnáño yoquẽratígo cucha to aja uacajesui ome jnani uté. Enga ajire yocugúchade jne, ga ase yocugúchade enga ajnoque yocugúchade uje ujnomerã́cho iji yocuniri Canaán udé ga íjnonguiji Egípto. Yojningane u cucha ai unérone to, perfume, aja bálsamo, aja mírra ore. Enga áta cutérĩ otadode to jne rĩ, jé aja cucha adie uje ajñunie déji ajei uje ore íode u alméndra.– Enga Jacob qué jno daruode údi ome ore rĩ enga chojninga: –Que yirajágo ujetiga uté irógode cho parágome uaque ica uje ore chichapo uacaplátadie aja uacabólsadie ajéode ica. Jecute ajnóchopo udire rĩ enga asíñopome uté rĩ. Mu ajnóchopo pláta ejodie udire rĩ enga uacagaite ejórigo gajnenie u udire iji bajedie quigade. Enga ujetiga eso uté jne enga ca asíñopome uacapláta casidé bajedie ome irógode rĩ mu asíñome ore eduguéjnapísi uté jne. Enga ojnichome jne: "De diji yoquipláta casidica. Uje a barógode ore cho parágome ica uje yicopóji yoquibólsadie ajéode rĩ ica uje e idája yoque ica.–

¹⁴ Enga Jacob e cho darúja dajnacarode ore aja ore ajesui enga chojninga: –Yipésupú ga yocangaráni Dupa Pujnuéngaisṍre chatapísaja uaque jne jõ, enga pésu ga eduguéjnai uté chosõripise uaque jne jõ, enga chirame Simeón to jne jõ, enga juégaporása doi ome Benjamín to jne rĩ enga chisápo uyu to jne rĩ. Ome yu ga a chejna yujnacarode ore jnese enga a gusu yu iji ore quigáningo jne iji yiyaritique jne.–

¹⁵ Enga jé u uje Jacob ujnacarode ore jno dẽrapáidode cucha udore údi, jé aja Benjamín to, jé aja ore ipláta casidica to rĩ, jé aja ore pose ejórigo gajnenie plátai to rĩ. Enga e ore jnome Egípto yui to. Enga e ore chise Egípto enga ore quítequigája José.

¹⁶ Uje e ore déji José iquei enga José chimo desai Benjamín iji ore gari to. Enga jé u uje catecã́ri daroguipísi uje jecucha déji gari iji iguíjnai. Enga chojningame: –Be udore ore ga ajna ore aja yiguíjnai. Enga ajéyo aquirájnarique to jne, enga apéso yoquibose unéningo jne. Enga jnanione udore a ore cháta rágaja yu jne iji yocatigárique iji guedé gatócoro.–

¹⁷ Enga José iroguipísi e dopísi José uruode enga chojningame José uyade: "Boyo yico, ga ajínañopíse yu aja José iguíjnai to."

¹⁸ Mu chajuguipise ore agutedie uje ore chudute José iroi uruode uje chĩ́care José iguíjnarique i jeta ore chicáji. Enga ore catecã́ri ñane aja iguíjnai yui enga ore chojningame ñane: –Ise mu uté chãra yoque jõ. A pota jetiga chisa yoque bisideque enga cho daróguiji yoque. A ájningarãque eduguéjnai gu yoquipláta casidica, enga a chose eti ca yoco oré yoquigaite baja casodica jne. Ujetiga yico iguíjnai ajei enga jé u uje a ore chuquéjnai yoque jne enga a ore chisa yoque jne enga a ore chijnapo yocachidode burica quedéjna iji yocari jne.–

¹⁹ Ga jé u uje ore chise José iguíjna piagoi enga ore catecãripísi José iroguipísi údode ome raque.

^20-22 Enga ore chojningame: –Angaripísi yocuruode jne. Uje yico uaque ica enga yicoi trígoi oredie ica ome uaque enga que paringaquérique dépisi yocajéode ome uaque. Ga yisígo yoquiplátadie ome uacarógode uñeque ica, ga yisígopísome. Mu yico ica ga e idája yoque ica enga e dejaque enga e yipéco yoquirengúi ica. Enga yuchẽco yoquibólsadie gáyode ica enga yicópo yoquiplátadie iji ajéode gaté rĩ. Mu que yirajágo gotique ica gu uje yoquiplátadie dépoji yoquibólsadie ajei te rĩ. Enga que uyoque u gotique ica jeta yipójo yoquiplátadie iji. Mu yijnójopo yoquipláta casidica enga dépoji de rĩ ujetiga yatirego jeta asi ome eduguéjnai te rĩ. Enga jé upúsu udire. Enga yoquigaite ejórigo gajnenie dépoji to rĩ.–

²³ Ga jé u uje José iroguipísi chajo ore aja jnumi enga chojninga: –Oyo parácho iji jnumi ome uacasadodéringane. Ise mu uacai, uacangureni Dupa u uje chatire uacaplátadie uacabai te rĩ uje dépoji uacabólsadie ajéode gaté rĩ. Chamáñaje uyu u ica uje yisa uacaplátadie ica uje uacoyo trígoi oré iji ica.– Enga jé u uje José iroguipísi doi ore jurúgai Simeón ga jé chatire ore gai, enga nóna ore aja José iguíjnai to.

²⁴ Enga uje Simeón e chise ore enga ore chacája José iguíjnai ajei jnese. Enga ore chisi ome yodi ome ore ujetiga ore churu darídade. Enga gajnui tu uje ore irasique ñane. Jecute ore churu darídade aja jnumi. Enga ore chisiapome ore gachidode burica quedéjna posode ome ore to.

²⁵ Enga e ore chijnime deranone cucha to iji dagúchade jeta dimáneo to iji José iquei, uje a di iji guedé gatócoro to jne. Enga e ore chiraja uje a ore taguíji José iguíjnai to iji guedé gatócoro.

²⁶ Enga jé u uje José e di iji daguíjnai enga ore doi deranone cucha enga ore chicha deranone iji iquei jnese. Enga ore chichaga dacurutedie aja jnumone iji iquei.

²⁷ Enga José catecã́ri ore enga chojninga: –¿Areque uaque jnese a? ¿Ama qué uacai eca ya? Uje e uacojnichome yu ica: 'E choquíjna yocai'.–

²⁸ Mu e ore chichagápo dacurutedie aja jnumone bajaque, enga quene ore chajnai uruode iji quigade enga ore chojninga: –Ejẽ́, yocai uté qué eca enga jé areque to. Jé cho deduguéjna iji ua to.–

²⁹ Enga jé u uje José chajiripise ore enga chusẽre desai uje ore daté jé chojmára nanique enga chojninga: –¿Ama uacojningai uaquesaque jé uté a?– Enga catecã́ri desai enga chojningame: –Yababi á, yipésupú ga Pangarádejnai Dupade chatapísaja ua jne jõ.–

³⁰ Mu uje chejna daruode udore guesi ga chajiripise desai enga uruode chijõrorase. Enga jé u uje chécãre dayaridi ga popise.

³¹ Ga jé u uje José chidotápo dajei taja rĩ enga churuápo dedodie rĩ, ga jé u uje chicapóji dayade rĩ. Ga catecã́ri darógode enga chojninga: "¡Boyo yoquibosode údi aja de!"

³² Enga ore cãra datigade jogadode ome ñane. Ga José gusu iji mésa chojmara gai, jé basa ga Jacob ujnacarode uñane ore taguíji mésa uña gai, jé basa ga egíptogosode ore taguíji mésa uña gai to. Chamáñaje que egíptogosode ore cháta raja hebréogosode ore atigárique gánique gu.

³³ Enga José doi enga chingo dayade jogadode ome ore iji atigai gai enga pésu ore iyoyai. Enga tibidi ore urẽjai bajaque, quigade ga tibidi uté quigaminóri, quigade ga tibidápoi quigaminore gatei, ga jé isoca. Tibidápoi quigaminore gatéode rĩ. Enga que chopise parágome ore, jé aja ore erueminóri. Enga chajuguipise dayade ore agutedie enga ore chajire ñane iji quedéjnane enga ore cho dabujame ñane enga ore chojninga: "¿Jé gotique gu a uje chiraja yoque?"

³⁴ Enga José uyade jé ore posode u José posode to uje déji uté atigabié mésa gai. Mu chĩretápise Benjamín gajné ga suépise uyade ore gajnéone gai. Enga José uyade ore chójiapo José jopidé jnese, enga quigade enga José, uyade, desai ore nína ñane jnese.