Génesis 42 - Dupade Uruode

Jacob chiroque dajnacarode aja Egípto ujetiga ore doi cucha pibosode iji uté

^1-2 Enga jé u nanique uje chaguhéode e socárome Jacob ore to iji ore idai. Mu Jacob chudute to uje cucha pibosode déji Egípto enga chudute to uje oredie gajnecho udore. Jecute catecã́ri dajnacarode nanique enga chojninga: "¿Gotique gu uje uacácayoji de bisideque? ¿Gotique gu uje uacoyo jṍro ome cucha pibosode yui to iji Egípto? Uje trígo déji arĩ́e. A yitogoi jne ome chaguhei. Boyo ga beyoi cucha pibosode to, ga beyoi oredie ome to iji Egípto uje oredie gajnecho gu, ga a yajo uaquetígo to jne. Enga jé u jne ujetiga yiquecágo to jnese."

³ Enga jé u nanique uje José uya casodica ore doi dayé uruode. Enga ore chicáji Egípto to ujetiga ore doi oré tome cucha pibosode iji to. Enga chejna yijmanáyone uje ore chicáji Egípto to ome dabosode.

⁴ Mu José desaque ejoi uje i tu Benjamín qué chácariji dayé gari. Uje dayé todo gu ujetiga cucha dacatique tṍraji ore gu iji sañeque.

⁵ Mu que gusu Jacob ujnacarode ore nanique uje ore chicáji Egípto yui ome dabosode, mu cananéogosode uñane ore nóna ore aja dajei to aja Egípto yui ujetiga ore doi dabotígo iji to. Chamáñaje chaguhéode e socárome ore to iji ore uniri Canaán uté údode jnese.

⁶ Uje purása quedéjnane ore di iji Egípto enga ore quítequiguíji José jnese ujetiga ore chutai trígo iji, enga ore doi oré tome to. Chamáñaje ore eduguéjnapísi tu José gu iji uté enga gajneque cucha pibosode. Enga jé u uje uya casodica ore di iji ti enga ore chichaga dacurutedie aja jnumone iji iquei jnese.

⁷ Mu José jĩraque chiraja daya casodica ore, mu que ore chiraja to. Mu José que chingo raja dayade ore, enga quĩrique chajire ore ga quĩrique dipógome ore. Mu quigade ga catecã́ri ore enga dinguire arecujaidie aja ore enga chojninga: –Uaque jnese, ¿órañoji rique a?– Mu ore chajnai uruode enga ore chojninga: –Yórangoji yocuniri Canaán diríca ujetiga yicoi cucha pibosode to iji uacaniri Egípto udé to.–

⁸ Enga José chirajapise uje uya casodica u ore jnese, jé basa ga que ore chiraja José to uje ore desa casica u uté.

⁹ Enga José jĩraque áyipie doi darigode ome re uje chĩ́cara darigode nanique uje qué jnacare nanique. Enga José e catecã́ri ore enga chojninga: –Ise ga taque uaque jõ. Ise mu apótayo ajicho cuchade iji de. Enga ise ga guidáyo uaque. Ise mu guidai uaque gu ujetiga ajicho yóguiji de jetiga chaguhéode chejnápise yoque enga yiserẽrángoja iji jmainie ga jé u ujetiga uacarasade ejnáño yoque iji de yocuniri.–

¹⁰ Mu jĩraque ore chajnai uruode enga ore chojninga: –Úngare, Yocangarádejná. Yicagoi udé gu ujetiga yicoi oredie ome yoquibosode to.

¹¹ Jé uyoc uñane uje yocai chojmára. Enga paraque yocai, jé aja uyoque rĩ. Que guidai yoque gotique.–

¹² Mu José chajnai ore uruode enga chojninga: –Taque uaque arĩ́e. Uacajmitáyo de gu ujetiga e chaguhéode e chejna yoque iji de gu enga yiserẽrángoja iji chaguhéode jmainie. Ga jé u jne ujetiga uacarasade ore ejnáño yóguiji de.–

¹³ Mu ore chajnai José uruode ome raque enga ore chojninga: –Yoqueduguéjná, yoco uacaróguiji yoque arĩ́e iji baquei tudé. Yocai ujnacarode uyoque gare yóguiji yirídai. Enga yoquejopísi qué chácariji yocai gari iji yocuniri, jé basa ga uñai e cho jmíti, jmíti ome yoque, ga que dépoji yocari to.–

¹⁴ Mu José jé chajo raja uje guidai ore ome José enga chojningame ore: –Jé ũré yu arĩ́e. A guidai uaque ome yajéode.–

¹⁵ Enga José chojninga: –A qué yetingarape uaque. A yingome yoqueduguéjnai Faraón ujetiga suruábu uacabai jne iji de yocuniri, jé aja ujetiga uaquesaque ejoi gotique di to iji de yocuniri.

¹⁶ Mu uacuñeque jno enga uñeque chajni to enga ajna uaquesaque ejoi aja de jne. Jé basa ga uñéngo chácarabíji yocari iji de ome dáringane pujurúgayo. Enga yajico ujetiga jé ca guidai uaque. Uacamóño uje eduguéjna cuchábi Faraón ichajapite yu aja yúringai eduguéjna ica enga yiji yuruode jnese ome cuchade.–

^17-18 Enga jé u uje José chiroque darógode aja ore jetiga ore suru ore gáyode. Mu dirode gadioque iji udore quigade ga José catecãrápoi ore rĩ enga chojninga: –Dupade anguresõre yu to arĩ́e. Jecute posongaquei déji yu ome uaque. Ujetiga beyoi yuruode udojo enga piquetaque uaque jnese jne.

¹⁹ Ujetiga jec ũré enga jnani paraque uac enga boyo enga ajíñoñome uacuñeque iji de, chojmarárique iji uacuñeque, jé basa enga boyo enga ajnócho trígo ome uacaguiosode ore iji uacaniri.

²⁰ Ujetiga eso uacaniri enga ajníñopo yoquibai jne rĩ enga ajínaño uaquesaque ejoi aja yoque to. Enga a pijoque jne jeta ajéquesé uaque jeta ajínaño uaquesai aja uyoque to. Mu ujetiga eso yoque jne enga a ca uaquesaque ejoi déji uacaríringa ejórique enga a yujé uaque jne enga a atoyoi jne.–

²¹ Enga ore chojninga: –A jé u arĩ́e baruode.– Enga e ore catecã́ri ñane iji José iquei enga ore cãra daruode ome José uruode, enga que ore chiraja uje José chiraja ore uruode to. Enga ore chojningame ñane: –Ise ga Dupade ipesucho yocajnéone cucha tocachucho, uje chetaque yocadode gu uje yetájo yoquesai nanique. Uje uté jecucha ga chijócha yocajéode údi nanique ujetiga ca yujuséjo nanique, mu yetájo nanique enga que posongaquérique déji yocajéningome nanique uje yico oré tome nanique ga yipáñangoji jnusiétigade uje chijna aja jnumone nanique.–

²² Mu Rubén chajnai desade uruode enga chojninga: –¿Ama ca yaquĩ́ra uágome yoquesa casicaite nanique a? Mu que angachopísi yurúrique nanique. Jecute e yoco yoquiba yoquetétigadatéode ome yoquesa casicaite uje a e topísi nanique.–

²³ José utocaidi déji ore yui enga catecã́ri uyade ore, jé basa ga José utocaidi uté chingo José uyade uruode aja José to. Jecute ore jos eti ca José chiraja ore uruode. Mu José chirajapise ore uruode uje ore catecã́ri ñane iji iquei.

²⁴ Enga José tangári ore uruode iji quedéjnai enga chiraja ore uruode enga chijõrorase enga educadode doi guesode iji edodie, jecute jno enga chécãre dayaridi enga jé u uje popise iji dayaridi. Mu José e cha dajnusiétigai ga e chidota dajei taja enga jé u uje chicai dayade ore charidi te rĩ enga chiroque darógode aja Simeón ujetiga ore chisa. Enga ore chigaru uté iji ore iquei enga ore jno údi iji ore iquei ujetiga ore suru gai.

²⁵ Enga jé u uje José catecã́ri daroguipísi enga chojninga: –Be ore ibólsadie enga ãrája trígo aja ore ibólsadie ajéode to ga ãretapise jne. Enga ãrápo ore iplátadie aja ajéode to jne, mu ca angome ore jne. Enga átaja ore posode to ujetiga ore tagu aja dajei jne.– Enga jé u uje José iroguipísi doi uruode to.

²⁶ Enga jé u uje José uyade ore chujé trígo aja dachidode burica quedéjna gáyode jnese, enga jé u uje ore jno enga ore chajni aja dayé.

²⁷ Mu uje e dejaque enga ore pésu darengúi ujetiga ore moji. Mu uñai chijnimírase dei trígo pei ome dachidi burica quedéjna potique mu chuchẽre dabólsa pijnani gai enga tajirome dabólsa ajei mu chimopo dapláta uquidé iji dabólsa ajei, enga chajuque aguté, enga aguté cho jora.

²⁸ Enga jé u uje tibidi dajorane ore enga chojninga: –¡Jé qué boyóji te é! ¡Jé cajicho to é, yipláta uquidé jé qué déji yibólsa ajei to rĩ é, uje a ore chatire yibai que!– Enga ore catecã́ri ñane jnese, mu ore tãrara jnese ome dasadodéringai enga ore chojninga: –¿Ama Dupade jé cho píringome cucha dacadode udojo a? A uté ujuyaquéode u jõ uje chetaque yocadode.–

²⁹ Uje e ore chise Canaán enga ore diji dai enga ore chingo cucha dacadode aja jnese.

³⁰ Enga ore chojninga: –Ore angarádejna cuchábi iji egíptogosode ore, dinguire arecujaidie aja yoque diríca enga chaguhéta yocúringane guidáyo yoquibai.

³¹ Mu yichajnángoi uté uruode diríca enga yojnijome diríca: "Jnani paraque yoque arĩ́e. Bo guidai iji yoque mu que yocajénique dotãre."

³² Mu yojnijome diríca: "Jé uyoc u ñane, uje yocai chojmára enga gare yóguiji yirídai. Mu yocuñai qué déji yocai gari iji yocuniri Canaán. Jé basa ga uñai e cho jmíti, jmíti ome yoque ga jno nanique.

³³ Mu uté catecã́ri yoque enga chojninga: "A qué yetingare uaque jne jeta ajéquesépise uaque." Enga chojninga: "Ajíñome uacuñeque iji de, chojmaráringuiji uaque. Jé basa ga boyo enga ajnócho trígo ome uacaguiosode ore."

³⁴ Mu chojninga: "Ujetiga eso uacaniri enga ajníñopo yibai jne rĩ enga ajínaño uaquesai aja ne jne rĩ. Enga jé u ujetiga yimo uaque jeta jé ũré enga jnani paraque uac, jeoga guidai uaque. Enga ujetiga yimo uaquesaque ejoi enga jé u jne jeta yijnime uacajõrai enga e yirógaja doi enga jé u ujetiga yujuéga yocuniri udé ome uaque ujetiga jecucha ga uaqueso ujetiga e yimo uaquesaque ejoi uté."–

³⁵ Ga jé u uje ore chuchẽre trígo gai enga ore chisósi bólsa ajámaminie iji bólsa querudie ajéode jnese, enga jé u uje ore chejñúsi pijnanámone gáyode jnese enga ore chimo dapláta casidé iji bólsabidie ajéode jnese. Enga chajuque ore agutedie jnese, jé aja ore dai Jacob to rĩ.

³⁶ Enga Jacob e narare enga chojninga: –Uaquesade e bijna gu uaque. Enga José e bijna nanique gu uaque, enga que yirajágo quitique. Enga uacajíñoñome Simeón iji punire quedéjnarique diríca. Enga e apótayo jeta boyopo yape ejoi Benjamín údi rĩ aja sañeque rĩ. Enga a bijnapome uyu jne rĩ. Jé ca arajáyo uje uacapesute yáyuguhebátigadatéode ome yabode udore.–

³⁷ Mu Rubén e chajnai dayé uruode enga chojninga: –Be ga asi ome Benjamín ome yu to enga a jé yĩrípise údi iji ua jne rĩ. Mu ujetiga ca yĩri údi ome ua rĩ enga ejna yape gárode udore jnese enga ejnápise ore.–

³⁸ Mu Jacob chajnai Rubén uruode enga chojninga: –A ca bo Benjamín údi jne. Bamo gu uje Benjamín uyai José casica a e toji sañeque ica, enga gusu yabi uté ome yu iji yacoté casica Raquel gari ica. Mu ujetiga boyorase Benjamín údi enga a cucha dacatique tõrarásiji sañeque, enga uté ujnomérique a chequésãrirase yu jne, ga uacabai turásu uté to jne ome cucha dacate tocachutique.–