Génesis 41 - Dupade Uruode

José chingo Faraón urigode quigode ome nanique

¹ Enga sequeredie gare iji udojo quigade nanique enga jé u uje Faraón urigode cuse to. Enga chimo re uje cháguena tié edógai.

² Enga aquirájna urojnanie tṍraji yodi údi iji tié tuaté ga doi guesi tiji tié enga chicáji guesi ga chise tié pijnanai enga jé u uje tagu jnacarade iji tié pijnanai. Enga gare iji ti yijmanuñai.

³ Ga quigade ga uñanie tocadepo iji tié rĩ ga garapo iji ti rĩ yijmanuñai. Mu godóguepísei enga gusu ajnoquéode iji gáyode, ga quedéjnapise uje torojnapise.

⁴ Enga aquirájna godóguedie udire doi aquirájna urojnanie enga tagu ga chejnapise. Enga jé u uje Faraón tṍra re iji jnumi enga niji jmame.

⁵ Niji mu e mopo rĩ, ga urigode e cusapo gaté rĩ. Enga chimo arroz quedéjnai trígo iji darigode uje sué ga ijõripis aja guesi. Enga chimo uje ero sué enga ade cuse iji gaté enga ubugode gare iji ti yijmanuñai, enga ueradipise ade ga ajñúranguipíse ade.

⁶ Enga chimopo uñai rĩ uje ero chojmárapo aja gaté rĩ, enga ade cuse to iji gaté enga ubugode garapo iji ti to yijmanuñai rĩ, mu garósi ade iji ubugode enga ajñunie ajégueságue ujade.

⁷ Enga chajire mu chimo uje que ajñúraque cuse ga tagu ajñurane enga chejnapise ajñurane. Enga jé u uje Faraón tṍra riji jnumi ome darigode, mu niji enga e chiraja uje uricho.

⁸ Enga chise dire uñai enga Faraón niji ga áyipiedie doi darigode. Enga chopise dáyugu darigode. Ga tibidi irajatade, ga chátaja daijnane ore to iji egíptogosode ore ujade jnese, enga catecã́ri ore ome darigode ujetiga ore chiraja urigode quigode, mu que ore chiraja quitique urigode.

⁹ Mu Faraón iroguipísi uje jecucha ga chaningára víno aja Faraón quene jnusina José casica uje chingo darigode quigode ome ica. Enga jé u uje quene chingo cucha dacadode quigode ome Faraón. Enga chojningame: –Gajnareque yadode uje yicadígui yujo casica pujurúgai uruode ome ua. Uje chutṍri yu ica ome ua.

¹⁰ Mu a qué yatataba cuchade udore quigode ome ua bajaque jne. Yoqueduguéjna cuchábi tu ua, jecute jé tiógara uje baroque baróquegatéi, barodisórone soldácho ore eduguéjnai aja yoque ica jetiga suru yoquibai to ica, yijõra casé uyoque uje uté isai tu arurégode icaite ome ua.

¹¹ Uje qué yugúcoi yocúringane pujurúgai ica enga yijõrai, yocurigode cuse jnese ica, mu yocurigode cãra daquigode ome ñane ica, mu que cucha bisideque yocurigode quigode ica.

¹² Mu yocujo pujurúgai déji to ica uje hebréogose. Uté u ica uje doi barodisórone soldácho ore eduguéjnai iroquéode. Enga jnacari uté chirajapise yocurigode quigode ica uje yingongome ga chiraja quigode.

¹³ Enga yocurigode quigode jé upúsu ica uje chirajapise. Ga chojningame yu ica: "A aningarápo vínoi taja beduguéjnai te rĩ," enga jé upúsu quigode ica. Jé basa ga chojningame yijõrai: "A ore chigaru betabi jne, enga jé u jne jeta ore chuguhese ua. Enga chugúperone a tagu barione iji gaté jne." Enga jé upúsu uruode quigode ica.–

¹⁴ Enga jĩraque Faraón chajnai daroi uruode, enga catecã́ri dasoldádode ga chojninga: "Beyoi José uté ga ajnáño aja yari iji de." Enga jĩraque ore doi ga chijnime José jeta ore chijnája Faraón. Mu José qué chuju dabuja bajaque enga quigade enga chaca daguidé omenie, enga chimate udojo ga jé u uje chicáji Faraón enga chojninga: "E yise ua."

¹⁵ Enga Faraón catecã́ri José enga chojningame: –Yurigode cuse que iji dejai tuqué. Mu irajatade, daijnane que ore chiraja quitique gotique. Mu bajnomei chise yu que uje baraja ore urigode quigode.–

¹⁶ Mu José chajnai Faraón uruode enga chojninga: –Ejẽ́, yiraja ore urigode, mu que uyu gotique jeta yiraja quigode. Mu Dupade u uje chiraja quigode ome yu. Enga Dupade a pota jeta araja barigode quigode to jeta yingome ua. Enga bagutíyabádode a u barigode udore iji siñeque jne.–

¹⁷ Enga Faraón e chatata darigode ome José enga chojningame: –Yĩ́cara que enga yiyáguena tiédaté edógai enga yajire ga yiraja tié uje uaté i tu Nílo.

¹⁸ Enga yurigode quigode u que uje aquirájna urojnanie tṍraji yodi údi iji tié enga jĩraque chijnare raja jnacarade iji tié edógai enga tagu jnacarade iji. Enga gare iji ti yijmanuñai aquirájnanie udire.

¹⁹ Mu quigade ga yimopo aquirájnanie uñanie rĩ uje tṍraji yodi údi iji tié to mu godóguepísei ga ajnoquecho ga quedéjna. Enga que yimo aquirájnaraque ujetiga cho udire iji Egípto údode; jé carangué rome dojodie aquirájna, uje godóguepísei ga ajnoquéode chague gáyode. Enga garapo ore iji ti yijmanuñai rĩ.

²⁰ Ga godóguedie ore tagu urojnanie enga ore chinire gai, enga ore chejnapise ore.

²¹ Mu godóguedie tagu urojnanie mu jé ate uje godóguepísei, enga que ore chécãripise dasocárique. Ga jé u uje yo cuyuque iji dejai tuqué enga yajire yejode uje yuricho.

²² Mu yimopo rĩ, enga e yurigode cusapo gaté rĩ. Enga yurigode quigode upo rĩ uje yimo arroz quedéjnai enga sué enga ijoréjnapise. Enga ero chojmára aja gaté enga ade cuse iji gaté uje ubugode gare iji ti yijmanuñai enga ade ajñunie iragupúsu ajéode.

²³ Mu yimopo uñai rĩ uje sué to mu betája guesi enga cho ujetiga ãre chujé aja guesi yui. Enga ade cuse to enga ubugode gare iji ti yijmanuñai iji ero chojmara to mu ajeguesácho adie ujade, ujade enga gusu aoi iji gai.

²⁴ Ga yimo uje ubugode uje garósi ajñunie ajei tagu ajñurane enga chejnapise ajñurane. Yingo yurigode ome daijnane udore mu que uñeque chiraja quitique ga que uñeque chingome yu.–

^25-27 Enga jé u uje José chajnai Faraón uruode udore. Enga chojninga: –Yeduguéjná, obiréjnapise baruode quigode ome yu. Gare barigode mu qué chojmára ome yu. Dupade chisi ome barigode ome ua gu ujetiga dimane ua ome cucha dacadode yúode uje Dupade guẽracho ome uaque jne iji uacaniri Egípto udé. Yeduguéjná, barigode udore quigode u udojo arĩ́e: a sequeredie gare iji ti yijmanuñai enga uacacatígo cucha utájnapiso jne, ga uacasequeré omenie a jé u jne. Mu iji sequeré omenie udire quigade enga sequeré poritadie a jé u jne uje gare iji ti yijmanuñai, ujetiga ca cucha pacatique áraque cuse iji. Enga sequeré omenie gajnunie u bamonie aquirájna urojnai udire uje gare iji ti yijmanuñai, enga gajnua jé upo cucha paca ero chojmára uaté rĩ uje sué ga ijoréjnapise aja guesi enga ubugode gare iji ti yijmanuñai enga adie ajñunie jiépisi iji adie ajéode. Jé basa ga sequeré poritadie gajnui jé upo aquirájna godóguedie uje garapóji ti rĩ yijmanuñai, ga gajnua upo cucha paca ero chojmára te rĩ uje betája guesi enga ubugode garapo iji ti rĩ yijmanuñai mu que ajñúraque cuse iji ade ajéode.

²⁸ Enga jé ũrepise yuruode udojo enga barigode tocade jne, enga jé upúsu yuruode quigode udojo ome ua. Obiréjnapise uje Dupade ipesute barigode ome ua diríca. Gaidi tu gu ujetiga arajáyo cucha tocachugode jne enga dimane uágome iquei.–

²⁹ Enga José qué jnopo daruode údi rĩ ome Faraón enga chojninga: –A sequeré oméringui di iji de uacaniri enga gare iji ti yijmanuñai, enga a jiépisi uacacatígo cucha árigo jne.

^30-31 Mu sequeredie garapo iji ti rĩ yijmanuñai enga sequeré poritadie jé u jne enga a garósipise uacabotígo cucha iji jne. Ujetiga sequeré poritadie socárome uaque jne enga a ca gosi jnusinápo sequeré omenie jne rĩ. Uje a amóño jnese jne uje e sequeredie noñanguepise jnese iji uacaniri enga uacaniri omitigai a e jnome uaque.

³² Yeduguéjná, Dupade chisi ome barique bajai tome ua ome aquirájnanie isocade, enga obiréjnapise sequeré omenie, sequeré poritadie iji barique bajai tuqué que. Mu chisiapome barique ejoi tome ua gaté rĩ uje qui jé chopise bajai tuqué quigode. Jecute que toc ujetiga potigayaque úringai tocachucho jne, enga e idógosi sequeré omenie uje gare ore iji ti.–

³³ Enga José e cho Faraón quique ome cucha dacate tocachugode yui enga chojningame: –A qué yingo yáyipiedie ome ua jne, Yeduguéjná: Omi tu ome yu ujetiga acué jnanírique jeta irajataque, jeta áyipierãque rĩ ujetiga chañurupúsu cuchade guio iji uacaniri udé.

^34-35 Enga ujetiga ese barótique áyipierãque enga doi enga chutai darasade ore ome ore acatígo cucha petígo iji uacaniri Egípto údode jnese. Enga a chojningame ore jne: "Asi ome yu bacade petique jeta bólsadie chejna yijmanai, jé basa ga bajnei gagájninie jne, jé basa yoqueduguéjnai gajné chojmaráraque jne." Enga baroi tuté jé doi dasocai tuté iji sequeré omenie údode jnese, enga chañurupúsu dataidode cucha pacacho guio jne iji ore idáyode jnese, enga dimane ome sequeré poritadie yui.

³⁶ Jecute ujetiga sequeré poritadie e tocade jne enga a ca barásarique uñeque toi jne ome chaguhéode. Enga a ore chapite gu bañerane cucha udore jne.–

Faraón pésu José úringai eduguéjna cuchape ujetiga egíptogosode ore cho deduguéjna cuchábi iji jnese

³⁷ Uje Faraón, ujode eduguéjna ore tangári José áyipiedie quigode enga ore irasepísi.

³⁸ Enga jé u uje Faraón catecã́ri dojode eduguéjna enga chojninga: –¿Ama yocurasade uñeque cho jnacari tuté ome úringai irajataque cuchape a? Pijoguipise uje Dupade ujopié dépisi uté áyipie. Yocutocaidi a u uté jne.–

³⁹ Enga Faraón e catecã́ri José enga chojningame: –Que irajatátique cho ua, jé bangaraque ua. Enga bajnué ore gáyode jnese ome báringai áyipierãque, irajataque ore. Enga obiréjnapise uje barajatígadatéi garani tu bangureni Dupápise.–

⁴⁰ Enga Faraón chojninga: –Yiguíjna cuchábi tudé e bajneque, jé aja yurasade ore jnese, enga a ore doi baroquéode jnese, jé aja bojningane cucha ore jnese. Gusu yu uje yujnué babai ome yúringai eduguéjna. Mu yujode eduguéjna iji yocuniri udé e bajnué ore gáyode jnese ome báringai eduguéjna cuchape.

⁴¹ Jé cajirape yu uje e yisi ome yuru iyiejájnane ome ua, enga a ajnué yocurasade jnese gai iji yocuniri Egípto udé, enga bajnui upúsu yu jne ome ore jnese.–

⁴² Enga jé u uje Faraón chijnime dajmanepié iji dajmané uje chicha darusarane aja dajmanepié uaté ga e nája José jmané to jetiga obiréjna úringai eduguéjna ome. Enga e chiroque darógode aja piguidé ueradéjnanie uje ore pésu iji borapeque ueradéjnai uje i tu líno, ga José e chacája to. Enga Faraón chisi ome dajúni carubi tome ga chátaja dajuné ga jé u uje chadia José etabi, enga ujuné uaté óro uegue.

⁴³ Enga Faraón jno José údi aja guesi enga ore choru guebéquedatéode. Enga bajai tu Faraón pi guebéquedaté aja José iquei, ga jno enga José chajna ome dabi guebéquedaté to. Enga Faraón chiroque darógode aja uraque daquei ujetiga ore tibidi dejode. Enga ore doi dasocabei enga ore tibite enga ore chejnapúsu dabijnane enga ore chojninga: "¡Ajoso dati iji yoqueduguéjna cuchábode ore iquei jeta guesája ore iquéode é!" Enga jé u nanique uje egíptogosode ore chiraja José úringai eduguéjna enga ore toji gai aja ajesui.

⁴⁴ Enga Faraón e catecãrápoi José gaté rĩ enga chojninga: –Beduguéjnai tu yu, mu a yajire bei to jne ome cuchade jnese, enga jeta cuchade omío ome ua enga a jé u uje yipésu to bojningáringo cucha. Enga jé cho ome yurasade udore ore jnese, jetiga ca barúo enga que pujuegate jetiga uñeque pésu cuchárique uje que barúo gu.–

^45-46 Enga Faraón chécãre José i nanique. Gaidi u gu ujetiga egíptogosode ore chĩ́care ipesudi i icha aja jne. Enga ĩcarai tuté, i ichai tu Zafnat-panéa. Enga chucuepoi gapúragome rĩ ujetiga chopise dacoté iji guiyáraque gapu. Enga jnanírique déji nanique rĩ iji ore idai On uje egíptogosode ore cho dangaráni iji uté ome guedé adode uje uté i tu Potiféra. Enga uté uro Asenat u nanique uje Faraón chisi ome José jetiga cho dacoté iji. Ga jé u uje José basája dáringai eduguéjnapise nanique enga jnoji Faraón gari ga chisṍriji Egípto údode jnese. Enga José e guejnanie sequerei 30 nanique uje egíptogosode ore eduguéjna cuchábi Faraón ipesute úringai eduguéjna nanique ome ore.

⁴⁷ Uje chise sequeredie uje gare iji ti nanique enga jiépisi ore acadie cucha ádie iji.

⁴⁸ Enga sequeredie chejna yijmana chojmarai ga garapo iji ti rĩ iji yijmanuñai nanique uje José chise ore idáyode chojmara, chojmarane iji Egípto údode jnese. Enga chutai ore ome ore acade árigui cucha uje déji ore guejnane iji ore idáyode ejode jetiga chañuru guio iji doratique guiguíjna ajénique iji ore idai chojmara, chojmarane jnese.

⁴⁹ Enga José añerane trígo sué yote quedéjnai arĩ quenguerachúringai gai iji edógai pijnanai. Enga José jé chajire ayoré chojmara acade cucha ikílode iji taningai, mu quigade ga e jiépisi añerane cucha pacacho ade enga que chajirápo ikílode rĩ uje jiépisi añerane gu.

⁵⁰ Uje cáma sequeré poritadie di iji ore nanique ga José abode base to iji sequeré poritadie yui iji acoté uje i tu Asenat. Enga gare abode iji uaté gari nanique.

⁵¹ Ore pésu dape bajai i nanique enga i tu Manasés, uje Manasés urui qui tu nanique uje "tarata gosi áyipiedie ome daguiosode," ga José chojninga: "Yĩcarai tu Manasés aja yababi suté gu uje Dupade e chĩro yujnusiétigade uje yujnusi yurasade ore. Enga yáyipiedie que dopoi ayoré piguiotígome uyu rĩ, jé chopome yujnusiétigade rĩ, jé tarata to yujnusiétigade ga e cucha bisidécho ome yu."

⁵² Enga ore ape ejoi base to ga ore pésu i to enga ore chĩ́care Efraín aja to, uje Efraín urui qui tu gu uje "e abechuque to." Uje José chojninga: "Yangureni Dupade e chisi ome yabode ome yu iji yáyuguhebátigai jmainie iji puniri tudé, ga chĩro yáyuguhebátigade jnese."

⁵³ Enga udojo quigade nanique enga sequeré omenie e eruei tu ome ore iji ore uniri Egípto.

⁵⁴ Enga jé u nanique uje José uruode e tocade enga e sequeré poritadie di iji ore. Mu que gusu iji ore uniri nanique uje sequeré poritadie di iji ore, mu e chise ore uniri ejominórone ore jnese to. Enga chaguhéode socárome ore iji ore uniri ejominórone nanique, jé basa ga chaguhéode que socárome egíptogosode ore to, chamáñaje José añerane ore acaque déji ore idáyode jnese nanique gu.

⁵⁵ Mu uje e íjnoque cucha pibosode iji ore nanique ga jé u uje egíptogosode ore chicáji Faraón nanique ujetiga ore chutai trígo iji uté. Mu Faraón chajnai ore uruode nanique enga chojninga: "Ajnánoji José uje añeracho cucha pacade udore gu, ga atáyoji uté, enga uté a chingo dasocáringome uaque jne. Enga beyoi ojningáringo cucha quitígo jne."

⁵⁶ Mu José cáma pota nanique iji taningai jetiga chuchẽre dañerane cucha pibose gai, mu qué chirote yúode jeta chaguhéode chejnapise ore jne ga jé u ujetiga chuchẽre gáyode ome ore, enga doi oré tome ore jne jeta chuchẽre gáyode ome ore.

⁵⁷ Enga jé u nanique uje José chuchẽre dañerane cucha gáyode ome egíptogosode ore. Mu que gusu egíptogosode ore nanique uje ore doi oredie ome to, mu purása quedéjnane iji Egípto dosadode jecucha ga ore di to jetiga ore doi oredie ome José añerane cucha pibose to. Chamáñaje chaguhéode chejnapise ore gu iji danirone udore jnese.