Génesis 40 - Dupade Uruode

José chingo Faraón iroque gárode ore urigode quigode ome ore nanique

¹ Enga chise diri nanique uje ore eduguéjna cuchábi Faraón que chisípise daroque gárode unétique ome ore isagode cucha. Faraón iroque gárode uñai isai tu víno nanique ujetiga chisa iji gaté, enga chisi ome uraque deduguéjnai gatuaque ujetiga jĩraque chisa ¡saque! ga chóji. Jé basa jõrai isai tu arurégode nanique ujetiga pésu ome uraque deduguéjnai.

² Enga Faraón iroque gárode udore ore chirógapo dajorane gaté rĩ iji iguíjnai to. Mu chise diri nanique uje ore eduguéjna cuchábi Faraón ajei dotãripise ome daroque gárode udojo ore nanique.

³ Enga jé u uje Faraón tibidi dasoldádode ore nanique enga chojninga: "Boyo udore údi enga ajucho ore gai to rĩ iji yocujurúgayode jogadi." Enga ore jurúgayode udore ore charidi jé chojmára uje ore suru José gai iji nanique.

⁴ Enga ore di iji ore jurúgayode jogadi enga jé u uje ore jurúgaisṍri iróquegatéi chojningame José: "Añuru yocujurúgai ichade udore guio to rĩ." Enga iyajmanguipise ore iji ore úringane pujurúgai nanique iji uté.

⁵ Enga chise dejaque uñeque enga ore jurúgai ichade udore ore urigode cuse jnese. Mu que cucha bisideque ore urigode mu ore urigode quigode cuse.

⁶ Enga chise diri nanique enga José diguiji dojode pujurúgai ujade uje chajire ore, enga chise jnani gárode udore to uje ejo ore ica, enga chajire ore enga jnusiétaguipíse ore.

⁷ Enga José catecã́ri ore enga chojninga: –¿Cuchárique u gu a uje jnusiétaque uaque? Uje uacajnusiétigai chise guesi iji uaquedodie.–

⁸ Enga jé u uje ore chajnai José uruode enga ore chojninga: –Yocurigode cuse que iji dejai tuqué. Ise mu ca yocurigode ucode cucha bisidécho to. Ise mu yocurigode chimo cuchárique jne. Mu que yijnico yocurigode ãrírique ga que toque quitígo ome yoque.– Enga jé u uje José chajnai ore uruode enga chojninga: –¿Ama ca Dupade chiraja uacarigode quigode? Dupade chiraja purigode quigode arĩ́e. Beyoi enga atatayo ome yu uacarigode quigode.–

^9-10 Enga bajai tu eduguéjnai iroi uje chisa víno tiji gaté ome eduguéjnai ujetiga chisi ome eduguéjnai. Enga uté chojningame José: –A qué yingome ua jne yurigode quigode, uje yĩ́cara ga yimo ore acadie úvai chojmarai uje erejnai choru ga gadioque quigode aja gaté. Enga yimopo erejnai pojnánguenie iji rĩ. Mu yimopo to rĩ uje erejnai pojnánguenie chécãrapo dasocai te rĩ enga adie ga ubuguéjna. Enga timate enga otadi irágu adie ajéode.

¹¹ Enga uyu upúsu uje yiji erejnai enga yiji ubuguéjnai enga yijnime a timachuguedie iji enga yijosaja Faraón jopidi enga irágu enga yajire ga uyu upúsu uje yisi ome Faraón ujetiga chóji. José, ¿o ringome jetiga araja quitígo, yuruode?–

^12-13 Enga José chajnai uruode enga chojninga: –Obiréjna quigode arĩ́e. Enga erejnai quigode uje jmanecade gadiógaja dajesui enga qui tu ujetiga dirode e gadióguiji yui ujetiga Faraón chijnimápo ua rĩ, enga chichapo ua aja basa casé iroquéo rĩ. Enga a jé ua upúsu jne ujetiga asiapome víno ome uté rĩ.–

¹⁴ Enga José qué jno daruode údi ome uté enga chojningame: –Ujetiga yuruode tocade jne enga ca acadígui yu jne. Ango yu ome Faraón iji iquénique jne. Ja seca pota jeta chijnime uyu iji de to jne. Osõripise yu enga be yuruode udore jne.

¹⁵ Chamáñaje ore orite yu nanique iji yurasade hebréogoso ore ujade, enga ore jno yúdi aja puniri tudé nanique. Enga que yibárique cucha cuse ica uje ore suru yibai iji de nanique.–

^16-17 Uje uñai uje isai tu arurégode nanique chudute dajõrai urigode quigode ujnomei iji José pijnani to enga chojninga: –José á, yingoma yurigode quigode ome ua to jne, ja seca araja yurigode quigode to á. Yĩ́cara ga yijnoque arurégode iji ore oradie ijnacojo gadióguedie ga yujé aja yójo jnese enga arureguipísode irágupúsu ore oradie ijnacojo uñanie ajéode. Jé basa ga arurégode iji uña cãra rome uñane enga yujé udore aja arureguipísode ore iquei iji yójo. Enga yiji enga e yirõre Faraón iguíjnai mu yuniname eti chugúperone tagu iji yójo.–

^18-19 Mu José chajnai uté uruode enga chojningame: –Obiréjna to. Yirajapise quigode to arĩ́e. Enga ore oradie ijnacojo gadióguei imoi tu to jetiga ore chijnime ua to iji dire gadiógode dirome. Mu a ore doi ua jne enga ore chigaru betabi jne enga ore chuguhese ua. Enga quigade ga chugúperone a tagu barione jne tiji babai.–

²⁰ Uje e chise dire gadiógode iji udore quigade nanique enga Faraón batigai dire u nanique. Enga tibidi dojode eduguéjna ore ujetiga ore pésu daninaquédatéi ome ñane iji dabose unérone gai. Enga jé u uje Faraón tibidi dasoldádode enga chojninga: –Beyoi yocujurúgai gare casodica, enga ajnáño ore aja de iji yoquiquei iji yocuague udac. Yojningai u yiroguipísi casica uje chaningára víno aja yu ica, jé aja jõrai uje pésu arurégode ica, ga yajicope ore iji de to.–

²¹ Uje e ore di ore údi ga Faraón chojningame uñai: "Bepoi basoca casica ome yu rĩ, enga aningarápo víno aja yu to rĩ."

²² Jé basa ga chiroque dasoldádode aja uñai uje isai cucha pisaque u arurégode ica uje pésu ome Faraón ica, enga chojninga: "Beyoi uté, agacho etabi enga aguhéso jne." Enga jé u uje José chingome ore ica enga tocade jnese, José uruode.

²³ Mu Faraón iro casica uje jecucha chaningára jódode víno aja uté ica que jnusinápo José uruode rĩ jetiga chingo José uruode ome Faraón.