Génesis 39 - Dupade Uruode

Peduguéjnai Potifar acoté catecã́ri José ujetiga moji gari mu José que doi uruode go

¹ Qué yingopome uaque rĩ José adi casodica uje ismaélgosode ore tẽrame egíptogosode ica iji ore uniri Egípto. Enga gaisṍri tu Faraón iróquegatéi uje i tu Potifar ica. Uje soldádode ore eduguéjnai u uté uje ore chirote Faraón ejode nanique.

² Mu Pangarádejnai Dupade dépisiji José gari iji puniri Egípto uté to nanique.

³ Enga José irósõri chiraja uje Dupade dépisiji José gari uje José isagode cucha ueradipíso jnese.

⁴ Enga Potifar que chuseque José to nanique enga chusípise guio iji daguíjnai. Enga Potifar cho daróguiji José enga sué irógode uñane gáyode jnese. Enga chojningame José: "Yiroguipísi tu ua, añurupúsu cuchade guio iji yiguíjnai jnese."

⁵ Enga Pangarádejnai Dupade que chuseque Potifar nanique ga nóna aja quedéjnane to. Que gusu iji iguíjnai mu cháta cuchade aja to ome guejnane, enga acade cucha jiei gatuaque.

⁶ Enga José tangaripísi darósõri Potifar enga dopísi iroquéode nanique ga irósõri que chopo dáyugu re ome cuchárique rĩ. Juéga dagúchade jnese ome José jeta suse guio; mu gusu Potifar uté uje pésu dáyipie ome dabotique cucha jetiga tagu. Enga José omipise ga tiroque adode aja jnumi to rĩ.

⁷ Jecute chise diri uje Potifar acoté chimo to uje aparagate dadode enga uome ga tiroque adode aja jnumi te rĩ. Jecute uaté catecã́ri nanique enga chojninga: –Angaramája yu.–

^8-9 Mu José que pota uaté gotóraque enga chajnai uruode enga chojninga: –Úngare. Bamo uje yirósõri angureni u yu ome daroquéode enga angureni u yu ujetiga yañuru ugúchade guio iji de. Enga noñome cuchade jnese iji de iji yijmainie jeta yañuru ugúchade guio. Enga chopise jeta yugúcha ugúchade jnese uje que charángome yu. Jé basa que juéga ua ome yu jeta yungarája ua. Jeta yungarája ua, ga a gajnareque yadode ome yirósõri tuté. Mu que gusu ome yirósõri gotique mu a jé chuságaja Dupade jne, yate gajnaréngone jeta yungarája ua. Que toguipise ome yu arĩ́e.–

¹⁰ Mu uaté que chacho uje catecã́ri José. Jecucha ga catecã́ri iji dirode jnese mu José que tangári uruode gotique.

¹¹ Mu chise dire uñai enga José chacája darósõri iguíjnai jetiga pésu darósõri ugúchade aja quigode iji iguíjnai ajei. Enga íjnoque José irósõri iroque uñeque iji ore ejode nanique.

¹² Ga jé u uje uaté chisa José iguidé nanique jetiga churugúsiji dei. Enga catecã́ri enga chojninga: –José, be enga angaramája yu to.– Ga jé u uje José chejñu isagué daguidé iji dabai enga tṍraja yui enga jé u uje chayome, enga jé u uje doi guesi iji guiguíjnai ajei enga chicai guesi.

¹³ Mu uaté ájningarẽ́ uje José noñome daguidé tiji gari, enga jé u uje chucué dajéode ujetiga jnutague ome re.

¹⁴ Enga jé u uje uaté tibidi dabai irógode uñane enga chojninga: –¡Cajicho to é! Yabai gaidi casica hebréogose pota yu to que, enga cajicho to uje noñome daguidé iji yari ga de daque. Chisarase yu que mu yibite ga yo ¡cãã!

¹⁵ Enga uté chudute yibijnane uje yejnapúsu yibijnane, enga jé u uje chayo enga noñome daguidé tiji yari, ga de daque iguidé.–

¹⁶ Enga jé u uje chañurupúsu José iguidé guio ujetiga abai di ga chingome José iguidé tome to.

¹⁷ Mu uje Potifar diji enga jé u uje acoté chingome dojñane ome enga chojninga: –Bagaidi hebréogose casica uje bajnája yocari ica, enga chicáji yari iji yoquimochádi que, enga chojningame yu: "¿Yiabi ua ya?"

¹⁸ Mu yibite ga yejnapúsu yibijnane. Enga uté chiraja uje yibijnane ibisócho enga jé u uje chayo enga noñome daguidé iji yari enga de daque. Cajire to.

¹⁹ ¿Ama o ringome jne baroi uté ate gajnaréngone ome yu uje pésu ome yu?– Enga jé u uje Potifar ajei dotãripísome José ome dacoté ojñane.

²⁰ Enga jé u uje chisa José enga tibidi darógode soldácho enga chojningame ore: "Boyo uté údi aja ore jurúgayode jogadi uje yujuco yoqueduguéjnai etégode gáyode iji, enga ajucho gai tiji to jne."

²¹ Mu Pangarádejnai Dupade que noñome José iji te gotique to, mu déji gari iji ore jurúgayode jogadi uté. Enga Dupade pésu ga ore jurúgaisṍri iróquegatéi uté irasique José adode.

²² Enga cho daróguiji José gaté rĩ enga chojningame José: "Añurupúsu bojode yocujurúgayo ore guio to iji de uacayaridi ome yu." Jecute José doi dajurúgaisṍri iróquegatéi uruode, enga chiroque dojode pujurúgayo aja ore isagode cucha iji dirode jnese. Enga cho ujetiga José ujode pujurúgayo ore eduguéjnai tu iji ore charidi uté.

²³ Enga e que ore jurúgaisṍri iróquegatéi chisapo cucháriguiji ore jurúgayode jogadi uté rĩ. Chamáñaje chimo gu uje Dupade chatapísaja José ome iroquéode enga José ujode pujurúgayo ueradipíso ore isagode cucha gatuaque ome José.