Génesis 34 - Dupade Uruode

Purása quedéjnai Siquem chisa Jacob uro Dína bisideque nanique

¹ Enga chise diri nanique uje Jacob, Léa ore uro Dína e nóna dojodie gapui to iji ore idai uté.

² Mu uje Hamor ujnacari Siquem chimo Dína nanique, enga potapísa uaté ome re. Jecute toria chisa Dína uaté ga tungarája bisideque nanique. Enga hevéogosode ore eduguéjnai u Siquem dayé Hamor uté nanique iji ore idáidatéi tuté.

³ Mu udojo quigade nanique enga Siquem jecucha pota nejé gapua uaté údode ujetiga chopise dacoté iji, uje ajegaidépise uaté gu.

⁴ Jecute Siquem catecã́ri dayé nanique enga chojninga: –Bo ga abágui gapua tuaté danique, enga yo yacoté iji jeta danique pota yu ome.–

⁵ Mu Jacob e chiraja Siquem adode uje chisa uro Dína bisideque. Mu qué chirote dajnacarode ore yui, uje qué ore chirote gachidedie áyasai gu. Mu chojningame re: "Ujeta ore di, ga jé u jne ujeta jnutaque yoque."

⁶ Mu uje Jacob qué chirote dajnacarode yui, mu Siquem dayé Hamor tibágui Jacob ujetiga catecã́ri ome uro uje ujnacari pota gu.

⁷ Uje Jacob ujnacarode di iji darodedie áyasai, ga ore chudute nena ujnomei enga jé u uje ájningaránguipíse ore. Enga ore chojninga: "Gajnarenguipise uje jnani unejátique chisa israélgosode yocurása bisideque, cuchiyi tupúsu yocai Jacob uro uaté." Enga ore chojninga: "¡Que pisoca gotique jetiga jnani unejátique chisa yocurásaraque bisideque!"

⁸ Mu Hamor di iji ore mu que chiraja gotique uje ájningarãque Jacob, ore enga chojninga: –Yujnacari Siquem chijnorapise baro, uaquẽro uaté. Ujetiga ajuéchome enga a cho dacoté iji jne.

⁹ Enga jé u jne ujeta yocacaya ñane jnese jne iji jnumi. Enga jé u jne ujetiga yisago uñane urodie enga yoco yocacoté iji ore iji deréjnane jnese, enga asayo yocurodie, jé basa ga yisago uacarodie uje yoco yocacoté iji ñane urodie.

¹⁰ A ca gusu uacajneque uacapáringai udé jne, mu beyoi oré tome jnumi petígo uñane iji yocuniri tudé údode jnese. Enga yico oredie ome ñane ugúchade gatuaque jne. Enga paraque yógome ñane jne.–

¹¹ Enga Siquem e narare to enga catecã́ri Dína dayé, dajade ore enga chojninga: –Angoño uacáyipiedie aja yu jetiga yisa baro, uaquẽro uaté, ga yisi ome uacapotigádode cucha ome uaque jne. Mu yijócha uacajéode údi ujetiga asíñome gapua uaté ome yu ujetiga yo yacotéji.

¹² Que cucha gotígo ome yu ujetiga atáyoi yu enga a querújna uacataitígo cucha marínga, a jé yisi ome uaque. Uje jecucha ga yocurasade chutai darodie oredie. U mu, a yẽratígo sué ore urodie gajnéone cucha gáyode jnese jne ome uaque. Mu ajuécho gapua tuaté ome yu jne, enga a yo yacoté iji jne.–

^13-14 Mu Dína dajade ore chiraja uje Siquem chisa ore nero bisideque diríca mu ore pógu dajei dotáningane iji dajéode. Enga ore chajnai Hamor, Siquem ore uruode enga ore chojninga: –Que toc jeta yisígome yoquẽro ome ayorérique ujetiga cáma pica ujñungungué aoi iji gai. Enga pajegátigai déji ome yocurásadie ujetiga uñáraque amanique ca picaque aoi iji ore ujñungunguenie gáyode.

¹⁵ A yisígo Dína ome ua jne ujetiga beyoi enga aquesúyo aoi iji uacarasade ore ujñungunguenie gáyode jnese, ujetiga jé beyopísi israélgosode yoquisocade to.

¹⁶ Enga a jé u jne ujetiga yisago uñane urodie ga yoco yocacotedie iji ore. Enga chopise jne ujetiga yocacaya ñane iji jnumi, enga a yácagoji uacaniri uné jne enga yocuniri chojmára jne iji jnumi.

¹⁷ Mu jetiga etácho yocuruode, yoquisocade udojo, enga a yico jne iji de uacaniri enga a yoquẽro nóna yoque to jne aja yocajesúrique.–

¹⁸ Enga Hamor, ujnacari Siquem ore chajnai ore uruode enga ore chojninga: –Jé areque. Yaquesúgo yocaoi to jne iji yocujñungunguenie gáyode, jé aja yocurasade uyoque jnese.–

^19-20 Enga Siquem que chajirape cuchárique. Jĩraque jno ga jé u uje ore chica aoi iji ujñungungué gai to. Chamáñaje potapísa Jacob uro gu ujetiga chóji gari ga cho dacoté iji. Enga obiréjnapise Siquem ome dai Hamor iguiosode ore jnese, jecute ore tangaripísi ome cuchade. Enga jé u nanique uje uté nóna dai aja ore idai ajéjonguei uje joride déji ajei yui, enga jnanione jecucha ga ore taquiri ñane iji uje ore catecã́ri ñane.

²¹ Enga e catecã́ri jnanione ore iji uté enga chojningame ore: –Quene yiríngoji Jacob urasade ore uje yicatecãcoi ore. Ga yimáco yocáyipiedie ome ore ujetiga ore chácariji yocuniri enga yicoi oredie ome uñane ugúchade iji de jne. Uacarajáyo arĩ́e uje querújnapise yocuniri udé ujetiga ore chácariji to enga ore cho daniri iji to. Enga e yoco ñane iji jnumi jetiga yisago ñane urodie, enga yoco yocacoté iji ñane urodie.

²² Mu qué cucha uñai déji ome yoque, jeta yicoi ore isocade to uje ore chica dajñungunguenie aode iji gáyode. Ujetiga jnanione, jnacarode yicoi ore isocade to, jé aja disiode uyoque jnese, enga jé u jne jeta e yitojmárango iji jnumi ome ñane.

²³ Jetiga yicoi ore isocade mu a yarángo ore jne, enga jé upo ore ugúchade rĩ jeta yimáco aja yoque jne, jé aja ore gachite dipeséode to rĩ jetiga déji yoque jne. Jetiga e diyajmanguipise ore iji de, enga a yujnuéngo ore gai jne.–

²⁴ Enga jnanione udore ore jnese ore chimesẽre Hamor, Siquem ore áyipiedie jnese. Enga jé u uje ore chica ore aode iji dajñungunguenie gáyode to, enga ore chátaja jnacaripísode ore to uje e ore chise dáringai pocaningane gaisóño to.

²⁵ Mu uje dirode e gadioc iji yui uje ore chica daode iji dajñungunguenie gáyode enga Dína dajade Simeón, Leví ore cugujnáji ore idai enga ore chijna queséode enga jé u uje ore cugujnáji ore iji ore idai údode. Enga ore chujé jnanione ore jnese, jé aja jnacarode ore. Chamáñaje qué urõsópise ore icapídode gu iji ore ujñungungué gáyode gu, enga que toc ujetiga ore chisa dejórigo ome ore.

²⁶ Enga ore chejnapise Hamor, ujnacari Siquem ore jnese ome daqueséode, enga ore jno nero Dína údi iji ore gari.

²⁷ Enga Jacob ujnacarode uñane di iji ore jocaningane quigade enga jé u uje ore doi ore yu casodé enga chajnose ore ome ore ugúchade jnese. Chamáñaje jnutaque ore gu ome nero Dína uje Siquem chisa bisideque gu.

²⁸ Enga ore jno ore gachidedie áyasai údi jnese, jé aja aquirájnanie, jé aja burica quedéjnane ore jnese; ajéjogonórone ore gachidode, jé aja ore idai eruéyuminórone ore gachidode jnese to rĩ.

²⁹ Enga ore chacája ore iguíjnane ajéode jnese enga ore jno ore iguíjnai ajéjogosórone cucha údi jnese; ga ore jno ore acotedie, ore abode ore údi to jnese ujetiga ore cho daróguiji ore.

³⁰ Enga jé u uje Jacob catecã́ri dajnacarode Simeón, Leví ore ome ore adode to enga chojningame ore: –¿Gotique gu a uje uaquejnáño ore jnese? A jnutaque Canaán jogosórone uñane ome yoque to jne, cananéogosode, ferezéogosode ore. Enga a ore chejna yoque to. Uacamóño uje garósi yoque ga jiei ore. A ore chujé yu jne enga ore chátaja yijogasui uaque jnese.–

³¹ Mu ore chajnai dai uruode enga ore chojningame dai uruode: –¿Ama ca gajnaréngome ua to a uje yoquẽro ipotigásõri uté cho dibéchoquíji yoquẽro uaté?–