Génesis 19 - Dupade Uruode

Dupade chejna ore idáyode Sodóma, Gomórra ore nanique ome pioque cuchábi

¹ Enga guedé e chaca ga tota erámi uje Dupade iroque gárode udore ore chise ore idáidatéi Sodóma. Enga Lot qué chácariji ore ujuyaquei ejórique iji joride uje jecucha ore ate, jnanione, uje ore chimáta ñane iji uté charidi to. Enga jé u nanique uje Lot chimo jnani gárode udore enga chague jmame enga chichaga dagataidie aja jnumi, enga chichagápo dacuruté taja jnumi rĩ uje imoi tu gu uje nína re ome ore yui.

² Enga catecã́ri ore enga chojninga: –E yijócha uacajéode údi, ujetiga amóñomíji yiguíjnai iji dejai tudé. Ajínaño yu aja yiguíjnai enga aruyo uacarídade iji uté. Enga a chise dire uñeque jne ga boyopo jne rĩ aja uacajesúrique.– Mu ore chajnai Lot uruode enga ore chojninga: –Yocacaranguipise uje banejéna yoque aja baguíjnai, mu a yimóngoji guetique jne iji dajéreraque iji guidai tudé ajénique jne.–

³ Mu Lot jé chajo raja uje catecã́ri ore enga jé u uje ore nóna aja iguíjnai. Uje e ore chise Lot iguíjnai enga jé u uje pésu dabose unérone ome ore, ga pésapo arurégode rĩ uje íjnoque bisidi iji, enga jé u uje udore ore taguíji iguíjnai.

⁴ Mu cáma jnanione udore ore mopise. Qué ore niji iji jnumone, ga ore chudute ore ichorai uje ore chaparu Lot iguíjnai gai. Enga guidai idaisórone jnanío ore déji jnese; jnani choquíjnane, jé aja jnanione, jnacarode, ore déji jnese.

⁵ Enga ore chinguíra dabijnanone aja Lot, enga ore chojninga: –¿Déji rique jnanione udore uje ore moji baguíjnai iji dejai tudé que? ¡Be udore ore, enga ajna ore aja yoque, enga yungacója ore!–

⁶ Enga jé u uje Lot doi guesi tiji daguíjnai ga suru daquigade enga que toque ujetiga ore chacája ajei.

⁷ Enga Lot chojninga: –Yijorane uaque á, jé dobíji. Uacarajáyo uje gajnarenguipise uacáyipiedie quigode udore.–

⁸ Enga Lot chojningápo rĩ: –Yurodie déji de uje gare ore uje cáma jnacánique nóna ore. A yiji ore jne enga yisi ore ome uaque ujetiga angachója ore. Chamáñaje yinejerãte jnani gárode ore gu aja yiguíjnai, enga a ca yujuéga ore jne ujetiga angachója ore.–

⁹ Mu ájningarãque ore ome Lot uruode udore enga ore chojninga: –¡Ajose ti iji piagoi! Yicoi ore jne. Cachi purása quedéjna ua arĩ́e iji yocujade enga que ajnué yoquibai. Que toc ujetiga yangácoi uje baquĩ́ra yoque. ¡Eti ca ajose ti iji piagoi enga yungacója ua to, enga datéringa jne!– Enga jé u uje ore cugujnáji Lot nanique ujetiga ore chuchẽre piagoi gai.

¹⁰ Mu jé u uje jnani gárode udore ore doi Lot nanique enga ore chisa enga ore chijna aja iguíjnai ajei. Ga ore suru dabai iji guiguíjnai ajei.

¹¹ Enga jé u nanique uje jnani gárode udore ore chisi ome dajopié ome ore iji guesi ga jé u uje edoparique ore. Enga jé u nanique uje edoparique ore enga jé chuságaja ore jnese: jnanione, jnacarode, choquíjnane ore jnese ga que imótique cuse iji ore. Mu e edoparique ore mu jé ore chajo raja joride uje ore chucué jórogui. Mu quigade enga ore cha ore chucué joride uje que togome ore gu ujetiga ore chise.

¹² Enga jé u nanique uje jnani gárode udore catecã́ri Lot enga ore chojninga: –¿Ama baguiosode uñéngo déji de? Aguito, enga boyóji guidáidatéi tudé enga idája uáguiji guidai tudé, enga aroque bajnacarode, barodie, basarane ore aja baquigade jne jeta boyo.

¹³ Chamáñaje e idógosi jeta yejnángopíse guidai udé, idaisórone ore jnese. Chamáñaje e jiépisi picatecãraitigade ome Dupade ome guidai udé idaisórone ome ore ipesútedatéode cucha gajnarécho gu. Jecute Pangarádejnai Dupade chiroque yógaja de ujetiga yejnángo guidai tudé, idaisórone ore jnese.–

¹⁴ Enga jé u uje Lot que chajirape cuchárique ome daro amanachuguedie, dasarane ore mu chicáji ore iguíjnane enga catecã́ri ore enga chojninga: –¡Ayágueyo ga yico! ¡Chamáñaje Pangarádejnai Dupade a chejna guidai tudé jne gu!– Mu que Lot dasarane ore tangári uruode gu uje ore chotigase uruode.

¹⁵ Mu e direjnipe mu Lot, ore qué déji guidai ajei. Jecute Dupade iroque gárode udore ore chijócha ajei údi enga ore chojninga: –Aguito ga bo ga bacoté, barodie uñanie nóna ua aja bajesui. Ujetiga ca boyo enga a Dupade ujuyaquei chise uáguiji de to ga chejna uaque to.–

¹⁶ Mu jé ate uje Lot que jno gotique. Ga jé u uje jnani gárode udore ore doi ga ore chisa aja guesi tiji ore idai eruei. Chamáñaje Pangarádejnai Dupade chijnorapise Lot gu. Mu que gusu Lot mu ore jnopo urodie, acoté ore údi to rĩ ujetiga ore eca to ome Dupade ujuyaquei.

¹⁷ Mu uje Dupade irógode ore chimate ore aja ore idai eruei enga udore uñai chojninga: –¡Boyo enga ayóyopise enga acugujnáñoji cucarani yui! Ca abaso iji yui enga ca ajicho uacaquigade rĩ. Yigaidi tu gu ujetiga idájapise uáguiji ore idáidatéi udé ujetiga Dupade ujuyaquei di enga ca chejna uaque to.–

¹⁸ Enga Lot chojninga: –¡Úngare! Yijócha bajei údi jeta ca aroque yu aja cucarani uté.

¹⁹ Enga yacaranguipise uje paraguipise uágome yu. Enga uacaquetáyo yu ome Dupade ujuyaquei. Mu que togome yu jetiga yicáji uacojningai cucarãte uje idájapísiji yu. Cachi Dupade ujuyaquei chise yu iji yui gu ga yitoji yui.–

²⁰ Enga Lot jno daruode údi ome Dupade enga chojninga: –Guidáyabi ajámami idógosiji yoque. Ajuéga ga yicáji uté enga a yiqueca iji jne, uje bamo uje que idáidaté gu.–

²¹ Enga jé u uje jnani gárode uñai catecã́ri Lot enga chojninga: –E yangári baruode. A acáji ore idáyabi jne enga a ca yejna ore idáyabi suté to jne. Enga a aqueca iji jne.–

²² Enga chojninga: –Bo enga ayópise aja yui. Enga a ca yiroque Dupade ujuyaquei taja suté jne. Bamo gu uje que toque jeta Dupade chejna ore idáidatéi udé uje qué bagúsiji ejoi gu. Mu ujetiga ese ore idai ajámami jne enga quene u jne ujetiga Dupade ujuyaquei chejna ore idáidatéi udé.– Enga quigade ga ore chĩ́care Zoar aja guidáyabi suté uje Zoar uruode qui tu uje ajámape gu.

²³ E dire uje Lot ore chise guidáyabi suté.

²⁴ Jé u uje Lot ore chise ore idáyabi ajei ga jé u uje Dupade chejna ore idáyode Sodóma, Gomórra ore ome pioque cuchábi. Enga pioi nóna cucha ai iringóric aja jnumi.

²⁵ Enga pioi chejnápise ore idáyode aja idaisórone ore jnese. Enga guesa ore idáyode ujárique nanique enga ore acadie cucha déji, mu pioi tagu ore idáyode ujai aja ñane, enga chejna ore acadie cucha jnese.

²⁶ Enga angoninguite paré Lot acoté. Enga ore jno mu uaté chajire daquigade enga jé u uje nóña ga echuné uaté enga catáji gaté enga que cṍra.

²⁷ Uje qué durasé iji dire uñai enga Abraham chicapóji uquécasé rĩ uje chijócha Pangarádejnai Dupade ajei údi iji diríca.

²⁸ Enga Abraham chajire guidáidatéode Sodóma, Gomórra ore gai mu chimo úyujnadaté uje chicáji gaté. Enga úyujnadaté jé chuságaja cucarani údi.

²⁹ Yujúdode udore u Dupade uje ujuyaquédatéi pioque chejna guidáidatéode udore nanique uje Lot cho daniri iji to nanique, uje guidáidatéode udore déji cucarani ejode nanique. Mu yujúdode udore upo rĩ uje Dupade tangári Abraham nanique enga Dupade chijnime Abraham ujnacare uñai iji dejnane udore ore idáyo nanique.

Moábgosode, amóngosode ore gãrapíode u Lot urodie abode uje ore dai icai u ore abode udore nanique

³⁰ Mu udojo quigade enga pisadodéringai chise Lot ore iji ore idáyabi Zoar, enga ore chajniápo rĩ mu ore chicáji cucarani. Enga Lot urodie ore nóna dayé enga ore chise cucarani edóraque enga ore cho daguíjnai iji cucarã́tedó enga ore moji.

³¹ Mu chise diri uje Lot urodie ore catecã́ri ñane. Enga uro urẽja catecã́ri nena enga chojninga: –Gusu yóguiji de uje que jnacánique cunguésõri yóguiji de ujetiga yisago yocamaníngo iji ore. Gusu yocai enga e choquíjnapise.

³² Mu yicoi yote pioi enga yipéco ome yocai jetiga chóji enga ũruso jne. Enga yimóngo iji gari enga yocatígo cuse jne.–

³³ Jé u iji dejai gajiné enga ore chṹraja dayé ome yote pioi jetiga chóji. Enga uje e ũrusópise enga uro urẽja moji gari. Mu dayé ũrusópise ga que chiraja uje uro moji gari, que chirajápo rĩ uje jno.

³⁴ Uje dire uñai u enga Lot uro urẽja catecã́ri nena enga chojninga: –Bamo uje yimóji yapade gari que iji dejai tuqué, enga a ua u gajiné ujetiga amóji gari iji dejaque ejoi tudé. Yicoi enga yúrangopo yote pioi taja jne rĩ, enga a ũrusópo rĩ iji dejai tudé gajiné. Ga a jé u jne ujetiga yocatígo cuse jnese.–

³⁵ Enga ore chaningára yote pioi aja dayé iji dejai gajiné, enga uro ejo moji dayé gari. Mu jé ate. Yote pioi chujépise Lot, jecute que chiraja uje uro ejo moji gari, que chirajápo rĩ uje jno.

³⁶ Ga jé u uje Lot urodie chujã erámi enga ore icadie déji ore ajéode jnese uje ore dai icai u uje déji ore ajéode.

³⁷ Uje Lot uro urẽja abi base enga ore chĩ́care Moab aja. Enga moábgosode iji dirode udojo ore gãrapi jé u uté nanique.

³⁸ Enga diyoqui Lot uro ejo abi to nanique enga ore chĩ́care Benámi aja uté nanique. Enga amóngosode iji dirode udojo ore gãrapi tu to.