Génesis 18 - Dupade Uruode

Dupade chingo Abraham uje a jeque acoté Sára jne enga ore abi basíji sequeré ejo jne

¹ Enga chise cucha dacadode udojo quigade nanique enga jé u nanique uje Pangarádejnai Dupade chiquetápo raja Abraham nanique rĩ. Enga qué Abraham ore déji darengúi tiji atetadie nanique uje atetadie gajnengõri i tu Mámre nanique. Enga chise guedé gatócoro nanique enga Abraham chácariji daguíjnai cárpa uburúdi nanique.

² Enga Abraham chajire daquei nanique mu chimo jnani gadiógode iji daquei. Enga Abraham chague jmame enga chachai ore. Mu chise ore enga chichaga dacuruté taja jnumi iji ore iquei, ga imoi u gu nanique uje nína ore yui.

³ Enga jé u nanique uje narare enga chojninga: –Ayoré díode, uaque á, ca boyope jne mu ácayope garósirique jne.

⁴ Ujetiga uacajéo ga ácayobíji poridie uburúdode enga yirógode ore dobi yodi ome uaque jne enga aruyope uacarídade jne.

⁵ Uje e uacaríño iji yiguíjnai tudé ga ajuéchome yu ujetiga yipésu uacabotígo jne jetiga uajate uágaja uacajesui jne.– Enga ore chajnai Abraham uruode enga ore chojninga: –Jé areque. Yácagope jne.–

⁶ Enga Abraham chacája daguíjnai cárpa údi enga catecã́ri dacoté Sára enga chojningame: –Aguito ga be harína jetiga chise 20 kílos enga apésu arurégode iji ome jnani díode ore.–

⁷ Enga Abraham chayója aquirájnanie pié enga chijnime dajegaidé aquirájna iji ujodie aquirájna ujai uje ípiso gu. Enga jé u uje chojningame darógode uñeque: "Be udaque enga ajé jne enga ore tagu to jne."

⁸ Que gusu aquirájna arione uje ore tagu mu chátapója aquirájna irisode íode to rĩ. Enga jé adi tu uje Abraham chisi ome cuchade ome ore jnese ujetiga ore tagu dajegaitígo iji. Enga ore taguíji guesi iji poridie uburúdode.

⁹ Enga uje e ore cha chagu ga ore catecã́ri Abraham enga ore chojninga: –¿Bacoté Sára déji rique a?– Enga Abraham chajnai ore uruode enga chojninga: –Déji yoquiguíjnai cárpa údi.–

¹⁰ Enga jnanione udore uñai catecã́ri Abraham enga chojninga: –A qué yĩriápo iji sequeré uñáraque jne rĩ jetiga bacoté atique cus.– Mu uje qué Abraham, ore catecã́ri ñane enga acotábia Sára tangári ore uruode iji quedéjnai ome ñane iji iguíjna cárpai ajei.

¹¹ Uje e iyajmaque nanique uje Sára iyode cha. Enga e gatápise, enga jé chopo abai te rĩ, choquíjnapise to.

¹² Jecute Sára cana mu suru dabijnani ujetiga ca ore chudute ajñane. Enga chojningame re: "¿Jé yoco ringome jne jeta yabai chisapo yejode jne rĩ? Chamáñaje e choquíjnape yabai gu. Jé cho yu to, gatápise yu to."

¹³ Mu Pangarádejnai Dupade chirajapise Sára adode enga chojningame Abraham nanique: –¿Gotique gu a uje bacoté Sára cana yuruode gai que? Ise ga ca changureta yuruode gu ujetiga atique cuse jne uje a aníri u gu uje e gatápise.

¹⁴ ¿Ama cucha ibiratique déji ome Dupade ujetiga ca pésu a? Enga a yĩriápo iji uaque jne rĩ iji sequeré ejo enga a amóño jne ujetiga bacoté Sára atique cus.–

¹⁵ Mu Sára qué tangári ore iji quedéjnai enga uje chudute Dupade uruode udore enga todópisa enga tãrara enga tibite enga chojninga: –¿Ama yingana ome uaque a?– Mu Pangarádejnai Dupade chajna uruode enga chojninga: –Yirajapise uje bangana yuruode gai.–

Abraham catecã́ri Dupade enga chaquĩ́ra jóroque ujetiga ca chejnápise guidáidatéi Sodóma jne

¹⁶ Udojo quigade ga jnani gadiógode udore ore chague enga ore jno. Enga ore chajna dajei aja guidáidatéi Sodóma yui. Mu Abraham chague to enga qué nóna ore aja ti.

¹⁷ Mu uje qué Abraham, ore nóna ñane aja te enga Pangarádejnai Dupade chojningame re: "A yingórasa Abraham yipesutique cucha ome uje a yipésu iji ore idáidatéi tuté jne.

¹⁸ Uje que cucha bisideque Abraham gu. Jecute a yingo yáyipiedie aja jne uje gajneque yuruode gu. Uje e yingome uje ape disi ejórigo ore gajneque puniri uté jne enga a jiépisi ore iji jne enga ore cho dají jnese jne. Enga que gusu udojo mu a erámi unirisórone ore jnese ore chagutíyame uté ape disi ejórique jne. Enga a yátapísaja ape disi ejoi uté anguresórone ore jnese jne.

¹⁹ Enga yajegaite Abraham uté gu jetiga chingópisa yuruode aja abode ore to, enga ore chajnerame dape gatérigo to jne. Yigaidi tu gu ujetiga ore doi yojningane cucha jnese enga ore atígo omío jne. Ujetiga Abraham, ape disi ejode ore doi yuruode, enga jé basa ga a yiji yuruode to uje yatatame Abraham diríca."

²⁰ Enga jé u nanique uje Pangarádejnai catecã́ri Abraham enga chojninga: –Abraham á, a e adute to uje Sodóma idaisórone ore pésu pisijnaringuédatéode. Enga jé chopome Gomórra idaisórone to rĩ, ore pésu pisijnaringuédatéode rĩ.

²¹ Enga a yicabíji ore idáyode jne enga a yajirape jne ujetiga ũrepise ore ujnoméone.–

²² Enga jé u uje jnani gárode udore qué ore jnome daqui Sodóma yui, jé basa ga Abraham, Pangarádejnai qué ore catecã́ri ñane iji dayaridi.

²³ Mu Abraham qué chose Pangarádejnai yui enga catecã́ri ga chojninga: –¿Ama, ejna sijnángone ore enga jé átaja parágode iji ore ujade a?–

²⁴ Mu Abraham qué catecãrápoi Dupade rĩ enga chaquĩ́ra jóroque enga chojninga: –Eti jnani parágode ore chise 50, ¿enga jé ejnárase ore jnese a? Úngare, ca bajuyaquérique chejna guidai jnese jne. Chamáñaje jnani parágode ore, a ore chise 50 gu iji ore ujade jõ.

²⁵ Que toc ujetiga ajé pisijnaringuéone ipesusórone ga áta jnani parágode ore aja ñane. Uje parágode que ore pésu cucha gajnarétique gu. Ua u gu ujetiga ajire erámi unirisórone yocatígo aja quitígo jnese jne enga a ũrepísi tu ua ome bajiritigade udore jne. Enga a ca orase bajuñame ayorérique bisideque jne. Enga que eduguéjnai uñeque sué babai uje eduguéjnapise ua gu ome ore jnese.–

²⁶ Enga Pangarádejnai Dupade chajnai Abraham uruode enga chojninga: –A ca yejna uyu aja guesi jne ome guidáidatéi Sodóma idaisórone jne ujetiga jé ũré ua enga jnani parágode ore chise 50 iji ore ujade.–

²⁷ Enga Abraham qué catecãrápoi Pangarádejnai Dupade gaté rĩ enga chojninga: –Yiraja uje ayoré gajnareque yu, jé basa Dupade pujnuéngaisṍri tu ua. Mu a qué yijóchapo bajei údi gaté jne rĩ.

²⁸ Que yimo ujetiga taque yu. Ise mu jnani parágode chise 45 iji ore jõ. ¿Mu ama jé ejnárase ore a, guidáidatéi idaisórone jnese a?– Enga Pangarádejnai Dupade chajnai Abraham uruode enga chojninga: –Jé u baruode. Jetiga jnani parágode ore chise 45 iji ore idai enga a ca yejna ore jne gu jnani parágode udore iji ore ujade.–

²⁹ Mu Abraham jé ate. Qué catecãrápoi Dupade gaté rĩ enga chojninga: –Taque yu. A jnani parágode chise 40 iji ore ujade.– Mu Pangarádejnai Dupade jĩraque chajnai uruode enga chojninga: –Ujetiga jé ũré ua enga jnani parágode ore chise 40, enga a ca yejna ore jne gu jnani parágode udore iji ore ujade.–

³⁰ Mu Abraham qué catecãrápoi Dupade gaté rĩ enga chojninga: –Jé ca barúrique gajnaréngaja yu jne uje jecucha ga yijáro yuruode iji jnumi ome ua. Mu a qué yijóchapo bajei údi gaté rĩ. Ujetiga jnani parágode ore chise 30 ga ¿jé o ringome ore jne jeta ejna ore?– Mu Pangarádejnai chajnápoi Abraham uruode rĩ enga chojninga: –A ca yejna sijnángone ore gu jnani parágode udore ore iji ore ujade jne ujetiga ore chise 30.–

³¹ Mu Abraham que cha chijócha Pangarádejnai Dupade ajei údi enga chojninga: –A e acho uje jecucha yijócha bajei údi jõ. ¿Mu jé o ringome jne a, ujetiga jnani parágode ore chisápo 20 rĩ iji jnani sijnángone udore ujade?– Enga Pangarádejnai Dupade chojningápo rĩ: –A ca yejna sijnángone gu parágode udore jne iji ore ujade ujetiga ore chise 20.–

³² Mu Abraham qué catecãrápoi Pangarádejnai Dupade gaté rĩ enga chojninga: –Yijáro yuruode iji jnumi ome ua. Mu ca yuruode pésu bajuredie jne. Enga yicatecã́ri ua, enga jé gusu yuruode jne. ¿Jé o ringome guidai uté unirisórone jne a, eti parágode ore chise 10 iji sijnángone ore ujade?– Mu Pangarádejnai chajnai uruode enga chojninga: –A jé ũré ua enga parágode ore chise 10 jne iji jnani sijnángone ore ujade enga a ca yejna guidai unirisórone gu jnani parágode udore jne iji ore ujade.–

³³ Mu Pangarádejnai Dupade chejna daruode udore aja guesi enga jec u uje jnoji Abraham gari. Ga jé u uje Abraham chajni to enga chicáji daguíjna cárpai yui.