Génesis 13 - Dupade Uruode

Jnani bajai Abram, ujnacare uñai Lot ore cãra dajogadode ome ñane nanique

¹ Uje Abram jnoji ore uniri Egípto nanique rĩ enga ore chajnésaru daquigade aja ore uniri Neguev ejode. Enga acoté, ujnacare uñai Lot, irógode ore nóna jnese.

² Abram uté ugúcharánguipíse nanique. Enga órodie déji gari to, jé aja cucarané nanganatáguedie uña to uje i u pláta. Enga jé cho gachidode cucha to, uje jiépisi.

³ Mu ore jnopóji ore uniri Neguev ejode rĩ enga jé ate, quĩrique ore jno, ore jno enga ore chicáji ore idai Betel. Enga ore chisápo darengúi bajai te rĩ uje déji cucarani eruei uje ore irengúi uté déji guidáidatéode ore ujai uje guidáidatéode uñai i u Hai, jé basa ga uñai i tu Betel.

⁴ Enga jogadi tu nanique uje Abram pésu daserani iji nanique uje catecã́ri Dupade iji nanique.

⁵ Enga Lot chopise daquerámi Abram to ome dagúchade uje ugúcharã́que to nanique. Enga jiei gachidedie, aquirájnanie aja áyasadie. Enga irógode jiépisi ore to uje ore nóna aja ajesúode.

⁶ Enga ore chise darengúi uté mu jnacarai chona ore gachidode cucha. Ore gachidode sué jnacarade gai gu. Enga ca toguírase nanique jetiga Lot nonapo daquerámi Abram nanique rĩ uje ore gachidode cucha jiépisi gu.

⁷ Enga chise diri nanique uje Abram, Lot irógode ore botare ñane ome uraque darósorone gachidode cucha posode enga jé u uje ore doi dajocaningai ome ñane. Mu que gusu Abram, Lot ore nanique mu cananéogosode, ferezéogosode ore déji to, enga ore umajo Abram, ore nanique.

⁸ Enga chise diri nanique uje Abram catecã́ri Lot enga chojninga: "Cachi yoquiguiose ñane arĩ́e. Ga gajnareque ujetiga bachidode irodisórone ore, jé aja yachidode irodisórone ore rĩ ore chujé ñane. Enga gajnareque to jeta yibotáco ñane ome ore isocade udore."

⁹ Enga qué jno daruode údi ome dajnacare uñai enga chojninga: "Cachi querújna jnumi arĩ́e. Be baquitíguiji. Jeta apota enga acáji casaque garani enga yicáji umusoi garani. Jeoga acáji umusoi garani enga yicáji casaque garani. Be baquitíguiji cuchade udojo."

¹⁰ Enga jé u uje Lot chajire erámi bajac. Enga chajire garáijnai uje tuijnai déji enga chichaga raja tié Jordán iji ta enga garai qué jnome uéchai jec aja idai ajámami uéchai te rĩ uje idai tuté i u Zoar. Enga yodi jiépisiji garai údode. Ga garai uerate. Ga ueradipise ga jé chacãra puniri Egípto ome úringai ueradipis. (Mu úringai uerate bijna ome uje Dupade cho dajuñame guidáyode Sodóma, Gomórra ore nanique. Chamáñaje Dupade guejnane guidáidatéo udore idógosiji garai tuté gu nanique.)

¹¹ Jecute jnani bajai Lot ajegaite garaidatei uté uje chuságaja tié jochai uje i tu Jordán. Enga garai uté déji ore irengúi uéchai iji guedé garani dosadi nanique. Enga jé u nanique uje Abram, ore cho jmíti, jmíti ome ñane nanique.

¹² Mu Abram qué chácariji ore unire bajai uje i tu Canaán. Mu Lot jno ga chicáji ore uniri uñai enga chise ore idai uñai uje i tu Sodóma enga pésu darengúone iji ejode. Mu que gusu Sodóma uje déji garaidatei ejoi nanique mu ore idáyode uñane déji Lot jogadi tuté ejode to.

¹³ Mu guidáyode udore idaisórone ore adode gajnarenguipíso nanique. Enga Pangarádejnai Dupade chetaguipise ore adode nanique.

¹⁴ Udojo quigade uje Lot e jno nanique enga Pangarádejnai Dupade catecã́ri jnani bajai Abram nanique. Enga chojninga: "Abram á, ajire casaque garani, ajirápo rĩ umusoi garani. Ajirápo rĩ guedé cacadi, ajirápo rĩ guedé garani.

¹⁵ Bajirigode udore barosacho a bajneque jnese jne enga jé chopome bape disi ejórigo, a ore gajnecho jnese to iji deréjna pitade."

¹⁶ Enga Dupade chojningápome Abram nanique rĩ: "A yipésu bape disi ejórigo ore jne enga a ore cho jnumi urui jne uje a jiépisi ore jne. Bamo uje que ayorérique déji uje chiraja jnumi péode jnese. Enga jé chopise bape disi ejórigo ore to jne jetiga ca pisecarãte ore iji erámi údode jnese to."

¹⁷ Enga Dupade nararápo rĩ enga chojninga: "Abram, ayague ga ariguiji jnumi tuté umaningai ga jé chopo pajei te rĩ, ga arigapóji to rĩ. Enga a yẽra jnumi tuté ome ua jnese jne."

¹⁸ Uje Abram chudute dajnéone udore Dupade urúo, enga jé u uje ore chijócãraja dagúchade enga ore chimate dagúchade enga jé u uje ore jno. Enga jé u uje ore jno, ore jno, ore jno enga ore chise ateta enga ore chicha darengúi taja. Enga ateta tuaté gajnengónique cuse uje i u Mámre, mu juéga dajné tuaté, ore ateta ome ore. Enga idógosiji ore idáidatéi Hebrón uté nanique. Enga Abram pésapo daserani iji pijogadi uté nanique rĩ jetiga catecã́ri Dupade iji to nanique.