Génesis 11 - Dupade Uruode

Babélgosode ore ajéode u ujetiga ore chiro cototé nanique ujetiga idája iji gaté yui

¹ Mu udojo taningai nanique uje cáma ore chisite rágaja quedéjnane enga ore uruode chojmára nanique.

² Enga ore uniri déji guedé garani nanique, mu ore jnoji uté uje i tu Sinar. Enga ore cho daniri iji uté to nanique.

³ Enga chise diri nanique uje ore catecã́ri ñane enga ore chojninga: "Yicoi ga yipéco ladríllode enga yiboco enga etoguipíso jne." Enga jé u nanique uje ore cha cucaranenie nanique ga ore pésu cuchade ome ladríllode. Enga ore cha chimera cuchade iji ñane ga ore chedu cucha otate utatai uje tṍraji jnumi ome dapesudode cucha. Enga uje ore chujé ladríllode aja ñane enga catapísaja ñane ome cucha otate judui tuté.

⁴ Udojo quigade nanique enga ore catecã́ri ñane enga ore chojningame ñane: "Yicoi ga yipéco yoquidáidatérique jne, enga a yirógo cototé tuaté aja gaté jne enga idája iji gaté yui jne. Enga a ujnomerãque uyoque jne iji yoquidai udé jne ome yoquipesudé cototé uaté jne. Enga a jé yoquijogate jne, enga a ca toque ujetiga uñeque chajuque yóguiji ñane. Chamáñaje gajnareque ujetiga yisíco yógaja quedéjnane enga yoco jmíti, jmíti ome ñane."

⁵ Enga Pangarádejnai Dupade doi jnumi nanique ujetiga chajirápo jnanione udore ore ipesudé cototé rĩ uje qué ore chiro.

⁶ Enga Dupade pésu dáyipiedie ome ore nanique enga chojninga: "Jnanione udore ore cháta raja ñane iji jnumi, enga jé chopo ore áyipiedie rĩ, chojmárapo to iji jnumi rĩ, enga jé chopo ome ore uruode rĩ, chojmárapo to rĩ iji jnumi. Jecute e ore chiro dapesudé cototé aja gaté, enga a ca toque ujetiga paquĩraque ore ome dapesudé. Mu a ca gusu ore ipesudé cototé mu a ore pésapo dáyipiedie ome dapesudode cuchadatéo uñane jne rĩ."

⁷ Ga Dupade doi nanique enga catecã́ri re nanique enga chojninga: "Yicoi ga yicagoi jnumi yui enga yĩrongo ore uruode jne ome ñane enga a ore uruode cãra rome ñane jne. Enga uñeque a ca chirajápo dajõrárique uruode jne rĩ iji ñane."

⁸ Enga jé u nanique uje Pangarádejnai Dupade chisite ore aja quedéjnane nanique enga ore cha dora tuaté cototé nanique enga ore chapo cucha pipesudode uñane rĩ uje ore pésu iji dedáidatéi tuté nanique.

⁹ Enga ore idai uté i u Babel nanique. Enga erámi unirisórone ore idai u uté jnese nanique iji taningai. Enga guidai tuté jé upúsu nanique uje Pangarádejnai Dupade chĩro ore uruode iji ñane nanique enga jé u uje que ore chirajápo uñane urúrique nanique rĩ. Pésu gu ujetiga ore jnoji dedai enga ore chisite ráguiji quedéjnane ome ñane.

Noé ujnacari Sem ape disi ejode íode u udojo

¹⁰ A qué yatataba Noé ujnacari Sem ape disi ejode íode ome uaque. Enga sequeredie gare nanique iji gue dequejnangóri quigade uje Sem abi Arfaxad base nanique. Enga Sem guejnanie sequerei e chise 100 nanique uje abi tuté base nanique.

¹¹ Mu iji abi uté quigade nanique enga guejnanie sequerei chise 500 nanique uje Sem quene topísi to. Mu que gusu abi Arfaxad to nanique mu ape ejode cusapo rĩ enga diyoqui uñéngo, jé basa diyequé uñanie.

¹² Enga Arfaxad guejnanie sequerei e chise 35 nanique uje abi Sála base nanique.

¹³ Mu iji abi tuté quigade nanique enga guejnanie sequerei chise 403 nanique uje Arfaxad quene topísi to. Mu que gusu abi Sála to nanique mu ape ejode cusapo rĩ enga diyoqui uñéngo, jé basa diyequé uñanie.

¹⁴ Enga Sála guejnanie sequerei e chise 30 nanique uje abi Heber base nanique.

¹⁵ Mu iji abi tuté quigade nanique enga guejnanie sequerei chise 403 to nanique uje quene Sála topísi to nanique. Mu que gusu abi Heber nanique mu ape ejode cusapo rĩ, enga diyoqui uñéngo, jé basa diyequé uñanie to.

¹⁶ Enga Heber guejnanie sequerei e chise 34 nanique uje abi Peleg base.

¹⁷ Mu iji abi tuté quigade nanique enga guejnanie sequerei chise 430 nanique uje quene Heber topísi nanique. Mu que gusu abi Peleg nanique, mu ape ejode cusapo rĩ, ga diyoqui uñane, jé basa diyequé uñanie to nanique.

¹⁸ Enga Peleg guejnanie sequerei e chise 30 nanique uje abi Reú base nanique.

¹⁹ Mu iji abi tuté quigade nanique enga guejnanie sequerei chise 209 uje quene Peleg topísi to nanique. Mu que gusu abi Reú nanique, mu ape ejode cusapo nanique rĩ, enga diyoqui uñéngo, jé basa diyequé uñanie to nanique.

²⁰ Enga Reú guejnanie sequerei e chise 32 nanique uje abi Sérug base nanique.

²¹ Mu iji abi uté quigade nanique enga guejnanie sequerei chise 207 nanique uje Reú quene topísi nanique. Mu que gusu abi Sérug nanique, mu ape ejode cusapo rĩ enga diyoqui uñane, jé basa diyequé uñanie.

²² Enga Sérug guejnanie sequerei e chise 30 nanique uje abi Nacor base nanique.

²³ Mu iji abi uté quigade nanique enga guejnanie sequerei chise 200 nanique uje Sérug quene topísi to nanique, mu que gusu abi Nacor nanique mu ape ejode cusapo rĩ, enga diyoqui uñane, jé basa diyequé uñanie.

²⁴ Enga Nacor guejnanie sequerei chise 29 nanique uje abi Taré base nanique.

²⁵ Mu iji abi uté quigade nanique enga guejnanie sequerei chise 119 nanique uje Nacor quene topísi to nanique. Mu que gusu abi Taré nanique, mu ape ejode cusapo rĩ enga diyoqui uñane, jé basa diyequé uñanie to.

²⁶ Enga Taré guejnanie sequerei chise 70 nanique uje quene abode cuse nanique. Enga gadioque uté ujnacarode nanique enga ore íode u udojo: uñai i u Abram, jé basa uñai i tu Nacor, jé basa uñai i tu Harán nanique.

Jnani bajai Taré ape disi ejode íode u udojo nanique

²⁷ A qué yatataba Taré uté ape disi ejode íode ome uaque jne. Yojningai Taré uté u uje ujnacarode u Abram, Nacor, Harán ore nanique. Jnani bajai Lot dai tu Harán uté nanique.

²⁸ Enga Harán uté toji ore idai Ur nanique uje ore idai Ur uté déji ore uniri Caldéa nanique. Mu dayé Taré qué eca nanique uje uté toi nanique. Ga Harán batigai u Ur nanique mu jé topóji rĩ iji dabatigai tuté punire.

²⁹ Enga Taré ujnacarode uñai Abram chisa dacotéraque to nanique enga acoté uaté i tu Sárai nanique. Jé basa Taré ujnacari uñai Nacor chisapo dacotéraque nanique rĩ enga acoté i u Mílca nanique. Enga Mílca uaté dai u Harán nanique. Jé basa Harán ujnacari cusapo nanique rĩ uje uté i u Ísca.

³⁰ Mu Abram acoté Sárai aberé nanique enga que atique cus.

³¹ Enga chise diri nanique uje jnani bajai Taré pésu dáyipiedie ome nanique jeta chicáji ore uniri Canaán jne. Jecute jnoji dedai Ur uté uje déji ore uniri Caldéa nanique. Enga nóna dajnacari Abram aja dajesui nanique, jé aja dacaria Sárai, jé aja dájnami Lot to uje Harán casicaite ujnacare uté to nanique. Enga ore qui turásu ore uniri Canaán nanique mu ore chise ore idai uñai iji uté dosadi enga ore chácariji uté nanique. Enga ore charidi tuté i tu Harán nanique.

³² Enga ore dai Taré toji ore idai Harán nanique. Enga guejnanie sequerei chise 205 nanique uje topísi.