Génesis 1 - Dupade Uruode

Dupade angúroméone u daruode nanique ome dapesudode cucha jnese iji erámi, gaté ore

¹ Iji taningai uje Dupade pésu cuchade iji taningai enga pésu jnumi, gaté ore jnese.

² Mu iji taningai nanique enga jnumipis uje cáma Dupade pésu cuchárique. Mu que pimo jnumi gotique uje yodi irágu erámi gu. Enga judúguejna jnumi enga que pimo cuchárique gotique. Mu Dupade Ujopié Espíritu Sánto chicai yui, chicai yui ujetiga pésu.

³ Quigade enga Dupade narare enga chojninga: "¡Dírecaringuéi á, be guesi!" Ga doi guesi.

⁴ Dupade chimo uje doi guesi ga irasique re uje ueradéjna ipesudi. Enga jé u uje Dupade cãra utataringuei, dírecaringuéi ore jogadode ome ñane.

⁵ Dupade chĩ́care 'diri' aja dírecaringuéi; jé basa ga chĩ́care 'dejai' taja dejai uje judúguejna. Enga Dupade imaningone u udojo iji dire chojmarai nanique.

⁶ Quigade enga Dupade narare enga chojninga: "Yodi á, ajuque ua enga bapeque uñeque chicáji gaté; jé uñeque chicáji jnumi. Yigaidi tu gu ujetiga yodode cãra dajogadode ome ñane." Enga jé u uje Dupade uruode tocade.

⁷ Enga cho jetiga Dupade suru yodi yui iji gaté uje cãra ore jogadode ome ñane nanique. Mu yodode uñane dóji gaté, jé basa ga yodode uñane dóji jnumi. Chamáñaje Dupade suru yui gu.

⁸ Enga Dupade chĩ́care 'gaté' aja gatajnoquei yuminóri. Enga Dupade imaningone u udojo iji dire chojmarai to. Mu yátaja ñane enga e gare dirode ome uje Dupade pésu cuchade iji taningai nanique.

⁹ Dupade nararápo rĩ enga chojninga: "Yodode á, uje uacagúsoi jnumi, ajucho uáguiji ñane enga acayoi gajño cuchábedie iji erámi jnese, tiedie rĩ. Enga átayo uágaja ñane iji jogate chojmarárique. Yigaidi tu ujetiga cajnore jnumi enga pijoque." Enga Dupade uruode e tocade.

¹⁰ Enga jĩraque obiréjna jnumi enga cajnoripise. Enga jnumi i tu 'jnumi' ome Dupade. Jé basa ga Dupade imatade yocho cháta raja ñane ga i tu 'yote quedéjnai' ome Dupade. Enga Dupade chajire dapesudode udore enga irasique re uje ueradipíso.

¹¹ Jecute Dupade nararápo rĩ ga chojningame jnumi: "Apésu ua enga uerate ua enga cucha pacade jnese déji ua. Yojningane u jnacarade, cucha pacade ore rĩ ujetiga ajñunie cuse jnese; jé aja poridie rĩ ujetiga udire sué enga udire adie cuse jnese to." Enga Dupade uruode e tocade.

¹² Enga jnumi uerate enga cucha pacade déji jnese, mu ore cãra rome ñane. Uñane adie cuse uje yajo, mu ajñunie déji udire uje pacaque gaté ajñunie. Jé basa ga uñane que áraque cus mu ajñunie déji bisideque ga sué bisideque to. Enga Dupade chajire cucha pacade, poridie, jnacarade ore enga irasique re uje ueracho cuchade udore jnese.

¹³ Dupade imaningone u iji dire chojmarai to, mu yátaja dirode aja ñane ga e gadioque uje Dupade pésu cuchade iji taningai nanique.

^14-15 Enga Dupade nararápo rĩ enga chojninga: "Dírecaringuéone uaque á, beyoi guesi enga ajñacho jnumi gai. Ajucho dire chojmara, chojmarane jnese jne enga díreca pei, jé basa ga judúguejna pei. A erámi jogosórone ore chimo dejade, dirode gatuaque jne gu uaque. Enga a ore chiraja cuchade to jne gu uaque. A ore chiraja sequeredie eruéode gu uaque jne. Enga tejnuringai a diji esode gatuaque gu uaque jne. Jé cho gajnetui jne. A ore chiraja to gu uaque jne uje uacapéso sequeré ome ore." Enga Dupade uruode udojo tocade.

¹⁶ Dupade pésu dírecaringué cuchábode nanique enga gare ore. Querúpise uñai ome jõrai. Enga uté u uje chijñate jnumi, erámi ore gai iji dirode jnese. Jé basa uté jõrai chijñate erámi gai iji dejade. Enga Dupade pésu guédodie to iji gaté enga udire chijñate erámi gai to iji dejade.

¹⁷ Enga Dupade pésu dapesudode udore jogadode iji gatajnoquei. Gaidi u gu ujetiga ore chijñate erámi gai.

¹⁸ Enga Dupade chutṍri dapesudode iji gaté: guedé, guedoside, guédodie ore ujetiga ore cãra dajogadode ome ñane ujetiga jecucha guedé tocade iji durasedie jnese ga díreca erámi. Mu guedé chaca enga judúguejnapo erámi rĩ iji dejade jnese. Enga Dupade chajire dapesudode iji gaté enga ueracho jnese enga irasique re uje ueracho jnese iji gaté.

¹⁹ Enga Dupade chimate dapesudode udore iji dire chojmarai to, mu yátaja dirode aja ñane enga e gagájni uje Dupade pésu cuchade iji taningane nanique.

²⁰ Udojo quigade enga Dupade nararápo rĩ enga catecã́ri yote quedéjnane enga chojninga: "Yote quedéjná, apésu bajogonórone cucha to jne, jé aja chugúpẽre ponáyone ujetiga ore chojí erámone jnese." Enga Dupade uruode udore e tocade.

²¹ Dupade pésu oyítedatéode to nanique enga déji yote quedéjnadatéode. Enga pésu yodode uñane jogosórone jnese to rĩ, jé aja chugúpẽre ponáyone jnese to. Enga Dupade chajire dapesudode udore enga irasique re uje ueradipíso ipesudode.

²² Enga Dupade cho darúja dapesudode udore ga chojninga: "Oyídode uaque á, a uacapiéjna jne enga a ãretáyo yodode, yote quedéjnane ore iji erámone jnese jne. Jé chopo chugúperone uaque rĩ, a jiépisi uaque to jne rĩ iji gatéode iji erámi údode jnese."

²³ Dupade chimate chugúperone, oyídode rĩ iji dire chojmarai to rĩ, enga yátagoja dirode aja ñane enga e chejna yijmanai uje Dupade pésu cuchade iji taningapísi.

²⁴ Enga Dupade nararápo rĩ enga chojninga: "Jnumi á, a pipesute cuchisode iji ua jnese jne. Yojningane u cuchiso parágode jnese, jé aja cuchiso sijnángone jnese to rĩ. Jé aja cuchiso ponáyone uñane jnese to uje que ore guichárique cuse uje quĩrique ore dique iji jnumi." Enga Dupade uruode udore e tocade enga cuchisode udore jnese e déji erámi údode jnese.

²⁵ Dupade chajire dapesudode udore cuchiso jnese enga irasiguipise re uje ueradipíso.

²⁶ Enga Dupade e nararápo rĩ enga chojninga: "Cuchade e déji jnese ga yico ga yipéco yocajnúrique jnani. Enga a gajneque yoquipesudode cuchiso ponáyo jnese: oyídode, aja chugúperone, jé aja cuchiso parágode, jé aja sijnángone rĩ, jé aja udore ore to uje que ore guichárique cuse uje quĩrique ore dique iji erámi."

²⁷ Iji taningai uje Dupade pésu jnani nanique enga pésu jetiga jé chopise. Mu que gusu jnani gotique mu jõra jé u ipesudé chequé to rĩ.

²⁸ Jé u uje Dupade chopo darúja dapesudode udore to rĩ ga chojninga: "A jiei uacatígo jne ga ore irágu erámi jne. Enga uacajnecho yipesudode cucha uñane jnese iji erámi enga añurupúsu guio jne. Enga cuchisode, oyídode, chugúperone, jé aja cuchiso uñane jnese to uje que ore guichárique cus, a ore todo uaque jne, jnanione uhuaque."

²⁹ Quigade ga Dupade catecãrápoi dapesudi jnani bajac ore rĩ enga chojninga: "Cajicho to cucha pacade jnese uje ajñunie cuse enga uacajnecho udojo. Cajichópo poridie rĩ uje árigo cuse, uacajnecho udire to. A acho cucha ajñunie jnese, jé aja adie jnese to rĩ.

³⁰ Jé basa ga chugúperone, cuchiso sijnángone, cuchisode uñane uje quĩrique ore dique a ore gajneque cuchade iji jnumi jne jeta ore tagu jnumi jogonórone udore jne." Enga Dupade uruode e tocade.

³¹ Enga jé u uje Dupade chajire dapesudode cucha jnese enga irasique re uje ipesudode cucha ueradipíso jnese. Enga Dupade e pésu cuchade udore iji dire chojmarai to, mu yátagoja dirode aja ñane enga e chojmára iji ti dirode uje Dupade chimate dapesudode cucha jnese iji erámi taningai nanique.