Gálatas 5 - Dupade Uruode

Adotáyo uáguiji uacanguretigai iji Jesucrísto ga ca atodóyopo cucha puyade rĩ

¹ Jesucrísto e chinoningase yógome cucha puyade ujetiga ca yitodógopo rĩ. Ga adotáyo uáguiji uacanguretigai iji Jesucrísto to. Ca ajuéchopo uágome cucha puyade jne rĩ uje cucha puyade udore ipesute uacasadodéringane ome uaque ica.

² Yujode Dupade anguresóño uaque á, angachobi yu. Páblo uyu uje qué yo uacaquique enga yósi tome uaque: ujetiga beyoi ore uruode uje ore chiroque uágaja circuncisión ujetiga acáyo uacádode ome uacáringane piquetaque, enga a ca toque jne ujetiga Jesucrísto chiqueta uaque to.

³ Qué yingopo uaque gaté rĩ, ujetiga gosi doi udore ore uruode ga chica dádode, mu que gusu go ujetiga chica dádode. Jé jorane u Moisés urusarane cucha puyácho jnese ujetiga ore doi.

⁴ Uje uacabeyoi Moisés urusarane cucha puyácho quigode, uje chiese udore u uje chiqueta uaque ujetiga eso uacáringane Dupade imeserãcho, e uacacayoi ti yui ome Jesucrísto adode. Enga e uacajnicho uáguiji Dupade ijnoraquei.

⁵ Mu uje Dupade imanique yógome Dajopié Espíritu Sánto taja re, ga yanguretágo abi Jesucrísto, ga jé u uje yanguretágo yógome Dupade ujetiga chimesẽre yoque.

⁶ Ujetiga Jesucrísto e yitojmárango ga e que cuchárique tṍraji ujetiga ore chica yocúdode ome circuncisión, jeoga ca ore chica yoque gotique. Mu gusu cucha omi tome uyoque u ujetiga yanguretágo Dupade abi Jesucrísto, enga ujetiga yijnórango Dupade, yocujode ayoréo ore jnese.

⁷ Uacadode omío ica mu e ecãcho uaque. ¿Jé gosi a ujetiga chacate uágome dacajnaqué quedéjnaringo ica ya, uje e uacayáyorasu pacajnaqué uréone?

⁸ Obiréjna uje uacacadisṍri uté gosi que garani u uacabidisṍri Dupade gotique.

⁹ Uacarajáyo arurégode uje bisidi ajãpe mu chicáji údode jnese ga doi gaté. Pacajnaqué tátigo jé gajnui tu uté to iji uacajade.

¹⁰ Mu yangureta Yocangarádejnai ome uaque ujetiga ca ecãchópo uacáyipiedie quitígo jne rĩ ome yocacajnaqué uréone. Que yiraja ujetiga ayoré dacasuté jeoga ayoré gajnareque, mu a Dupade cho dajuñame jnani tuté jne uje pésu uacajurérigui ome dacajnaquérigo.

¹¹ Yijorane uaque á, ujetiga jé ũré enga qué yiroque ore aja ujetiga picaque ore údode, enga a jĩrique yurasade judío ore charásu uje ore cho damajo yu. Enga a ore chaporásu rĩ uje ore chetaque yatatagode Jesucrísto acho uje toji curesei gai.

¹² Yajéode u ujetiga jnanione udojo uje ore chiroque uágaja cucha puyade quigode ujetiga acáyo uacádode ome circuncisión, ¡jé ore aquesuguipise raque! Uje ore pésu uacajuredie gu.

¹³ Yijorane uaque á, Dupade ibididique uaque nanique. Enga gaidi u ujetiga chimate uágaja cucha puyade uéchai. Mu que chimate uágaja cucha puyade udore uéchai gu ujetiga e beyoi uacapotigué ayoréode. Jé basa Dupade pota ujetiga ajnóraño ñane enga beyoi ñane iroquéode gatuaque.

¹⁴ Adójnacho uje Moisés urusarane Dupade iroquéo jiei, mu Dupade iroquéode jnese ero u piroqué ibijoi udé, uje chósi te: "Bajnepídi tu ujetiga ajnóra bojórique ayoré, enga bajnoraquei ome uté a jé chopísirase bajnoraquei ome ua."

¹⁵ E mu ujetiga jec ũré ore ojñane ome uaque uje uacacho ñane ome uacabotaquéode, uacajei dotáningane ome ñane, enga ajusópise uaqueo ujetiga ca ejnáño ñane, ga ca oyórase cucha bisidéguiji ñane.

Dupade Ujopié Espíritu Sánto, yoquipotigué ayoréode ore chetaque ñane iji yocajéode

¹⁶ Yuruode qui tu udé: ujetiga beyoi Dupade Ujopié Espíritu Sánto áyipiedie gatuaque enga a ca uacapotigué ayoréode unéningárique cusapo jne rĩ ome uaque.

¹⁷ Uje yoquipotigué ayoréode, Dupade Ujopié Espíritu Sánto ore chetaque ñane iji yocajéode. Enga yoquipotigué ayoréode jecucha ga chetaque Dupade Ujopié Espíritu Sánto adode iji yocajéode. Jé basa Dupade Ujopié Espíritu Sánto chetaque yoquipotigué ayoréode to iji yocajei. Jecute que togome uaque ujetiga apéso uacapotigádode cucha.

¹⁸ Mu ujetiga yocajnai u Dupade Ujopié Espíritu Sánto, enga e que Moisés urusarane cucha puyácho suépo yoquibai te rĩ.

¹⁹ Obiréjna erámi unirisórone ipesudode cucha gajnarécho uje ore jno dapotigué ayoréode údi: jnanione que ore chedu dacotépisedie mu ore chucué gapu quedéjnanie gatuaque. Jé cho chequedíe rĩ uje que ore chedu dabaipísode mu ore pota jnani unejángone. Que gusu udore mu ore pésu dapesute cucha gajnarenguipísode uñane to rĩ.

²⁰ Jorane jé u udojo: ore cho dupa iji ayoré gajnúone, ore cho daijna iji rac ga ore chijna pujopié quedéjnanie. Ore chetaque dojode ayoréo, ga ore botare ñane. Ore charatáyime cuchade ome ñane. Ájningarãque ore iji udore bisidec. Ore jnari cuchade ome re. Ore chajuque uñane ajei aja jnumi ga ore gaidi tu ujetiga ore chirota ñane ome detétigade.

²¹ Ore charatáyime cuchade ome ñane, ayoré yusõre ore, yote pioi josõre ore rĩ. Enga acharádecojna uñane to rĩ. Mu que gusu go udojo dacate gajnaréngone mu gajnúone qué déji. E yingome uaque ica, mu yingopome uaque rĩ, uje Dupade a ca cho darása iji udore ore to jne uje ore pésu cucha gajnaréngone udore.

²² Mu uje Dupade Ujopié Espíritu Sánto chinoningase gosi ga e pijnoraquei déji, pirasitigai dépoji rĩ, pajesereringai déji, ga chidota re ome cuchade, irasique dojode ayoréo, osõrataque rĩ. Que potigayaquérique déji urúrique rĩ.

²³ Pajnotaque enga chidota re ome páyipie gajnarénguenie. Enga que purusãratique déji siñeque ujetiga chãraque gosi ome pisoca omone udore.

²⁴ Udore ore uje e ore changureta Crísto ga ore patĩ́ora Jesús iji itoringai iji curesei gai iji Dupade edominone. Jecute ore isoca bajade toi ome ore uje pajópi aja curesei. Yojningane u ore ipotigué ayoréode, jé aja ore áyipie quique gajnaréngone.

²⁵ Ga e yiquecágopo rĩ iji yoquitoringai quigade uje Dupade Ujopié Espíritu Sánto iringarãque yoque gu. Jecute ca yetájo Dupade Ujopié Espíritu Sánto tuaté jne ujetiga chorei yóguiji quedéjnane ga yicoi áyipiedie quigode ome yoque gatuaque.

²⁶ Yicoi ga ca josipíerãque yógome ñane uje pijosipiedie udire ipesute pájningane gu. Ca yaratáyingopome cuchade ome ñane rĩ.