Gálatas 4 - Dupade Uruode

¹ A yacãra yacajnaquéode aja disabi uje dayé chichaga dẽrapáidode cucha aja. Mu uje qué disape ga cáma pijógosi iji dayé irógode ababode ujade. Que pijógosi mu e gajnecho dayé gajnéone cucha jnese.

² Uje qué disape ga disabi suté irodisórone cuse uje ore chusosipise guio. Jé basa ore chuse gajnéone cucha guio to jé aja dayé ojningai dire ujetiga e disabi cho dajnenguíji cuchade udore jnese.

³ Yocajnui jé u disabi suté to nanique uje cáma yirajágo cuchárique. Enga yoquigaidedie jé u judíode jmapiedie gatuaque, uje udore ore cho ujetiga yoquirodisṍri u ore.

⁴ Mu uje chise Dupade ojningai dire ga Dupade chiroque dajnacari Jesús aja yoque. Mu cho ayorepísiji ga basíji chequé judía, ga jé judío u to nanique. Jecute dopísi Moisés urusarane cucha puyácho to.

⁵ Mu Dupade abi uté gaidi u ujetiga chijnime yóguiji Moisés urusarane cucha puyácho jmainie. Enga gaidi upo rĩ ujetiga jno yocúdi aja dayé Dupade ujetiga cho dabi iji yoque to.

⁶ Dupade que pota ujetiga potigayaquérique déji uaque ome uacáringane abío. Jecute chiroque dabi Ujopié Espíritu Sánto taja uacáyipiedie ujetiga oyo uacaji Dupade to. Chamáñaje Dupade abi Ujopié Espíritu Sánto u uje gajnei tu ujetiga chojningame Dupade: "Yai tu ua, Dupade á."

⁷ Cho ujetiga ayoré pisaque ua nanique, mu e Dupade ape ua. Jecute a bajneque Dupade guẽrapáidode cucha to jne uje chichaga aja dajnacari Crísto anguresórone.

Páblo áyuguhebátaque ome dojode Jesús anguresóño ore iji Galácia

⁸ Uje cáma arajáyo Dupade to nanique ga uacoyo dupa iji ayoré gajnúone, mu jé ũré uje que dupa gotique uacangurenone udore. Mu cho ujetiga ore isaque uaque nanique.

⁹ Mu e uacarajáyo Dupade. Mu que gusu udore mu Dupade e chirajápo uaque rĩ. Jecute ¿gotique gu a uje uacoyo caru ome Dupade ga uacajnésacho aja uacangurenone cucha bisidécho uje que cuchárique tṍraji ome uaque? ¿Gotique gu a uje uacajuéchopo uágome udore ore rĩ ujetiga ore chopo darógode iji uaque rĩ?

¹⁰ Uje jé uacabeyoi udore jmapiedie enga uacajnusináño ore gajnéone dire puyácho gatuaque to uje que Dupade acho mu.

¹¹ E yopise yáyugu yu. Chamáñaje que yipota gu ujetiga cucha bisideque yisagode Dupade iroquéo uje yipésu iji uacajade nanique.

¹² Yujode Dupade anguresóño uaque á, acãcho uágaja yu, uje uacamóño uje yo purása quedéjnane uaque to. Que gajnareque uacasocárique ome yu ica gotique, ga jé beyoi uacasocade udore údi ome yu.

¹³ Uacarajáyo uje yise uaquedai iji taningai enga yejnaréngone déji yu nanique, jecute que yiji iji uacari míraque go. Enga jé u uté ica uje yacate uágome Yoquiquetangóri Jesucrísto adode nanique iji taningai.

¹⁴ Que arajáyo uacasocáringome yu diríca uje ejnarétaguipíse yu iji uacajade, mu que etácho yu gotique. Mu datéringa uágome yu uje a yajnui u Dupade iroque gaté unirísonique ome uaque, jeoga Dupade abi Jesucrísto jé upúsu. Uje que ajusécho yu ica.

¹⁵ Que arajáyo uacasocáringome uacarasitígadatéode ome yu ica. Mu ísenga uacarasitigade udore e bijnápo ome uaque rĩ. ¿Gotique gu a? Uje uacamóño yejnaréngone iji yedodie ica, enga uacapótayo ajnicho uaquedo omenie ome yedo gajnarénguenie ga omepo rĩ.

¹⁶ Ísenga ayáyo uacarasitigai tome yu gu uje yacate uágome Dupade uru uréone quigode, ¿ga ajoso ati yipojnaite uaque a? Jecute a oyo uacamajósõri iji yu.

¹⁷ Yiraja uje jnanione uñane ore áyipiedie dépisiji uaque mu gajnareque ore áyipiedie quigode. Ore ajegaidi u gu ujetiga ore chécãre uacáyipiedie quigode ome yoque, enga uacáyipiedie dépisiji ore.

¹⁸ Cucha ueradi u ujetiga yocáyipiedie déji yocujode ayoréo ome cucha omone. Enga jé arec ujetiga boyo uacasoca omone udore údi gatuaque. Enga ca ayáyo uje boyo uacasoca omone udore údi uje idája yu iji uaque.

¹⁹ Yababode uaque á, a yajnua tu chequéraque uje chejnáreque dape basui urõsoringuéone. Uje a ca íjnoque yáyuguhebátigade ome uaque jne, jé aja ujetiga yimo uje oyópise uacangureni Crísto.

²⁰ Yipota jóroga ujetiga yugúsiji uacari iji uáguiji te ujetiga yicatecãcopísi ñane ome cuchade udojo. Mu idája yu iji uaque jecute que yiraja yuru quitígo ome uaque.

Páblo chacãra dacajnaquéode aja chequé gáredie uje ore íode u Agar, Sára ore

²¹ Uaque uje uacapótayo ujetiga ajnésacho Moisés urusarane cucha puyácho, ¿ga ca arajáyo quitígo a?

²² Uje Moisés urusarane chósi te: yocai jnani bajai Abraham abode gare nanique. Abi uñai tṍraji darogué Agar. Jé uñai tṍraji acotépise Sára.

²³ Que cuchadaté gotique uje Abraham acoté darogue jeque ga abi basíji. Mu cuchadatépise uje acotépise abi cuse. Chamáñaje Dupade urugaidé ome dabi gu uje gatapise uaté nanique.

²⁴ A yacãra yacajnaquéode aja chequé gáredie udire ore jne. Uje Dupade áyipiedie jé gare to nanique. Dupade áyipie quique uñai u uje chisi ome Moisés nanique iji cucarani uje i tu Sinaí. Enga Dupade áyipie quique uñai uté gajnua tu Abraham irogué Agar. Chamáñaje uje ore déji Moisés urusarane cucha puyácho gai nanique enga cho ujetiga cuchade udore iroque ore to.

²⁵ Que gusu cucarani Sinaí uje déji ore uniri Arábia uje gajnua u Abraham irogué Agar, mu Jerusalén iji deréjnane udojo gajnua jé u to. Chamáñaje cáma jerusaléngosode ore áyipieraque toi ome cucha puyade enga cho ujetiga cucha puyade jé iroque ore.

²⁶ Mu yirajágo uje Jerusalén gateminóri cuse to. Enga Jerusalén uté idaisórone que ore cho ayoré pisagode gotique uje guesája cuchade yúode ome ore gu. Enga Jesús anguresórone uyoque yocajnúone u ujetiga idáidatéi uté ape yoque.

²⁷ Uje ore urusarane Dupade urúo déji uje chojninga: Anínapúsu ua, chequé á. Abere ua enga íjnoque babode, mu a batígo cuse jne. Yiraja uje cáma ejnáreque batique achaminone, mu anínapúsu ua rĩ. Chequé ducarané ua, mu a jé batígo suépise chequé dacajné abode gai jne.

²⁸ Yujode Dupade anguresóño uaque á, yirajágo uje Dupade urugaite Abraham ujetiga atique cuse jne ga abi tuté u Isaac. Enga yocajnui u Isaac. Chamáñaje Dupade jé urúo to ome Abraham nanique ujetiga abode uásejna enga uyoque u.

²⁹ Yirajágo uje Abraham abi iji dacoté darogue cho damajo abi uje Dupade Ujopié Espíritu Sánto urugaite nanique. Judíode iji deréjnai udé ore gajnui tu ape sijnai tuté uje ore cho damajo Abraham abipísode yoque uje yanguretágo Dupade abi Jesucrísto.

³⁰ Dupade uruode chósi tome Abraham nanique: "Ṍra bacoté barogue, abi ore uje a chamáña jne ujetiga ajuguína bẽrapáidode aja bacoté barogue abi to jne. Jé basa bẽrapáidode udore gajnesṍri turásu bacotépise abi."

³¹ Yujode Dupade anguresóño uaque á, uje e yanguretágo Jesucrísto ga e que yoco Abraham irogué abi go. Jé basa yoco acotépise abi uje a gajneque dayé guẽrapáidode cucha jne.