Gálatas 3 - Dupade Uruode

¿Cucha onique déji rique a: ujetiga omone u cucha puyade ujetiga yicoi adode, jeoga omi tu panguretigai iji Crísto?

¹ ¡Galáciagosode uaque á, ísenga ca uacáyipieraque cus! Cho jetiga daijnárique chamacãre uáguiji uaquedai ome páyipie gajnaréngueringui ujetiga ayáyo angáchoi pacajnaqué uréone quigode. Uje uacadúcho Jesucrísto ujnomei nanique uje toji curesei gai ome yoque, enga pacajnaqué obiréjnapisode u udore ome uaque ica.

² Jecute angoñome yu: ¿ujetiga Dupade chisi ome Dajopié Espíritu Sánto tome uaque to ica uje qué uacagaidode u Moisés urusarane quigode, jeoga chisi ome Dajopié Espíritu Sánto ome uaque ica uje uacanguretáyo Jesús to ica uje uacadúcho ujnomei tiji yoquibijnanone to?

³ ¿Gotique gu a uje que acueyoi uacáyipie quique omone? Iji taningai ica ga uacamesechopise Dupade Ujopié Espíritu Sánto adode ome uaque. Mu iji de gajneri uacajéode u ujetiga ejnáño uaquetotigué ayoré aja Dupade adode. Mu que pisoca udore ome Dupade adode go.

⁴ ¿Ma ca cucha ome uaque uje uaquejnárecho uaque ome Jesús adode ica iji taningane? Yipésupú ga ca oyo cucha bisidécho iji uacasocade udore.

⁵ Uacarajáyo uje Dupade tẽra uágome Dajopié Espíritu Sánto. Enga Dupade pésapo dapesute cucha pitijabádode iji uacajade. ¿Ga pésu udore gu a, uje uacanguretáyo Jesucrísto ujnomei uje uacadúcho iji yoquibijnanone, jeoga pésu udore gu uje uacapéso Moisés urusarane cucha puyácho?

⁶ Yocai jnani bajai Abraham angurenipíso Dupade uruode ome re nanique. Ga jé gusu Abraham anguretigai tiji Dupade uruode ome re, mu Dupade chimesẽre Abraham enga cho ayoré ujñapetáguiji.

⁷ Jecute yo quique yocai bajai Abraham ape disi ejopísode ome uaque jne: u ore uje ore changureta Dupade.

⁸ Dupade uté uje chisi ome daruode ome yoque, chiraja iji taningai nanique uje ducurása quedéjnane a ore chise dáringane Dupade imeserãcho to jne gu danguretigai. Jecute cho dáyipie omenie udire quique ome Abraham to nanique enga chojninga: "Abraham á, a yosongaquéode chise erámi unirisórone ore jnese jne gu ua."

⁹ Uje Abraham changureta Dupade nanique enga jogadi u uté uje gajneque Dupade osongaquéode. Isocai jé u uté to ome Dupade anguresórone uyoque jnese. Uje yanguretágo Dupade enga yocajneque Dupade osongaquéode to.

¹⁰ Ore uje ore changureta Moisés urusarane cucha puyácho quigode jé ore yuque raque ome Dupade. Uje Dupade uruode chojninga: "Uñeque ujetiga doi Moisés urusarane cucha puyácho, mu chó uñeque gai ga jé yuque re ome Dupade."

¹¹ Enga obiréjnapise quigode: uje que togome uñeque go ujetiga chise dáringárique Dupade imeserãque gu dagaidode Moisés iroquéo. Chamáñaje ore urusarane Dupade urúo déji uje chojninga: "Udore ore uje ore chise dáringane Dupade imeserãcho gu danguretigai, ga a ore gajneque pucuecaringuei jne."

¹² Moisés urusarane que chutai gosi anguretigai iji re go, mu utaidipísi tu gosi ipesudode. Chamáñaje ore urusarane Dupade urúo dépoji rĩ uje chojninga: "Ujetiga gosi dopísi yurusarane quigode jnese ga yiquetai tu uté gosi jne."

¹³ Yirajágo uje jé yoquique yógome Dupade uje yiyógo Moisés urusarane gáyode gu. Mu Crísto iquetaque yógome yocajnéone Dupade ujuyaquédatéo. Chamáñaje gajneque Dupade ujuyaquei tome yoque gu nanique, ga cho daba yocate gajnaréngone. Uje ore urusarane Dupade urúo déji uje chojninga: "Dupade ujuyaquéode gajnesórone u udore ore jnese ujetiga chuque ore iji curesérique gai." Jecute yirajágo uje Crísto gajneque Dupade ujuyaquéode to nanique uje chuque iji curesei gai gu.

¹⁴ Crísto pésu cuchade udore gu ujetiga Dupade uruode ome Abraham tocade uje chojninga: "A purása quedéjnane gajneque yosongaquéode jne." Jecute Jesucrísto anguresórone uyoque jnese yocajneque Dupade Ujopié Espíritu Sánto to uje Dupade jé urúo nanique ujetiga chirógaja yoque jne.

Bajei Dupade áyipiedie ome Abraham uje chichaga dẽrapáidode cucha aja; jé basa ejo áyipiedie ome Moisés ome cucha puyade

¹⁵ Yujode Dupade anguresóño uaque á, qué yope yacajnaquéode udojo ejémplo iji jnanírique ujetiga chimate dáyipierigui ome dapotigátique cucha. Ga doi ga churúsãre quigode. Uje chimate, ga e chicha dei aja. Uje e chicha dei taja ga e que toc ujetiga qué pecãrai áyipiedie quigode. Enga que togápo rĩ ujetiga uñeque doi enga chinoningase uté áyipiedie quigode.

¹⁶ Gajnui jé u uje Dupade chimate dáyipiedie ome Abraham, ape disi ejórique nanique. Que Dupade uruode ojningane u Abraham ape disi ejo dipeséode ore jnese go. Mu ojningai u ape disi ejo chojmarai, ga ojningai u Crísto.

¹⁷ Yuruode quigode u udojo: uje Dupade chimate dáyipiedie ome Abraham nanique, ga que toc ujetiga qué chécãre dáyipieraque. Jé basa ga sequeredie 430 iji udojo quigade u uje Dupade chimate dáyipiedie ome Moisés ome cucha puyade. Mu que toc ujetiga Moisés urusarane udore doi enga chĩro Dupade áyipie bajedie ome Abraham ga ca cuchárique tṍraji.

¹⁸ Ujetiga gusu Moisés urusarane ipesungórone ujetiga ore gajneque Dupade osongaquéode, enga e cucha bisideque Dupade uruode ome Abraham. Mu Abraham changureta Dupade uruode nanique, jecute gajneque Dupade osongaquéode. Enga Dupade chedu Abraham anguretigai enga que chucué ate uñeque go.

¹⁹ ¿Ga jé ca cuchárique tṍraji Moisés urusarane cucha puyácho a? ¡Tṍraji arĩ́e! Udore u gu uje cho quique pisijnaringuéone quitígo ome yoque, enga yirajágo uje máraque yoque gu udojo. Mu eruei tu uje Abraham ape disi ejoi di uje uté gajnei Dupade áyipie omenie. Yirajágo uje Dupade chutṍri darógode ome Moisés nanique ujetiga ore chatata cucha puyade quigode ome Moisés. Ga jé basa Moisés chajnerame darasade. Jé basa Moisés urasade ore chutṍri Moisés to ujetiga catecã́ri Dupade ome ore.

²⁰ Cucha uñai u Dupade isocade ome Moisés urasade nanique uje chutṍri Moisés aja ore ujetiga chajnerame daruode ome ore. Enga que cunguésõri isocade ome Abraham gotique. Uje que angúromei u datocaitique ujetiga chingo dáyipiedie ome Abraham, mu Abraham icatecãraisṍri jé chojmára nanique enga Dupade jé upúsu.

Páblo cho quique Moisés urusarane cucha puyácho udore

²¹ Que yuruode qui tu gotique ujetiga Moisés urusarane chinoningase Dupade uruode ome Abraham. Ujetiga Moisés urusãratique dérasiji siñeque ujetiga chisírase pucuecaringué eyúgojmai ome yoque enga a jĩrique yicórasi udore quitígo, enga yocúringane ayoré ujñapetácho a jé urásu ujetiga Dupade cho darása iji yoque.

²² Mu Dupade uruode cho yoquiquique uje pisijnaringuéone isaque erámi jogosórone uyoque jnese, enga que toque guetique ome yoque. Mu uje yirajágo udore enga jogadi u uté uje yajico Jesucrísto yui. Enga jé u uje Dupade uru diyajmane ome Abraham tocade ome yoque gu yocanguretigai ome Jesucrísto.

²³ Mu uje cáma pacadique yógome panguretigai quigode, enga gusu Moisés urusarane ome yoque. Enga cho ujetiga Moisés urusarane udore suru yoquibai jé aja ujetiga Dupade chingo dáyipie omenie ome yoque ujetiga chiqueta yoque gu yocanguretigai.

²⁴ Cho ujetiga yoquirodisṍri tu Moisés urusarane nanique ga yocajnui tu disabi iji udore jmainie ujetiga yicoi yoquirodisṍri uté iroquéode. Mu uje Crísto di enga Moisés urusarane e toi ome yoque ujetiga e yico yocúringane Dupade imeserãcho gu yocanguretigai ome Jesucrísto.

²⁵ Uje e chise deréjnai uje yanguretágo Jesucrísto enga e que yoquirodisṍri upo Moisés urusarane cucha puyácho rĩ.

²⁶ Uacanguretigai tuté ome Jesucrísto u uje Dupade cho dabi iji uaque jnese.

²⁷ Uje e uacanguretáyo Jesucrísto ga ore tṍra uágaja yodi ome bautísmo, enga e uacapijócho uje uacátayo uágaja Jesús ga e uacatojmáraño, ga gajnui u ujetiga ajmacho Jesús uté ate ueradode aja uaque.

²⁸ Ga e que cucha go ujetiga judío yoc, jeoga purása quedéjna yoc; jeoga ayoré ataque yoc, jeoga pisaque yoc; ujetiga chequé u, jeoga jnani u marínga, jé yocopise ñane ujetiga yanguretágo Jesucrísto.

²⁹ Ujetiga Crísto gajneque yoque ga jnani bajai Abraham e ape disi ejo yoque to. Ga a yocajneque Dupade osongaquéode to jne uje chichaga aja yocai Abraham nanique.