Gálatas 2 - Dupade Uruode

Jesús iroguipísode ore chijna Páblo aja raque uje ore chiraja gu uje Jesús iroguipise "apóstol" to

¹ Uje yejnanie sequeré gagájni iji yirídai uje yiriguiji ducurása quedéjnane ore iji erámi enga Bernabé uyoque yibajopoi ore iji Jerusalén rĩ. Enga Títo nóna yoque to.

² Yicáji Jerusalén gu uje Dupade chingome yu uje jé ajéo ujetiga yicáji. Uje gusu yu iji jnanione gari uje Jesús anguresórone ore cho dangaránone iji ore, enga jé u uje yo ore quique ome yacajnaquéode quigode ome ducurása quedéjnane uje yatata Jesús adode ome ore. Yigaidi u gu ujetiga ore chimo uje ueracho yacajnaquéode quigode enga ca potigayaquérique déji ore ome yacajnaqué casodé quigode ome ducurása quedéjnane. Jé u to ujetiga ore changureta yu ome yisagode Dupade iroquéo uje a yipésu jne iji dire gatéode dirome. Que yipota gu ujetiga ore cho cucha bisidéguiji yipesudode cucha ome Dupade.

³ Ore chiraja uje ducurása quedéjna yijõrai Títo, mu que ore chiroque Títo aja go ujetiga picaque údode.

⁴ Jé ũré uje jnanione uñane ore pota ujetiga picaque Títo údode. Mu cachi ore cho Jesús anguresõre iji raque mu taque ore. Enga cachi ore chimere re iji Jesús anguresórone yocujade gu uje ore pota ore timíninga yógaja quedéjnane. Uje ore chudute gu uje e guesája cuchade yui jnese ome yoque uje yanguretágo Jesucrísto. Enga ore pota ujetiga yajníngopója Moisés urusarane cucha puyácho quigode rĩ uje udore jnuéngai yoque nanique.

⁵ Mu que pangarate udore ome yoque go. Ga jé yidotágo yóguiji yocacajnaqué uréone ome Yoquiquetangóri Jesús adode. Chamáñaje yocáyipiedie déji uaque gu ujetiga gusu pacajnaqué uréone udore ome uaque ujetiga beyoi quigode.

⁶ Mu Dupade anguresórone angaránone udore iji Jerusalén que ore cho quique dacajnaqué ichárique ome yu go. Yojningane u udore ore uje yocujode Jesús anguresóño ore cho dangarádejnai iji ore. Mu que cucha ome yu ujetiga pangarádejna ore. Yiraja gu uje Dupade que chajire yocate guesíminórone, mu ajirigode u yocajéode.

⁷ Mu jnanione udore que ore chetaque yacajnaquéode quitique go, mu jĩrique ore chiraja uje Dupade iroguipísi tu yu aja ducurása quedéjnane ujetiga yacate ore ome Yoquiquetangóri Jesús adode to. Ga adi jé u uje chiroque Pédro aja judíode to ujetiga chacate ore ome Jesús adode. Mu Pédro uyoque yocacajnaquéode quigode jé chojmára ome ore jnese.

⁸ Enga Pédro uyu yoquirósõri jé chojmára enga Dupade u, mu cãra yoquiquigode ome ñane. Chiroque Pédro aja yocurasade judío, jé basa chiroque yu aja ducurása quedéjnane. Mu cho Jesús iroguipísode iji uyoque jnese.

⁹ Jecute jnanione udore uje Jesús anguresórone ore cho dangaranipísode iji ore, ore chiraja uje Dupade jé iroguipise yu to. Yojningane u Jacóbo, Pédro, Juan ore. Enga udore ore chisi ome dajmanáyone ome yoque ga imoi jé u uje jé yitojmárangopísiji jnumi. Enga ore ajéode u to ujetiga yijõrai Bernabé uyoque yico ga yacaco ducurása quedéjnane, jé basa jé ore chacate yocurasade judío.

¹⁰ Mu udore ore cho yoquiquique to ome jmatágode ore ujetiga yosṍco ore. Mu jé yosõraque jmatágode ore gatuaque, enga yejna yu aja yosõraquéode ome ore.

Páblo chaquĩ́ra Pédro ome adode iji ore idai Antioquía

¹¹ Uje Pédro chise yóguiji ore idai Antioquía enga yiji enga yaquĩ́ra Pédro iji yocujode Jesús anguresóño ajei. Chamáñaje obiréjnapis ome yu gu uje gajnareque isocade.

¹² Yetétigai tu uje Pédro taguíji ducurása quedéjnane gari iji taningai, mu uje Jacóbo irógode ore di iji yoque enga Pédro jĩrique cha uje taguíji ore gari. Pédro todo gu ujetiga ca udore ore chise adode unétique uje taguíji ducurása quedéjnane gari. Chiraja gu uje judíode udore uñane ore chajo raja ujetiga picaque ducurása quedéjnane údode ome circuncisión bajaque uje ore changureta Jesús, enga quene jogadi tu uté ujetiga Jesús anguresórone judío ore cháta rágaja ore.

¹³ Que gusu Pédro go, mu Dupade anguresórone uñane, jé aja Bernabé rĩ ore chirate Pédro aja ate gajnaréngone uje ore cha taguíji ducurása quedéjnane gari to.

¹⁴ Uje yimo uje Pédro ore isocade quedéjna, enga que cunguésõri pisoca omone uje pacadique yógome iji Dupade uru uréone, enga jé u uje yiborátaja ome ore. Enga yojningame Pédro iji yocujode Dupade anguresóño ajei: "Judío ua, Pédro á, mu bacha judíode yoquisocade aja ti yui diríca enga babé ducurása quedéjnane ore isocade. ¿Jecute jé gotique gu a uje bécãre ua enga e baroque ducurása quedéjnane aja ujetiga ore doi judíode yoquisocade to?"

Dupade isocai chojmára ome judíode, ducurása quedéjnane jnese, enga u uje chedu yocanguretigai iji Jesucrísto ome yocúringane piquetacho jnese

¹⁵ Judíopise yoque enga que yoco ducurása quedéjnane ome ore ipesute gajnaréngone to go.

¹⁶ U mu yirajágo to uje que togome uñeque ujetiga chise dáringárique Dupade imeserãque gu uje pésu Moisés urusarane cucha puyácho. Mu gusu panguretigai ome Jesucrísto u uje pésu yoque enga Dupade cho dameseránguiji yoque. Jecute uyoque ga yanguretágo Jesucrísto to nanique uje yoquigaidi tu gu yocúringane Dupade imeserãcho. Yirajágo gu uje Dupade chedu yocanguretigai enga que chucué gotique ujetiga yipéco Moisés urusarane cucha puyácho aja quitígo. Uje a ca ayorérique déji jne ujetiga chise dáringárique Dupade imeserãque gu uje pésu Moisés urusarane aja quitígo jnese.

¹⁷ Ujetiga yicoi enga yanguretágo Crísto uje yoquigaidi tu yocúringane Dupade imeserãcho, mu quigade enga yipéco pisijnaringuérique, ¿ga jé yoquisijnaringuéone udore garani u Crísto a? Úngare. Gajnarenguipísirase ome Dupade ujetiga gosi chojningárasa: "Yisijnaringuéone garani u Crísto."

¹⁸ Mu ujetiga yiji enga yajnangarase cuchárique, mu quigade enga yipésapo aja gaté rĩ, enga uté urásu ujetiga pésu yúringai máraque.

¹⁹ Mu uyu ga cho ujetiga yitoi nanique ome Moisés urusarane cucha puyácho. Enga Moisés urusarane jé upúsu uje pésu yu ga yopise togode ome ore nanique. Mu cuchade udore pésu re iji yu gu ujetiga e yedu Dupade iji yajei iji erámi tudé.

²⁰ Uje Crísto cho daba yate gajnaréngone nanique ga qui tu uje jé yibaya to iji itoringai uje ore chujé iji curesei gai. Ga e que uyu upo uyu gotique rĩ, mu Jesús jé yitojmárango iji jnumi enga yucuecaringué ichai tudé garani tu yanguretigai iji Dupade abi Jesucrísto uje chijnóra yu ga tẽra re ome yu ujetiga ore chujé iji curesei gai.

²¹ Enga que yetaque Dupade áyipie omenie udire ome yu ujetiga chiqueta yu ome dajnacari Jesús. Mu ujetiga Dupade chiquetárase yógome Moisés urusarane cucha puyácho ga a ca cuchárique tõrarásiji Jesús itoringai tome yoque jeta chiqueta yoque.