Gálatas 1 - Dupade Uruode

¹ Jesucrísto irógode apóstol uñai u Páblo uyu uje yiroque purusarane udojo aja uaque. Que ayorérique ajegaite yu ujetiga yiji Jesucrísto iroquéode, mu Jesucrísto jé upúsu uje ajegaite yu ome udojo. Mu que gusu Jesucrísto, mu Yocai Dupade uje chiringare Jesucrísto iji úringai toque quigade, uté jé upúsu to uje pota yu ome dabi iroquéode.

² Yurusarane gajnengórone u Dupade anguresórone uaque jnese iji uacaniri Galácia údode. Enga yujode Dupade anguresóño iji de ore pota jeta yingo ore irasitigade aja uaque to uje unere uaquéode ome yoque jnese.

³ Yajéode u ujetiga Yocangarádejnai Jesucrísto, dayé Dupade ore chatapísaja uaque, enga ore chisi ome pajesereringai ome uaque to.

⁴ Jesucrísto doi Yocai Dupade áyipiedie ome re nanique, enga tẽra re ujetiga chuque ome yocate gajnaréngone. Gaidi u gu ujetiga chiqueta yógome erámi tudé josipié gajnarénguenie.

⁵ Jecute beyoi gajneri ga yisigopise Dupade gai iji deréjnane jnese ome ipesútedatéode udore ome yoque. Amén.

Que pacajnaquei uñeque déji ujetiga chiqueta yoc; gusu pacajnaquéode ome Jesús

⁶ Yopise yáyugu yu uje jĩrique ecãcho uacáyipiedie. Uje e que angáchopoi uacabidisṍri Dupade rĩ uje chosõre yoque gu Crísto adode ome yoque. Enga e uacangáchoi pacajnaqué quedéjnarique uje chiese piquetaque uágome jne.

⁷ Mu que pacajnaquei uñeque déji siñeque go ujetiga yiquetágo yógome. Mu uñéngo a déji uacajade jõ uje ore chãra uaque enga ore chécãre pacajnaqué uréone quitígo, uje pacajnaqué uréone udore chacate yoque uje gusu Crísto ujetiga chiqueta yoque.

⁸ Mu ujetiga gosi, jeoga uyu u, jeoga Dupade iroque gaté unirísõre, doi enga chacate uágome dacajnaqué quedéjnarique uje unejángome yocacajnaqué casodica ome Crísto úringai yoquiquetasõre, enga ¡jé areque ujetiga pujuyápise uté gosi jne iji deréjnane jnese!

⁹ Qué yingo uaque gaté rĩ. Ujetiga gosi doi enga chacate uágome dacajnaqué quedéjnarique uje unejángome yocacajnaqué casodica uje e uacamesecho ica, enga ¡jé areque ujetiga pujuyápise uté gosi jne iji deréjnane jnese!

¹⁰ Uje yósi tome uaque, enga que yucuei tu go ujetiga asíyo yibánique, jeoga oyo ũrepise iji yu. Mu yucuei upúsu ujetiga Dupade irasique yadode. Ujetiga yucuegode urásu ujetiga yujode ayoréo ore chisi yibánique enga chorase ujetiga yo yirósõri iji jnanione udore. Enga e que toguírase ujetiga Crísto chopo daroi iji yu rĩ.

Páblo chatata dáringai Jesús iroguipise ome Galácia unirisórone ore

¹¹ Yipota ujetiga arajáyo to uje yacajnaquéode ome Crísto adode que garani u jnanione gotique.

¹² Enga que yujórique ayoré acadique yu ome pacajnaquéode udore to go. Mu Jesucrísto jé upúsu uje chacate yu ome cuchade udojo quigode.

¹³ A jé adúcho yujnoméone to uje qué yugúsiji yurasade judío ore áyipiedie quigode gáyode. A e arajáyo to uje yopise yumajo Jesús anguresórone nanique, enga yajéode u nanique ujetiga yejnápise udore ore jnese.

¹⁴ Uyu u irajataquipísi nanique ome yujode jnacáño ore ome judíode yoquijmapiedie. Enga que yiyópise yocayode jnani bajácho acajnaquéode quitique gánique gotique to.

¹⁵ Mu Dupade a jé ajegaite yu nanique iji yaté ajei ujetiga yiji iroquéode. Chijnorapise yu gu. Enga pésu dáyipiedie ome yu.

¹⁶ Jecute chise deréjnai uje Dupade chingo dajnacari aja yu to. Gaidi u gu ujetiga yiji Ujnacari uté ujnomei údi ome ducurása quedéjnane uje piquetangóri tu. Uje Dupade chiroque yu aja udore enga que yetatique cuse go, enga que yucué yujórique ayoré áyipieraque gotique.

¹⁷ Enga que yicabíji Jesús irógode uñane to go uje ore déji Jerusalén uje bajac ore ome yu ome Dupade iroquéode. Mu jĩrique yijnare yu aja ore uniri uje i tu Arábia. Udojo quigade enga yajniápo aja ore idai Damásco rĩ.

¹⁸ Uje yejnanie sequeré gadioc iji ore idai Damásco ga quene u uje yicáji Jerusalén, enga quene yimo Pédro to iji uté. Enga yácariji uté gari iji dirode uje chejna yirídai.

¹⁹ Mu que yimo Pédro ujode Jesús irócho gotique. Gusu Yocangarádejnai desaguipísi u uje yimo to uje uté i u Jacóbo.

²⁰ Jé ũrepise yurusarane udojo quigode jnese. Enga Dupade chirajapise uje que yo yurupatáringa gotique.

²¹ Uje e yiji iji Pédro ore gari iji Jerusalén enga yicáji ore unirone uje íode u Síria, Cilícia ore.

²² Jecute Crísto anguresórone ore iji ore uniri Judéa que ore chimópise yu to nanique iji taningai.

²³ Gusu uje ore chudute ore ojñane ome yadode. Uje ore chojninga: "Yocumajósõri casodica e jno Crísto ujnomei údi to. Potapísa ujetiga chĩro dojode ayoréo anguretigai ome Crísto nanique, mu e chacate ore aja daquigode erámio ujetiga ore changureta Jesucrísto to."

²⁴ Enga uje ore chudute yujnomei tuté enga jogadi u uté uje judéagosode ore chacãre Dupade gai ome yu.