Filipénses 4 - Dupade Uruode

Páblo chingo ore ujetiga jecucha ore nína re ome Yocangarádejnai

¹ Yijorane uaque á, yijnorapise uaque enga yipotapísarása jetiga jé yisápo uaque rĩ. Uje yirasique yu gu ome uaque uje yajnéone u uaque ome Dupade. Jecute yipota ujetiga adotáyo uáguiji uacanguretigai iji Yocangarádejnai to.

² Evodia yá, Síntique á, uje Yocangarádejnai angureto uaque jnese enga ayáyo uaquetétigade ome ñane enga oyópise uaquẽro iji ñane to.

³ Enga ome ua, yijõrámi á, yijóchapise bajei údi ujetiga átaja yoquijoranie udire, enga o ore quique. Ua u gu uje yijorámeque ua aja yoquisagode Dupade iroquéo. Enga baraja uje yoquijoranie udire jecucha ga ore cháta rágaja yu ica ome yatatagode Jesús úringai piquetangore, jé aja Clemente ore to ica. Enga yirajágo uje ore íode déji pucuecaringuei gajnéone darujna ao jnese iji Dupade gari iji gaté.

⁴ Yajéode u ujetiga uacarasique uágome uacanguretigai ome Yocangarádejnai iji deréjnane jnese. Yijáro yuruode iji jnumi ome uaque uje yojninga: anínaño uaque gatuaque iji dirode jnese.

⁵ Yajéode u to ujetiga uacacaniratiguéode pijógome uacojode ayoréo ore jnese, uje e idógosi Yocangarádejnai diringai gu.

⁶ Ca oyo uacáyugu uáguiji udore bisideque, mu acatecãchoi Dupade ome uacajnusiétigade jnese. Jé u uacapotigádode cucha rĩ ujetiga acatecãchoi Dupade ome udore to. Atáyoi Dupade ome cuchade, enga acãcho Dupade gai to ome guẽratígo cucha ome uaque.

⁷ Ujetiga beyoi yuruode udore quitígo enga Dupade a chisi ome daríjogonóri pajesereringa ome uaque jne. Enga Dupade guerani pajesereringa uté u uje chinoningase pujnusiétigadatéode, enga que togome erámi unirisórone ujetiga ore chiraja garãtique. Enga Dupade guerani tuté pajesereringa a u jne ujetiga chãraque uacáyipiedie, jé aja uacajéode ome cucha gajnaréngone jnese. Chamáñaje Jesucrísto anguresórone u uaque gu.

Yicoi enga páyipie omenie ca jnoji yocajéode

⁸ Yijorane uaque á, a yo uacaquique jne iji yurusarane eruei tuné ujetiga ejnáño uacáyipiedie aja cucha omone, jé aja cucha uréone, pipesute ueradode, cucha ujñapetade ore. Enga ca uacáyipiedie jnopo iji pujnomé omone to rĩ. Enga ueguipise uacáyipiedie ome cucha gajnaréngone udore iji erámi tuné. Ujetiga gosi isocade omío enga uté gajnei tu picotaquei, enga ejnáño uacáyipiedie taja uacacotaquérigo ome uté gosi to.

⁹ Uacadúcho yacajnaquéode, enga uacamóño yisocade to rĩ. Jecute beyoi yacajnaquéode udore quigode enga aracho yu aja yisocade to. Ujetiga beyoi yuruode udore enga pajesereringai guẽrasṍri Dupade a nóna uágaja quedéjnane to jne.

Páblo chacãre filíposgosode gai uje ore chisi ome deranone cucha ome

¹⁰ Yirasiguipise yu ome Yocangarádejnai uje uaqueranone cucha e díji yu enga yiraja uje jé gajnui u uje uacáyipiedie dépoji yu rĩ. Que yuruode qui u go ujetiga acadíchoi yu, mu ísenga quene piotiguei dépoji uaque rĩ ujetiga ẽchója yu.

¹¹ Ca ajoso ati yuruode udore qui tu ujetiga yutaite uaque uje yijmáta ome cuchárique. Chamáñaje yiraja cuchade gu uje basája yu, jecute yinína yu ome cuchade uje déji yu. Ujetiga garósi marínga, jeoga jiei, mu yinína yu ome udore.

¹² Uje yiraja pijmátaringuéi quigode ome yu, ga yirajápo cucha dipeséode quigode ome yu rĩ. Mu yidota yu ome cucha dacadode udore jnese. Jecute jé cho ñane ome yu ujetiga yica guejna, ujetiga chaguhei chejna yu rĩ. Jé chopo ñane ome yu rĩ ujetiga cuchárigo sué yibai, jeoga yijmátapis ome cuchárigo.

¹³ Enga que cuchárique piragome yu, uje Jesucrísto jecucha chisi ome petotiguei ome yu gu ome yajnéone cucha dacacho jnese.

¹⁴ Mu ueradipise uacasocade ome yu uje uacosṍcho yu iji yúringai pujurúgai uné.

¹⁵ E uacarajáyo uje gusu Dupade iglésia uaque iji uaquedai Filípos uje uacasíyo yu iji uaqueranone cucha uje yiji iji uacaniri Macedónia ica iji taningai ujetiga yacate ore iji ducunire uñane ome Crísto ujnomé ueradi uté. Jé ũré uje que iglésia uñáraque chisíome deranone cucha ome yu to.

¹⁶ Mu uje yugúsiji ore idai Tesalónica to ica ga uaqueranone cucha chise yu gatuaque to. Uacagaidi u gu ujetiga ca yijmáta ome yajegaitique cucha.

¹⁷ Que yáyipie déji gotique ujetiga pisi yu iji, mu yáyipie déji uaque ujetiga ejnáño uágaja uacacaniratiguéode. Yiraja uje Dupade a cho uacoré jne ome uaqueranone udore gu.

¹⁸ Uaqueranone cucha jnese e chise yu uje Epafrodíto di údi iji yu. Jiei uaqueranone ome yu, jecute que cucha chonatique déji yu. ¡E yujuyápise! Enga uaqueranone cucha gajnui tu cucha ai otate unérone uje jnani bajade ore tẽrája Dupade ome nanique. Jecute Dupade a irasiguipise re ome uaqueranone udore ome yu.

¹⁹ Enga yangureni Dupade a chosõre uaque to jne ome cuchade ujetiga qué chona uaque. Chamáñaje cuchade déji Dupade jnese gu iji gaté ujetiga chosõre yógome uje yanguretágo Jesucrísto.

²⁰ Beyoi enga yicotágopise Yocai Dupade gatuaque iji dirode jnese. Qui jé u uté. Amén.

Páblo urusarane eruei uné uje chatata daninaquéode ome filíposgosode ore

²¹ Angoma yirasitigai aja Dupade urasade iji uaité jne. Yojningane u Jesucrísto anguresórone jnese. Yaríjogonórone ore iji ne ore irasique uaquei to rĩ.

²² Dupade anguresórone ore jnese iji ne, jé aja rómagosode ore eduguéjna cuchábi irógode ore rĩ, ore pota to jetiga adúcho to uje ore irasiguipise uaquei to rĩ.

²³ Yipota jetiga Yocangarádejnai Jesucrísto chatapísaja uaque jnese jne. Amén.