Filipénses 3 - Dupade Uruode

Dupade imanique danguresórone átegoningáne aja guesode

¹ Yijorane uaque á, anínaño uágome Yocangarádejnai. Que cucha go ome yu ujetiga yigotája jeta yo quique uaque ome yurusãraque ejode unojo. Yigaidi u gu ujetiga cucha gajnarétique ca chósi ti iji uaque.

² Ajusópise uaqueo ome ore uje ore gajnúone u tamoco sijnángone, enga gajnarenguipise ore adode. Uje ore chiroque uágaja ujetiga acayo uacádode ome circuncisión. Uje chiese quene jogadi u uté ujetiga Dupade cho darása iji uaque uje uacacayo uacádode.

³ Chiese Dupade urasapísode u udore ore uje ore chica dádode. Mu Dupade urása obiréjnane upúsu yoque uje yanguretágo Dupade ome yocúringane ayoré jnese, uyoque uje yoquirasique yoque uje Jesucrísto e gajneque yoc. Enga que qué yocáyipieraque dépoji cucha guesíminónique rĩ ujetiga chiqueta yoque.

⁴ Ujetiga jé ũré jnanione udore uje ore iquetangórone u dapesudode cucha, enga jétapũré uyu ujetiga yipesudode cucha udore chiquetápise yu to.

⁵ Uje dirode gadióguiji ti iji yibatigai yui enga ore chica yúdode to nanique. Chamáñaje israélgose yu gu, enga yãrapi u Israel ujnacarode uñai Benjamín. Enga hebréo yai, yaté ore jnese. Jecute hebréode uñai uyu to. Uacamóño uje fariséo yu to nanique enga yigaidode u ore acajnaquéode ome Moisés urusarane, uje judíode uyoque yicoi purusarane udore quigode.

⁶ Enga fariséopise yu nanique enga yetaque pacajnaqué unejángone jnese. Jecute yo yumajo Jesús anguresórone nanique. Que yiyó Moisés acajnaquérique gánique gotique to, jecute que yurásarique chiraja daru quitíguiji yu nanique.

⁷ Yipésu cuchade unojo nanique uje jeoti enga cucha omío nanique ome yu. Mu e yingo uaque uje cucha bisideque cuchade udore jnese ome yu. Uje e yiraja uje yiquetangóri u Crísto enga cucha bisideque cucha uñane jnese ome yu.

⁸ Cho ujetiga cuchade udore e que oréraque cusipise go ome yu. Mu cucha orerãi upúsu uje yiraja Yangarádejnai Jesucrísto. Jecute e yṍra cuchade udore. Chamáñaje yate bajade udore jnese chopise pasique ducaranone ome yu gu. Uje e yangureta Crísto uje cucha gose uté ome yu gu.

⁹ Enga e yaríjogonóri u Crísto enga uté gajnenguipise yu. Enga Dupade e cho ayoré ujñapetaque iji yu. Mu yúringai ujñapetaque que tṍraji yipesudode cucha uje yiji Moisés urusarane, mu tṍraji yanguretigai ome Jesucrísto.

¹⁰ Enga yajéode e u ujetiga yirajapise Crísto gaté. Enga yipota ujetiga Dupade Ujopiédaté uje chiringare Crísto iji datoringai nanique jogadípise yu to. Yipota to ujetiga yo yiba Crísto adode, adi u uje Crísto cho daba Dupade adode to nanique. Enga dimane yu to ujetiga yitoi ome adode.

¹¹ Yigaidi u gu ujetiga piringarangápo yu jne rĩ iji yitoringai quigade.

Páblo chacãra dacajnaquéode aja ayorérigo jeta ore quejnáji dajnetígo cucha yui

¹² Yiraja uje qué yiságui ujetiga yise yipotigádode udore jnese, enga cáma yise yúringai ujñapetaguipise. Mu yejna yu aja Crísto adode uje yigaidi u gu ujetiga yimate Crísto áyipiedie jnese ome yu. Chamáñaje Crísto chiqueta yu gu udire nanique iji taningai.

¹³ Yijorane uaque á, yiraja uje cáma yimate Crísto áyipiedie udire aja jnumi ome yu jnese. Mu e yimate yáyipiedie ome yu: a yijíñome yate bajade, enga a yejna cucha dacadode jnese aja yiquigade. Mu qué yiqui tu gaté ujetiga yise Crísto ipotigádode cucha ome yu jnese, uje cuchade udore qué déji yiquei gu.

¹⁴ Enga gajnui u ujetiga yugúsiji pigajñúraque gai enga yiquítequigája yiqui tuté. Chamáñaje ujetiga yise yiqui tuté jne enga Dupade a tẽrája yu jne iji gaté. Uje Dupade tibidi Jesucrísto anguresórone uyoque nanique gu ujetiga yico idai enga tẽrája yóguiji uté.

¹⁵ Omi tu ujetiga Dupade anguresõre etógode uyoque jnese yocáyipiedie chojmára iji jnumi ome cuchade udore. Mu ujetiga uacuñéngo jé cãra dáyipiedie quitígome yáyipiedie udire quigode enga Dupade a chingo quiguipísode ome uaque to jne.

¹⁶ Mu beyoi enga yejnángo yógaja yoquirajade cucha iji Dupade adode enga jé yico údi.

¹⁷ Yijorane uaque á, ejnáño uágaja yadode unojo to. Enga adójningachó uacojórigo Jesús anguresõre ujetiga ore ajnerámeone u yadode enga átayo uágaja udore ore to.

¹⁸ E yingo uaque ica enga e yingopome uaque rĩ uje yopise yáyugu uje jiei uacuñane uje cachi ore cho Dupade anguresõre iji re mu gajnareque ore adode. Crísto guetesórone u ore enga ore cho cucha bisidéguiji Crísto itoringai uje toji curesei gai ome yoque.

¹⁹ Mu a Dupade cho dajuñame udore ore jne. Uje cachi ca udore ore chajire Dupade yúrique go, mu cho ujetiga ore idupade u dapotiguéode cucha. Enga que ore chajéngome date gajnaréngone gotique, mu ore irasique re ome date gajnaréngone. Udore ore áyipiedie gaidode u cucha jnutiminórone gatuaque ome re.

²⁰ Jé basa Dupade urasapísode u yoque, enga yoquidai u gaté. Enga yanguretágo yoquiquetangóri yui jeta di enga tṍraji gaté ome yoque. Yojningai u Yocangarádejnai Jesucrísto.

²¹ Ujetiga di, enga a chinoningase yoquejnaréngone isai yocao jne. Enga a yocópise uté jne ome ao ijoréjnai. Enga oidé tu dajopié jne ujetiga chinoningase yoque. Enga utocaidé a jé upo dajopié tuaté jne rĩ ujetiga chimate cuchade aja re jnese, enga a jnuéngai cuchade udore jnese jne.