Filipénses 2 - Dupade Uruode

Crísto jnacare pajnotaque, mu unojo quigade enga eduguéjna cuchape

¹ Etoque uágome Dupade adode uje Crísto chijnóra uaque gu enga cho uacaquique ome uacajnusiétigade. Enga uacaríjogosṍri u Dupade Ujopié Espíritu Sánto to rĩ. Jecute caniraque uaque to enga posõraquéode déji uaque to ome uacojode ayoréo.

² Jecute apéso yininaquéode to rĩ, enga ajnórañopise ñane. Uacajéode chojmarapísiji jnumi ome cuchade jnese, enga átayo uágaja ñane ome Dupade adode gatuaque.

³ Ujetiga apéso cuchárique jne, mu ca uacáyipieraque déji oréraque ome uaque, jeoga uacáringárique picotaque. Mu beyoi enga apéso uacapesutique cucha enga ca uacáyipieraque dépisiji uaque. Uje ueradi u ujetiga yajicopise yocujode ayoré yui ome cuchade, enga yisigopise uté gosi gai, enga cho ujetiga sué yoquibai ome cuchade.

⁴ Acueyoi cucha arégode ome uaque, mu jé ca eduyo uaque. Mu acueyoi cucha arégode ome uacojode ayoréo to.

⁵ Cucha omi tu ujetiga ajuso uacáyipiedie guio, adi u Crísto uje suse dáyipiedie guio to nanique:

⁶ Crísto, Dupade ore adode jé upúsu ñane nanique. Mu Crísto áyipieraque que déji gotique ujetiga chopise dai Dupade ome gajnéone cucha.

⁷ Mu chicha dajnéone cucha aja ti yui, enga pésu re enga erámi unirísõre to, enga jé basa ga cho piróguiji re iji jnumi tuné to.

⁸ Uje e cho erámi unirisórone uñai tiji re, enga jnacare pajnotaque nanique. Enga tangaripísi dayé Dupade aja dagachodi, uje noñanguipise múñi uje ore chajo ayorérique aja curesérique gai.

⁹ Jecute Dupade chosipísi dajnacari iji gaté ujetiga sué ore gáyode jnese, enga ĩcarai taja dabi i u uje ueradéjna enga sué ore íode gáyode jnese iji jnumi.

¹⁰ Enga ujetiga ayoré togode, erámi unirisórone, gaté unirisórone ore chudute Jesús i ueradéjnai enga a ore doi ga ore chichaga dagataidie aja jnumi iji iquei jnese jne.

¹¹ Enga a ore chojninga jnese jne: "Yocangarádejna Jesucrísto." Enga Jesús gajnéone picotaquéo udore a gajnengóri u dayé Dupade to jne.

Dupade anguresórone ore chijninguesipise erámi unirisórone ujade ome dátegoningáne

¹² Yijorane uaque á, uje yugúsiji uacari nanique enga jecucha uacangáchoi yu. Mu ujetiga idája yu iji uaque marínga, jé angáchoi yu gaté. Ca ácayoji uacayaritique bisideque, mu beyoi enga ejnáño uágaja uacacuecaringué ichai tuté uje Dupade gueranome uaque. Ga pajnotaguipise uaque, enga jecucha ga angachopísi Dupade to.

¹³ Dupade pésu dáyipiedie ome cuchárique, enga jé u uje chisi ome páyipie omenie ome yoque. Enga Dupade upo rĩ uje chátaja yoque ujetiga yimáco yocáyipiedie unaji aja guesi.

¹⁴ Apéso cuchade unojo jnese enga ca oyo chere chere ome ñane, enga ca abotácho ñane rĩ.

¹⁵ Yigaidi u gu ujetiga ca uacojórique ayoré chiraja daru quitíguiji uaque, enga ca ore chisápo uacayoguérique rĩ iji dajade. Uacagúsoji pisijnaringuéone ipesungórone ujade iji erámi tuné uje gajnarenguipíso ore isocade. Mu Dupade ape uaque, jecute oyo uacai Dupade uje uégome pisijnaringuéone iji erámi unirisórone udore ore ujade. Chamáñaje uacajnunie u guédodie ome úringanie nanganatáguei uje chijninguese utataringuéone ajei.

¹⁶ Uaque u gu uje uacangoño Dupade uruode ome ayoré sijnángone udore ore uje Dupade a guẽrate pucuecaringué eyúgojmai ome ore ujetiga ore changureta. Enga ujetiga Crísto di jne enga a yirasique yu jne ome uacapesudode udore. Enga a yiraja jne uje que cucha bisideque yacajnaquéode ome uaque go. Enga a yirajápo jne rĩ uje que cucha bisideque yisagode go ome Dupade.

¹⁷ Jé socaseti ore chujé yu jne, mu pininaquei jogadi u jne ome yu. Yiraja gu uje e uaquẽcho uacanguretigai ome Dupade to, enga a yẽrápisa yu to ujetiga yoquẽrapáidode nóna ñane aja gaté ome Dupade. Enga e yingo yirasitigade ome cuchade udore ome uaque ujetiga uacarasicho uaque to.

¹⁸ Jecute anínaño uaque to, adi uyu uje yinína yu to.

Páblo ajéode u ujetiga chiroque Timotéo, Epafrodíto ore aja Filípos

¹⁹ Ujetiga Yocangarádejnai Jesús ajéo enga a jĩraque yiroque Timotéo aja uaque jne ujetiga chidójninga uaque. Enga a yinína yu jne ujetiga di uacajnomérique údi iji yu.

²⁰ Que yaríjogonórone uñeque déji ne ujetiga cho Timotéo, uyoque. Uje Timotéo chopise yu enga gaidode u uacangoningárique to.

²¹ Uje yocurasade uñane ore ucuegode u cuchade ome re jnese, enga que cucha Jesucrísto iroquéode ome ore go.

²² Mu uacarajáyo Timotéo átegoningáne to uje cháta raja yu ome yocatatagode Dupade urúo. Enga Timotéo gajnami su disabi to ome yu uje cháta cuchade aja dayé.

²³ Jecute a yiroque Timotéo aja uaque jne jeta pijoque yujurúgaisórone áyipierigui ome yu.

²⁴ Mu yangureni u Yocangarádejnai ujetiga jĩraque chijnime yu iji yúringai pujurúgai enga a uyu u jne jeta yise uaque.

²⁵ Yajéode upo rĩ jeta yirógape Epafrodíto aja uaque uje uacaroi jé u Epafrodíto aja yu ica jetiga cháta cuchade aja yu iji yúringai pujurúgai. Jecucha Epafrodíto uyoque yátago yoquipesudode cucha aja ñane ome Dupade uje yipécorango Dupade guetesórone ore adode.

²⁶ Mu e Epafrodíto potapísa jetiga chajirápo uaque rĩ. Uje uacadúcho úringai ejnarétaque to enga uacosṍchopíse yui. Enga e pota jeta chisápo uaque rĩ ujetiga ayáyo uacáyuguhebátigade ome.

²⁷ Jé ũré yu uje ejnarétaque diríca enga jé toguírase. Mu Dupade chosõre diríca enga chiqueta. Que gusu uje chosõre Epafrodíto, mu jé chosõrapo yu to rĩ jetiga ca pujnusiétigade sué yibai iji yúringai pujurúgai uné.

²⁸ Jecute yipota jetiga yirogabája uaque jetiga uacarasique uté jeta amóño, enga a yiya yo yáyugu uaque to jne.

²⁹ Ujetiga Epafrodíto díji uaque enga ca ajusécho jne uje uacojo Dupade anguresõre gu. Mu ca gusu Epafrodíto ujetiga ca ajusécho, beyoi enga ca ajusécho jnanione uñane to uje ore cho Epafrodíto uté.

³⁰ Uje Epafrodíto toguírase diríca enga uté bai u Crísto iroquéode. Uje idája yu iji uaque enga que toque jeta átayo cuchárigo aja yu, mu uacaroi Epafrodíto chisi ome re ome yu iji yajnei pocaninga ujetiga chátaja yu iji yúringai tuné pujurúgai.