Filipénses 1 - Dupade Uruode

¹ Jesucrísto irógode u Páblo, Timotéo uyoque, enga yurúsãco yocurusarane cárta ome yocujode Dupade anguresóño jnese iji uaquedai Filípos uje uacátayo uágaja Jesucrísto to. Enga uacangaránone uje pastores u ore, jé aja uacatocaidode diácono ome Dupade adode ore gajnecho yocurusarane to rĩ.

² Yocajéode u ome uaque ujetiga Yocai Dupade, Yocangarádejnai Jesucrísto ore chátaja uaque enga uacajéode cho sere jne.

Páblo icatecãraitigade gajnengórone u Dupade anguresórone iji Filípos

³ Jecucha yáyipie déji uaque enga yicatecã́ri Dupade ome uaque. Enga jecucha yacãre Dupade gai ome uaque rĩ.

⁴ Uje yicatecã́ri Dupade ome uaque enga yirasique yu ome yicatecãraitigade ome uaque jnese.

⁵ Chamáñaje jecucha uacátayopísaja yu gu ome yatatagode Jesús acho jé iji taningápisi, jé aja deréjnane unojo to rĩ.

⁶ Uerate Dupade ipesudode iji uacajéode iji taningápisi. Enga a jé jno dapesudode cucha omío udore údi ome uaque jne jé aja diri uté ujetiga Jesucrísto diapo jne rĩ. Enga que potigayaquérique déji yu to ome Dupade adode udore ome uaque.

⁷ Jé tiógara yáyipie omenie udire ome uaque jnese. Chamáñaje cho ujetiga agusopísiji yajei uje yijnorapise uaque gu. Uje yugúsiji soldádode iguíjnai uje ore suru yibai iji, jeoga yugúsiji eduguéjnane iquei uje yĩrarare yatatagode Jesús acho gai, mu cho ujetiga agúsoji yari iji te enga yajnei Dupade icaniratigué jé gajnengórone u uaque to.

⁸ Dupade chiraja uje yijnorapise uaque jnese. Enga yijnoraquei gajnui u Jesucrísto ijnoraquei tome uaque.

⁹ Yicatecã́ri Dupade ome uaque ujetiga uacajnoraquéode quérãpise ome ñane jé aja uacarajatigade, uacayuquetotiguéode to rĩ ujetiga udore quérãpise to iji uaque jnese.

¹⁰ Yipota gu ujetiga jĩraque arajáyo cucha areguipísode iji cuchade uñane ujade, enga ejnáño uacáyipiedie aja cucha areguipísode udore. Yigaidi tu gu ujetiga uacáringáringo ũréo pijoque, enga ca ayorérique chiraja daru quitíguiji uaque, jé aja Crísto diringárique.

¹¹ Yigaidi tupo rĩ ujetiga uacajnua tu poria uje adie jiépisi. Yojninganie ai u uacátegoningáne uje udore garani u uacaríjogosṍri Jesucrísto. Chamáñaje yocátegoningáne u uje pésu ga Dupade ingoningájnai pijógome erámi enga diga picotaque Dupade gu ome udore.

Páblo gaidode u Crísto adode uje qué eca

¹² Yijorane uaque á, yingome uaque uje que gajnarécho yajnéone pujuyaquéo gotique, mu ueracho. Uje piotiguei jé u gu ome yu jetiga yingo Dupade úringai piquetangore aja ore.

¹³ Enga soldádode uje ore déji eduguéjnai iguíjnai, ore chiraja jnese uje yibade u Crísto adode. Jé u ayoréode uñane rĩ, ore chirajápo to rĩ uje yibade u Crísto adode.

¹⁴ Jiéode upúsu yujode Dupade anguresóño uje ore chimo yu aja yúringai pujurúgai enga udore ore u uje ore jnusi rángome datatagode Dupade urúo gaté, enga que ore chagutu rángome to. Ore chimo uje Yocangarádejnai chátaja yu, enga ore changuretapise to ujetiga chatapója ore to rĩ.

¹⁵ Ũré yu uje gajnarénguei jnanione uñane áyipiedie uje ore chacate darasade ome Crísto adode. Uje cachi ore ajéode noña ome yu enga ore ucueguipísi tu ujetiga ore ujode Dupade anguresóño ore ajéode noñapise to ome yu. Jé basa ueradei jnanione uñane áyipiedie, enga ueracho to ore isocade uje ore chacate darasade ome Crísto adode.

¹⁶ Taque jnanione udore uñane uje ore cho Crísto adode atatasórone iji raque. Udore ore gaidi tupúsu dáringáringo ayoredatéo, enga ore pota chinguíra páyuguhebátigade aja yu gaté iji yúringai tuné pujurúgai.

¹⁷ Jé basa ga uñane basája yiyaridi tome Crísto iroquéode uje ore chijnóra yu gu. Ore chiraja gu uje yibade u uje yĩrarare Crísto úringai piquetangóri gai.

¹⁸ Ujetiga ueradei Crísto adode atatasórone ore áyipiedie, jeoga gajnarénguei ore áyipiedie, mu yirasique yu uje yudute uje pacadique ayoréode ome Crísto adode. Enga a qué yirasique yu gaté jne.

¹⁹ Yiraja gu uje Dupade a chiqueta yu jne ome cuchade udore jnese ome uacacatecãraitigade ome yu. Uje Jesucrísto Ujopié Espíritu Sánto a chátaja yu to jne rĩ gu.

²⁰ Yajéode u ujetiga ca yajéngome yatique uñeque jne, mu yangureta Dupade ome yu ujetiga picasitigai irágu yu ome yatatagode Dupade urúo iji deréjnane. Yigaidi tupúsu ujetiga picotaguipise Crísto ome yadode iji deréjnane. Cuchiyi tupúsu iji deréjnane unojo. Jecute jé arec ome yu ujetiga yitoina yanguretigai ome Jesús, jeoga qué yiqueca.

²¹ Uje qué yiqueca enga unéri tu Crísto ojningane cucha ome yu, enga yigaidode u udore. Jé basa uneripísi tu yitoringai ujetiga yimate yu aja Crísto gari iji gaté.

²² Mu ísenga jé yiqueca ga yatatarása Jesús adode gaté. Jecute que yiraja yajegaitique iji cucha gáreode udore: ujetiga e yitoi, jeoga jé yiqueca.

²³ Que toc ujetiga yiraja arétiguiji cucha gáreode unojo. Yipotárasa jetiga e yitoi enga yicáji Jesús gari to. Ísenga ueratigai u uné ome yu jetiga yitoi.

²⁴ Mu ueratigai a u ome uaque jetiga yiquecape ome uaque.

²⁵ E yiraja uje arei tu jetiga yiqueca enga yátabája uaque gaté jne ujetiga aquéraño iji uacanguretigai ome Dupade. Yigaidi tu gu jetiga uacarasique uaque gaté ome uacanguretigai.

²⁶ Yiraja to uje a jé yisápo uaque jne rĩ, enga a anínañopúsu Jesucrísto jne ujetiga chorei yu iji uaque.

²⁷ Uje Crísto adode gaisórone u uaque, enga acueyoi uacasocáringome uaque ujetiga uacadode omío jnese. Ujetiga yise uaque, jeoga idája yu iji uaque, mu yipota ujetiga uacajnomérique chise yu uje uacajéode chojmarapísiji jnumi jnese uje uacajóyo uágaja uacanguretigai ome Dupade uru piquetangórone.

²⁸ Enga ca amóño pisadodéringárique ome uacamajosórone ore. Chamáñaje ujetiga ore chimo uacacasitigai enga a jĩraque ore chiraja jne uje Dupade iquetade a u uaque jne, jé basa ore quique obiréjnai a u Dupade ujuyaquei jne.

²⁹ Uacajnei tu ujetiga anguretáyo Crísto, mu que gusu ujetiga anguretáyo uté. Mu uacajnei tupo to rĩ ujetiga oyo uacaba adode to. Enga cucha omejnai tupúsu ome yoque ujetiga yoco yoquiba Crísto adode.

³⁰ Jé yoco ñane ome yocajnéone pocaninga uje Dupade guetesórone cho dajocaningame yoc. Mu uacarajáyo uje que yiya yatata Dupade adode nanique ome cuchade udore. Enga yujnomei a e chise uaque uje jé yajo yu aja yatatagode Dupade urúo ome ore, jé aja deréjnane unojo.