Éxodo 9 - Dupade Uruode

Dupade chisi ome dequejnareque cuchátigo ome egíptogosode gachidode cucha nanique

¹ Dire uñai ga Dupade chojningápome Moisés gaté rĩ: –Bo ga jé ajmitape Faraón uté gaté ga angopísa yuru quigode udojo aja uté jne. Ga ojningame jne: 'Pangarádejnai, uje hebréogosode yocangureni Dupa u uté, chósi tome ua que: Jé ca ãraque doi ome yurasapísode Israel ujnacare disi ejo ore ga ore jno ga ore catecã́ri yu iji uté jne.'

^2-3 Ojningápome Faraón gaté rĩ: 'A jé ca ajuéga doi ome yoque gajneri jne enga Pangarádejnai Dupade a chijna cutejmai detotiguejna, dajopiéjna ome uacachidode aquirájna gajneri uje udire déji garáyode iji baniri udé údode. Ga a chisi ome dequejnareque cuchátigo ome aquirájnanie udire jne ga chácariji údode. Mu a jé ca gusu aquirájnanie gotique ome jne, mu jé aja uacachite cuchiso uñane ore jnese: buricade jnese, burica quedéjnane jnese, caméllode jnese, jé aja áyasadie ore jnese rĩ.

⁴ Mu Pangarádejnai chiraja yocurasade gachidedie iji egíptogosode uacachidedie ujade ga a jé ca cho dajuñame yocachidedie to jne iji egíptogosode uacachidedie ujade. Ga yurasade ore gachidéraque a ca uñátaque chejnárengosi re to jne ga jé ca uñáraque topoi jne rĩ.'–

⁵ Mu Dupade chojningame Moisés: –A yipésu udojo dirome.–

⁶ Uje chise ojningai dire ga doi daru quigode ga egíptogosode ore gachidedie aquirájna íjnonguipíse nanique uje Dupade chisi ome dequejnareque cuchábi ome nanique. Mu Israel ujnacare disi ejode que uñeque gachidéraque toi to gotique.

⁷ Dire uñai ga Faraón chiroque darógode aja israélgosode ore gachidedie yui jeta ore chajire jeta ore gachidedie toi to. Mu que uñátaque toi gotique. Mu Faraón jé isoca uje cusu rome cuchade ga que juéga doi ome Israel ujnacare disi ejode ore gotique.

Dupade chisi ome pugórodie ome egíptogosode ga ujuya ore

^8-9 Dupade catecãrápoi Moisés, Aarón ore rĩ ga chojningame ore: –Moisés á, aro puchucurui jne uje déji pipotatique ajénique ga oréji Faraón ga asidája quedéjnane iji uté iquei. Ga a chicáji ore idai údode jnese jne ga a basája jnanione ga nóña enga pugóroi iji ore gáyode jnese, jé aja ore gachidode cuchiso ore gáyode jnese rĩ. Ga jé chuságaja puniri Egípto údode jnese.–

¹⁰ Moisés, Aarón ore charo puchucurui uté ga ore chijna daroi ga ore chicáji Faraón yui. Ga jé u uje Moisés tṍra daroi puchucuru aja gaté ga basája ore gáyode ga jĩraque nóña ga jĩraque pugóroi iji ore gáyode, jé aja ore gachidode cuchiso ore gáyode rĩ.

¹¹ Faraón tibidi jórogui daroque irajatade uje ujopíerãque ore to ujetiga ore charo puchucurui ga tṍraja gaté to ga pésu pugórodie iji ore gáyode to. Mu que ore doi uje pugórodie jé ujuya ore to gu.

¹² Mu Dupade pésu Faraón ga cusu rome cuchade udore jnese ga que tangári Moisés ore uru quitique gotique. Ga Dupade jé uruode upúsu ica ome Moisés ore.

Dupade chiramurase ébedatédie egíptogosode ore gáyode nanique

¹³ Mu Dupade chojningame Moisés gaté: –Bopo rĩ ga abágui Faraón gajneri jeta dire ga ango yuru quigode udojo ome uté jne ga ósi tome jne: 'Pangarádejnai, hebréogosode Yocudupade chojningame ua: Jé ca ãraque doi ome yurasade ore jeta ore jno ga ore catecã́ri yu iji sañeque.

¹⁴ Jeta jé ãraque doi ome yurasade Israel ujnacare disi ejo ore jne enga a amo yujuyaquédatérigo ome barasade, uaque jnese jne, baróquegatéode ore, ga a suépise uacajné casodé yujuyaqué baja casodé gáyode jnese. Ga a u jne uje quene uacarajáyo yu uje que uñeque doi ga chosi yu to iji erámi tudé ome yúringai Dupa Pimanisõre.'–

¹⁵ Moisés chojningame Faraón ore: –Dupade uruode uñéngo qué déji uje chojningame uaque ga chósi tome uaque: 'A yajéraso diríca ga yujuyaqué casodé e chequésãriráse uaque diríca mu yigaidi u ujetiga jé amóño yujuyaquéode uñéngo ome uaque uje qué déji uacaquéode.

¹⁶ Qué yicha uágaja diri diríca gu jeta arajáyo yúringai ujopíerãque cuchape uje qué uacagúsoi erámi tudé. Yigaidi upome uaque rĩ jeta uacojode ayoré chudute uacajnomei iji danirone to iji erámi údode jnese uje Dupa Eyúgojmai uyu u uje yujuyagaite uáguiji uaquedai tudé ome uacajosipiedie.

¹⁷ Uje uacamóño yujuyaquéode ome uaque, mu que ajuécho doi ome yurasade udore ore ga ore jno enga ore catecã́ri yu iji sañeque.

¹⁸ Jecute a guedé batigai udé jé upúsu dirome jeta yiramurase ébedatérigui uacabai iji uacaniri udé údode jnese. Ga a udire suépise egíptogosode uacamonie ébei gáyode jne. Ga que uacáquirigo jnani bajaque que ore chimo udaji to nanique.'

¹⁹ Dupade chojningápome uaque rĩ: 'Jetiga dire dirome ga ajuso uacachidérigui guio iji cuchárique útigo to jne uje ebe cuchábedie udire a chujé uacachidedie jeta déji garáyode, jé aja jnanione jeta jé ca ore chácariji guiguíjna ajénique.'–

²⁰ Faraón iróquegatéode uñane ore dosóñime dire uñai yui jeta Dupade e cho dajuñame ore dirome, ga ore doi dachidode cuchiso ga ore chaníraja guiguíjna ajéode to, jé aja ore irógode jeta ore chácariji guiguíjna ajénique to.

²¹ Mu uñane que ore dosóñime Dupade uru casodé gotique to, jecute ore gachidedie jé jogate garáyode iji sona, jé aja ore gachidedie irodisórone ore iroque ore to.

²² Ga Dupade chojningame Moisés: –Moisés á, be ga asingare bajmainie aja gaté ga jogadi u uje ebe cuchábedie base egíptogosode ore gáyode, jé aja ore dosadode iji garáyode iji ore eruéode jnese ga chujé ore gachidode jnese. Ga chejna ore acade cucha iji ore jutícabidie ore to.–

²³ Uje Moisés chutai gaté enga jogadi u uje ajnorane base, ga guéode uruode jiépoi rĩ ga ebe cuchábedie basapo to rĩ iji ore uniri Egípto údode jnese.

²⁴ Guéode uruode que íjnongapo gotique rĩ, jé aja ajnorane ore jnese. Ga jé aja ebe cuchábedie uje que chapo gotique to rĩ. Egíptogosode ore dáquirigo que gajnetique Dupade ujuyaqué chopo ore gajnéone udojo Dupade ujuyaquéo ebe cuchábei rĩ.

²⁵ Ebe cuchábedie udire chujé ore acade cucha nanique iji jnumone jnese, jé aja ore gachidedie aquirájna posode jnacaracho iji ore uniri údode. Jé aja ore acadie pori uje ore tagu adie ga chibéro aja jnumone to, enga chujépise jnanione jnese uje ore déji guesáringai, jé aja ore gachidode cucha jnese.

²⁶ Mu iji Israel ujnacare disi ejode ore idai Gosén que ébedíe chise ore gotique to iji te. Que ebe cuchábedie uñátaque basosi aja ore idai tuté gotique to.

²⁷ Faraón tibidi Moisés, Aarón ore gaté rĩ ga chósi tome ore: –Quene yiraja uje yocúringane ducusuréo u uje Dupade cho dajuñame yoque iji yocuniri Egípto udé. Que cachi Dupade ujuyagaite yoc.–

²⁸ Faraón chojningame ore: –E jiei guéode uruode ome yoque, jé aja ajnoraque cuchábode, ebe cuchábedie ore. Be ga aquĩ́ra Dupade ome yoque jeta ébedíe chope jnángome yoque. Ga a quene yujuéga doi ome Israel ujnacare disi ejode uaque jne.–

²⁹ Moisés chajnai Faraón uruode ga chósi tome: –A yajníngo to gajneri iji baguíjnai tudé jeta yicagóji yoquidai uté ga a yutai gaté gajneri ga a ébedíe cho jnángome uaque gajneri uje yingo Dupade gu. Ga jogadi u jne uje quene uacarajáyo jne uje Dupade gajneque erámi tudé ga jé doi dajequigode ome. Uje a chaquĩ́ra ebe cuchábedie, gue uru cuchábode, ajnoraque cuchábode ore jne, ga jogadi u jne uje guei a cha ¡jnaque! jne.–

³⁰ Moisés chojningápome Faraón rĩ: –Yiraja uje que basadodéringai déji ua ome Dupade, jé aja baroguipísode uñane to rĩ. Chamáñaje a jé ajuéchorása doi ome yoque jne gu ujetiga jé ũré enga atodóyo Dupade ujuyaquéode yúrigo.–

³¹ Faraón jutícabia irodisórone chopise dáyugu re ome ore aca casodé uje irodique ore acade cucha uje i tu cebáda. Enga adie e cusirase mu ebe cuchábedie chujé iji jnumi ga e ore jmátapóme rĩ. Jé chopo ore acaque cucha uñeque rĩ uje i u líno ga ore chiro daguidedie iji ducarigode uje ore chucare iji líno uté to nanique. Ga a e pojnárase mu ebe cuchábedie chujé iji jnumi to ga e ore jmátapóme cucha pacade udore rĩ.

³² Jé basa ore acaque uñai uje i tu centéna ga cáma ájnaraque doi guetique to ga a jĩraque suépo jne rĩ. Ga jé upome ore acai trígo to rĩ uje que cuchárique chósi ti iji trígoi uté to.

³³ Uje Moisés chajníji Faraón iguíjna cuchábi ga Moisés chãrai dajmainie iji gaté ga catecã́ri Dupade ga chojninga: "Aquĩ́ra guetṍrai ome egíptogosode udore ore." Ga jĩraque guetṍrai tuté cho jnángome Faraón urasade ore jnese. Ga guéode cha, ga ajnorane chapo to rĩ, jé aja guéode uruode, ebe cuchábedie ore, ore cha jnese.

³⁴ Uje Faraón chimo uje ore gajnei guetṍraque cho jnángome ore, ga jé chajnera dádi ome date gajnaréngone ga cusu re ome ore. Jé aja Faraón iróquegatéode ore, ga ore cusu raque to.

³⁵ Uje Faraón cusu re ome Israel ujnacare disi ejode ore ga que juéga dórique ome ore. Dupade uru casodica jé upúsu ome Moisés uje chojninga ica: 'A yipésu ga Faraón ducusuréchoquí ome uaque jne.'–