Éxodo 8 - Dupade Uruode

¹ Ga chojninga: –Boyo ga abáchopoi Faraón gaté rĩ ga ojnichome jne: 'Pangarádejnai potapísa jeta ajuéga doi ome yoque ga chojningame ua: Jé ca ãraque doi ome yurasade Israel ujnacare disi ejode udore ore ga ore jno ga ore catecã́ri yu iji garáijnai tuté jne.

² Ujeta ãraque doi ome yurasade Israel ujnacare disi ejo ore gajneri enga a yo yujuñame uáguiji uacaniri tudé ome yujuyaqué cuchátique jne ga yiramurase chiranie, jmíngone ore aja uacabai jne, iji uaquedai tudé, mu que gusu uáguiji de mu jé aja uaquedai uñane ore jnese uje ore déji Egípto udé údode jnese.

³ Ga a tié cho dajachuguéraque iji chiranie, jmíngone ore jmainie jne uje ore imeséra iji jnumi ome dáringanie chogué. Ga a chiranie udire chipédugu tié jne enga a ore chise baguíjna cuchábi uté to uje bayaridi jé u uté gu, ga chiranie chise uáji bayaridi. A chĩretápo bamochápi iguíjnai jne rĩ, jé aja baseradéjnai gai. Mu a ca gusu baguíjnai jne jeta chiranie udire, jmíngone udore ore chĩreta, mu a ore chĩreta baróquegatéode ore iguíjnai ajéode to jne, jé aja barasade ore iguíjnane jnese to jne. A chĩretápo uacapesudode dotíya gáyode jne rĩ, jé aja uacapotapiedie enga a ca togápo pioque pipotatígome uaque jne rĩ.

⁴ A chiranie udire chója babai dirome ga a chácari jóroguiji bádode dirome jeta ṍra jórogaja quedéjnane iji babai. Mu a ca gusu ua jne, ga baróquegatéode, barasade ore narañime to jne ga jé chopise ua uje chácari jóroguiji ore údode to.'–

^5-6 Dupade chojningápome Moisés rĩ: –Angome bayai Aarón ga chanire dogué aja tiedie jnese iji Egípto údode ga jĩraque chiranie, jmíngone chĩreta jnumi tudé údode.– Ga Aarón jĩraque jnome desai uruode jeta chujé yodode ome dogué ga chiranie, jmíngone chĩreta gajñonie, tiedie, tié pujnunie ore iji egíptogosode ore uniri údode jnese. Uje chiranie tṍraji yodode udore ga chĩreta egíptogosode uniri ¡pac!

⁷ Ga Faraón tibidi darógode ore to uje irajataque ore ga jé ore dopísi Moisés, Aarón ore isocade to uje ore chiroque chiranie aja darasade ore idáyode to. Enga jé ore pésu to, mu udore ore ujopiedie jé cãra re ome Moisés, ore oidé Dupade ujopié.

⁸ Mu uje Faraón narañi jórogome chiranie ga tibidi Moisés, Aarón ore ga chojninga: –Angoñoba uacangureni Dupade gotique ga chaquĩ́rape jmíngone, chiranie ore ome yurasade ore uyoque ga a boyo jne enga acatecãchobi uacangarádejnai gotique iji sañeque jne jeta ẽchója uté jne ome uacachidode aquirájna uñéngo iji sañeque.–

⁹ Moisés chojningame Faraón: –Angoba guedé jogatígaja yu ujeta yicatecã́ri Dupade ome barasade, baróquegatéode ore, uhuaque jne ga chirã cuchábedie chibéroba re ome uaque to jne jeta Pangarádejnai chiroque ore aja doi iji uacaniri udé údode jnese enga doi dajómione yocho ga cho daniri iji jne.–

¹⁰ Faraón chojninga: –Yajegaidi jé u dire uñai dirome jeta acatecã́ri ome yoque.– Moisés chojningame Faraón uté: –A yicatecãrami ome uaque jne ga Dupade chaquĩ́rape chiranie ome uaque jne. Ga a quene amóño jne uje Pangarádejnai Dupade ujopíerãque ga que uñeque ujopié cunguésõri uté cutejma ujopié.

¹¹ Ga a quene amo jne uje Dupade u uje chiroque udire aja doi iji baguíjna cuchábi ajei ga chiroque ore aja ore unirenie tié jeta ore chedu chácariji tiedie udire. Ga a ca chácarapóji uacádode jne rĩ, barasade, baróquegatéode, uhuaque jnese.–

¹² Moisés, Aarón doi guesi iji Faraón iguíjna cuchábi ajei. Ga Moisés chijócha Dupade ajei údi jetiga chaquĩ́ra dajuyágaidé casidé diríca chirãi ome egíptogosode ore uje jé chácariji ore údode gu.

¹³ Ga Pangarádejnai Dupade tangári Moisés nanique uje chijócha ajei údi ome egíptogosode jeta chaquĩ́ra chiranie ome ore. Dupade tangári Moisés nanique ga chaquĩ́ra chiranie ome Faraón, urasade egíptogose ore nanique, mu que Dupade chiroque chiranie aja dode nanique mu ore toji ore iguíjnane ajéode jnese.

¹⁴ Ga egíptogosode ore chacã́ri chirã toguedie iji ñane nanique jeta ore pésu unucódedie iji dedai dosadode nanique ga ore idai chusaque dejode iji jnumi ome chiranie abié nanique.

¹⁵ Uje Faraón chimo uje chiranie cho jnángome ore ga que juégapo doi tome Moisés, Aarón ore ujode Israel ujnacare disi ejo ore rĩ. U gu uje Dupade jé urúpisome Moisés ore nanique uje Dupade a guerani u pucusuréringai ome Faraón uté jne.

Aarón chujé jnumi ome dogué ga úyujna jnome egíptogosode ore idai údode ga úyujna nóña ga jnapié

¹⁶ Ga Dupade chojningápome Moisés rĩ: –Angome bayai Aarón jeta chujé jnumi ome dogué tuaté ga úyujna jnome egíptogosode ore idai údode ga úyujna nóña jne enga jnapié jne ga a jnapié yore egíptogosode ore gáyode jnese jne iji egíptogosode ore uniri údode.–

¹⁷ Uje Aarón chujé jnumi ome dogué ga jnumi úyujna jnome ore idai údode ga úyujna tuaté nóña ga jnáño ga yore egíptogosode ore gáyode: jnanione, jé aja ore gachidode cuchiso ore jnese ga ore uniri uté nóña ga jnapiéji jnumi.

¹⁸ Uje Faraón irógode jnani ujopíerãque ore chujé jóroque jnumi ome doguedie to jeta úyujna nóña ga jnáño to mu que cuchárique tṍraji ore oguedie gotique. Ga egíptogosode ore chejnáreque re ome jnapiedie udire diríca uje yore ore gáyode, jé aja ore gachidode cuchiso ore gáyode to nanique.

¹⁹ Faraón irógode udore jnani irajatácho quene ore chiraja uje Moisés que u gotique jeta pésu cuchade ome dajopiéraque, jecute ore chojningame eduguéjna cuchábi Faraón: –Quene yirajágo uje cuchade udore garani jé u Dupade ujopíerãi uje que cuchárique tṍraji yocoguedie gotique to.– Mu jé isoca uje Faraón cusu rome Moisés, enga que tangári darasade uru quigode, ga que juéga doi ome Israel ujnacare disi ejode ore. Enga jé chopise uje Pangarádejnai Dupade chingo ore ica gu.

Dupade chiramurase juticade egíptogosode gai nanique

²⁰ Dupade chojningame Moisés: –A Faraón chicáji tié dirome ga obéri yui to dirome ga ango yuru quigode udojo aja uté jne ga ojningame jne: 'Pangarádejna Dupa Eyúgojmai chiroque yu aja bei ujetiga yingo uruode ome ua, ga chósi tome ua: Ca ãraque doi ome yurasade Israel ájnape disi ejo ga ore tẽrája dachidode cuchiso uñéngo ome yu iji sañeque.

²¹ Mu jeta ca ajuéga doi ome ore enga a yisi ome jutíca uásejnaringome uaque jne jeta yore uacabai iji uacaniri tudé ga a chĩreta baguíjna cuchábi ajei jne, jé aja baróquegatérigo ore iguíjnaringo to, jé aja barasade ore iguíjnane jnese iji uacaniri tudé údode. Ga a juticade chĩretapise uacaguíjnane ajéode ga jiépoji jnumone jne rĩ iji uacaniri údode.

²² Mu yojningame ua: A gusu Israel ujnacare disi ejode ore uniri uje i tu Gosén jeta titame juticade uje a arajáyo jne uje yajneque erámi tudé ga jé yiji yajequigode ome uáguiji erámi údode jnese.

²³ A uyu u dirome jeta yujuéga juticade ome baniri tudé, mu jé basa ga a yãraque Gosén yui ome juticade udore ga a ca déji to jne.'–

²⁴ Dupade pésu dojningane udore jnese ga chiramurase juticade egíptogosode gai nanique ga chopise ome gue abuja utatadie uje tṍraji gaté ga quítequigája ore eduguéjna cuchábi Faraón iguíjna cuchábi ajei ga nóña ga jutíca nanique ome egíptogosode ore. Ga juticade chĩreta Faraón iróquegatéode iguíjnane ajéode to ga ore chapuse ore idai údode aja to ga chĩreta egíptogosode ore uniri údode jnese nanique. Jutíca uási uté chácariji egíptogosode ore údode nanique uje chejnapise cuchade iji ore uniri Egípto aja guesi nanique.

²⁵ Faraón tibidi Moisés ore jeta catecã́ri ore ga chojningame ore, Moisés, Aarón ore: –Ujetiga Israel ujnacare disi ejode apótayo ẽchója uacangureni Dupa ome uacachidode cuchiso uñéngo marínga, ẽchója uté iji de yocuniri Egípto, mu jé ca boyóji yocari jne.–

²⁶ Moisés chajnai Faraón uruode ga chojningame: –Que baruode déji pajénique ome Israel ujnacare disi ejode uyoque. Uje barasade egíptogose uacadupade jé u aquirájnanie gu, ga cachi amóño yoquẽrapáidedie ome Pangarádejna Dupa Eyúgojmai ga amitingácho yóguiji uaté gánique ome cucaranéringui ga a amácho yógaja jnumone jne jeta arotáyo yoquiguéraque aquirájna.

²⁷ A yico jne enga a yicagóji Dupade ojningai uté garáijna jne uje uru quigode jé u ome yoque gu. Ga a yoquimochátigo gadióguiji uté yui jne jeta yico to uje idája gu. Ga a quene jogadi jeta yẽcója Dupade iji ome yocachidedie aquirájna uñanie iji to.–

²⁸ Mu Faraón chojninga: –A yujuéga doi ome uaque jne jeta ẽchója Dupade gotíguiji te, mu jé ca idája uáguiji sañeque jne ome yoque. Ga acatecãchoi dirome, ga acatecãchópoi ome yu to dirome rĩ.–

²⁹ Ga Moisés chojningame Faraón: –A yajni to gajneri ga a yicatecã́ri Pangarádejnai Dupade ome ua gajneri ga chijócãre jutíca uási uté gajneri iji uacaniri tudé jetiga oyo paráchoji uacaguíjnane ajéode dirome, jé upúsu ua aja barógode ore jnese to, jé aja barasade ore jnese. Mu ajuse beo ome baringaquéode udore gajneri ¡jã! Ca ãrácapome yoque jne rĩ jeta yẽcója Dupade iji garáijnai tuté jne.–

³⁰ Uje Moisés doi guesi tiji Faraón iguíjna cuchábi ga catecã́ri Dupade jeta Dupade chaquĩ́ra jutíca cuchábode ome ore dirome uje chácariji ore údode gu.

³¹ Ga Dupade tangári Moisés ga chaquĩ́ra jutíca chagúode ome Faraón ore urasade jnese nanique, ga quene tijode chopo jnángome Faraón, iróquegatéode, urasade ore jnese rĩ.

³² Mu jé isoca uje Faraón cusu re ome Moisés, urasade ore nanique ga que juéga doi ome ore iji dire uñai.