Éxodo 7 - Dupade Uruode

¹ Dupade chojningame Moisés: –Cangarami yuru quigode udojo ome ua. Uje a yiqueta yu aja bajei jne enga a jé opise yu jne iji Faraón uté iquei. Jé basa ga bayai Aarón a chajnerame baru quitígo ome eduguéjna cuchábi jne jeta jé acatecãchoi uté.

² A bajúdode u yingoméone cucha aja Aarón jne enga chajnerame baru quigode ome egíptogosode eduguéjna cuchábi uté. Uje baraja quigode jnese gu uje yingome ua ica, ga jé basa ga bayai Aarón chajnerame baru quigode ome eduguéjna cuchábi ujeta juéga doi ome Israel ujnacare disi ejode, enga aquíjnochoja doi iji egíptogosode ujade.–

³ Ga Dupade chojningápome Moisés rĩ: –A yipésu Faraón jne enga cusu rome uaque jne enga a ca juéga doi ome uaque jne. Mu a uté chimopo yatígome re jne. Ga Faraón uté, jé aja uté urasade a quene ore áyipiedie déji yu jne uje ore chimo yátedatéode uje garani jé upúsu Dupade uyu.

⁴ Ujeta Faraón jé ca juéga doi ome uaque jne marínga, jé ca oyo uacáyugu uágome uté gãrétigaringo jne uje a uyu u jne gu jeta yicha yiyiejnáringuejnái aja puniri Egípto tudé údode jnese ome yúringai pirosobádodedaté ome cucha ponai, ga a uyu u jne rĩ jeta yiroque uágaja uacajesui uté jne. A yeranone u páyuguhebátigadatéode jne ome egíptogosode udore ore iji ore uniri tudé uje que cachi yẽrapáicho ome ore gu uje ore pésu yurasade Israel ujnacare disi ejo uacajurédatédie ga jé basa ga udore chajni ore gai iji daniri tudé údode dirome. Ujeta yejna yujuyaquérigo aja guesi jne ome egíptogosode ore ga a yojningame Israel ujnacare disi ejode uaque: "Boyo jne enga apéso uacajochatígo aja uacajesui gajneri ga boyo jnese jne enga atiróchoja uacajesúrique jne ga a yopise yurása iji uaque jne aja uacajesúrigo erámio jne."

⁵ Ujeta egíptogosode ore chimo yátedatéode ome raque dirome jeta e yijnimápo uáguiji ore uniri tudé enga quene ore chiraja uje Dupa Eyúgojmai jé upúsu yu uje yijnime uáguiji ore ujade.–

⁶ Moisés, Aarón que chimoque Dupade uru quitígome re uje ore pésu udore aja quigode nanique.

⁷ Moisés guejnanie siquerei chise 80 nanique uje catecã́ri Faraón, jé basa uyai Aarón guejnanie siquerei déji 83 nanique uje ore catecã́ri egíptogosode eduguéjna cuchábi Faraón nanique.

Aarón tṍra dogué aja jnumi iji Faraón iquei, mu nóña ga uga

^8-9 Dupade chojningápome Moisés, uyai Aarón ore rĩ: –Ujeta Faraón pota chimo uacátedatérique jne, enga angome bayai Aarón jne jeta tṍra dogué aja Faraón uté yui jne ga a nóña ga uga jne.–

¹⁰ Uje Dupade chejna daruode udore guesi ome Moisés ore ga ore jno, ga ore tibágui Faraón ga ore doi Dupade uru quiso ome raque. Ga jé u uje Aarón tṍra dogué aja jnumi iji Faraón, ujode eduguéjna ore iquei ga udore ore pañaji jnese uje docogué mu nóña ga uga.

^11-12 Ga jé Faraón chirate Aarón, desai Moisés ore ga tibidi darógode uñane uje ujopíerãque ore to jeta ore tṍra doguedie aja Moisés ore yúode to, ga ore tṍra ga jé uga to. E mu Aarón ogué tuaqué tagu Faraón iroque irajatade ore oguedie uje nóña ga uga to que.

¹³ Faraón chimo udore marínga, qué cusu rome Moisés, Aarón ore ga que chajire ore yúrique enga ore jnusina uje Dupade ojninga casé jé u gu.

Moisés chujé yodi ome dogué enga tié nóña ga diquiyo iji jnumi

¹⁴ Ga Dupade jé isoca ome Moisés, Aarón ore ga chojningame ore: –E Faraón ducusuré ome uaque ga que juéga doi ome uaque gotique, Israel ujnacare disi ejo uaque.–

¹⁵ Ga Dupade chojninga: –Jeta dire gajneri ga obechoi tié yui jne enga ajnáño bogué casé jne ga arocho Faraón iji jne uje jecucha uté chicáji tié iji dúrasabídie gatuac. Yojninga bogué u uje uacórañoja Faraón iquei diríca ga nóña ga uga.

¹⁶ Ga ojnichome Faraón iji uté jne jeta chise uaque: 'Pangarádejna Dupa Eyúgojmai, hebréogosode yocangureni uté, utocaite yoque jeta qué yicatecãcópoi ua to rĩ iji de. Ga uruode u udojo ome uaque: Jé ca ãraque doi ome yurasade Israel ujnacare disi ejo udore ga ore catecã́ri yu iji sañeque jne iji garáijnane jne. Jecucha ore uruode udojo ome ua mu que ajuéga dórigo ome ore gatuac.

¹⁷ Faraón á, a quene araja uyu gajneri uje Dupa Eyúgojmai u yu. A yutṍri Moisés gajneri enga chujé yodi uté ome dogué tuaqué jne rĩ enga a tié tuaté nóña ga diquiyo jne iji jnumi.

¹⁸ Ga a oyídode toji tié tuaté jne enga a ca egíptogosode chisápo unétique jne rĩ uje oyídode toji ga chusaque dejode ome dabié ga que ore chójiapo iji tié tuaté rĩ ome cutejma abié.'–

¹⁹ Dupade chojningápome Moisés rĩ: –Angome bayai Aarón jne jeta chanire dogué aja tiedie iji Egípto údode jnese jne, jé aja gajñonie, jubérade ore, jé aja ore jopidode erucho ga a nóña ga diquiyo udore jnese jne iji ore uniri tudé údode. Ga a jé chopome ore iranéringui dagoi jne rĩ, jé aja ore jnutígo cuco ore jopitígo ore, a yodi nóña ga diquiyo iji udore ajéode jnese.–

²⁰ Moisés, uyai Aarón que ore chó Dupade uru quitique gánique uje ore doi ojningane cucha. Aarón chujé yodode ome dogué uaté iji Faraón, ujode eduguéjna ore edominone ga ore chimo uje yodode iji jogadode diquiyo udore.

²¹ Ga yodode udore ujõsórone toji gáyode jnese ga chusaque dejode ga egíptogosode que ore chisápo unétique rĩ uje ore chojare abiedie gu ga que qué ore chójiapo yodode udore rĩ. Ga piyo ueque udore iji egíptogosode uniri udore údode jnese.

²² Mu Faraón tibidápoi darása irajatade ore to rĩ jeta ore chanire doguedie aja yodi to ga yodi nóña ga diquiyóraso to. Ga Faraón cusu rome udore ore ga que Faraón tangári Moisés, uyai ore gotique uje Dupade jé urúo ome ore ica gu.

²³ Enga Faraón chajniapója daguíjna cuchábi te rĩ ga que áyipieraque déji cucha dacatique uje cho jeta diríe u erámi ome.

²⁴ Ga egíptogosode ore chijócha derugode iji tié garérodie jeta ore chóji derutígo jeta ueracho. Uje que ore chójiapo tié gu rĩ uje chusaque dejode.

Dupade chiramurase chiranie, jmíngone ore aja egíptogosode ore gai nanique

²⁵ Uje dirode gare iji ti iji yui uje Dupade chujé yodode iji jnumone diríca ga catecãrápoi Moisés rĩ.