Éxodo 6 - Dupade Uruode

¹ Mu Dupade chojningame Moisés: –A amo jne jeta yijna yujopié ome Faraón uté. Uje a yucuase Faraón uté aja ti yui jne, enga guesája dajei ome uaque jne. Que gusu udore mu a yipésu ga Faraón jé upúsu jne jeta chiroque uágaja doi.–

Dupade catecãrápoi Moisés gaté rĩ

² Dupade catecãrápoi Moisés gaté rĩ ga chojningame: –Moisés á, Dupa Eyúgojmai tu yu uje yicatecã́ri ua iji de.

³ Uje yingo yu aja uacáqui cásodicáite Abraham, Isaac, Jacob ore nanique ga yarecujaidie jé u udiji ome ore nanique uje Dupa Pirosobádejnai jé uyu u uje yujñapegome cucha ponáyone jnese. Mu que yingo yípisi aja udore uñeque to gotique. Mu gusu ua uje yingo yu aja ua uje yi u udé ome ua: Dupa Eyúgojmai tu yu.–

⁴ Ga Dupade chojningame Moisés: –Uacáqui cásodicáite Abraham, Isaac, Jacob ore gajneque yuru quigode udojo nanique uje yojningame ore nanique: 'A yẽrapaite uacapusiétique punire ome uaque jne uje puniri tuté i tu Canaán.' Yojningai uté u uje Abraham purása quedéjna ore iji nanique mu ore cho dedáji erámi tuté nanique iji puniri uté urasade ore ujade nanique.

⁵ Uje yipáñaji egíptogosode cutejmanie ore josipié ome Israel ujnacare disi ejode udore ore, ga yimo uje ore chiroque ore bisideque, ga jé u uje yujnusina yarecujadi cásidicáite ome ore dáqui jnupabejna cásidicáite ore uje yojningame ore nanique: 'A yẽrate ore uniri Canaán ome uacape disi ejode jne.'–

⁶ Ga Dupade chojningame Moisés: –Bo ga ajnerame yuruode ome bojode Israel ujnacare disi ejo ore jne ga ojningame ore: "Dupa Eyúgojmai a chibéro uacajnéone egíptogosode ore iroquéode udore iji uacabai jne, ga a agutíyañome uté jne jeta uacajnenie pijosipié chibéro rome uaque gu uté.– Dupade chojningame Moisés: –A yijna yujopié etotiguejnai ome egíptogosode ore dirome, ga a ore pañaji yátedatérigo ome raque jne jeta yo yujuñame ore dirome.

⁷ A yáta yu aja uaque jne ga a yo yurásaji uaque jne rĩ, ga a yujuéga yu ome uaque jne jeta oyo uacangarádejnaji Dupapísi uyu. A jé ca uacuñeque chotigásapo yu jne rĩ jeta amóñopise jne uje a yijnimique uáguiji uacajnenie egíptogosode josipié jmainie jne, ga a quene ajnusináño uje Dupapísi jé u yu, uje Pangarádejnai jé u uacosõrasṍri uyu.

⁸ A yorei uáguiji punire ueradi jne. Ga a oyo uacaniri iji jnumi tuté enga a uacajnenguipise jne. Yojningai tuté erãpe omitíga u uje yingome uacáqui jnupabejnáringui ore nanique, Abraham, Isaac, Jacob ore nanique uje qué ore chapite to nanique. Ga ore gajnecho yuru iyiejnane udojo to nanique. Dupa Eyúgojmai tu yu uje yicatecã́ri ua iji de.–

⁹ Moisés chingo Dupade uru quigode udojo ome dojode Israel ujnacare disi ejo ore mu que ore chise unétique uje ore gajnéone piroqué chácariji ore údode uje que ore chisápo datijínaquérigo ome egíptogosode ore iroquéode nanique.

¹⁰ Ga Dupade catecãrápoi Moisés gaté rĩ.

¹¹ Ga Dupade chojningame Moisés: –Bo ga abágui Faraón gajneri ga angome jne jetiga juéga doi ome bojode Israel ujnacare disi ejo uaque.–

¹² Moisés chojningame Dupade: –Cachi que bojningane udore yujo Israel ujnacare disi ejo ore tangári yuru quitique arĩa, jétapũré bojningai tuté Faraón uje cho uru taratáguiji yu ga que tangári yuru quitique.–

¹³ Mu Dupade jé isoca uje chirógapo Moisés, Aarón ore aja darasade Israel ujnacare disi ejo ore yui bajaque rĩ, ga quigade chirógapo ore aja Faraón yui to rĩ. Ga jé ore uru qui chojmára iji jnumi ome ore jnese. Ga ore chósi tome ore: –Que toc jeta jé ca yicoi yocajnéone Dupade uru quichome yoc. Yoquigaidi tu gu jeta yitirójoji jnumi ome Dupade ajegaidode cucha jnese, jeta yijnico yocujode Israel ujnacare disi ejo ore jnese iji egíptogosode uacajade ga yicagóji toniñeque.–

Moisés, Aarón ore gãrapíode jnani ore íode u udojo nanique

¹⁴ Israélgosode ore cãra dãrapíode jnanío ome ñane icaite uje jnani bajai Jacob ujnacare ore nanique. Ga ore asutedie gãrapíode jnani ore íode u udojo nanique: Jacob jnacare bajai tu Rubén nanique ga Rubén abode cuse nanique ga ore íode u udojo: Hanoc, Falú, Hezrón, Cármi ore nanique. Rubén uté ujnacarode ore ape disi ejode cãra rome ñane nanique iji dayaridode iji dore, iji dore.

¹⁵ Ga Jacob ujnacarode uñai cusapo rĩ ga i tu Simeón nanique. Ga Simeón ujnacarode ore íode u udojo: Jemuel, Jamín, Ohad, Jaquín, Zohar, Saúl ore. Saúl uté datéraque cananéagoto nanique. Ga isocai jé u uje Simeón abode ore ape disi ejode cãrapo rome ñane rĩ iji dajogadode nanique rĩ.

¹⁶ Ga Jacob ujnacarode uñai cusapo rĩ uje Simeón quigaminóri u ga i tu Leví nanique. Ga Leví guejnanie siquerei chise 137 uje topísi nanique. Mu uté abode cuse ga ape bajai i u Gersón nanique. Ga Gersón quigaminóri i u Coat, jé basa Coat quigaminóri i tu Merári.

¹⁷ Ga Leví ujnacare bajai Gersón ujnacarode cusapo to rĩ ga ore íode u Líbni, Simei ore nanique. Ga udore ore ujnacare disi ejode cãrapo dajogadode ome ñane nanique rĩ.

¹⁸ Leví ujnacari Coat guejnanie siquerei chise 133 uje topísi to nanique. Ga ujnacarode cusapo to rĩ ga ore íode u udojo: Amram, Izhar, Hebrón, Uziel ore.

¹⁹ Ga Leví ujnacarode ore ejoi Merári ujnacarode cusapo rĩ, ga ore íode u udojo: Máhli, Músi ore nanique. Enga Leví ujnacare bajade, jé aja ujnacare ejoi, udore ape disi ejode cãra rome ñane iji dajogadode jnese to nanique.

²⁰ Chise diri uje Leví ujnacare ape gatei Amram chisa dacoté ga uté daterãpe dacoté nanique. Ga Amram acoté uaté i tu Jocabed nanique. Enga gare uaté ujnacarode ore nanique. Aarón u uñai, jé basa Moisés u ejoi. Enga ore dai Amram guejnanie siquerei 137 nanique uje toi.

²¹ Ga Amram uté quigaminóri Izhar ujnacarode cuse to nanique ga ore íode u udojo: Coré, Néfeg, Zícri ore.

²² Ga Amram, Izhar ore desaque ejoi Uziel ujnacarode cusapo rĩ enga ore íode u udojo to: Misael, Elzafán, Sítri ore.

²³ Ga Amram ujnacari Aarón chisa dacoté to nanique ga acoté i tu Elisabet. Enga uaté dai i tu Aminadab nanique, jé basa ga uaté dajai i tu Naasón nanique. Ga uaté abode cuse ga ape bajai i tu Nadab, jé basa ga ejode ore íode u udojo: Abiú, Eleazar, Itamar ore.

²⁴ Ga Izhar ujnacari Coré abode cuse to nanique ga ore íode u: Asir, Elcána, Abiasaf ore nanique. Coré ujnacarode udore ore cãra dajogadode nanique ome ñane. Jecute ore chojningame udore ore uáguedie corégosode nanique uje ore dáquirique i tu Coré nanique gu.

²⁵ Ga Aarón ujnacarode uñai uje i tu Eleazar chisa dacoté to nanique uje Futiel urodie uña u uaté nanique. Ga uaté abi cuse ga i tu Finees. Yujúdode udore iji jnani baja cásodicáite ga levígosode ore asutedie u udiji nanique iji yocáquirigo jnani bajaque ore ujade nanique iji jnupabejnáringui ore.

²⁶ Yojningane udojo jnani bajaque jnupabejna jé ore ape disi ejode upúsu Moisés, Aarón ore uje Dupade utocaite ore nanique jeta ore chijna Israel ujnacare disi ejode iji egíptogosode ore gari. Ga Moisés, Aarón udore ore chojningame darasade ore nanique: "Jetiga yico gajneri enga uaque gosode daníngo gãrapi u yocáquirique Rubén nanique ga apéso uacajochai ga eduyo uáguiji jne. Jé basa ga gosode daníngo gãrapi u ujoi yocáqui Simeón, jeoga yocáqui uñeque uje Jacob ujnacáño ore, enga angaráñopo uacajochatique jne rĩ. Ga a yico gajneri enga yoquipopégaja yocajesúrique gajneri jeta yicoji Egípto udé ga angaráño uacajochatígo jnese aja yocajesúrique uje jé Pangarádejna Dupa Eyúgojmai urúo udojo gu ome yoque."

²⁷ Yojningane udojo Aarón, Moisés ore jé ore urásapise Israel ujnacare disi ejode udore nanique uje chijnime ore iji egíptogosode ujade nanique, uje ore tibágui egíptogosode ore eduguéjna cuchábi Faraón nanique jeta uté juéga doi ome ore nanique rĩ iji daniri.

Dupade utocaidode u Moisés, Aarón ore ujetiga ore chajnerame uru quigode ome Faraón nanique

^28-29 Diri jé u nanique uje Pangarádejnai Dupade catecãrápoi Moisés iji Egípto rĩ ga chojningame: –Dupa Eyúgojmai u yu uje yicatecã́ri ua iji te. Bo ga abágui egíptogosode eduguéjna cuchábi Faraón uté enga ango yojningane cucha aja jnese jne uje a yingo ua jne.–

³⁰ Mu Moisés chojningame Dupade: –Pangarádejná, urénga, cachi que yiraja puru quigode gotígo to arĩa ome yujórique ayoré jeta tangári yuru quitique. Ga yajnui jé u ayoré uru taratátique ome Faraón uje que tangári yuru quitique ome re uje yicatecã́ri jórogui uté.–