Éxodo 40 - Dupade Uruode

Ore chadia Dupade iguíjnai péode aja ñane nanique jeta ore chadíja gaté

¹ Pangarádejnai Dupade cho Moisés quique ga chósi tome:

² "Jeta chise dire bajai iji guedosi bajai jne enga a adíyoi yiguíjnai uté péode aja ñane jne jeta adíyoja gaté. Yiguíjnai uté a u jne jeta ojnichome uté jne 'Dupade, Yutuãjóa Ñane Iji Te.'

³ Achayo yuruode pi aja ajé uñeque jne, enga achayo borapetígo aja uté yui jne.

⁴ Ga anícho mésa aja ajé uñai to jne, jé aja ore ibiogode jogosṍri. Achayo mésa jogosórone cucha aja uaté gai jnese. Enga anícho ore apósatígo aja ore orai tuté ore apósode erã́sori úcodie eruéode jnese jne.

⁵ Enga achayoi ore aseradéjna uñai aja yuruode pi cajo iquei jne uje ore chãru cucha ai unérone iji uté gai iji yuruode pi cajo iquei. Ga yojningai uté ore aseradéjna u uje ore chimese gai ome óro jnese. Ga acha borapetígaja uté quigade jne iji guesi yui iji yiguíjna ajé puyai piagoi.

⁶ Enga achayo uacaseradéjna uñeque aja yiguíjna puyai piagoi iquépisi iji guesi ga uté u jne ujetiga abocho uaquẽrapáitigo cuchiso iji ome yu.

⁷ Enga achayo ore esãrapié aja yiguíjna puyai, uacaseradéjnai uté ore ujai jne. Enga ãretáyo ome yodi.

⁸ Enga adíyo gaminore gatéode borapecho aja dosadode jnese iji gai. Enga anícho borapeque gatérigo iji ore pípidi piagoi.

⁹ Enga anícho aseque puyai aja yiguíjna puyai uté ajéminórone cucha gáyode jnese. Enga átayo erásorone cucha jnese to jne. Ga a yiguíjna puyai jogonórone cucha puyaguipíso jnese ga jé u jne uje yo yajnéngu udore jnese jne.

¹⁰ Enga anícho aseque puyai aja uacaseradéjnai uté to uje uacabocho cuchisode iji uté gai ome yu. Ga jé átayoja erásorone cucha to. Ga uacaseradéjnai uté úringai puyaque jogadi upúsu jne ome yu.

¹¹ Ga anícho aseque puyai aja ore esãrapié to, jé aja uchiejnane iji údi ga jé u uje puyé to.

¹² Enga ajnáño Aarón, ujnacarode ore aja yiguíjna puyai iquei jeta ore churu dabáyode iji esãrapié tuaté.

¹³ Ga Aarón quene chigui doite puyade udore. Enga anire aseque puyai aja uté gai ga úringai yiroque jogadi u ga yingara uté jogadi ome urasade ore.

¹⁴ Enga anire Aarón ujnacarode ore oidode aja ore to.

¹⁵ Enga anire aseque puyai aja Aarón ujnacarode ore gai to, ga jé be to basocai uje banire aceite aja ore dai gai que, ga ore úringane yiroque jogadi u uje yingara ore jogadi tome ore urasade to ome yiroquéode. Que gusu ore, mu a ore ape disi ejórigo a ore basája dayode udore charidode to ome yiroquéode jne, enga a jé yiroguipísode jecucha déji jne jeta ca eruénique cusapo jne rĩ iji dínique udé."

¹⁶ Moisés pésu udore jnese uje Dupade ajegaidode jé u jnese ica gu.

¹⁷ Uje israélgosode ore jnoji Egípto nanique ga siqueré bajé quigamito jé u uje ore chimate Dupade iguíjna puyai uté aja gaté. Ga dire bajai tu nanique iji guedosi bajai tuté uje ore chimate Dupade iguíjna puyai uté aja gaté.

¹⁸ Ga Moisés pésupúsu Dupade iguíjna puyai adode aja quigode. Ga chanire táblade cutádedie aja údode, ga chanire tábla péode aja uje chiramísara pajei, ga chipotingare táblade jnese iji gai.

¹⁹ Enga chanire gaminórone borapecho iji gai, jé aja gaminoripísi. Enga pésu udore jnese uje Dupade e cho quigome ica.

^20-21 Enga Moisés chuchẽre Dupade uru iyiejnane pi gai ga chanire Dupade áyipie pirosobádedie aja uté ajei uje purúsãra iji cucarãte uejájnane ica. Enga suru gai ga jé u uje chanire ore ipesudi aja ujeta ore chijnoque jne. Enga jé u uje ore jno údi aja Dupade iguíjna ajé puyai ajei ga ore chicháji Dupade iguíjna ajé pirosobádi ajei. Ga ore chaco borapei uté yui gai uje Dupade jé urúo ica gu.

²² Enga jé u uje ore chanire mésa aja casaque garani yui iji Dupade iguíjna ajé puyai ajei uje i tu 'Dupade, Yutuãjóa Ñane Iji Te.' Ga chicháji Dupade uruode pi borapeque jogosṍri uécha uñai.

²³ Ga Moisés chanire arurégode aja bajodíe iji mésa gai uje Dupade jé uruode u ica ome gu.

²⁴ Enga chanírapo ore apósode jogosṍri aja ajei to rĩ ga chicháji umusoi garani yui iji mésa iquei. Ga déji ajei uté to uje ajei i tu 'Dupade, Yutuãjóa Ñane Iji Te.'

²⁵ Enga Moisés chãru ore ibiogode iji uté ajei uje Dupade jé urúo ome ica gu.

²⁶ Ga chicha ore aseradéjnai aja borapei uéchai uje chaco Dupade uruode pi yui gai, ga déji uté iquei. Ga ore chimese uté gai ome óro diríca.

²⁷ Enga Moisés chãru inciénso iji uté ga chusaque uté ajei uje Dupade jé urúo ome ica gu.

²⁸ Enga Moisés doi borapéode uñai ga chanire udore yui iji piago guesíminóri.

²⁹ Enga Moisés chanire ore aseradéjna uñai aja guesi iji Dupade iguíjna puyai piagoi iquei uje ore chojningame uté 'Dupade, Yutuãjóa Ñane Iji Te.' Enga Moisés chibore cuchisode iji uté gai ga cháta ore acade arroz quedéjnai uje i tu trígo ga chipotame to uje qué déji guidode. Pésu cuchade udore jnese uje Dupade jé urúo ome ica.

³⁰ Ga Moisés chicha ore esãrapié aja ore aseradéjnai, Dupade iguíjnai ore ujai. Enga chĩretame yodi jeta ore churu dabai iji.

³¹ Enga Moisés, Aarón, ujnacarode ore chijnime yodi tiji uaté ajei jeta ore churu dajmainie, darídade ore.

³² Ore churu darídade, dajmainie gu uje ore chacája Dupade iguíjnai uje i tu 'Dupade, Yutuãjóa Ñane Iji Te.' Ga jé ore isocai u to uje ore churu darídade, dajmainie to uje ore chose ore aseradéjnai yui iji guesi. Enga Moisés ore pésu udore jnese uje Dupade ojningane cucha u udore ome gu.

³³ Moisés chimate udore jnese ga chanírapo ore ujuyaquei erásorone borapecho aja gai gaté rĩ iji Dupade iguíjnai uté gai jnese. Ga chanire borapei aja ore pípidi iji piagoi ga jé u uje chimate Dupade iguíjnai uté adode jnese.

Gue abuja cuchabé tṍraji gaté ga chichaga raja Dupade iguíjna puyai uté gai

³⁴ Uje Moisés chimate uté adode jnese ga gue abuja cuchabé tṍraji gaté ga chichaga raja Dupade iguíjna puyai uté gai. Ga Dupade cutejmai ueratígajna níe uaté aja jnumi ga chĩreta daguíjnai uté ajei jnese ome cutejmai ueratígajna.

³⁵ Que togome Moisés jeta chacája Dupade iguíjna pirosobádi uje i tu 'Dupade, Yutuãjóa Ñane Iji Te,' uje Dupade ueratígajnai chĩreta daguíjnai uté ajei gu.

³⁶ Uje israélgosode ore chimo uje gue abuja chicáji gaté iji Dupade iguíjnai gai ga ore chiraja uje Dupade chiroque ore aja doi, ga ore pésu dagúchade jnese jeta ore jno.

³⁷ Jé basa ga uje ore chimo gue abuja cuchabé uje chácariji Dupade iguíjnai gai ga ore chiraja uje Dupade ajéode u jeta jé ore cho degúji darengúi te rĩ. Ga ore chirote diri jeta gue abuja jnome gaté ga jé u uje ore jnoji darengúi uté.

³⁸ Uje israélgosode ore chécãre, chécãre darengúone nanique mu ore ajna jé u gue abuja uaté iji jnumone. Ga ore pañaji gue abuja cuchabé uaté jnese nanique. Iji dirode ga ore chimo gue abuja tuaté iji Dupade iguíjnai gai nanique, jé basa iji dejade ga ore chimo pioque ocaraidie iji uté gai nanique iji dejade jnese.