Éxodo 4 - Dupade Uruode

¹ Mu uje Dupade chejna daruode udore guesi ome Moisés ga Moisés chojninga: –Ise mu jé ca Israel ujnacare disi ejode ore dayode tangárirási yu jõ. A ca ore chimesẽ́raporáse yu rĩ. Mu a ore chotigásirase yu ga ore chojningárasa: 'A ca Pangarádejnai Dupade chiqueta raja ua gotique.'–

² Ga Dupade chojningame Moisés: –¿Gotique uti iji bajmanai te é?– Moisés chojningame: –¡Cachi yogué tu daque é!–

³ Ga Dupade chojningame Moisés: –Ṍra bogué aja jnumi.– Moisés tṍra dogué aja jnumi ga ogué nóña ga uga. Ga Moisés chajire dogué tuaqué mu uga ga jé u uje chayome dogué tuaqué.

⁴ Dupade chojningame Moisés: –Moisés á, jé ca ayo. Aquéjnai ugai carigábi ga asasi.– Ga Moisés chuquéjnai ugai ga quĩrique chisa ugai carigábi mu ogué tuaqué jé upúsu.

⁵ Dupade chojningame Moisés: –Yigaidi tu gu ujeta jé ajna yisocai to ome Israel ujnacare disi ejode ore dayode dirome jeta agúsiji ore iquei uje uacáquiode Abraham, Isaac, Jacob ore angaráni casé Dupa jé upúsu yu uje yiqueta yu aja ua. Ga a ca potigayaque ua jne ome ore jeta ese ore.–

⁶ Ga Dupade chojningápome Moisés rĩ: –Jé cajmare bajmanai aja baguidedie údi iji barobé.– Ga Moisés chijmare dajmanai aja daguidedie údi ga chijnimápo dajmanai tuqué rĩ mu chajire dajmanai tuqué ga jmanai cope, ga jé chopise dequejnarei isagode uje ore chojningame lépra.

⁷ Ga Dupade chojningápo gaté rĩ: –Aramája jogadi tuqué rĩ.– Ga Moisés chanírapo aja rĩ. Chijnime, mu ueradápo jmanai tuqué rĩ ga chopise dasocai tuqué.

⁸ Ga Dupade chojningame Moisés: –Ujetiga ca ore tangári ua ome basoca bajai te jne enga opósi tome ore to jne, ga a Israel ujnacare disi ejode dayode ore tangári ua to jne ome yisoca ejoi tudé ome ua.–

⁹ Mu Dupade chojningame Moisés: –Jetiga jé ca ore timíninga ua ome basoca gárode udore jne, enga bo jne enga acáji tié cuchabé enga aro yodi ome bajóraque jne enga ójneja cajnóningárique jne iji udore ore ajénique jne, enga a nóña ga piyojna jne.–

¹⁰ Moisés chojninga: –¡Urénga, Yangarádejná! Bamo uje yojñane jecucha deroque quigode ome yujode ayoré ore arĩa. Bajos eti gusu iji deréjnai tudé uje que yiraja yuru quitígome ua uje yo ta-ta-ta iji baquei tiji de. Mu que gusu iji deréjnai tudé, uje yo ta-ta-ta iji yujode ayoré ore iquéode to ica gu. Yipota jóroga jeta yĩrarare to ica iji cuchade mu que yajno darai gu uje uru tarataque yu.–

¹¹ Pangarádejnai Dupade chojningame Moisés: –¿Gosi ipesute jnanione uacabijnanone iji taningai nanique a? ¿Gosi ipesute jnanione uje que toque daráringome ore, jé ujode jnani chiraja darade quigode? Angoronépariguipíse uñane, jé basa ga pududique cuchade jnese ome uñane. Jé basa ga edogusuque uñane, jé edomite uchu uñane. ¿Gosi ipesute udore ore iji ñane a? ¿Ama jé ca uyu u nanique jeta yipésu udore ore nanique ga yingara yijmapiedie ome ñane?–

¹² Dupade chojningame Moisés: –Moisés á, a yijína uája quedéjnane jne. Jecute bo ga acáji Egípto jne enga ca abója ua ome darai uje a uyu u jne jeta yipesute baru quitígo jeta acate Israel ujnacare disi ejode ore iji Egípto.–

¹³ Mu Moisés jé isoca uje chojninga: –Yangarádejná, aroque yujórique ayoré aja Egípto yui. Ga jé yácariji udé to jne.–

¹⁴ Ga Dupade uruode dosója Moisés ga chojninga: –Cachi bayai Aarón déji Egípto to arĩa, uje uacai cásodicáite ore gãrapi jé u uacáqui gatei Leví to nanique. Yiraja bayai uté to uje chirajapise daru quigode ome dojode ayoré uaque. A bayai uté chachai ua iji dajei dirome jeta acáji ore. Ga a irasiguipise ua jne jeta eso ñane uje que qué amóñopo ñane to gu.

¹⁵ Acatecã́ri bayai uté ga ango bojña quigode aja uté jnese jne jeta uté chajnerame bojña quigode ome barasade ore jne. Enga a jé uyu upo to jne rĩ jeta yugúsiji bari iji te, jé upo iji bayai gari to. A yo baquique aja bajesúrigo iji ore idai údode jne jeta acate ore.–

¹⁶ Dupade chojningápome Moisés rĩ: –Jeta acatecã́ri bayai Aarón jne enga cho jetiga uyu darai iji bajei jne enga bayai Aarón chajnerame yuru quigode uje tṍraji babijnani ome Israel ujnacare disi ejode ore jne.–

¹⁷ Dupade chojningame Moisés: –Adota bogué tuaté aja bajesúrigo jne ga a apésu yojningáringo cucha ome bogábia suaté iji ore ujárigo jne. Ga a ore pañaji basocádatérigo iji dajade jne.–

Moisés chajniapója Egípto nanique rĩ

¹⁸ Uje Dupade cha catecã́ri Moisés iji uté ga Moisés chajniapója dayoquíjnai Jétro iguíjnai te rĩ. Enga chojningame dayoquíjnai: –A yi jne enga yajniapója Egípto to jne rĩ uje yaníngo icaite ore ujnacarode déji uté gu. Jecute yipota jeta yajmita ore jeta qué ore chapite to.– Ga Moisés iyoquíjnai que chaquĩ́ra gotique. Chojninga: –Bo enga acáji ore jne. A jé ca cuchárique chósi ti iji ua jne aja bajesui.–

¹⁹ Moisés jnoji ore uniri Madián nanique ga Pangarádejnai Dupade catecãrápoi Moisés iji ta rĩ iji dajeque pajei. Enga chojningame: –Bo ga ajniapója Egípto to rĩ uje bajmongarájasṍri cásodicáite ore chejna raja toi nanique.–

²⁰ Moisés jno ga nóna dacoté, dabi ore aja Egípto yui. Moisés acoté, abi ore chorúsu burica quedéjnami aja Egípto yui, jé basa ga Moisés diguiji jnumi mu que noñome Dupade ojninga casica pogué jeta chijnásija dajesúrigo erámio ica.

²¹ Dupade chiquetápo raja Moisés gaté rĩ, enga chojningame: –Ujetiga aríñoji Egípto jne enga ca achietáyime ua ome Faraón iquénique jne uje e badute yuruode ome ua diríca jeta jé be yisoca casodé ga a u jne jeta ore pañaji bapesútedatérigo jne enga quene ore chiraja uje yẽrate báringai ujopíerángome ua to. Mu Faraón ga a yerani tu pucusuréringai ome uté jne. Jeta ese ore, enga a angome Faraón uté jne jeta juéga doi ome uaque, mu a ca juéga ome uaque jne. Ducusuréguipíse gu.

²² Ujetiga Faraón jé ca juéga doi ome uaque ga a ojningame jne: 'Faraón á, jé Dupade urúo u udojo ome ua uje cho dajnacare urejane iji Israel ujnié disi ejode uyoque.

²³ Ga uruode qui tu udojo ome ua: Jé dóji ga yedójnarione yujnacare urẽja ore jnoji uacaniri udé ujetiga ore tẽrája yu iji sañeque. Mu uje bãraque doi ome ore ga a yujé bedójnari bajnacare urẽja jne.'–

²⁴ Uje Moisés ore déji dajeque pajei ga guedé jnome ore iji te ga ore jogasui pésu dataranone uje dejaque gu. Ga Dupade chiqueta raja Moisés iji te. Gaidi u gu jeta chimanipísirase Moisés aja jnumi uje Moisés que doi Dupade uru cásodicáite quigode ome dabi to gu uje que chaquesu aoi iji ujñungungué gai.

²⁵ Ga jogadi tu uje Moisés acoté Séfora chisa quesei uje cucarané peque enga quene chaquesu dabi ujñungungué aoi. Ga tṍraja dabai Moisés guídedie gai. Ga chojningame Moisés: "Quene yiraja uje yabai piyo ijnimisṍri tu ua ga yujnapise ua ome bajmapié uaté."

²⁶ Mu Dupade e juégapo doi ome Moisés rĩ uje e doi uru qui cásodicáite ome dabi gu. Jé basa ga Moisés acoté chetaguipise udore ome dabi ga uruode dosója dabai uje chiese piyo ijnimisõre abai ome ajéode.

²⁷ Uje Moisés qué ore déji dajéode iji Egípto yui ga Dupade chiqueta raja uyai Aarón iji ore iquei. Ga chojningame Aarón: "Bo ga achai besai Moisés ore uje qué ore déji dajei uje ore qui tu uaquedai tudé to." Ga jé u uje Aarón jno ga chise Moisés iji cucarãte cuchábi uje i tu Dupade Jogadi Cucarãte. Ga chimo desai enga jĩraque tagu uredie.

²⁸ Uje ore chise ñane iji dajei ga Moisés chatata dajnéone Dupade uru quichome Aarón to ujetiga Aarón jé chajnerámome ojña quigode ome darasade ore iji Egípto, jé aja Faraón gajnenguipísode Dupade uru quicho to, jeta chajnerame to. Chingopome to rĩ uje Dupade utocaidi jé u re ome datígo jeta ore tija ipesutígo cuchadatéo iji dajade jne.

²⁹ Uje ore diji Egípto ga Moisés, Aarón ore tibidi dojode israélgose ore daníngo ga ore taquiri ñane nanique.

³⁰ Ga Aarón chatata Dupade uruode jnese ome ore uje Dupade chingome Moisés diríca. Jé basa Moisés pésu dasocádatérigo iji ore ujade to.

³¹ Ga jé u uje israélgosode ore dayode que ore chotigase gotique uje Dupade utocaidipíso Moisés, Aarón ore ome ore. Ga jĩraque ore áyipiedie déji to uje Dupade jé ca áyipieraque jnoji ore gotique iji ore gajnenie pijosipiei jmainie enga pañapóji ore to ome dedodie rĩ uje ore jnaríji jnumone ica ome dajnéone ore iroquéo jmainie. Ga quene ore áyipie déji uje ore dáqui cásodicáite ore urása casicaite Dupa que chiramurase ore iji dajénique. Ga jogadi jé u uje ore chichaga dagataidie aja jnumi ga jé u uje ore catecã́ri uté ga ore chicota uté to ome ate ueradode ome raque.