Éxodo 39 - Dupade Uruode

Ore pésu Aarón, ujnacarode ore iguidedie nanique

¹ Ore pésu sacerdóteode iguidedie ujetiga ore chigui udire uje ore pésu cuchade aja quigode iji Dupade iguíjnai ajei. Ga ore chuga ore iguidedie iji borapéode uje ore uruchachade cãra rome ñane ga utata uneroque uñane, jé carataque uneroque uñane, jé carataguipise uñane to. Ga ore pésapo Aarón iguidedie rĩ ga ueradepísei iguidedie udire ga ore pésupúsu Dupade ojningane ome Moisés jnese uje ore pésu ore iguidedie udire.

^2-3 Aarón oite catadábi uje i tu efod ga ore chiro uté iji ducarigode uje pipesute iji ore acai uje i tu líno enga ore uruchachade cãra rome ñane, ga utata uneroque uñane, jé carataque uneroque uñane, jé carataguipise uñane to, ga ducarigode uñane pipesute iji óro to. Uje ore chujé óro iji jnumi ga jé jno, jno jeta ore pésu jnatúraguiji uaté péode. Ga ore cho ducaríguiji ga ore chiro dorade borapeque iráradie ome udire ga cho nánga, nánga, nánga iji Aarón gai.

⁴ Uje ore chuga efod uté ga que ore pésu jmanéroraque mu guesája dosadode ga carubábode chicasíji orotaidie jnese.

⁵ Ga ore chanire igarubi aja efod pajei ga ore chuga uté ome óro to ga uruchachade udore jnese uje ore déji efod uté jé chichagu iji igarubi uté to. Enga ore pésu udore jnese uje Dupade jé urúo ome Moisés ica gu.

⁶ Ore churúsãre cucarané ajámaminie jeta ore chichasíji Aarón orotaidie gáyode ga jé jogate efod uté. Ga cucaranenie udire ore i tu cornalína. Ga ore chimese óro aja udire eruéode ga ore chica ga ore churúsãre jnani bajai Israel casicaite ujnacaripísode ore íode iji udire. Ga ore inguírajane jé u séllodie ipesusórone ore inguírajane cucha uje ore pésu darusarane iji cucha uajádode.

⁷ Enga jé u uje ore chugája Aarón oidi efod orotaidie jeta jé jogate uté gatuaque. Ore gaidi u gu jeta Aarón chacája Dupade iguíjna ajé puyai to, ga jĩraque Dupade chimo Israel ujnacari cásodicáite ore íode iji orotaidie gai, enga jé u uje jĩraque jnusina daru iyiejájna cásodicáite ome ore. Uje Dupade jé ojningane u ome Moisés nanique ga ore pésupúsu udore quigode jnese.

⁸ Ore pésu arobé jogoto pectoral to ga ore pésu iráradie iji uaté údode ome ducarigode uje pipesucho iji óro. Ga ore pésu pectoral uté iji borapei to uje pipesute iji ore acai uje i tu líno, ga uruchachade jé cho efod uté uruchachade to uje utata uneroque uñai, jé carataque uneroque uñai, ga carataguipise uñai.

⁹ Pectoral uaté umare borapei mu ore chipocásu iji gatócoro ga abubíedie tiroque jnese iji ajidedie. Iji gai jnese ga chise 22 centímetros, jé iji umaningai, pajei ga ore abubíe jé chojmára.

¹⁰ Ore chuga cucaranenie aja pectoral uaté ga ore pésu cucaranenie udire jochade, ga gagájni jochade iji Aarón arobé uaté gai. Iji jochaque bajai iji Aarón ajúgoro údi ga cucaranenie déji uje ore íode u: rubi, crisólito, esmerálda ore.

¹¹ Iji jochaque bajai unimitodie ga cucaranenie udire íode u: granate, zafíro, jade ore.

¹² Iji jochaque bajai quigamito gatedie ore íode u: jacínto, ágata, amatísta.

¹³ Eruemitopísedie iji jnumi yui íode u: topácio, cornalína, jaspe ore. Ga ore chuga cucaranépitadie ejode ome óro jnese.

¹⁴ Gare iji yirídai cucaranenie udire ga séllo irajasórone ore churúsãre Israel ujnacari cásodicáite ore íode iji udire uje gare ore iji yirídai to nanique.

¹⁵ Ga ore pésu chaguhéjnane iji pectoral uaté to ga óropise, ga ore chimere órodie iji ñane ujetiga ueradipise chaguhéjnane udore.

^16-18 Ga ore chadíja dorade chaguhéjna aja Aarón jogosṍri pectoral jogotodie angoronei. Ga ore chadíja orotaidie jogotóisi cucaranei uje déji orotaidie uje angoroinie déji udire to. Ga jé u uje pectoral catája efod uté.

^19-21 Ga ore pésapo angoroné gáredie uje ore ipesudei iji óro ga déji pectoral údi iji uéchade jnese, ga ore chadia dorai cucha ijmaque gajnu aja udire uje ore oráguiji borapeque utata uneroi. Ga ore pésapo angoroné uñanie to rĩ ga ore ipesudei iji óro, ga déji efod ajei iji igarubi gai. Ga ore chadíja pectoral aja udire ga jogadi upúsu efod uté gatuaque. Ga ore pésu udore jnese uje Dupade chingome Moisés ica ga ore pésu aja quigode jnese.

²² Ga ore pésapo Aarón oite catadéode uñai to rĩ uje chajni catadé ajúode ga i u cápa. Ga ore ipesudíji borapeque utata uneroi ga ore chedupise utata uneroi ome.

²³ Ga guesája ore ipesudi uté ome Aarón gatoi ga ore chipocásu uté pijnanai ujeta jé ca dejñu.

²⁴ Ga ore pésu pore a oré iji dapesudi uté Aarón oite eruei to uje i tu granáda ga uruchachade udore chichagu re iji jnumi jnese iji ore ipesudábidie sudire pore a orábi uje pipesucho iji ore acai uje i tu líno.

^25-26 Ore pésapo tãraraminie iji óropisedie rĩ. Ga ore chaníraja Aarón oidi uté eruei to ga ore chaníraja cucha a ujade iji udore, udore iji eruéode jnese. Uje Aarón chacája Dupade iguíjna ajé puyai nanique ga ore chudute tãraraminie agoyedie aja ajesúode. Ore ipesudode udore jé upúsu uje Dupade chingome Moisés ica.

²⁷ Ga ore pésapo Aarón oidode uniminore umari te rĩ uje chise jnumone ga i tu túnica. Ga borade orasṍri oraque uté iji ore acai uje i tu líno. Ga pésapo Aarón ujnacarode ore oidode iji uté to rĩ.

²⁸ Ga borade orasṍri uté chiro Aarón gatoje uje i tu turbante, ga pésu iji borapeque póroroi uje líno u. Ga pésu ore gatójedie uñanie to uje chacósaja ñane ga ore chojningame udire tocádo. Ga pésu tocádodie udire iji líno to, jé aja Aarón, ujnacarode ore calzoncíllodie.

²⁹ Ga pésu ore igarubedie to ga pésu iráradie iji gai, ga ore uruchachade chichagu re iji udire to ga utata uneroque uñai, jé carataque uneroque uñai, jé carataguipise uñai to. Ga jé udire chopise Dupade ojninga casodica uje chingo Moisés ica.

³⁰ Ga ore chadia óro pei aja Aarón gatoje eruei iji enochai ga séllo ipesusṍri jnani chica uté iji Aarón enochai ga churúsãre quigode ga urusarane chósi te iji uté enochai: 'Dupade cãrai tu yu ome daroquéode.'

³¹ Ga ore chadíja pámo gajnui aja uté ayoi eruéode ga ore chadíja ñane iji itai. Ga pámo gajnui uté pipesudíji borapeque utata uneroi. Ga ore pésupúsu udore jnese uje Dupade chingo Moisés ica ga que ore chimoque uñeque.

Ore chimate Dupade iguíjna puyai adode jnese nanique

³² Ga chise diri nanique uje ore chimate Dupade iguíjna puyai adode jnese nanique, ga ore chojningame Dupade iguíjna puyai uté nanique 'Dupade, Yutuãjóa Ñane Iji Te.' Ga israélgosode ore pésupúsu Dupade ojningane udore jnese uje chingo quigode aja Moisés ica.

³³ Uje quene ore chimate Dupade iguíjna puyai uté adode jnese ga jé u uje ore jno údi ome Moisés. Ga ore erásorone cucha u udojo: Ojnaque ditajíode. Jé aja tábla péode. Jé aja táblade uje chiramísara pajei, uje ore nája angoroinie to. Jé aja tábla péode uje ore cho cutadéji to. Jé aja cutadé gatedie uje ore chicháji jnumi yui.

³⁴ Jé aja áyasa choquíode aode uje ore acacho udore iji cucha carataguipísi ujetiga ore chaco Dupade iguíjnai gai ome. Jé aja gaminoripísi cucha ao diríjape uje pipesudíji cuchiso uñane aode. Jé aja borapei jeta ore chaco Dupade uruode pi cajo yui gai ome.

³⁵ Jé aja Dupade uruode pi cajo, erásorone tábla pecho ore jeta pijnoque uté ome udore. Jé aja pi cajo uté joride to.

³⁶ Jé aja mésa, erásorone cucha jnese. Jé aja arurégode uje puyaguipíso udore uje ore chicháji Dupade edominone iquei.

³⁷ Jé aja ore ibiogode jogosṍri uje úcodie gare iji ti iji uté eruéode ga ore ibiogode déji ore gatajidode jnese. Jé aja ore ibiogode erásorone jnese. Jé aja erã́sori aseque uje ore chanire borapei aja udore ga ore chãru.

³⁸ Jé aja ore aseradéjnai uje cucha ai unérone gajneque uje ore chimese uté gai to ome óro. Jé aja inciénso to uje ore chãru udire iji daseradéjnai uté gai. Jé aja borapei uje ore chadia Dupade iguíjna puyai piagoi yui uje ore chojningame uté 'Dupade, Yutuãjóa Ñane Iji Te.'

³⁹ Jé aja ore aseradéjna uñai uje ore chibore dẽrapáidode cuchiso iji uté gai uje ore chimese bronce aja uté. Jé aja ojnaque noñángone uje ore imerachóji ñane iji uté ajé gatei. Jé aja erásorone tábla peque jeta ore chijnoque uté ome udore. Jé aja uté erásorone cucha jnese to. Jé aja ore esãrapié, uchiejnane iji ejode ore.

⁴⁰ Jé aja borapeque umarone uje ore cho ojnánguiji udore iji Dupade iguíjna puyai gai gaté. Jé aja tábla péode to uje ore chadíja borapeque umarone aja tábla péode udore. Jé aja táblade cutadé gatedie. Jé aja piago guesíminóre jogosṍri borapeque. Jé aja ore ajópiode picho uje ore chadíja ojnai taja dajópiode udore picho iji uté eruéode jnese iji gai. Jé aja erã́sore uásejnane uñane jnese uje ore edugádode u udore jnese ome Dupade iguíjna puyai adode jnese, uje ore chojningame uté 'Dupade, Yutuãjóa Ñane Iji Te.'

⁴¹ Jé aja Dupade irógode ore iguidedie uje ore cháta raja Aarón, ujnacarode ore ome Dupade iroquéode. Jé aja Aarón iguidé puyedie. Jé aja ujnacarode ore iguidedie to.

⁴² Israélgosode ore pésu udojo jnese uje jé upúsu uje Dupade chingome Moisés ica.

⁴³ Uje Moisés chimo uje ore chimate udojo jnese ga irasiguipise re nanique uje que ore chimoque uñeque. Ga jé u nanique uje Moisés chacacãre darasade udore ga uruode ueradipíso ome ore jnese.