Éxodo 38 - Dupade Uruode

Bezaleel pésu ore aseradéjna uñai te rĩ uje ore gueranone cuchiso gajneque jeta ore chipotame iji gai

¹ Bezaleel pésu ore aseradéjna uñai te rĩ uje ore gueranone cuchiso gajneque jeta ore chibore iji gai ome Dupade. Ga pésu iji poria uje i tu acácia. Enga jé chopise ñane iji gai abubíedie uje 2 métros 25 centímetros jnese iji gai. Ga abubíe iji jnumi 1 métro 25 centímetros.

² Iji uté ajidedie ga ore pésu uedie to ga jé chojmára iji jnumi aja uedie. Ga ore chimese uedie udire gai ome bronce jnese.

³ Ga ore pésu gaserani erásorone cucha jnese iji bronce to: corángarangóne, jé aja bajodíe jeta ore chanire puchucurui aja udire, jé aja cucha patarane, jé aja bajodíe jeta ore chanire gueguerade aja udire, jé aja ojnaque ditajírigo jeta ore chijnire detígo cuchiso arione aja udore.

⁴ Ga ore chanire damerajane udore ojnaque aja gaseradéjnai tuté ajei ga chaqui chujépise raja gatócoro, jé basa ore imerajane udore dosadode chisírase gaseradéjnai eruéode iji gaté. Ore gaidi tu gu ujetiga ore chijnime ojnane udore jeta ore churu udore gai. Uje ore churu ga jé ore chanírapója gaseradéjnai tuté ajei gaté rĩ.

⁵ Ore pésu angoroné gagájninie to iji bronce, ga ore chanire angoroné gáredie aja ojnai dosate chojmarai, ga garapóji ujoi dosate rĩ. Ore gaidi tu gu ujeta ore na erásoningo tábla peque aja udire ga ore chijnóngaja dajesúrigo.

⁶ Uje ore pésu uté erásorone udore iji pore péode uje i tu acácia, ga ore chimese udore gáyode ome bronce to.

⁷ Ga ore na erásoningo aja angoroinie udire uje ore déji ore aseradéjnapísi dosadode ujetiga ore chijnóngaja dajesúrigo. Ga ore pésu ore aseradéjnapísi uté iji poria uje i tu acácia, ga ore pésu uté údi ga guesája ajei.

Bezaleel pésu ore esãrapié nanique

⁸ Chequedíe chimáta ñane aja Dupade iguíjna puyai iquei nanique ga ore chijna dajicaranone iji gatéode jeta ore tẽrame Dupade. Ga ore chisi ome Bezaleel. Ga jé u uje Bezaleel pésu ore esãrapié iji udore. Ga pésapo ore uchiejnane iji ejode rĩ. Ga bronce ueque uaté jnese.

Bezaleel pésu Dupade iguíjna ajei puyai ujuyaquéode nanique

⁹ Bezaleel pésu Dupade iguíjna ajé puyai ujuyaquéode iji uté ejode. Borapéode déji umusoi yui ga udore umaningai chise 45 métros. Ga ore pésu borapéode udore iji ore acai uje i tu líno.

¹⁰ Ga ore ipesudode tábla peque chejna yu iji dosadi uté iji umusoi yui ga ore pésu cutadé gatedie iji údode ga 20 u to ga pipesudei iji bronce. Ga ore chanire ore ipesudedie angoronei aja táblade eruéode uje pipesudéji pláta. Jé basa ga ore chanire ojnaque ditajíode aja borapei eruéode to ga pláta u to. Ga ore chadíja borapei aja tábla eruéode jnese uje ore chuguhésiji gaté.

¹¹ Iji casaque yui ga jé adi tupo rĩ uje borapéode déji uje ore cháta udore aja ñane ga ore umaningai chise 45 métros to, ga ore chanírapo tábla peque uñane aja rĩ uje chejna yu. Ga ore pésu udore cutadé gatedie rĩ iji údode ga 20 u to ga pipesudei udire iji bronce. Ga ore pésu angoroinie, ojnaque ditajíode ore to iji pláta, ga ore chadíja borapéode udore aja tábla eruéode jnese ome udore uje ore chuguhésiji gaté.

¹² Iji guedé cacadi yui ga borapéode déji to uje ore cháta ore aja ñane ga ore umaningai chise 22 métros y médio. Ga tábla péode chejna yijmanáyone iji guedé cacadi yui uté, ga táblade udore cutadé gatedie que chimoque údode uje pipesudei iji bronce to. Ga ore pésu angoroinie iji tábla péode udore eruéode to, ga pláta u. Jé aja ojnaque ditajíode to uje ore chaníraja borapei eruéode ga pláta u to.

¹³ Iji guedé garani yui ga borapéode déji to uje ore cháta ore aja ñane ga ore umaningai chise 22 métros y médio.

^14-15 Iji guedé garani yui ga piagoi dosadi jogonórone borapecho ore umaningai chise 7 métros iji dosate chojmarai uté, ga adi jé upome ujoi dosate uñai ga 7 métros upo rĩ iji uécha uñai. Ga chadíja borapéode jogosórone ojnaque ditajío aja dapesudedie angoronei iji tábla gadiógode udore eruéode iji dosadode jnese. Ga tábla gadiógode udore cutáderigui cuse jnese to iji dosadode jnese to.

¹⁶ Iji uté gai ga líno ueque uté gaminórone borapecho jnese.

¹⁷ Cutádedie jnese iji ore ipesudi Dupade iguíjna ajé puyaque ujuyaquei iji gai ga ore ipesudei iji bronce jnese. Angoroinie, ojnaque ditajíode ore jnese ore ipesudé iji pláta. Iji táblade udore gatajidode jnese iji guesi ga ore ipesudei iji pláta ga chedu re iji gatajidode jnese iji ore ujuyaqué guesíminóri. Enga tábla péode udore iji Dupade iguíjna puyai uté gai jnese que tita táblade uñeque eruénique ome ore ipesudedie angoronei uje ore pésu iji pláta.

¹⁸ Ore pésu ore ujuyaquei piago guesíminóri ome borapéode uje pipesute iji ore acai uje i tu líno, ga ore pésu iráradie iji gai jnese ga ueradipise iráradie iji gai uje ore pésu ome ducarigode uje ore uruchachade cãra rome ñane ga utata uneroque uñai, carataque uneroque uñai, jé carataguipise uñai. Ga ore chatingara métro aja udore ga chise 9 métros iji umaningai, jé basa ga abubíe iji jnumi chise 2 métros 25 centímetros iji jnumi. Ga ore abubíedie jé chojmára iji jnumi ome borapeque uñane jnese iji ujuyaquei uté iji Dupade iguíjnai ejode.

¹⁹ Iji piagoi uté ga gagájni tábla péode iji ga cutadé gatedie cuse jnese iji uté údode uje pipesudei udire iji bronce. Ga uje ore pésu angoroinie iji tábla gagájnione udore gatajidode ga pláta u, jé aja ojnaque ditajíode uje ore chaníraja borapei eruéode ga pláta upo rĩ. Ga ore chanire pláta aja táblade udore gatajidode jnese to.

²⁰ Ore pésu ojnane uñane jeta ore chajo aja jnumone iji tábla péode dosadode jnese iji gai. Ga ore ipesucho udore iji bronce jnese.

Ore chuguhese ore oidode guebecho jeta ore chiraja udore batigade

²¹ Moisés chiroque Dupade irógode ore eduguéjnai Aarón ujnacari Itamar aja ujeta chuguhese ore oidode guebecho udore jeta ore chiraja batigai. Ga uté irógode cuse to jeta ore chátaja ga ore gãrapi u jnani bajai Leví jnese. Ga yojningane u óro, pláta, bronce ore uje ore oidode u ome Dupade iguíjnai úringai pipesute, uje ore chojningame uté nanique 'Dupade Uruode Pi Guiguíjna'.

²² Enga Úri ujnacari Bezaleel u uje chajire ore yui uje ore pésu Dupade iguíjnai uté adode jnese aja ajesúode. Ga jnani bajai Hur ájnape uté ga uté gãrapíode u judágosode nanique. Ga pésupúsu Dupade ojningane cucha ga chopise uje chingo Moisés ica.

²³ Aholiab jecucha chatapísaja Bezaleel to uje pésu cuchade to iji uté. Ga uté dai u Ahisamac nanique. Ga uté gãrapíode u jnani bajade uje dángose ore. Ga uté chiraja cuchade úringane poracho to iji guebéode. Jé aja boradie úringanie pipesudei, chirajapise to. Ga chiraja jeta pésu dapesudode iráradie. Ga uté u uje pésu iráradie iji borapéode uje pipesucho iji ore acai uje i tu líno, ga chijna ducarigode ome dapesudedie irára uje ore uruchachade cãra rome ñane ga utata uneroque uñai, carataque uneroque uñai, ga carataguipise uñai to.

²⁴ Ore ipesudode cucha jnese iji óro gãrapíode u israélgosode ore gueranone uje ore chisi ome Dupade, uje que piroque ore aja udore mu ore tẽrája dadode ome Dupade gu uje unere yui ome ore ujetiga pipesute iguíjnarique ome Dupade. Uje ore chuguhese ore gueranenie óro nanganatáguei ga batigai chise 965 kílos, aja 30 grámos. Ga ore chuguhese udore iji Dupade iguíjnai jogoto cucha iménuone erãto uje ore chajire cuchade kílode iji. Jecute que potigayaque udore gotique.

^25-26 Ore ipesudode cucha jnese iji pláta gãrapíode u jnanione gueranone ome Moisés uje ore cho doré ome Dupade ga ore gueranone pláta guebecho u 5 grámos y médio jnese nanique. Yojningane u jnanione udore ore jnese uje e ore guejnanie siqueré chise 20 nanique. Moisés isecaranone jnanío udore ore batigai chise 603.550 nanique, jé basa ga ore gueranenie plátai chise 3.319 kílos nanique, ga nóna pébi uje 525 grámos u. Ga ore chijna Dupade iguíjnai jogoto cucha iménuone erãto ome pláta guebéode udore to uje ore chajire udore batigai, ga jé upúsu ore ojningane ome udore imenuringuei nanique.

²⁷ Ore chuguhese cutádedie jnese to uje pipesudei iji pláta ga chise 3.300 kílos nanique, ga cutadé chojmara, chojmaranie chise 33 kílos jnese. 100 u cutádedie udire ga ore chanire táblade aja udire garane iji Dupade iguíjnai dosadode jnese, jé aja tábla péode to uje ore chuguhese borapeque cuchábi iji udore iji Dupade uruode pi cajo iquei, ga ore chanire udore aja cutádedie udire uñanie garane to.

²⁸ Bezaleel pésu cuchade uñane ome pláta guebéode udore amirone ga ipesudode u ojnaque ditajíode, jé aja angoroinie ore, ga chimese tábla péode gatajidode ome pláta to.

²⁹ Ore chuguhese bronce to uje ore tẽrája Dupade ome nanique, ga chise 2.336 kílos nanique ga nóna pébi uje 400 grámos u.

³⁰ Ga ore ipesudode cucha iji bronce u udojo: ore pésu cutádedie ome tábla péode udore uje ore déji Dupade iguíjna puyai piagoi iquei uje Dupade iguíjna puyai uté i tu 'Dupade, Yutuãjóa Ñane Iji Te.' Ga ore chejna bronce udore amirone aja dapesudi daseradéjna uje ore chanire bronce aja gai, ga ore pésu ojnane iji bronce udore to ga ore chimeri ñane ujetiga ore chanire dapesudi uté aja daseradéjnai ajei. Ga ore pésu uté erásorone cucha uñane iji to.

³¹ Jé aja ojnane uje ore chajo cuchade aja jnumi iji ore ujuyaqué gatei iji Dupade iguíjna puyai gai, jé aja cutádedie jnese iji ore ujuyaquei uté jogosórone tábla údode jnese. Jé aja ujuyaquei piagoi jogotodie cutádei to. Ga pipesute cuchade udore jnese iji ore gueranone bronce udore nanique.