Éxodo 36 - Dupade Uruode

¹ Jecute irajatade udore uje Dupade guẽrate ore irajatigade ome ore, a ore cháta raja Bezaleel, Aholiab ore ga a ore u jne ujetiga ore chimate Dupade iguíjnai gajnéone udore jnese ujeta jé chopise Dupade ipotigádi casica jnese."

Moisés chaquĩ́ra darasade ome ore guẽrapáidode cucha ome Dupade uje sué ipesusórone ore gai gu

² Moisés tibidi Bezaleel, Aholiab ore, jé aja jnanione udore uñane uje ore chiraja cuchade iráradie úringáringui porai, uje Dupade guẽrate ore irajatigade ome ore gu ujetiga e ore pésu cuchade aja quigode jnese ome Dupade iguíjnai yui. Ga yojningane udore ga que uñeque iroque ore aja jeta ore cháta raja Bezaleel ore to, mu ore cháta rágaja ore gu uje uneripise ome ore jeta Dupade iguíjnai déji ore.

³ Uje ore di ga Moisés chisi ome israélgosode ore guerani casodé Dupade gajneque cucha ome ore jeta ore pésu Dupade iguíjnai jogonórone cucha. Uje e ore pésu Dupade iguíjnai uté mu israélgosode que ore cha tẽrája Dupade gotique. Ga jecucha ga ore tẽrája iji dirode jnese.

⁴ Uje Bezaleel, jorane ore chimo darasade uje que ore cha tẽrája Dupade ga ore tibágui Moisés ujetiga ore catecã́ri uté.

⁵ Ga ore chojningame: "Que yocurasade ore cha dẽrapáidode ome Dupade ga suépise yoquibai. Enga déji yoque jnese erásorone cucha jeta yimáco aja gaté jne. Enga cuchárique que chona gotique uje Dupade ajegaidi casodé cucha e déji jnese jeta yipéco ojningane cucha jnese aja quigode."

⁶ Enga jé u uje Moisés chiroque darógode uñane aja ore idai údode jeta ore chingo ore ga ore cha chisi ome cuchade ome Dupade uje jiei iji iguíjnai ejode gu. Ga ore chojningame ore: "Chequedíe á, jnanione á, ayáyo uacorade cucha uje uacapéso udore ome Dupade iguíjnai úringai pipesute. Chamáñaje e jiépisi uaquẽrapáidode gu ga a chise iguíjnai jnese jne."

⁷ Enga que gusu uje ore guẽrapáidode chise iguíjnai nanique, mu udore amíningo déji to.

Gusu irajataguipísode jeta ore oraque Dupade iguíjna puyai aja quigode

⁸ Gusu irajataguipísode uje ore oraque Dupade iguíjna puyai aja quigode. Ga ore pésu iguíjna puyai ome borapéode uje borapéode udore ore chejna yijmanáyone. Ga pipesute borapéode udore iji ore acai uje i tu líno, ga ore uruchachade cãra rome ñane ga utata uneroque uñane, jé basa carataque uneroque uñane, jé carataguipise uñane to. Enga ore pésu gaté unirísõre gáningo ore orérigui iji borapéode udore enga ore pésu ujnóngone iji gaté unirisórone udore ore orérigui to.

⁹ Ga ore chatingara doidi métro aja borapéode udore abubíe jeta umaningai chise 12 métros y médio, jé basa ore chatingarápo borapéode pajei rĩ jeta chise 2 métros. Ga borapéode udojo uje ore chejna yijmanáyone ga udojo jé tiroguipise eruéode jnese iji jnumi.

¹⁰ Ore chuga borapéode aja ñane uje ore chejna yijmanai aja ujode borapecho uje chejna yijmanai to jeta jé chopise bajáiso.

^11-12 Enga ore pésu angoroinie iji borapeque utata uneroi. Enga 50 déji dosate chojmarai, ga 50 upóji borapeque uñai dosadi. Ga ore dépisi uñane tiógareode.

¹³ Enga ore pésu ojnaque ditajíode to iji óro jeta chise 50. Ga ore chaníraja dapesudérigui angoronei jeta catája ñane ome ore ipesudode udojo ojnaque ditajío. Ga jé cho jeta chojmára iji jnumi uje umarejnápise, ga Dupade iguíjna ajé puyai yuminore bajai borapeque e pijoque.

¹⁴ Bezaleel pésu Dupade iguíjna puyai yuminórone uñai to ujetiga ore chaníraja borapeque bajai uqué gai gaté. Ga chiro uté iji áyasa quedéjnanie ojode. Ga uté orai achéquedíe chojmára iji yirídai

¹⁵ Iji borapéode udore jnese uje chojmára ore iji yirídai ga ore umaningai u 13 métros y médio jnese, jé basa iji pajei ga 2 métros jnese. Enga udore abubíedie jé chojmára iji jnumi jnese.

¹⁶ Ga Bezaleel chuga borapéode udore uñane aja dosate uñai uje chejna yijmanai, jé basa jorane iji dosate uñai chojmára iji ti.

¹⁷ Enga pésu angoroinie ga 50 déji dosate chojmarai, ga 50 dépoji borapeque uñai dosadi. Ga ore dépisi uñane tiógareode.

¹⁸ Enga pésu ojnaque ditajíode to iji bronce jeta chise 50. Ga chaníraja dapesudedie angoronei jeta catája ñane ome ore ipesudode udojo ojnaque ditajío. Ga jé cho jeta chojmára iji jnumi uje umarejnápise. Ga ore chaníraja bajai gai gaté.

¹⁹ Enga ore pésapo borapeque gárode gaté rĩ jeta ore chaníraja gai gaté. Ga ipesudi uñai u borapei iji áyasa choquíode aode uje ore chaca ga carataguipise. Iji yuré guesímitó ga cuchiso ao diríjabio sudore.

²⁰ Uje ore chimate borapéode udojo jnese ga ore pésu tábla péode iji acácia, ga caputaguipíso udore iji Dupade iguíjna puyai dosadode jnese.

²¹ Ore chatingarapísa métrode aja tábla péode udore abubíedie ga umaningai chise 4 métros y médio, jé basa ga pajei chise 65 centímetros.

²² Ga ore pésu tábla erué gárode jeta chacája cutadé uje iménu ga jé u uje ore chadíja jorane tábla aja ñane jnese. Ga jorane tábla jé isocai u uté jnese iji Dupade iguíjnai tuté dosadode.

²³ Ore pésu táblade iji umusoi garani yui ga ore chejna ayoré chojmarai.

²⁴ Ga ore pésu táblade udore cutádedie to enga que chimoque eruéode jnese. Uje ore ipesudei udire iji plátadie ga pláta uegue udire, ga ore ipesudedie udire chise 40 nanique. Ore chijócha cutádedie gatajidode jnese jeta ore na tábla erué gárode aja udire ajei.

²⁵ Iji dosate uñai uje casaque yui tu, ga ore pésu táblade to uje chejna ayoré chojmarai.

²⁶ Ga ore pésapo cutade gatedie rĩ iji plátadie ome casaque yui, ga ore chise 40 to. Jecute gare cutádedie ome tábla chojmarai, chojmarane jnese iji casaque garani yui to.

²⁷ Iji Dupade iguíjna puyai gatajidi iji guedé cacadi yui táblade chojmára iji yijmanai uñai.

²⁸ Enga ore pésu tábla gáningo gaté ome Dupade iguíjna puyai gatajidi jeta ore sóñime dajorane iji ajidedie jnese.

²⁹ Enga ore pésu angoronéringui iji udore gai iji guesi jeta ore chanire tábla péode aja udire ga quítequiguíji uéchade jnese. Ga iji ajidedie ore chanire angoroné gáredie aja ajidedie erásorone tábla jeta ore catája ñane iji ajidé gaté.

³⁰ Gadióguiji yijmanai uñai táblade udore iji guedé cacadi yui ga ore ipesudedie cutádei chojmára iji yirídai uñai ome táblade udore. Enga gare cutádedie ome tábla chojmarai, chojmarane jnese uje ore na táblade udore dugudie aja cutádedie udire uje udire pipesudei iji pláta.

^31-32 Iji Dupade iguíjna puyai uéchade udore jnese ga Bezaleel chanire tábla peque uñai aja dapesudode udore angoroinie jnese uje déji gai ga chiramísara pajei jeta udore uajádiji gatéode ome. Ga uté ipesudode tábla peque 5 iji umusoi garani yui uje chiramísara pajéode, ga 5 upóji casaque garani yui, jé basa ga 5 upóji guedé cacadi yui to.

³³ Tábla peque gatócorominóripísi iji dosadode jnese, jecucha ate uje umare ome jorane ga quítequiguíji uéchai.

³⁴ Enga ore chimese táblade gáyode ome óro jnese. Jé aja angoroinie iji gai ga óro uegue to. Jé aja tábla péode to uje ore chiramísara táblade pajei ga ore chimese tábla péode udore ome óro to.

³⁵ Bezaleel chiro borapei to jeta chaníraja Dupade iguíjna ajé pirosobádi yui. Enga ducarigode cãra rome ñane ga utata uneroque uñane, jé carataque uneroque uñane, jé basa ga carataguipise uñane, jé basa ga uñane ipesucho udore iji ore acai uje i tu líno. Enga pésu gaté unirísõre gárode ore iji dorai borapeque ga ore ujnóngone déji jnese.

³⁶ Ga chimate ga jé u uje ore pésu tábla péode uñane iji acácia jeta gagájni péode udore ga ore chaníraja ojnaque ditajíode aja udire eruéode to uje óro ueguipíso. Ga ore chadíja borapei aja cutádedie udire jogosórone ojnacho ujeta chaco Dupade iguíjna pirosobádi yui gai. Ga táblade udore cutádedie cuse iji údode uje pipesudei iji pláta.

³⁷ Ga jé u uje Bezaleel pésu borapéode to ome Dupade iguíjna ajé puyai piagoi. Ga chiro iji ore ucarigode uje ore ucarigode enochade jé cãra rome ñane. Ga utata uneroque uñai, jé basa ga carataque uneroque uñai, jé basa ga carataguipise uñai. Ga ducarigode uñane pipesuchóji ore acai uje i tu líno. Ga pésu udore iráradie iji gai jnese ga ueradéjnapise iráradie iji gai jnese.

³⁸ Ga ore pésu tábla péode to uje chejna yijmanai ome iguíjna puyai piagoi. Enga ore chanire cutadé gaté aja udire údi gaté uje ore ipesudei udire iji bronce. Ga ore chimese tábla péode udore gai ome óro. Ga jé u uje ore chadíja borapei aja udire jogosórone ojnaque ditajío, angoroinie ore uje pipesucho udore iji óro to.