Éxodo 34 - Dupade Uruode

Dupade churúsãrapo daru casodé iji cucarãte uejájnaringo rĩ

¹ Dupade chojningame Moisés: –Apésu cucarãte uejájnaringo jne jeta gare. Enga a yurúsãrapo yuru casodé iji jne rĩ uje basũrurásaja jnumi diríca.

² Dimane ua to jne ome dire uñai yui jeta oru cucarani Sinaí to dirome iji durasedie, jeta esípise ójopise to dirome uje a yutuãjopóa ñane iji uté jne rĩ.

³ Enga a jé ca uñeque nóna ua aja cucarani ójo dirome. A gusu ua iji cucarani uté ójo dirome. Uje que yipota jeta yimo uñeque iji cucarani udé dirome. Jé cho aquirájnanie uje que yipota jeta yimo iji cucarani ejode, jé aja áyasadie. Enga ore tagu jnacarai iji quedéjnarique dirome jne.–

⁴ Moisés pésu Dupade ojningane cucha udore jnese ga pésu cucarãte uejájnane ga jé chopise baja casodé. Uje chimate cucarãte uejájna gárode udore, enga dire uñai iji dúrasabía ga Moisés chobéri choru cucarani uje i tu Sinaí, ga jé chijnoque dapesudíso cucarãte uejájna jeta Dupade churúsãrapo gaté rĩ.

⁵ Ga Dupade chajna Moisés aja jnumi iji uté uje pié u gue abuja cuchabé aja Moisés iji te ga basája iquei ga chatata dépisi ome Moisés iji to nanique.

⁶ Uje Dupade basája Moisés iquei iji cucarani uté ójo, ga chãraja ga chicáji daqui uté iji Moisés dosadi, ga chinguíra dabijnani aja Moisés iji te ga chojninga: –¡Pangarádejnai Dupa Eyúgojma u yu! ¡Pangarádejnai Dupa Eyúgojma u yu! Ga Dupa pañerasṍri u yu. Ga uyu upo rĩ uje ajé yote yu ome ayoréode uaque. Enga yidota yu ome cucha dacadode jeta jé ca jĩraque yo júruru. Ga yijnoraquei cuse to uje uásejna, ga cho jeta uté catája yijnorane, ga jé jogate ore. Ga cucha uréone garãsóri upo yu rĩ.

⁷ Iji jnani bajaque jnupabejnáringui eti jé yijnoraquei jogate ome ore nanique, ga jé chuságaja disi ejode uaque, jé aja uacape disi ejórigo jne rĩ, jé aja erámi eruénique. Enga jĩraque yicadígui ore ate gajnaréngone ome yu. Ujeta uñéngo chijáro raja dangoninguinone ome yuruode quigode, mu jĩraque yicadígui ore angoninguite paritigade udore ome yu to. Yirajápo rĩ jeta yinoningase ore ate gajnaréngone iji ore. Ujeta yojningame gosi: 'Ate gajnareque uté,' ga jé ũrepise yu uje gajnareque gosi adode ga jé gajnarécho. Ga e dimane gosi ome yujuyaquérique jeta gosi chimo ome re. Ga a uté abode jé ca ore taya ga gose uté ate gajnaréngone jne, jé aja uté ájnatigo ore, jé aja ájnape gatérigo, gatérigo ore jne rĩ.–

⁸ Uje Moisés chudute Dupade uru pirosobádejnane udore ga chichagápisa datajidi aja jnumi ga chicota Dupade iji uté.

⁹ Ga Moisés chojningame Dupade: –¡Pangarádejná, Dupa eyúgojmá! Ujetiga jé ũré ga yajnei tu bajnoraquei jne, enga ajína barasade uyoque jne aja bojningai uté punire gotique. Baraja uje yocurasade udojo ore u uje josipiéranguipíse ore, mu acadígui yocate gajnaréngone ome ua, yoquisijnaringuéone ore, enga ajose yoqui jeta opise barása iji yoque to.–

Dupade chingo dáyipiedie ome Moisés uje a pésu cucha pitijabate cuchátigo iji israélgosode ore ujade jne

¹⁰ Ga Dupade chojningame Moisés: –Angaripísabi yuruode quigode jne uje a qué yingo ua jne. Uje a é yisi ome yuru iyiejájnane ome barásarigo ore uhuaque jne. Enga u udojo jne: a yipésu cucha pitijabate ueratígome uaque jne uje cáma pimo yadi udé ome ayoré dipeséode uñéngo to gu iji ore unirone jnese iji erámi údode. Iji erámone udojo ga a ore chimo israélgosode uacangureni uyu yisocai ome uaque enga ore tija israélgosode uaque jne jnese. Uje a yipésu cucha pitijabate cuchátigo iji israélgosode uacajade jne.

¹¹ Ujeta yocáyipie quitique chojmára iji jnumi jnese ome yuru iyiejájnane jne, ga a ejnáño udore guesi jne enga jogadi u jne jeta yijína uágaja yojningai tuté punire yui ga yijócãre unirisórone ore jne iji yoquiquei uje ore íode u: amorréogosode, cananéogosode, hitítagosode, ferezéogosode, hevéogosode, jebuséogosode ore.

¹² Enga jé ca acatecãchoi puniri uté unirisórone ore jne jeta ore pota cháta dáyipie quitígo aja uaque. Uje a udore ore gajnunie u pujuyadie jne uje ore chicháji dajuya aja uacaquei jne ga ore gaidi u jne jeta abasója enga a udore ore sué uacabai jne.

¹³ Jé ca uacuñeque catecã́ri ore jne uje purása quedéjnapise ore ome uaque gu. Jecute ujeta e agúsoi ore uniri uté jne enga beyoi ore angurenone cucha jne ga ajéyo iji jnumone jne, jé aja ore aseradéjnane uje ore chibore dachidode cuchiso iji udore uje ore tẽrame dangurenone dupa gotígo, ga ajéyo uté iji jnumi to. Ajéyo ore angurené cucarané puyedie iji jnumone to jne, jé aja pocoro puyedie ga ajucho udire aja jnumi. Uacagaidi u gu jeta jé ca dupa uñeque oréraque, jeoga aseradéjnarique déji uacaniri uté údode jnese.

¹⁴ Enga jé ca acatecãchoi dupa uñeque uje gusu Dupade uyu ome uaque ga yajnui tu jnani ocácachoquí cuchátique uje tocãra dacoté ga timíninga edodie aja quedéjnane. Ga yi jé u Dupade ocácachoquí.

¹⁵ Enga jé ca átayopísa uágaja erámi tudé unirísõre bajade ore jne. Enga jé ca oyo uacajõra iji ore. Ja seca ore catecã́ri dangureni dupa gotique iji uacajade ga ore tẽra dachidode cuchiso ome dangureni dupa uté gotique ga a ore tibidi uaque jne jeta acho ore posode to iji ore atigai tuté. Enga a aniname eti a ore chisi ome uaque ore guẽrapáidode dachite arione udore ome dangureni dupa que, ga jé u uje pésu banerotiguérique ome yu.

¹⁶ Enga jé ca ajuéchopise uacajnacarode ore ome purása quedéjnane ore jne rĩ jeta jé ca ore chisa dacotérigui iji ore urórigui. Uje a gosi nóña ga dipotaque ome dacoté uaté purása quedéjna angureni dupa gotique jeta doi adode to.

¹⁷ Enga a puyaguipise ome uaque jne jeta apéso cuchade udojo uñeque, enga apéso uacadupárigo to jne iji óro jeta apótayome udore to. Jeoga guebeque uñeque jne, mu a jé yarángome uaque jne ujeta apéso uacadupárique iji, uje que yujuéga gu.

Dupade cho quique ore jnusinamánone díño ome Moisés ujetiga ca ore cha pésu udore iji siqueredie jnese

¹⁸ Jé ca ayáyo apéso uacajnusinamáni dire jne uje uacacho arurégode iji nanique uje que bisitique déji udore nanique. Enga jé yuru quichome uaque gatuaque jeta acho udore jne iji dirode jeta gare iji ti. Uje chise uacajnusinamáni guedosi uje uacaboyo iji Egípto nanique iji guedosi uté uje i tu Abib ga jecucha ajnusináño uacacoringai uté jne ga a acho arurégode iji ñane gari jne uje que anícho bisitígaja.

¹⁹ A yajneque uacape bajade jnese jne. Yojningane u diyoquíode udore uje uacape bajade u udore, jé aja uacachidode cuchiso ore ape bajade to jeta choquío udore, ga yajnecho udore ore to. Yojningane u aquirájnanie ape choquíode, jé aja áyasadie ape choquíode, jé aja áyasa quedéjnanie ape choquíode to, ga jé yajnecho udore ore jnese.

²⁰ Ujeta burica quedéjna yajnetique erase ome uaque mu ajéyo áyasa atique jne jeta choqui, jeoga áyasa quedéjnaraque atique iji bachidi burica quedéjnape suté jogadi ga a suté chapite jne. Mu jeta jé ca ajéyo áyasa uaté atique iji suté jogadi, enga jé u jne ujetiga beyoi yajnei burica quedéjna ape bajábi suté jne enga abéroyo etabícoro jne. Ga adi jé upo ome uacape bajábode uje diyocape ore, ga jecucha oyo ore oré ome yu to. Ujeta gosi pota chose yi jne ga jé ca gosi chedo dajmanéraque ome dẽratique cucha jne ome yu.

²¹ Asayo uaquejode aja dire chojmarai iji tia gatuaque iji semánanie jnese, mu iji dire garitia ga ca asayo uaquejode iji uté. A agúsoji uacacapiedie gáyode múñi, ujetiga e chise dire garitia ga e gusu uacasagode jne iji te. Ga dire uñai ga asayopo uaquejode jne rĩ. Jeoga e agúsoji ujetiga e aráño uacacade cucha ade, mu que yujuéga jeta aráñopo rĩ iji dire garitia. Yajneque dire garitia gu, jecute oyo uacajñare iji uté gatuaque.

²² Jé ca amócho apéso uacaninaquéode iji uacajnusinamánone díño uje uacojnichome udore 'Pininaquei Jogadi Tu Iji Semánanie Udire'. Yojningane u uacaninaquéode ome uacasiqueredie a bajedie jeta aráño trígo a bajade ga asíyo yu iji to, enga apésopo uacaninaqué cuchátigo to jne rĩ iji siqueré eruépisi to.

²³ Iji siqueredie jnese ga jnani chojmarai, chojmarane jnese a jecucha ore chingongarája israélgosode uacangureni Dupa Eyúgojma uyu jne iji yojningane uacajnusinamánone díño udore uje gadioque jne iji siqueredie jnese.

²⁴ Enga a jecucha yucuase uacaniri uté unirísõre bajade ore iji sona, sona jne jeta uacaniri quérã, quérã gatuaque. Yigaidi tu ujetiga ca purása quedéjnaringo ore cho dajnéngu uacajnéone jnumío to iji uacaquigáningo uje uacaboyo gu ujetiga angoño uágaja uacangureni Dupa Eyúgojma uyu iji yiguíjnai jogatique iji yojningane uacaninaquéode udore uje gadioque uacajnusinamánone díño udore iji siqueredie jnese.

²⁵ Uje uaquẽcho uacachidode cuchiso iyode ome yu enga jé ca átayo arurétique aja uaquegode iyode udore to ujeta bisitique déji. Ujeta acho Páscua gajnéone udore uacachite cuchiso arione jne enga jé ca oyo uacajõratu jne jeta acho iji dire uñai.

²⁶ Enga ajnáño uacanasu ueradedie aja uacangarádejnai Dupade uyu yiguíjnai jeta uaquẽracho ome yu. Yojninganie u uacacade a bajade ajñunie. Jé ca aréñoi áyasa quedéjna iji daté irisode jeta uacabose uje que pisoca gotique gu ome yurasade uaque.–

Moisés di Dupade uruode údi ome darasade ga edodie cho nánga, nánga iji jnumi uje quene cha catecã́ri Dupapísi gu

²⁷ Dupade chojningame Moisés: "Arúsãrape yuru quigode udojo jnese jne. Uje yuru iyiejájnane u gu ome israélgosode ore uhuaque ujetiga beyopísi yojningane udojo cucha jnese, ga jé basa ga a yiji yuru quigode to jne ome uaque."

²⁸ Moisés chácariji Dupade gari iji cucarani ójo uje i tu Sinaí ga guejnane dire chejna ayoré gáredie, jé aja dejade uje guejnane ayoré garapo rĩ. Ga que tagu dabotique iji uté, ga que chójiapo yotíguiji uté rĩ. Ga Moisés churúsãre cucarãte uejájnane iji uté, ga urusarane u Dupade áyipie pirosobádejnanie iji udore uje chejna yijmanáyone Dupade áyipiedie udire quigode.

²⁹ Uje Moisés doi jnumi tiji cucarani uje i tu Sinaí ga chijna cucarãte uejájna gárode udore aja jnumi. Uje diji cucarani uté ójo ga que chiraja uje edodie cho nánga, nánga iji jnumi ga uté edodie chopise guedé edo ome úringai nanganataque uje que pajirique ome ayorérique uyoque jeta gosi toji gai. Uje uté quene cha catecã́ri Dupade gu, ga Dupade nanganataringuei chuságaja uté edodie.

³⁰ Uje Aarón, israélgosode ore chimo Moisés uje edodie cho cúruru, cúruru ga que ore pota jeta ore cunguésõrapói Moisés gotique rĩ uje ore dosóñime gu.

³¹ Mu Moisés tibidi darasade ore. Ga jé u uje Aarón, ujode israélgose ore angaránone ore chose Moisés yui jnese jeta Moisés chingo dojñane aja ore.

³² Quigade enga Moisés urasade uñane ore di jnese ga jé u uje Moisés chatata Dupade áyipiedie quigode ome ore jnese uje Dupade chingo Moisés gu iji cucarani Sinaí uté ójo diríca.

³³ Uje Moisés e cha catecã́ri darasade ore ga digapóji ore ujade rĩ uje enochai jé ate dadi uje cho nánga, nánga iji ore ujade ga edodie cho cúruru, cúruru aja dajesúode iji ore ujade. Jecute Moisés chaco borapeque diríjabi dedodie gai jeta urasade ore cha dasadodéringai ome.

³⁴ Mu uje Moisés catecã́ri Dupade iji iguíjna ajei ga chejñu dedodie gaminóri borapeque diríji iji dedodie gai. Ga chacopo dedodie gai te rĩ uje chajníja darasade jogadi. Ga jecucha Moisés isoca nanique uje tangári Dupade uruode ga doi guesi iji Dupade iguíjnai, ga chatata quigode ome darasade.

³⁵ Enga Moisés jecucha isoca uje doi guesi iji Dupade iguíjnai ga chaco dedodie gai aja guesi. Gaidi u gu jeta urasade israélgose jé ca ore dosóñime ome cutejmai nanganataringué. Ga chacapója Dupade iguíjnai ajei rĩ ga chejñuápo dedodie gaminóri borapeque diríji rĩ iji dedodie gai.