Éxodo 33 - Dupade Uruode

Dupade chiroque Moisés ore aja doi ujetiga ore chicáji ojningai punire ueradéjna yui

¹ Dupade chojningame Moisés: –Boji udé ga ajína udore ore aja bajesui uje boite ore iji Egípto ica. Enga acayóji jnumi casica uje yingo uacáquiode Abraham, Isaac, Jacob ore nanique uje yojningame ore nanique: 'A uacatígo gajneque jnumi udé jne jeta ore cho daniri iji jne.'

² Enga a yiroque yirótique gaté unirísõre aja uaque ujetiga cho dajéode quigome uaque jne aja uté yui jeta yijócãre unirisórone ore iji uje ore íode u cananéogosode, amorréogosode, hitítagosode, ferezéogosode, hevéogosode, jebuséogosode ore.

³ Acayóji puniri uté jne uje cutepepiei ga cho yodode aja dajesúode iji uté. Enga aquirájnanie posode jnacaraque uerachóji jeta irisode jiépisi iji to. Mu a jé ca yijína uágaja jnumi uté yúode to jne. Cachi yijínarása uaque enga a jĩraque yejnárase uáguiji sañeque uje josipíerãque uaque gu. Ga a jé yedugáta yiroi gaté unirísõre ome uaque jne.–

⁴ Uje israélgosode ore chudute Dupade guetei cucha iji ore ga que qué ore chijnapo dangoronépiérigui, jé aja dajmanepiérigui, jé aja ore ujnápeode uñane. Ga imone u uje áyuguhebátaque cuchape ore ome dadi casodé gu, uje Dupade dosója ore ome daru dosóguejnane gu.

⁵ Dupade chojningame Moisés gu: –Ango yuruode aja israélgosode jne uje yojningame ore: 'Urénga ayoré ducusuréchoquí cuchape uaque. Ujeta yugúsirásiji uacajade jeta quene yise uaque mu a jĩraque yejnárase uaque ¡jaripe! ome uacáringane ayoré ducusuréchoquío. Enga ejñúño uacangoroinie jogotodie, uacajmanepiédie ore iji uaque. Uje uacayaróchopisa ome yu. Mu ujetiga ejñúño uacayarógade uacajnápeque udore iji uaque, enga a jé u jne ujetiga quene yucué yáyipiedie jne ome uaque.–

⁶ Uje israélgosode ore jnoji pajmini uje i tu Horeb ga que qué ore chanire dangoroinie jogotodie aja dangoroinie rĩ. Jé aja ore jmanepiedie, ujnápeode ore.

Moisés pésu Dupade iguíjnai nanique iji borapéode ga chojningame dapesudi uté 'Dupade, Yutuãjóa Ñane Iji Te'

⁷ Uje cáma pipesute Dupade iguíjnapísi nanique mu jecucha Moisés isoca nanique iji ore irengúone uñane uje pésu Dupade iguíjnai nanique iji borapéode iji ore irengúone ejode iji ti, ga chojningame dapesudi uté 'Dupade, Yutuãjóa Ñane Iji Te.' Ujeta gosi pota catecã́ri Dupade nanique ga chicáji Moisés ipesudi uté jeta catecã́ri Dupade iji. Mu jecucha déji ore irengúi ejoi nanique.

⁸ Uje Moisés chicáji dapesudi Dupade iguíjna nanique ga urasade ore doi guesi tiji daguíjnane jnese ga ore cháguena gatéode ga ore timíninga Moisés aja qui uté yui jeta ore chajire Moisés jeta chacája dapesudi guiguíjna uje i tu 'Dupade, Yutuãjóa Ñane Iji Te.'

⁹ Uje Moisés chacája Dupade iguíjnai uté ajei nanique ga urasade ore chimo gue abuja cuchabé nanique uje tṍraji gaté ga chacája Moisés gari iji jogapi piago. Enga igasique iji uté, jé aja jeta Moisés cha catecã́ri Dupade.

¹⁰ Uje Moisés urasade ore chimo gue abuja tuaté uje chichaga raja Moisés pípidi uqué ga ore chichaga dagataidie aja jnumone jnese iji daguíjnane piagode, ga ore catecã́ri Dupade iji udore jnese.

¹¹ Dupade catecã́ri Moisés nanique ga chingopísa raja Moisés nanique ga chopise Moisés jorámetique dojo ayoré nanique uje ore pañapísiji ñane uruode nanique. Ga Moisés chajníja ore irengúi mu iroi jnacare gatode Josué chácariji uté ajei gatuaque iji dirode jnese, uje uté dai i tu Nun nanique.

Dupade chingongara dangoningájnai aja Moisés nanique

¹² Moisés catecã́ri Dupade ga chojninga: –Yocangarádejná, cachi batṍri yu que arĩa jeta yijína yurása dipeséode udore ore aja bojningai puniri yúode, mu que bango yátajasónique yujo ayoré aja yu. Uje jecucha bojningame yu: 'Yirasique badode, ga yedugádi upúsu ua ome cuchade yúode.'

¹³ Ujeta jé ũré baruode udojo ome yu ga ango bajegaitígaja yu ga yiraja ua gaté. Ujeta atata báyipie quitígo ome yu jne ga a jé u jne ujeta yiraja bajnoraquei ome yu, ga jé upo to rĩ jeta yujnusi yu ome báringai pangurete gaté. Baraja uje que purása ayoréode udojo gotique ome yu, mu ua u uje barásapise israélgosode ore.–

¹⁴ Enga Dupade chojningame Moisés: –A uyu u bajõrai jne, ga a yáta basagode aja ua jne ga a qué o bajñare gatuaque jne.–

¹⁵ Moisés chojningame Dupade: –Ujeta jé ca ua upúsu jne ujeta ajína yógaja quedéjnane enga jé ca aroque yógaja doi, ga yácagoji de jne.

¹⁶ Ujeta jé ca ajína yógaja quedéjnane enga a jé ca yocúringáringo bameserãque pijógome erámi jne. Mu ujetiga ajína yoque jne enga a pijoque jne uje bajegaite israélgosode uyoque iji yocujode ayoré ore ujade uje bo barása iji yoque.–

¹⁷ Ga Dupade chojningame Moisés: –A yiji baru quigode udore jne, enga a jecucha yijína uágaja tijode. Yiraja uje que ajuseque yuru quigode ome ua ga jecute yimesẽripise basocade udore jnese.–

¹⁸ Ga jé u uje Moisés chojningame Dupade: –Yangarádejna Dupá, ajuéga ga yimópise bagosi jnese ome yedodie jeta ayáguena yiquei ome bangoningájnai.–

¹⁹ Ga Dupade chojningame Moisés: –Jé areque. A yingongara yingoningájnai aja ua jne enga a angaripísi yuruode jne uje a qué yatata yípisi ome ua jne uje yi pirosobádejnai u. Jecucha yisocai u uje a yajéo ga yosõre gosi ome cucha dacatígo, jeoga yajéo ga yo yedójnari gosi to.

²⁰ Mu que toque jeta yingo yedodie aja ua. Chamáñaje jeta gosi pañarásiji yedodie ga jĩraque gosi torási ¡sere!–

²¹ Dupade chojningápome Moisés rĩ: –Cajirape yijogadi tiógarei to uje cucarané déji ga ayáguena cucarané uaté gatajidi jne.

^22-23 Enga a anina jne eti yingoningájnai chise ua iji bayáguesiringai uté jne, ga a yucuase ua iji cucarã́tedóraque jne. Ga yujúringara yijmanai aja bapácapie uaté cucarã́tedó piagoi jne, enga a jé yãraja ua jne ga a yijnime yijmanai iji bapácapie cucarã́tedó piagoi jne, ga jé u uje yujuéga yĩraránucadói úringárique pimo ome ua jne uje yicáji yiqui uté iji barosadi. Mu que toque jeta yingo yigosi aja ua jnese. Uje puyaguipise gu jeta gosi pañapísiji yedodie iji daquei.–