Éxodo 32 - Dupade Uruode

Aarón pésu aquirájna ape choqui oré ga chimate ga chisi ome darasade ujetiga ore cho dadupade iji ipesudi uté

¹ Uje israélgosode ore chajire jóroque Moisés yui nanique iji cucarani uté ójo ga ore chacho yui uje que di, ga ore doi uyai Aarón ejode ga ore chaparu gai jeta ore catecã́ri Aarón uté nanique. Uje ore chacho Moisés yui ga ore chojningame Aarón: –Chimo jóroque re uje Moisés uté uje ijnimique yóguiji Egípto, mu a e cuchárique tṍraji iji sañeque uje que diapo rĩ. Ga qué dóji jne, enga be ga apésu yocanguretique dupa jne jetiga yipáñangoji to. Ga a uté u jne jeta cho dajei quigome yoque jne jeta ga yicoji erámi tudé.–

² Aarón chajnai ore uruode ga chojninga: –Angoñome chequedíe jne, jé aja ore urodie, jé aja ore ujnacarode ore to, jeta ore chejñu dangoroinie jogotodie jne enga ore chijnája de jne.–

³ Enga ore chijnime dangoroinie jogotodie jnese ga ore chisi ome Aarón jnese.

⁴ Enga Aarón chãrei enga chijnime ga doi martíllo ga chujéji jnumi jeta pésu quigode aja ajesúode. Enga Aarón chimate ga pésu aquirájna ape choqui oré tiji dapesudi ore udupa. Enga chimate ga tibidi israélgosode ore jnese, ga chingo dapesudi ome ore. Ga jé u uje ore chimo aquirájna ape choqui oré ga ore chojningame ñane: –¡Israélgosode uaque á, a yocangureni dupa udé u uje ijnimique yóguiji Egípto ica!–

⁵ Uje Aarón chimo ore irasitigai enga doi ga pésu daseradéjnai iji dapesudé aquirájna oré iquei enga doi ga e chinguíra dabijnani aja darasade ore ga chojninga: –¡A yipéco yoquininaquédatéi dirome jeta yẽcója Pangarádejna Dupa Eyúgojmai gajnei yoquẽratique cuchisórigo dirome!–

⁶ Ga iji dire ejoi iji durasé ga ore doi dachidode cuchiso ga ore chipotame degode udore iji Aarón ipesudé uaté iquei. Ga ore tẽrapo dachidode uñane ome uté rĩ uje chiese ore gaidi tu ujeta Dupade, ore ajéode chopo sere ome ñane rĩ. Ga israélgosode ore nína re ome udore ga ore tagu cucha pibosode jnese iji ñane gari ga ore doi jobeyei jnese.

⁷ Enga Dupade jĩraque chojningame Moisés iji cucarani ójo: –Moisés á, be jnumi iji cucarani udé ga abágui barása casodé israélgose uje bajnime ore iji Egípto ica. Uje e gajnaréngapo ore isocade rĩ.

⁸ A jĩraque ore cha yerani casica dajeque uréone ore ga e ore chijnángui ajesúode. Enga ore pésu aquirájna ape choqui iji óro ga ore cho dadupade iji uté. Ore tẽra cuchade ome uté rĩ, enga ore catecã́ri uté ome cuchade. Enga ore chojningame dachietaquéode: '¡Israélgosode uyoque yocangureni dupa u udé uje ijnimique yóguiji egíptogosode ujade ica!'–

⁹ Enga Dupade qué jno daruode údi ome Moisés ga chojninga: –Yopise yáyugu udore ore uje jĩraque ore cusu rome cuchade, jecute udore ore chácaripísiji yúdode.–

¹⁰ Ga Dupade chojningame Moisés gaté: –Moisés á, jé ca aquĩ́ra yu ome barása casodé ore jne, enga a yejna ore ¡jaripe! jnese jne uje ájningarã́que cuchape yu ome ore gu. Enga a gusu amiri tu uáji dínique jne. Ga a yipésapo barásarigo gaté jne iji erámi uje a ore gãrapi jé u ua jne iji jnumi tudé. Ga a apéducho erámi údode jne ome uacapetígajnai. Ga a obiréjnapise udore ore ome yu jne.–

¹¹ Moisés chimo uje ájningaránguipíse Dupade ga doi uté ga chaquĩ́ra iji ájningai ome darása casodé. Ga nejéru Dupade údode. Enga chojningame: –Jé gotíguipié, Yocangarádejná, uje que ajire cutejmárique bájninga ome barása casodé israélgose ore, uje gusu ua uje bajnimique udore ore iji Egípto ica ome cutejmai betotiguejna uje que cuchárique déji baróbuchaque quitique.

¹² A gajnareque jne jetiga egíptogosi casodica ore chudute israélgosode ujnomérique jne uje bajnimique ore iji Egípto ica ga a ore chojninga jne: 'A jé Dupade uté gotique chijnime israélgosi casodica ore iji yocujade ga gose dajocaningai ome ore ica. Uje chejnápise ore iji ore qui casica cucarãte uje i tu Sinaí ica ga que uñeque chapídiji uje chejnápise ore ¡jaripe!'– Moisés qué jno daruode údi ome Dupade ga chojninga: –Yangarádejná, be ga acadígui ore adode ome ua enga aya bájningai ome ore jne uje barása ore arĩa ga jé ca bo bájningárique údi ome barasade israélgose ore jne. Ga bajéode urásu jeta ejna ore, mu aya báyipiedie udire ome ore jne ga acadígui ore adode jnese jne.–

¹³ Moisés chojningápome Dupade rĩ: –Yocangarádejná Dupade á, ajnusina baru cásodicáite ome israélgosode yocáqui cásodicáite ore to uje jecucha bango cuchade aja ore nanique: yojningane u yocáqui bajai Abraham, jé aja Isaac, jé aja Israel ore. Uje ua upúsu darai nanique uje bacatecã́ri ore nanique ome baru iyiejnane ga bojningame ore nanique: 'Jé yarecujaidie u yingoméone ome uaque uje a yipésu uacape disi ejórigo ore ga a ore gajnunie u guédodie jne ome dáringanie dipesei.' Enga bojningápome ore nanique rĩ: 'Puniri uté uje yingome uaque ica a yẽrate yojningai uté ome uacape disi ejórigo ore jne jeta ore cho daniri iji uté gatuaque iji deréjna pitade. Ga yajnui a u jnanírique jne uje chichaga dagúchade aja dajnacare urẽjai, ga que qué porichópo iji ujnacari uté gari to rĩ.'–

¹⁴ Enga uje Moisés chisíome Dupade uru cásodicáite ome uje chingo Abraham ore nanique, ga jé u uje Dupade cha dáyipiedie udire ga chojningame re: 'A jé ca yejnápise israélgosode ore jne.'

¹⁵ Uje Moisés doi jnumi tiji cucarani ga chijna cucarãte uejájna gárode aja jnumi uje Dupade urusarane daru pirosobácho déji udore uéchade jnese.

¹⁶ Dupade jé upúsu uje churúsãre cucarãte uejájnane udojo nanique. Ga jé upo to rĩ uje ipesucho cucarãte uejájnane udojo úringane uejácho.

¹⁷ Uje Moisés, Josué ore nóna ñane aja jnumi yui iji cucarani, enga Josué chojningame Moisés aja dajei: –Yudute ore pijnanéjnane que ga cho pocaningane gajnéone pibijnácho que.–

¹⁸ Ga Moisés chojningame Josué uruode: –A jé ca ore iradé uaté que uje ore chingójna degode cucha gai ome dajúdi uté. Que chopo puyacade júdode gotique que rĩ. Ga a jé ca urásarique toi gotique.– Ga Moisés chojninga: –Piradé guichaya uaté gotórangome yu ga gotóraque jé cãrápisa dajúdi.–

¹⁹ Uje Moisés e ore chirõre jnumi iji cucarani ga ore chajire daquei tuta ga qué ore urasade doi jobeyei iji Aarón ipesudé aquirájna ape dosadode ga Moisés jĩraque ájningarángome ore ga chinguíra doidéisi Dupade áyipie pirosobádei aja jnumi iji cucarani gaté ga urúpisiji jnumi.

²⁰ Enga jé u uje Moisés cugujnáji Aarón ipesudé aquirájna chocábi oré uje ore cho dadupade iji aquirájna chocábi uté, ga Moisés chisa ¡saque! ga tṍraja pioguéjnai ¡jmuque! Ga chisapo rĩ ga chijáro ga urúpisiji jnumi ga tṍraja tié, ga tibidi israélgosode enga chojningame ore: "Israélgosode á, boyo iji te ga ójiyo yijotai iji uacangaráni casé dupa aquirájna chocábi casé otadi."

²¹ Ga jé u uje Moisés catecã́ri dayai Aarón ga chojningame: –¿Yocurasade israélgose jé ore cho ringome ua uje bapésu cucha noñaque uté diríca, uje que déji pajénique mu bapésu uté? ¿Ama jé ca basijnaringuei u ome Dupade uje baroque yocurasade israélgose aja borai aquirájna ujnacare oré uje ore cho dupa iji gu a?–

²² Ga Aarón chajnai desai Moisés uruode ga chósi tome: –Moisés á, yangaráni tu ua arĩa. Jé ca o júruru ome yu jne enga jé ca bo bájningárique údi ome yu jne. Uje baraja yocurasade udojo ore isocade uje jecucha ore gaidode u dasijnaringuéone gatuaque.

²³ Ga ore chojningame yu diríca: 'Apésu yocudupárique jne uje a cho yoquiquique jne ome cuchade uje que yimóngopo besai Moisés casica rĩ uje ijnimique yóguiji Egípto ica. Mu a cucha dacatique sué gai iji cucarani uté ójo.'

²⁴ Uje ore chiroque yu aja uté úringárique pipesute diríca ga yojninga: 'Óro petígo jeta déji uacuñéngo ga amátayo ga ajnáño aja de jne.' Ga ore di údi diríca ga yisa ga yṍraja pioi uté diríca mu ¡yuniname diríca eti aquirájna ape chocábi suté oré tṍraji udire diríca iji pioi!–

²⁵ Moisés chimo uje urasade israélgoso que ore cájnaru rome cucha gajnaréngone úringane pipesucho uje ore doi jobeyéode. Ga ore chejñu dabáyode aja dagaidode jobeyéo ga ore chopise choquírigaja, mu que paquĩraque ore ome uyai Aarón gotique to nanique. Ga jé u uje ore umajosórone chujñieta israélgosode ore ome ore isocade udore.

²⁶ Ga Moisés basája dajei garani iji israélgosode ore irengúi gabi ga chinguíra dabijnani aja ore ga chojninga: –Ujeta uacuñéngo ijnoraquei qué déji ome Pangarádejna Dupa Eyúgojmai to ga beyoi yejoi iji de jnese.– Ga levígosode ore doi Moisés ejoi jnese nanique ga ore chedu re iji uté nanique.

²⁷ Ga Moisés chojningame levígosode ore uje catecã́ri ore: –Israélgosode Yocangureni Dupa Eyúgojma arecujate pirosobádejnai u udiji ome uaque uje chojninga: 'Asayo uacõrachade asórenie jnese jne, ga beyoi uacarasade amirone udore jne uje qué ore chácariji uacarengúi. Enga ajéyo chojmara, chojmaráringo iji udore, udore jne. Jetiga besaque jne marínga, jeoga bajõrápise jne mu jé ajé uté gosi to jne.'–

²⁸ Enga levígosode ore dopísi Moisés júdedie Dupade áyipiei quigode, enga ore chujé darasade uñane iji dire chojmarai ga ore yugode chise 3.000 iji dire chojmarai uté nanique.

²⁹ Enga Moisés chojningame levígosode: –Uacáringane Dupade imeserãque quene pijoguipise uje uacabeyoi uruode quigode, ga que acájnacho chutígo ome uaquesaguipísode ore to, jé aja uacabipísode uñane ore to. Enga jé u iji deréjnai tudé jeta Pangarádejnai Dupade chacacãre uaque jne ome daru ueratígo jne.–

³⁰ Iji dire ejoi ga Moisés chojningame darasade ore: –Urénga uacapéso cucha gajnaréquedatéi uje uacoyo dupáji aquirájna ape chocábi diríca. Mu a qué yorúpo cucarani jne rĩ jeta qué yicatecã́ri Dupade ome uaque jeta ajéo ga chicadígui uacate gajnaréngone jne rĩ.–

³¹ Ga Moisés tibágui Dupade iji jogadébei tuté iji cucarani ójo ga chósi tome Dupade iji te: –Gajnarenguipise yurasade adode uje ore pésu aquirájna choqui ga ore cho uáji dapesudi aquirájna ujnacare que uje ore ipesudíji óro, ga ore catecã́ri uté.

³² Enga qué yutṍri ua ome yurasade ore gaté jeta osõripísapo ore jne rĩ, ga acadígui ore isocade udojo jne. Ujeta ca apota acadígui ore ate gajnaréngone jne, ga áta yu aja yurasade ore to jne ga yipatĩ́ora udore to jne jeta ãro yi to iji barusãra casodica to.–

³³ Dupade chajnai Moisés uruode ga chojningame Moisés: –Gusu yĩro ore íode iji yurusarane darujna ao uje ore pésu cucha gajnaréngone ome yu.–

³⁴ Dupade chojningame Moisés rĩ: –Bo ga ajína barasade ore aja puniri uje e yingo uaque ica. Ga yirótique gaté unirísõre cho uté quique jne ome uaque. Mu a chise dínique jne jeta pujuyagaite pisijnaringuéone ipesusórone jne ga a uyu u jne jeta yujuyagaite ore.–

³⁵ Enga Dupade chiramurase dequejnarei udore ore gai uje ore catecã́ri Aarón ipesudi aquirájna choqui oré ga jé ore bai tu uté ome Dupade nanique.