Éxodo 31 - Dupade Uruode

Dupade cho quique Moisés ome ajegaidode jnanío ujetiga ore pésu iguíjnai jogonórone cucha

¹ Pangarádejnai Dupade catecãrápoi Moisés rĩ ga cho quique ga chojningame:

² "Moisés á, jé cajirape uacáqui casicaite Judá ape disi ejode udore uñeque to jne, uje yajegaite uté gosi to iji ore ujade jeta pésu yiguíjnai, jogonórone cucha uñéngo to jne. Yojningai u Úri ujnacari uje i tu Bezaleel uje jnani baja casicaite Hur ájnape uté to.

³ Yĩreta uté ajei ome yujopié ga irágupúsu jnani uté ajei. Ga e yisi ome payuquetotiguei, pirajatigade ore ome uté to. Jecute uté chirajapise cuchade úringane pipesucho jnese.

⁴ Uté chiraja jeta pésu cuchade iji órodie, ga chirajápo jeta pésu cuchade iráradie iji dapesudode guebéode uñane to rĩ uje pésu cuchade iji pláta, bronce ore jnese.

⁵ Chirajápo rĩ uje chijnire cucaranenie garane, ga chiraja to jetiga pésu órodie, jeoga guebéode uñeque u ga chanire cucarané nanganatagué aja gai gaté ga chácaripísiji dajogadi. Enga chirajápo uje chijno poridie garane to rĩ, ga uerate ipesudode cucha iji táblade jnese. Uté chiraja jeta pésu cucha pisaque ibirade jnese to uje a jé ca pirajaque mu jé chiraja.

⁶ A yisi ome Bezaleel átajasónique ome jne, ga yajegaidi u dángosode uñai uje i tu Aholiab ujeta cháta cuchade aja Bezaleel. Jnani uté uje i tu Aholiab dayé i tu Ahisamac. A jé ca gusu udore ore gotique jne mu a barótigo uñéngo cuse to jeta ore pésu to yiguíjnai gajnéone cucha. Ga udore ore a yõre ore irajatigade jne ome cuchade, jé aja jeta ore chimate dasagode cucha jnese aja eruénique, enga a jé ca ore chimoque yojningárique jne. Ga a cuchade tocade jnese jne uje e yingopísa quigode ome ua gu.

⁷ Enga a ore ipesudode u udojo jne: Yiguíjna puyai uje i tu 'Dupade, Yutuãjóa Ñane Iji Te.' Jé upo yuruode pípisi uté rĩ. Jé aja yuruode pi uté joride. Jé aja yiguíjnai gajnéone cucha uñane jnese.

⁸ Jé aja mésa, gaminórone cucha jnese. Jé aja ore apósode ero, úcodie ore jnese rĩ, jé aja erásorone to ome ore apósode ibiocho.

⁹ Jé aja uacaseradéjnai uje cucha ai unérone gajnei tu. Jé aja uacaseradéjna uñai uje uacabocho uaquẽrapáidode cuchiso iji uté gai. Jé aja uacaseradéjnai uté gajnéone cucha jnese. Jé aja ore esãrapié, jé aja ore uchiejnane iji uaté ejode.

¹⁰ Jé aja Aarón, ujnacarode ore iguidé nanganatáguedie uje a ore chigui jne ujeta ore doi yojningane cucha iji yiguíjnai gatuaque.

¹¹ Jé aja aseque puyai uje pésu cuchade úringane puyácho. Jé aja cucha ai unérone uje i tu inciénso. Uje a ore pésu udore jne enga jé ca ore chimoque baru quitígo ome udore jne jeta ore pésu. Chamáñaje e barajapise yáyipiedie quigode jnese que jeta opise ore quigome."

Israélgosode a ore pijógome dáringane Dupade urása jne gu dire puyai uje ore pésu ome Dupade gatuaque

¹² Dupade cho quique Moisés ga chósi tome:

¹³ "Ango yuruode aja barasade israélgose ore ga ojningame ore: Uacangarádejnai Dupade chósi tome uaque: 'Jé ca oyo cucha bisidéguiji yojningai uté dire puyaque ome uaque jne. Yojningai uté a dire puyágome uaque jne ujetiga yipijójome ñane, ga uacape disi ejode a ore gajneque dire puyai tuté to iji deréjna pitade jne iji uacaquigáningo. U to jne ujeta cãra uacajogadi ome uacojode erámi unirísoño ore. Ujetiga ore chudute uacajnomei jnese uje uacapéso dire puyai uté ga ore chiraja jnese uje Dupa Eyúgojmai uyu yimeserãque uáguiji udore ore ujade.

¹⁴ Dire puyai uté a pijoguipise úringai puyaque jne ome uaque enga jé ca asayo cucha pisatíguiji jne. Ujeta gosi chietáyime dire puyai uté jne enga a gosi cachodi u jne ome dachietabátigai jeta gosi topísi. Adi jé upo rĩ jeta gosi doi cucha pisatique iji jne enga a chuque uté gosi to.

¹⁵ Asayo cucha pisagode jnese aja dire chojmaráitía, mu iji dire garitia ga oyo uacajñare iji diri uté gatuaque jne iji semánanie jnese. Enga angaráño dire garitia ome yu ujetiga uacáyipiedie jecucha chejna raja Uacangarádejnai Dupa Eyúgojma uyu iji uté. Qué yogotápo rĩ: jeta gosi chisa dejode iji yojningai dire puyaque udé jne ga gosi cachodi a jé u jne jeta pimanique gosi aja pitoringai.'

¹⁶ Jecute, Moisés á, a israélgosode uaque, a oyo uacajñare iji yojningai dire puyaque uté jne, ga a apéso yuruode aja quigode jnese iji uté. Ga a yoquipijogúsõri u dire puyai uté jne ome yocúringane pujúcho jne. Enga que gusu uaque, mu a uacape disi ejórigo ore, yoquipijogúsõri u to jne iji uacaquigáningo iji deréjnane jnese.

¹⁷ Ga israélgosode a oyo uaquedópasa uacapijogúsõri iji dire puyai uté jne ga a yipijójome ñane jne gatuaque ga gose uté jne." Dupade uruode u udore ome Moisés gu uje pésu gaté, erámi ore nanique iji dire chojmara iji tíode ga chimate ga que chisapo cucháriguiji dire garitia rĩ. Ga cho paráguiji degúi nanique iji dasagode cucha udojo quigade.

¹⁸ Uje Dupade e cha catecã́ri Moisés iji cucarani ójo nanique ga chisi ome darusarane ome uje déji cucarãte uejájnane uje áyipie pirosobádedie jogapíode u udore uje churúsãre quigode iji ga inguíraja jé u dajmané uje churúsãre dáyipie quigode iji udore. Ga gare cucarãte uejájnane udore nanique uje Dupade chisi ome Moisés.