Éxodo 30 - Dupade Uruode

Dupade cho quique ore aseradéjna uñeque ome Moisés ujetiga Aarón chãru cucha ai unérone iji gai iji durasedie gatuaque

¹ Apéso uacaseradéjna uñeque jeta uacapósode cucha ai unere gajneque uté jne jeta ãcho iji gai. Ga apéso iji pore péode to jne uje i tu acácia.

² Ga 45 centímetros u umaningai, jé basa a 45 centímetros upo pajei te rĩ jeta tiroque iji jnumi, ga umaningai iji jnumi a chise 90 centímetros jne. Ga apéso uacaseradéjnai uté uérigui jne iji eruéode ga jé jogate uté uarainie jne. Ga uedie jĩraque pipesudei to iji uacaseradéjnai uté eruéode uje catája uté gu.

³ Ga ameso uedie gáyode ome óro. Ga amese uacaseradéjnai gai jnese ome óro. Ga apéso uruchachárique iji pijnanai gai jnese jne jeta óro ueque.

⁴ Enga anire bapesudérigui angoronei aja bapesudi uruchacha údi, jé iji uécha uñai to ga gare iji uéchade jnese. Enga a anícho tábla péode aja jne jeta jé jogate, ga a ore chijnoque udore jne aja dajesúode.

⁵ Ga tábla péode udore uje uacapéso iji acácia ga ameso gai to ome óro jeta óro ueque.

⁶ Ga acháji uacaseradéjnai uté iji borapei uéchai jne iji yiguíjna ajé pirosobádi iquei uje yuruode pi cajo, joride ore déji borapei uécha uñai uté. Yiguíjna ajé pirosobádi uté u uje a jecucha yise ua iji jne.

⁷ Iji durasedie gatuaque a jecucha Aarón chãru cucha ai unérone jne iji uacaserani udé gai uje cucha ai unérone i tu inciénso. Enga a jecucha ga Aarón chãru udire to jne iji guedé batigai uje ore pésu dabiogode adode iji durasedie gatuaque.

⁸ Ujeta guedé e jno, ga a Aarón chãrupo cucha ai unérone to jne rĩ. Ga guedé batigai jé u uje ore chãru dabiogode udore. Enga jecucha apéso udore jne iji yiguíjna ajé puyai uté jne iji dirode jnese, ga que gusu uaque mu uacape disi ejode a ore pésu udore to jne iji uacaquigáningo.

⁹ Gusu yojninga u inciénso jeta apótayome iji uacaseradéjnai udé gai jne, ga jé ca anícho cucha ai unere uñeque aja to jne. Enga jé ca aníchoja cuchiso ãri ajámatique aja uacaseradéjnai udé gai to jne, jeoga trígo ubucho, jeoga víno u. Jé ca ojne víno aja uté gai jne. Enga jé ca apotame uaquẽrapáitique cucha uñeque ome yu iji uté gai to.

¹⁰ Iji siqueré chojmara, chojmaranie jnese ga Aarón a jecucha changuñéra uaquetique iyoi aja uacaseradéjnai udé uedie jnese jne. Ga úringai puyaque jogadi tu, ga quene papose cucha ai unérone iji gai. Mu eduyo uaquei uté jne aquirájna choqui uje pate gajnaréngone inoningayasṍri u, ujeta Aarón changuñéra uté iyoi aja uacapesudi gaseradéjna uedie jne. Ga jé ca amoque siqueréraque jne jeta anguñéra uaquetique iyoi aja uacaseradéjnai udé uedie gatuaque jne."

Dupade cho quique pláta guebetígo ome Moisés ujetiga ore tẽrája Dupade ome ga ore ecáji dínique

¹¹ Dupade qué jnopo daruode údi ome Moisés enga chojningame:

¹² "Ujetiga ga asecãru barasade israélgose udore ore jne ga a ore chisi yu iji daplátarigui jne jeta déji ore ga pláta guebetígo. Ga a ore ecáji dínique ga goto ore iplátadie udire jne ome yu. Jé basa jeta jé ca ore tẽra dapláta ome yu to jne ga a yujuyaquérique chise uaque ga gose ore angoninguite paritigade ome yuruode quigode uje que ore doi quigode to gu.

¹³ Ujeta gosi di jeta purusãraque uté i ujeta e pisecarãte uté gosi ga gosi chijna pláta guebéode jeta chise 5 grámos jne. Uacarajáyo uje pláta guebeque uñai cuse uje 10 grámos u uje ore chuguhese udire iji Dupade iguíjnai ajei. Mu que yojninga u uaté gotique. Yojninga u uña uje 5 grámos u uaté ujetiga ore chisi ome ore, ga ore churúsãre ore íode to.

¹⁴ Jnacarode, jnanione a ore cho doré ome yu jnese jne, mu gusu ore uje e ore guejnanie siqueré chise 20 nanique. Ujeta cáma ore guejnanie siqueré chise 20 enga a jé ca ore cho doré ome yu to gotique.

¹⁵ Enga a jé ayoré iplatarane ore gueranéringui batigai jé chopise ayoré jmatágode ore gueranéringui jnese jne. Enga a ore chapídiji dínique jne ga goto u udire ome yu jeta ore doi quigode.

¹⁶ Ujeta e amate israélgosode ore gueranenie daplátai udire jnese jne uje a ore chapídome yu ga goto udire iji dínique jne, ga plátadie udire u jne ujetiga ore doi cuchade ome yiguíjnai gajnéone cucha iji ajé uñai uté uje i tu 'Dupade, Yutuãjóa Ñane Iji Te.' Ga jé u ujetiga yipáñaji israélgosode ore guẽrapáidedie daplátai udire ga jé u uje yáyipie dépisi ore uje que ore chimoque yuru quitígome raque enga ore chapidipísiji dínique ga goto u udire uje ore doi quigode."

Dupade cho quique ore esãrapiéraque ome Moisés ujetiga ore pésu uaté iji guebei uje i tu bronce

¹⁷ Ga Dupade qué jno daruode údi ome Moisés gaté ga chojninga:

¹⁸ "Apésu ore esãrapiéraque jne iji guebei uje i tu bronce. Apésu ore uchiejnatígo iji dosadode jne ga jé bronce u to jne. Enga acháji uacaseradéjnai, yiguíjnai ore ujai jne uje yiguíjnai uté i u 'Dupade, Yutuãjóa Ñane Iji Te.' Enga ecãcho yodi aja ore esãrapié uaté ajei jne jeta irágupúsu.

¹⁹ Enga a Aarón, ujnacarode ore chijnime yodi iji uaté ajei jeta ore churu dajmanáyone, darídade ore iji.

²⁰ Ujeta jecucha ore chacája yiguíjna ajé puyai uté ga a jecucha ore churu dajmanáyone, darídade bajaque, ga quene ore chacája ajei. Mu que gusu jeta ore chacája yiguíjnai, mu ore churu to uje ore chose daseradéjnai yui ujetiga ore tẽrája yu ome dachidode cuchiso uñeque ujeta ore chipotame udore ome yu. Enga a jé ca ore toi ¡paque! jne jeta ore pésu udojo jnese.

²¹ A yirógode ore churu dajmainie, darídade ore gatuaque jne ujetiga ca ore toi ¡paque! jne. Ga yuru iyiejájnane udore gajnesórone u Aarón, ape disi ejode ore jnese jne uje a ore basája ñane charidode iji deréjna pitade gatuaque ome yiroquéode."

Dupade cho quique aseque puyai ome Moisés ujetiga paníraja cuchárique gai ga quene úringai puyaque pijógome ore

²² Dupade catecãrápoi Moisés gaté rĩ ga chojninga:

^23-24 "Be barasade ore acadie cucha ai ueradedie jne ga amáta oméringui iji ujade jne. Yojninganie u ore acadie uje ore íode u udojo: mírra, canéla, cáña aromática, cásia ore. Ga ameríji ñane jne ga ore aca mírra chise 6 kílos, jé basa ga ore aca canéla chise 3 kílos, jé basa ga ore aca cáña aromática chise 3 kílos, jé basa ga ore aca cásia chise 6 kílos to. Ajicho udojo imenuringuei batigárique iji yiguíjna ajei jeta jé upúsu yojningai. Enga jé u jne jeta ojne aceite aja jne uje garani u poria adie uje poria uaté i tu olívo. Ga apatigásiji ñane údode jne.

²⁵ Jé bepísi cucha ai unérone ipesungónique jmapié ome bapesudi aseque puyai uté jne jeta unere ai to. Ga ajuse guio jne jeta paníraja gosi gatoi ga nóña ga e yiroque gosi. Jeoga paníraja cuchárique gai jne enga uté úringai puyaque e jogadi u to.

²⁶ Enga anire aseque puyai uté aja yiguíjna ajé puyai uje i tu 'Dupade, Yutuãjóa Ñane Iji Te.' Ga anírapója yuruode jogapi uté gai to jne rĩ.

²⁷ Ga aníraja mésa gai to jne rĩ, jé aja bajodíe, jorane cucha ore gáyode jnese jne uje ore déji mésa gai. Jé aja ore ibiogode jogapi, aníraja gai jnese to, jé aja jogosórone cucha jnese. Anírapója uacaseradéjna uñai gai to jne uje cucha ai unérone gajnei uté uje jecucha ore chãru inciénso iji gai.

²⁸ Aníraja aseque puyai uté aja uacaseradéjnai gai to uje uacapotayome uaquegode cuchiso iji uté gai, ga aníraja uacaseradéjnai erásorone cucha gáyode jnese to. Ga anírapója ore esãrapié gai to, jé aja ore uchiejnane iji esãrapié ejode.

²⁹ Uje e baníraja udore gáyode jnese ga ore úringane puyaque quene pijógome yu jnese. Ujeta gosi chisa udojo uñeque jne enga a gosi úringai puyaque jogadi u to jne, jeoga cucha uñeque u.

³⁰ Ga anire aceite uté aja Aarón, abode ore gai to jne jeta ore úringáringo yiroque pijoguipise ome aceite uté.

³¹ Enga angome barasade israélgose ore jne ga ósi tome ore jne: Pangarádejnai Dupade chósi tome uaque: 'Yajneque aseque puyai iji deréjna pitade jnese, ga paníraja cuchárique gai ga uté úringai puyaque jogadi u jne.

³² Jecute jé ca apúsoja jeta aníchoja ayoré bisidétique ójo uje puyaque gu. Enga jé ca apéso aseque uñeque ujetiga jé cunguésõri aseque puyai uté. Puyaguipise gu, enga isagode cucha puyaguipíso to. Jecute oyo aseque puyai iji aceite uté enga ajusopise uacasocade guio ome uté to.

³³ Ujeta gosi pésu aseque uñeque jne jeta jé chopise aseque puyai udé ga a gosi bai u ome uaque jne jeta ajócãcho iji uacajade. Jeoga gosi chaníraja yiguíjnai jogonóri aseque aja ayoré uñeque gai bisideque, ga ajócãchopo uté gosi jne iji uacaniri to jne rĩ, ga angaráño gosi quitique enga jé ca esópo gosi unétique jne rĩ."

Dupade cho quique inciénso jeta pipesuchóji ore acadie cucha ai ueradedie

³⁴ Pangarádejnai Dupade chojningápome Moisés rĩ: "Apésu inciénso jne enga a pipesuchóji cucha ai unérone uje ore íode u udojo: resína, úña aromática, inciénso púro, gálbano aromático. Aguhese cuchade udore jnese ujetiga ore batigade jé chopise ñane jnese.

³⁵ A áta echoi aja cucha ai unérone udore ga apésu inciénsopíseraque ga unere jorane iji ñane ga a jé chopise cucha ai ipesungoremétique ipesutique jne, jeta amechóji ñane údode. A yo yajnenguíji jne ga puyaguipise inciénso uaté jne.

³⁶ Asa bapesudé inciénso uaté petique ga ajáro ga jé u jeta ai jnome quedéjnane ga acháji yuruode pi iquei. Ga ai chisípise yiguíjna ajé puyai uté ajei eruéode. Ga uneripise ai iji uté uje jecucha yutuãjóa ñane iji. Ga a jé oyo cucha puyáguiji inciénso udire to jne rĩ ga úringai puyaque pijoguipise ome uaque jne.

³⁷ Enga jé ca apéso inciénso uñáraque jne jeta jé chopise bapesudé udaque ome yu. Uje gajnareque jeta gosi pésu ga chaníraja cucha quedéjna uñeque. Gusu uacangarádejnai uyu ujeta apéso ome yu uje puyé gu.

³⁸ Mu jeta gosi pésu inciénso uñáraque ga chopise udaque ga gosi gaidi u jeta urasade ore chojare ai bisideque, mu ajócãcho gosi jne rĩ iji uacajade, enga jé ca esópo gosi unétique jne rĩ."