Éxodo 3 - Dupade Uruode

Dupade chutṍri Moisés nanique ujetiga chijnime urasade iji egíptogosode ore jmainie

¹ Moisés iyoquíjnai Reuel i uñai u Jétro nanique, ga sacerdote Jétro uté, enga catecã́ri Dupade ome darasade ore iji ore uniri Madián nanique. Ga Jétro uté chiroque dãsarai Moisés aja dachidedie áyasai jeta chirote. Ga chise diri uje Moisés jno dayoquíjnai gachidedie áyasai údi aja garáijnai uéchamitó uje cucarãte cuchábi déji uté ga i tu Horeb ome ore nanique. Ga ore chojningame cucarani uté "Dupade jogadi u udé."

² Uje Moisés chise cucarani tuté nanique ga Dupade irótique gaté unirísõre tuangóa iji te ga pioque ocaraidie déji Dupade utocaidi uté dosadode iji porabia dosadábode jnese. Moisés chajire porabia suaté uje désiji pioque ocaraidie ajei mu jé adape tiji cutejmanie udire pioque ocaráchi ajei.

³ Ga Moisés chojningame re: "¿Chimo jóroque re dadi gotique? uje pioque ocaráchi udire mu que chejnási porabia suaté. Qué yijosape yui ga yajmitápisape uaté gajneri."

⁴ Uje Pangarádejnai Dupade chimo uje Moisés chose uaté yui ga Dupade catecã́ri Moisés iji porabia uaté ajei. Chĩ́care Moisés i ga chojninga: –¡Moisés á! ¡Moisés á!– Ga Moisés que chiraja dacatecãraisṍri gosi mu chojninga: –¡Moisés uyu arĩa iji barosadi tudé!–

⁵ Ga Dupade chojninga: –Ca ajose yi. Ejñu bachiédode iji ua uje puyaque yiyaridi unojo gu.–

⁶ Ga Dupade jé chajnera daruode údi ome Moisés ga chojningame: –Uacayode, Abraham, Isaac, Jacob ore angureni casica Dupa jé uyu uje badute yuruode iji de.– Ga jé u uje Moisés chaco dedodie gai uje que pota jeta chajire Dupade gu uje todo.

⁷ Mu Pangarádejnai Dupade jé isoca uje que cha catecã́ri Moisés nanique ga chojningame: –Yipáñaji yurása cásodicáite uje ore cho caru iji egíptogosode jmainie ome cutejmanie dajosipiei. Yudúdapo ore agoyedie to rĩ uje ore irodisṍri casodica que ore chajire dejopóringome ore uje ore chajire ore yúode iji ore isagode cucha pisacho ica. Mu jé udore ore isoca aja deréjnane udojo to.

⁸ Jecute yi jnumi ga yajna ua aja jnumi tiji de gu jeta ajna ore iji egíptogosode jmainie jne. A yangúromei tu ua jne mu a uyu upúsu jne jeta yoite ore iji egíptogosode jmainie, ga yorei ore iji punínique jne uje uerate jnumone iji, ga cutepéode déji uté to ga gosi chuchẽre gai ga udore chayója jnumone ga chopise yote bayade aja jnumone. Ga jnacarai ueradipise iji uté to jeta gosi gachidedie tagu ga irisode chayója jnumone ga jé chopise yote bayade aja daquigode to. Mu puniri tuté unirisórone uñane jé jogate puniri tuté uje ore íode u cananéogosode nanique, jé aja hitítagosode ore to nanique, jé aja amorréogosode ore to nanique rĩ, jé aja ferezéogosode ore to nanique rĩ, jé aja hevéogosode ore to nanique rĩ, jé aja jebuséogosode ore to nanique rĩ.

⁹ Angarami yuru quigode udojo ome ua gajneri ga ca etaque yuru quitígome ua jne. Chamáñaje yimopise yurása cásodicáite Israel ujnié disi ejode uje ore cho caru iji dajnacade jmainie ome egíptogosode cutejmanie josipiei ome udore ore iji dajade.–

¹⁰ Ga Dupade chojningame Moisés iji te: –Apésu bagúcharigo jne enga o búja uje a yiroque ua aja ore eduguéjna cuchábi Faraón jeta angomome Faraón jeta ajnime yurása cásodicáite Israel ujnié disi ejode ore iji ore ujade jne uje que ore chajire jnutígome ore gu iji dajade.–

¹¹ Moisés chajnai Dupade uruode ga chojninga: –Cachi que yujñapegome diri gotique to jeta yi ga yibasája Faraón edominone iji iquei. ¿Ama yorási ringome Israel ujnié disi ejode ore jeta yijnime ore iji Faraón ore ujade?–

¹² Dupade chojninga: –Moisés á, a yijína ua aja quedéjnane jne arĩa. A amo jne uje jé ũrepise yu ome yuru quigode uje a chise dínique jne jeta amáta Israel ujnié disi ejode ore aja cucarani tudé. Ga a acatecãchoi yu iji udé jnese jne rĩ, jeta e ajnime Israel ujnié disi ejo cásodicáite ore iji Faraón urasade ore ujade.–

¹³ Mu Moisés chojninga: –Gajnaréngome yu gu jeta yĩríji Israel ujnié disi ejode ore ga a yojningárasome ore: 'Uacáquiode ore angureni casicaite Dupa iroque yu aja uaque jeta yijna uáguiji egíptogosode ujade.' Ga a ore chojningárasome yu: '¿Ama yocáquiode ore angureni írique nanique a uje chiese utocaite ua ome yóguiji udojo?' ¿Ama yorási ringome ore gajneri a?–

¹⁴ Ga Dupade chojningame Moisés: –Yi gãrapi jé u yu. Ujetiga ore catecã́ri ua ome yu, ojningame ore jne: 'Yutocaisṍri uté i garani jé upúsu re ga i tu Uyu U Yu.'–

¹⁵ Ga Dupade jé jno daruode údi ome Moisés ga chósi tome rĩ: –Angopome ore jne rĩ uje Pangarádejnai Dupa Eyúgojma iroque ua aja ore ga ojningápome ore jne rĩ: 'Uacáquiode Abraham, Isaac, Jacob jé ore angaráni casicaite Dupa jé u uje chirógapo yu aja uaque rĩ.' Yi tuqué uje jé Uyu U Yu qui tu uje togójma yi. Ga que yi eruénique cuse jne jé aja disi ejode, ejode ore aja deréjnane udojo aja erámi eruénique.

¹⁶ Bo jne enga acáji Egípto jne. Amáta barasade Israel ujnié disi ejode ore daníngo iji ore ujade enga acatecã́ri ore enga ojningame ore jne: 'Uacáqui cásodicáite Abraham, Isaac, Jacob ore angureni casicaite Dupa Eyúgojmai chague yibai diríca ga chingome yu uje áyipie dépisiji uáguiji egíptogosode ore ujade uje pañaji ore josipiedie ome uaque gu.'

¹⁷ Angopome ore rĩ uje a uyu u jne jeta yoite ore iji ore gajnenie egíptogosode josipié jmainie iji te ga jogadi u ujeta tijode chopo jnángome ore jne rĩ. Angome ore uje a yorei ore iji purása quedéjnane ore unirone to jne uje ore íode u cananéogosode, hitítagosode, amorréogosode, ferezéogosode, hevéogosode, jé aja jebuséogosode ore to. Puniri tuté u uje cutepéode piéjna ga dotíja jnumone ga cho yote bayade aja dajesúode. Ga jnacarai ueradipise to iji uté jeta gosi gachidéraque aquirájna tagu ga irisode jiépisi ga tamutája guesode ga irisode chopísome yote bayade.–

¹⁸ Dupade chojningame Moisés: –Israel ujnié disi ejode ore daníngo a tangári ua arĩa iji egíptogosode ujade. Ga a ore nóna ua aja egíptogosode asuté Faraón jne. Ujeta agúsoi eduguéjnai iquei ga acatecã́ri jne enga ósi tome barúringome jne: 'Hebréogosode yocangureni Dupa Eyúgojma chajna yógaja jnumi ga qué yicatecãcoi ua ujeta ajuéga doi ome yoque ga yicagobíji garáijnane jeta yijóchago Pangarádejnai, yocangureni Dupa uté ajei údi ome yoque ga a yẽco yocachidéraque aquirájna ome jne iji te. Ga a dirode gadioque jeta yico yoquiqui tuté.'–

¹⁹ Dupade chojningame Moisés: –Yiraja arĩa uje a Faraón uté chãraque doi ome uaque jne. Mu a boyo jne gu uje yucuayaque uágaja uacajesui uté jne. Uje a yejna yu aja guesi ome Faraón uté jne jeta juéga doi tome uaque.

²⁰ Ujetiga cáma boyo ga a yingongara yúringai ujopíerãque cuchape aja egíptogosode udore ore jne. Ga a yisi ome dequejnareque cuchátigo ome ore jne jeta chequésãre ore. Ga a Faraón chimo dequejnaréngone udore jne enga jé u uje juéga doi ome uaque.

²¹ Ga a yujuégapome egíptogosode ore jne rĩ jeta quene ore tẽrája uáguiji dajade, jé aja jeta ore tangári uaque to rĩ. Ujeta boyóji ore uniri Egípto uté jne enga a ca edóyo uacajmanéragaja uacajesúrique jne.

²² A chise diri jne jeta ore chejna dagúchade aja uaque jnese. A hebréogotóraque chutárasi dejomito egíptogotóraque ugúcharigo ga jĩraque chisi ome, jeoga iplátarigui ga chejna daplátadie aja, jeoga óro u, jeoga ore iguidei, mu tẽrame jnese. Ga hebréogoto uaté, abode ore iguidedie a cuse jnese. Ga hebréogotodie ore isocai u jnese.–