Éxodo 29 - Dupade Uruode

¹ Dupade qué jno daruode údi ome Moisés ga chósi tome: "Moisés á, bajnei tu jeta apésu cuchade aja ajesúode iji Aarón, ujnacarode ore ujade jeta yo yiróguiji udore ore jne jeta ore doi yojningane cucha quigode jne. Ga a ósi tome cuchade udojo jne: Be aquirájna choquírique jeta qué ujnacare ga a ajnája yiguíjnai iquei jne. Jé aja áyasa choquírigo to jeta qué ujnacáño udore to. Enga ajiripise udore údode jne jeta jé ca isójna uñeque.

² Enga apésopo arurétigo jne rĩ jeta jé ca bisitique déji, jé aja tórtarigo ga anguñecho aceite aja udore gai jne. Apésosu hojuéladie to jne mu jé ca anícho bisitígaja to jne ga ameso aceite gai jne.

³ Ga anícho uacapesudode udore aja uacoradie ijnacojoi ajei jne. Ga boyo udore údi aja yiguíjna puyai piagoi iquei jne. Ga adi jé u ome aquirájnai uté jeta ajnáñoja yiguíjna piagoi iquei to, jé aja áyasa choquíso.

⁴ Ga adi jé u ome Aarón, ujnacarode ore, bo ore údi aja yiguíjna piagoi iquei to jne uje yiguíjna puyai uté ajé uñai i tu 'Dupade, Yutuãjóa Ñane Iji Te.' Enga a aru ore gáyode jne iji yiguíjna ajei puyai uté iquei bajaque uje cáma adia ore oidode aja ore.

⁵ Enga jé u uje babé Aarón iguidedie uje úringai yiroque pijogútodie u udire. Ga adia oite umari aja, jé aja oite catadé, jé aja oite gaminórami uje arobé jogotodie cucaranépitai catája uté. Enga jé edu jeta adia igarubi aja oite catadábi ga adotája pajei.

⁶ Ga jé u jeta adia gatoje aja jne ga a anírapo ore urusarane aja enochai jne rĩ uje chojninga: 'Dupade cãrai tu yu ome daroquéode.'

⁷ Ga ojne aceite Aarón uté gatoi gai jne ga úringai yingaraque yiroque pijogúsõri u uté jne.

⁸ Ga amate Aarón iguidedie aja jne enga adiapo ujnacarode ore iguidedie aja ore to rĩ.

⁹ Mu jé ca edu Aarón uje badia igarubi, gatoje aja, mu adia ore igarubode aja ore pajéode to jne. Ga adia ore gatójedie aja ore to jne. Ga a udore ore pijógome yiguíjnai uté adode jne jeta ore urásarigo tangári ore. Ujeta e amate udore aja ore enga que toc jeta qué pecãracápo ore úringane yirócho jne iji deréjnane gatuaque.

¹⁰ Ga jé u jeta boyo aquirájna choqui uté údi aja yiguíjnai ajé puyai uje i tu 'Dupade, Yutuãjóa Ñane Iji Te,' ga Aarón, ujnacarode ore chujé dajmainie aja uté gatoi gai bajaque.

¹¹ Ga jogadi u jne jeta ajéyo jé iji yiguíjna puyai piagoi iquei uje yutuãjóa ñane iji te.

¹² Enga aca bajmané iji aquirájna uté iyoi jne ga aguñéraja uacaserani uté uedie jnese jne ome aquirájna iyoi. Ujeta ajéyo aquirájna uté jne, ga achayo bajóraque aja iyoi údi jne ga ójneja uacaserani dugudie údode jnese jne jeta jé jogate uté. Ga ejna iyoi aja uté jne jeta ojne aja.

¹³ Ajnicho uaquei aquirájna uté ipocáyadie ga ajnicho íode iji ipocáyadie gai jne, jé aja abito carubode, jé aja iyobié ajáminie íode to. Enga apótayome iji uacaseradéjnai gai.

¹⁴ Ga amátayo uchade iji jnumi ga átayoja uaquei uté igosi jnese jne ga a arugúsoja guesi iji uaquedai jne ga a apótayome jne iji guesi. Chamáñaje uacasijnaringuéone jé péroji udore ome yu gu.

¹⁵ Enga beyoi áyasa chocábode uñátique to jne enga ajnáñoja yiguíjnai piagoi iquei jeta Aarón, ujnacarode ore chicha dajmainie aja uté gatoi gai to.

¹⁶ Ga a ajéyo uté jne enga a achayo bajóragaja iyoi údi jne enga a ójneño uacaserani gai jne jé aja dugudie eruéode jnese.

¹⁷ Ga jé u jne jeta ajucho uaté aja jnumi jne. Ga aruyo ipocáyadie gai jne, jé aja úsugurúode iji yotique. Ga anire ipocáyadie, úsugurúode, arione ore aja uacaseradéjnai uté gai to jne, jé aja gatoi.

¹⁸ Ga jé u uje uacasíñome yu, ga a abocho uaté ome yu enga uacangarádejnai uyu a yojare cutejma irara jne enga a yachietáji uaté jne.

¹⁹ Ga beyopoi áyasa chocábiso uñai te rĩ ga Aarón, ujnacarode ore chujé dajmainie aja uté gatoi gai jne.

²⁰ Ujeta e ajéyo áyasa choqui uté jne ga ajuso iyoi guio. Ga aca bajmané iji uaquei áyasa uté iyoi jne ga a anguñéraja Aarón ujnacarode ore angoroné eruébi jne iji ore ãrachua. Enga a anguñéraja ore jmanédatédie to iji ore ãrachua, ga a anguñerápo aja ore guídedatédie to jne rĩ iji ore guídai jne uje déji ore ãrachua. Ga be iyoi ié ga amesẽre uacaseradéjnai gai ome, ga ójneja dugudie údode jne.

²¹ Uje uacanícho aceite aja áyasa iyoi iji uacaseradéjnai, ga asa ga amesẽre Aarón, ujnacarode ore gáyode ome uté jne, jé aja ore oidode to. Enga quene jogadi u uje uacamácho ore úringane yiroguipíso uje yingara udore ore jogadi ome ore urasade ujeta yipijogúsorone u udore. Ga jé chuságaja ore iguidedie uje pijógome yu to.

²² Ajnicho íode iji áyasa choqui ejoi uté cari jne. Enga ajnicho íode iji ipocáyadie gai to jne, jé aja abito carubode, jé aja iyobié ajáminie jeta ajnicho íode iji gai to. Ga anícho udore aja bajóraque jne, enga a átayo uepéode uñai to uje déji uté ãrachua. Ga a jecucha uacasocai udé jne jeta apéso yirógode ore pijogúsorone cucha ome yu jne.

^23-24 Uje uacanícho arurégode aja ijnacojodie ajei, ga asíñome uñéngo ome Aarón, ujnacarode ore, ga ore jno údi gaté aja Dupade edominone jeta ore chingo Dupade ga ore chachia iji dajmainie iji Dupade iquei. Enga asi ome arureque gadioc, gadioc, gadiótigo ome Aarón ore jeta arureque aparúgaitaque uñai, jé basa a arureque uñai upo jne rĩ, uje pimeracho udore iji aceite ujade, jé basa a hojuéla u uña jne.

²⁵ Enga Aarón, ujnacarode ore chatire jne ujeta ore chisi ome ua, ga baníraja uacaseradéjnai gai to ga uacátayo uaqueque bajai áyasa uje Dupade chachietai uaquei uté irara. Ga uacasocai udé a i cuse jne ga a i u "Pẽrapaite papósode ome Pangarádejnai Dupade."

²⁶ Uje e uacapéso Aarón úringai yiroque enga asa uaquei áyasa arobé jne ga ango Dupade jne. Ga achia iji uté iquei jne. Ujeta e ejna udore guesi jne ga a acha arobé uaté aja ti jne jeta agu jne.

²⁷ Uaqueque bajai uqué arobé ga a Aarón, ujnacarode ore gajnei jne arobé jé aja uepei, ga a ore tagu jne. Uacajéyo bajai uqué gu uje uacamácho Aarón, udore úringane yiroque.

²⁸ Enga a jecucha uacasoca uté jne uje uacasíñome uaquegode áyasa choquío ome Dupade jne, uje uacagaidi u jeta jé ca Dupade derógome uaque, jeoga acãcho Dupade gai ome uaquei uté áyasa, ga jecucha yirógode ore gajneque uaquegode udore arobé, uepei ore gatuaque jne. Ga a jecucha ga israélgosode uacajnei yáyipie puyedie udiji quigode gatuaque jeta apésoja quigode.

²⁹ Ujeta Aarón e toi jne marínga, a chisi ome daguidedie udire ome dape disi ejórigo jne ga a ore chigui jne enga ore pijogútodie u udire iji darásarigo ujade uje yiroque ipijogúsorone u udore iji darasade ujade ujeta ore urasade tangári ore to.

³⁰ Ujetiga Aarón ape disi ejórique basája Aarón charidi jne ga a jé basa chiguíape Aarón iguidode oicho jne ga a chejna dire garitírigo iji uté gosi gai jne, enga jogadi quene u jne jeta gosi pijógome yadode ga a quene gosi chacája yiguíjnai ajé puyai uje i tu 'Dupade, Yutuãjóa Ñane Iji Te.'

³¹ Enga beyoi uaqueque ejoi uqué áyasa ga aréñoi iji Dupade iguíjna puyai uté ejoi jne.

³² Enga Aarón ujnacarode a ore tagu uté arione iji yiguíjnai ajé puyai piagoi iquei jne uje i tu 'Dupade, Yutuãjóa Ñane Iji Te.' Ga a ore tagu udore jne, enga ore chátaja arurégode uje déji ijnacojodie ajei.

³³ Ore tagu udojo gu uje e pĩroque ore isijnaringuéone ga gose ore yui uté áyasa. Enga quene dimane ore ome ore posode udore gu uje e Dupade cãra ore jogadi jeta cho daróguiji udore jne ome daroquéode. Mu jé ca uñeque chacásãra ore iji udore gai jne uje puyaque udore ore gu ga jé puyácho ore posode udore to.

³⁴ Iji udojo quigade jeta Aarón ore cha chagu jne ga amátayo ore iquebétigo jne ga a óraño jne iji dirode uñeque jne ga a apótayome jne iji siñeque. Chamáñaje gajnareque gu uje puyágome ayoré uñeque jeta tagu ore iquebéode udore uje puyácho ga que ayoré uñeque tagu gotique.

³⁵ Moisés á, ujeta chise dínique jne jeta angara Aarón ujnacarode ore jogatígo ome yadode ga jé ca ayó yojningárique cucha gánique jne, jeta be quigode gatuaque. Enga a jecucha udojo guejnane dire gare iji ti jne jeta amate yojningane udojo aja quitígo jnese.

³⁶ Jecucha iji dire garitíode jne enga ajéyo aquirájna choquíode jne uje qué ujnacáño ga a uacarajáyo uje quene pĩroque uacasijnaringuéone ome udore iyoi. Ujeta abocho udore iji uacaseradéjnai gai jne enga udore imoi u uje uacaserani uté icha iji jnumi ome cucha gajnaréngone, ga a dimane jne ome uacasoca ejórigo yui. Enga anícho aceite aja uacaseradéjnai gai ga úringai puyaque jé u.

³⁷ Enga a qué yingoba ua gaté jne rĩ: Jeta e chise dire garitíode udojo enga ajéyo aquirájna choquíode iji udojo jogapíode dire jnese jne, ga a arajáyo jne uje udore a toi gu uacasijnaringuéone jne jeta picadícho ome udore úringáringo chucho. Ga a abocho uaquegode iji uacaseradéjnai jne ga jogadi u jne jeta uacaseradéjnai quene pijoque úringai puyaque. Ujeta cuchárique chaguñéra riji uacaseradéjnai uté ga úringai puyaque jogadi u to ome Dupade.

³⁸ Jé ca amócho dínique jne jeta ajéyo áyasa choqui gáningo jeta udore guejnanie siqueré qué chojmára. Ga abochóji uacaseradéjnai gai jne iji dirode jnese.

³⁹ Chojmarai a abocho jne iji durasé jé basa uacabocho jõrai iji guedéjnoringái. Ga a jecucha isoca jne iji dirode jnese.

⁴⁰ Uaqueque bajai áyasa uqué jetiga e déji uacaserani gai jne ga anícho uacapocayatique dotíyai aja jne uje pipatigayáguiji harína. Enga uacapesudi uté dotíyai a chise 2 kílos jne, ga ójneño aceite gai jne uje gãrapié tu poria adie uje i tu olíva, ga apatigásoji ñane údode jne. Ga ajéyo uacapesudi uté aja uaquei áyasa bajai tuté gai. Enga a ójneño víno udore gai jne jeta chise lítro chojmarárique.

⁴¹ Uaqueque ejoi áyasa choqui uqué uje uacajéyo ome Dupade iji guedéjnoringái, ga a jé uacasocai upome jne rĩ, uje dotíyai, víno uacátayoja udore jnese. Ga a uacapesudode udojo i tu: 'Puguheyaque pẽrapáidode ome Dupade uje Dupade chojáripíse cutejma irara ga chachietai udore'.

⁴² Uacasocai udojo ome uaquẽrapáidode áyasa choquío a jé ca abéroyo uágome jne, ga a jé asáchoja uaqueruéningo, jeta uacape disi ejórigo ore doi uacasocade udojo gatuaque jne, jé aja ore ape disi ejórigo to rĩ. Enga jé ca ore chibore udore iji sañeque, mu ore chibore iji yiguíjna cuchábi iquei uje ajé bajai i tu 'Dupade, Yutuãjóa Ñane Iji Te.' Chamáñaje jecucha yico ñane iji te gu jeta yicatecã́ri ua.

⁴³ Mu a jé ca gusu ua ome, Moisés á, mu a jé israélgosode ore angarátigo u to jne iji baquigade jeta yutuangóa ore to iji udé jne. Yijogadi uté a puyaguipise jne uje yugusipísiji uté gu.

⁴⁴ A yinoningase uacaseradéjnai, jé aja yiguíjna puyai, enga jé yuságaja yiroi Aarón, ujnacarode ore jne. Ga a puyaque udore ore to jne uje puyácho yojningane cucha jnese gu iji yiguíjnai ajei jnese.

^45-46 Enga a yipésu yiguíjnarique iji israélgosode uaque uacajã́ro jne, enga a yopise yurása iji uaque jne. Ga a Uacangureni Dupade jé upúsu yu jne ga a jecucha yáta cuchade aja uaque jne jeta ca cuchárique chonapo uaque jne rĩ.