Éxodo 28 - Dupade Uruode

Dupade cho quique Moisés ome Aarón, ujnacarode ore iguidedie jeta ueradei ga ore pijógome dáringane Dupade iroguipíso

¹ Dupade chojningame Moisés gaté: "Moisés á, aquĩ́ra bayai Aarón iji bejoi jne jeta yo yiroguipísiji uté to jne. Jé aja ujnacarode ore to uje ore íode u udojo: Nadab, Abiú, Eleazar, Itamar ore. A yo yirógode iji ore to jne rĩ jeta ore cháta cuchade aja dayé iji yiguíjna puyai uté jne. Ga udore ore u jne iji uacarasade israélgose ore ujade jeta ore doi yiroquéode jne.

² Ga apéso bayai Aarón iguidedie ga a ueradei jne ga a nanganata to jne ga a pijógome darasade ore jne ga a goto daguidedie udire jne.

³ Acué oitátigo iji barasade ore ujade jne jeta ore chiro Aarón iguidedie udire. A jé orasórone u ore jne uje e yisi ome ore irajatígajnai ome ore ujeta ore chiro ore iguidedie. Ujetiga ese yojningane udore jne enga atṍri ore ome Aarón uté iguidedie jne ga a ore chimate jne enga jé u jne ujetiga yingara Aarón ome yiroquéode jne.

⁴ Irajatade udore a ore ipesudedie u udaji jne: Aarón iguidé gamito u uña uje ore chojningame uaté pectoral, jé aja oite catadábi to uje i tu efod, jé aja oite uniminóri to uje i tu cápa, jé aja oite umari uje i tu túnica, jé aja gatoje to uje i tu turbante, jé aja igarubé to. Bagaidi tu jne ujetiga bayai Aarón, ujnacarode ore, ore iguidedie ueradei. Chamáñaje yiroguipísode u ore gu ujetiga ore pésu cuchade aja quigode iji yiguíjna puyai ajei.

⁵ A orasórone udore ore pésu Aarón ore iguidedie jne iji borapéode uje ore ora iji ore acai uje i tu líno, ga borapéode udore uruchachade cãra rome ñane jne ga utata uneroque uñai, jé carataque uneroque uñai, jé carataguipise uñai. Ga a ore pésu ducarigode ome óro to ujetiga ore pésu irárarigui iji Aarón iguidedie uñanie to.

⁶ A efod uté ueradipise jne ga a ore pésu uté iji borapeque utata uneroi jne, jé aja carataque uneroi, jé aja carataguipísi jne, ga a ore pésu iráradie iji gai jnese ome ore ipesudode ducaricho uje óro ueque ducarigode udore.

⁷ A ore chuga borapetígo aja efod uté guidoboi, iquei ore ujetiga ore chigaru péode udore aja ñane iji Aarón orotadábode.

⁸ A ore chapuse borapéode aja jnese ome efod uté igarubé to, ga a ore pésu iráradie iji igarubé gai jnese ome óro ga nanganata iji Aarón pajei.

⁹ Beyoi cucarané nanganatague petígo jne uje udire i tu cornalína, ga gare jne jeta acayo ga arúsãcho Israel casicaite ujnacari cásodicáite ore íode iji udire jne.

¹⁰ Ga a oyo bajágu ape bajai i jne jeta arúsãcho iji cucarané gáredie udire. Ga a arúsãcho chojmára iji tírigo ore íode iji cucarané chojmara jne. Jé basa ga ujode chojmára iji ti íode déji ujo cucarané. Ga a jé oyo ejo ore ungarone íode jne.

¹¹ Ga acueyoi jnanírique jne jeta chirajapise jeta pésu séllo uje ore pijogútodie u udire. Ga a uté gosi u jne jeta churúsãre Israel ujnacarode udore ore íode iji cucaranenie udire jne. Enga uté gosi a chanire óro peque nanganatátigo aja udire dosadode jne.

¹² Ga a adíyo cucaranenie udire aja uacapesudé efod uté carubode jne uje déji Aarón orotaidie. Uacagaidi u jeta Aarón jnusina darasade uaque gatuaque uje chicáji yiquei. A yimo Israel ujnacari cásodicáite íode iji Aarón orotaidie enga jé basa ga jé ca yiramurase ore ape disi ejode uaque iji yajénique to.

^13-14 A anícho cadénanie aja cucaranenie udire dosadode jne uje pipesudei udire iji óro peque nanganatátigo ga gare péode ome cadéna chojmaráraque jne uje uacamechoi ore iji ñane.

¹⁵ Apéso Aarón arobé gamitóraque to jne uje i tu pectoral ga a apéso iji líno to, ga a jé chopise iguidé uña uje i tu efod ga a uruchachade cãra rome ñane jne ga utata uneroi, jé aja carataque uneroi, jé aja carataguipísi. Ga a ore pésu iráradie iji gai jnese ome ore ipesudode ducaricho uje óro ueque ducarigode udore. A Aarón tujúna darobé gamito uaté jne ujeta chucué yáyipiedie ome darasade ore.

¹⁶ Ga uacorai uté a chise 22 centímetros jne iji umaningai ga a amochẽ́choji gatócoro jne ga quigode gare iji. Ga uacamochẽrapídi chicáji jnumi jne. Jé basa guesája dosadode jne.

¹⁷ Enga a agayo cucaranéringui aja uté jogonóri borapeque jne uje déji arobé, ga a achayo Israel ujnacari casodica ore íode aja udire ore iji Aarón arobé uje gare ore iji yirídai ica. A uacoradie cucaranépitai jochatígo gagájni jne iji, aja jnumi yui. Jé basa ga cucaranenie gadióguiji jochai jne uje chicáji Aarón orotaidie quigode yúode. Ga a uruchachade jé cãra rome ñane jne jeta amácho úringanie porai. Aarón etabícoro unimitodie jochaque bajai jogotodie íode u udojo: rubi, crisólito, esmerálda ore.

¹⁸ Bajedie quigamitodie cucaranei íode u: granate, zafíro, jade ore.

¹⁹ Bajedie quigamito gatedie cucaranépitai ore íode u udojo: jacínto, ágata, amatísta ore.

²⁰ Jé basa ejopísedie ga ore íode u: topácio, cornalína, jaspe ore. Ga apéso cucaranépitadie ejode jne enga amesome órodie jne ga a óro ueque ore dosadode jnese jne.

²¹ Enga a udire gare iji yirídai jnese jne, uje jé Israel uqué casicaite abode u nanique uje gare ore iji yirídai. Iji cucaranenie udire ga a séllo ipesungónique chica jne enga a chicha Israel ujnacare disi ejode ore unuchúode aja darusãratígo jne iji Aarón arobé jogotodie cucarané ga a quigode u udojo jne: Rubéngosode Simeóngosode Levígosode Judágosode Zabulóngosode Ísacargosode Dángosode Gádgosode Asérgosode Neftalígosode Joségosode Benjamíngosode.

²² Apéso cadénanie uñáringui iji óro ome Aarón arobé gamito uaté ga óro péode gare ome cadéna chojmara jne uje amecho ore iji ñane.

²³ Enga apéso angoroné gárerigui iji óro to jne ga agayo udire aja Aarón arobé gamito uaté eruéode.

^24-25 Enga adíyo uacapesudedie cadénai aja angoroinie udire jne uje ore déji Aarón arobé gamito eruéode iji Aarón orotaidie údi ga adíyopo cadénanie eruéode uñane aja orotaidie jogotodie cucaranei rĩ. Uacagaidi u gu ujetiga pectoral uté a jé catája oite catadábi suté jne uje i tu efod.

^26-28 Agayo angoronéringui aja uacapesudi uté uarané jnutimitodie jnese jne ga óro upúsu jne. Ga anícho uacoratique pámo aja uté uje a utata uneroque uacorai uté jne, ga a catája oite catadábi jogotodie angoronei jne iji uode jnese jne iji arobé. Ga oite catadábi jogotodie angoronei óro upúsu to. Ga arobé jogotodie cucaranépita a déji igarubi gai jne iji arobé, ga a oite catadábi erã́sori igarupe a déji uté údi jne jeta chigaru dapajei ome.

²⁹ Ujeta e amácho Aarón iguidedie udire jne, enga a chacája yiguíjna ajé puyai jne enga a chigui uacorai efod jne enga tujúna dajúni pectoral uté ujeta catecã́ri yu ome yáyipiedie quitígo. Ga uté gaidi u jeta tujúna udire aja Dupade uyu yiquei uje Israel ujnacarode íode déji ujúni uté, ga jĩraque yáyipie déji Israel ujnacarode ape disi ejode ore gatuaque to.

³⁰ Acháji yáyipiedie pijogútodie cucaranei uje ore íode u Urim, Tumim ore iji pectoral uté ajei uje uacamochẽ́cho uacorai uté iji gatócoro que. Ga a Aarón doi yiquei gatuaque jne enga jĩraque tujúna udire iji yedominone iji Pangarádejnai Dupa Eyúgojma yiquei jne. Ga jogadi a u jne jeta quene cho quigome yu ga a yatatapísa udire quigode ome Aarón uté jne jeta chirajaque quitígo.

³¹ Apésopo Aarón oite catadérique jne rĩ jeta chajníji otadábode ga a uacapesudi iji ore acai líno to jne ga a utata uneroque jne jnese. Ga uté i u cápa.

³² Enga gatoi piéraque a catája oidi uté carubode jne, ga a guesája arobé gai jé aja jnumi. Ga a apocásu bajugupídi uté pijnanane jne jeta jé ca dejñu. Ga a jé chopise uacaguidedie isocai jne uje uacapesudi iji cucha aode ga i tu chaléco.

³³ Apéso uacagai Aarón oite eruei ga uerate jne. Agayo pore áragaja eruéode jne uje i tu granáda. Ga anguíraño jnatudíe jne uje utata unerongue uña, caraté unerongue uña, jé caratépise uña, ga apéso pore a ome udire jne. Apésopo tãrarátigui jne iji óro jeta adíyoja to.

³⁴ Enga pore a jé ca chimoque tãraraminie ujade jne iji uacorai uté eruéode jnese.

³⁵ Ujeta Aarón chacája yiguíjna puyai ajei jne ga a jecucha chigui doidi jne uje i tu cápa uje pésu cuchade iji yiquei. Ujeta chacája uté ajei jne enga a yudute oidi jogotodie tãrara jocarane jne ga a jé ca chuque uté jne.

³⁶ Apéso óro petique jne ga a séllo irajasórone uñeque chica uté jne, enga a churúsãre darusãratígo iji jne ga a urusarane quigode u udojo jne iji Aarón ayoi eruei uje déji enochai 'Dupade cãrai tu yu ome daroquéode', ga urusarane udore quigode u uje yingara Aarón jogadi gu ujetiga yutṍri uté ome yajegaidipísode quigode iji yiguíjnai ajei.

³⁷ Enga adíyo ore urusarane udore aja Aarón gatoje jne ome cíntarigui jne jeta utata uneroi cíntadie udire iji Aarón enochai ga a ore urusarane udore iji óro pei uté etóguiji dajogadi jne iji uté ucuruté.

³⁸ A jecucha Aarón chanire datoje aja denochai uje urusarane déji ucuruté, ga a yimo ore urusarane udore jne iji Aarón ucuruté ga jecucha yisa ore gueranone cucha jne uje Aarón e chisa bajaque gu. Ga cho jeta Aarón urasade noñome dayoguéode iji uté jmainie, ga nóña ga pĩrocho iji uté jmainie uje tẽra ore guẽrapáidode gaté ome Dupade uyu.

³⁹ Apéso oite umánique to jeta chise guídogorodíe ga a jmaneca umare jne jeta chajníji jmanegataidie. Ga apéso irárariguiji gai jnese jne ga chise eruéode jnese jne. Ga a apéso oidi uté iji borapeque póroroi jne rĩ uje i tu líno. Ga a gatoje líno u to jne ga póroropo to rĩ. Ga a ore pésupúsu uté igarubi jeta uerate ga a ĩrararãque jne.

⁴⁰ Enga apésopo Aarón ujnacarode ore oitígo to rĩ, jé aja ore gatójedie, jé aja ore igarutígo to jne rĩ jeta ore cho daparagádu udore ga ore chijninguese yiguíjna cuchábi uté ajei to ome doite ueradode udore to.

⁴¹ Ujeta e amate bayai Aarón, ujnacarode ore iguidedie udire jne ga be aceite jne enga aníraja udore ore ójodie to uje aceite gãrapi u poria adie uje poria uaté i tu olívo. Ga imoi tu uje udore e pirosobácho ore ome darasade to, enga ore úringane yiroguipíso quene pijoque uje yingara ore jogadi ome yiroquéode.

⁴² Apéso ore calzoncíllorigui to jne rĩ jeta chajníji ore etarute ajéode jne ga a chaco ore etarúdode gáyode jne. Ga apéso iji borapei jne uje garani u ore acai uje i tu líno.

⁴³ Enga a jecucha Aarón, ujnacarode ore chijna dacalzoncíllodie jne jeta ore chacája yiguíjna cuchábi ajei, jeoga ore déji ore aseradéjnai dosadi. Jeta ore pésu cuchade jnese iji yiguíjna puyai uté jne, ga jé ca chimoque jne jeta ore chijna ga jé ca ore chejñu iji re jeta e ore déji dasagode yiroquéode gáyode. Ore gaidi u gu jeta ca ore cho parágome Dupade uyu yojningane cucha uñeque, enga a jé ca gosi toi jne iji dasagode udore gai ¡paque! Enga yujúdode udojo que cucha noñaque gotique quigode, uje que toque jeta jé ca pipesute udojo quigode. Mu que yedu Aarón, ujnacarode ore ome gotique mu jé yojningane u Aarón ape disi ejórigo ore jnese to jne jeta ore basája ore charidode udore to jne."