Éxodo 26 - Dupade Uruode

Dupade e cho quique daguíjnai ajé puyátique ujetiga pipesute iji borapetígo

^1-2 Apéso yiguíjnai ajé puyátique jne. Ga a ajnáño borapetígo ome yiguíjnai ajé puyai tuté jne ga borapetígo chejna yijmanáyone ome. Enga a jé ore eruénique chojmára jne. Ga 12 métros y médio u umaningai, jé basa a 2 métros u pajei jnese jne. Enga a acacho ducaritique jne iji ore acai uje i tu líno jne, jé u ujeta aróyo uacora iji uacacarigode udore jne. Enga a acáyo uacora uaté jne ome cucha caratatígo uje carataguipise uñai, jé carataque uneroque uñai jne, jé basa utata uneroque uñai. Enga a agayo gaté unirísõre gáningo oréragaja uacora uaté gatócorodie jne uje uacaquesucádode chejna yijmanáyone ga uacapesudode gaté unirísõre ore ga ga gare iji udore jnese. Enga ujnóngone déji to. Enga apesopúsu jeta ueradipíso.

³ Ga ome borapéode uje chejna yijmanai ga aga udore eruéode aja ñane jnese jne. Ga jé adi u ome ujode chejna yijmanai, jeta aga ore eruéode aja ñane to.

^4-6 Enga apéso borapéode angoroinie jeta chise 50 iji gatajite chojmarai jnese. Enga apéso uacapesudedie angoroinie udire iji borapei petique ujeta utata uneroi peque. Ga agayo uacapesudedie angoroinie udire aja borapei eruei jnese. Ga adi jé u ome borapeque uñai jeta ore tiroque uje uacamácho angoroinie jnese aja ñane tiógareode gu. Ga apéso ojnaque ditajatígo iji óro petígo to jne rĩ enga a 50 upo ojnaque ditajatígo udore jne rĩ. Ga a angoroné gáredie chisa ojnaque ditajaque chojmarai jne jé aja erué uñai iji uéchai. Uacagaidi u ujeta borapéode udore chojmarápise ujeta acóyo yiguíjna puyai gai jne ome uacorai uté.

^7-8 Enga apésopo yiguíjnai yuminore uñai to rĩ ujeta acóyo bajai gai ome uté ga a apéso ejoi uté ome erámoro quedéjnanie ojode. Acacho ducaritique iji erámoro quedéjnanie ojode, enga aróyo uacorade iji uacacarigode udore jne. Enga chojmára iji yirídai jne uacorade udore rĩ, ga a jé ore abubíeraque chopise ñane jnese ga uacora chojmarai umaningai a chise 13 métros y médio, jé basa ga a 2 métros u pajei jne.

^9-11 Agayo jõráringo aja ñane jeta chejna yijmanai, jé basa ga agayo chojmára iji tírigo aja ñane iji uécha uñai. Apéso uacorade udore iji erámoro quedéjna ojode ga angoronéringui a chise 50 iji erué chojmarai, ga adi jé u ome jõrai erué uñai te rĩ jeta jé ore chopise ñane. Ga apéso ojnaque ditajatígo jne iji guebeque nanganatátigo uje i tu bronce jeta 50 upo gaté rĩ, ga a chacája uacapesudedie udire angoronei ajéode jne ga adíyo uacagáiso aja ñane jne enga uacagacho ga jĩraque querújna iji gaté. Ome uacagagode chojmarai uje chojmára ore iji ti iji uécha uñai ga ca apéso angoroinie iji to uje a abéroyo aja jorane údi jne gu iji iquei.

¹² Iji uacagai ejode udore ga petique qué dóji ga cho cochógaja jnumi iji yiguíjna puyai quigade jne.

¹³ Enga adi jé u to iji yiguíjna puyai uté gaminórone jeta cho cochógaja jnumone to iji umaningai quigode to. Ga 45 centímetros a u udore abubíedie udire jnese iji uéchade jnese ujeta cho cochógaja jnumone iji uté ejode.

¹⁴ Apésopo yiguíjna puyai yuminórone uñane gaté rĩ ujeta pipesucho iji cuchisode aode. Apéso uñai iji uaquegode áyasa choqui aode uje uacacáyo udore aode iji cucha carataguipise, jé basa ga a gaminoripísi a pipesucho iji cucha ao diríjabode jeta aníchoja udore gai jnese. Ga gagájni yuredie iji yiguíjna puyai uté gai jne.

¹⁵ Enga apéso táblarigo iji poria uje i tu acácia ga cáputapise uacajugutígo jne.

¹⁶ Enga atingacho métro aja uacajugugode udore jne ga 4 métros y médio u jne iji umaningai jne, jé basa ga 65 centímetros tiji pajei jne.

¹⁷ Apéso táblade udore dugúrigui jnese jne jeta gare iji tábla chojmarai jne. Enga a jé uacasocáringome udore jnese jne jeta yiguíjna puyai gajnei udire jnese jne. Enga a agayo udore aja ñane bisideque jnese jne jeta ore tiróguiji jnumi.

¹⁸ A uacajugugode tábla peque chejna ayoré chojmarárique jne jeta ajéyoja ñane iji umusoi garani yui.

¹⁹ Enga a apéso cutáderigui jne jeta chise 40 ga a pláta guebeque uécho udore jne ga a ajóchayo uacapesudedie udire gatajidode jne ga uacaráño táblade aja udore gatajidode ¡curu! Iji táblade udore eruéode ga apéso dugu gárerigui, ga cutadé gárerigui dóji tábla chojmarai údi jne. Uacagaidi a u gu ujetiga asingacho táblade udore enga ore cháguena gatéode gu cutádedie udire uje uacaráño táblade dugudie aja udire gatajidode.

²⁰ Jé isocai u ome uécha uñai iji casaque garani yui ga apéso táblade uñéngo to jeta chejna ayoré chojmarai iji casaque garani yui.

²¹ Ga adi jé u jeta apéso cutáderigui iji táblade udore údi ga apéso udire ajéode jnese to. Enga uacapesudedie a jé gare ome táblade jnese ga udore chise 40 jnese uje cutádedie udire pipesudei iji pláta to.

²² Iji yiguíjna puyai dosate uñai iji guedé cacadi yui enga táblarigo a chojmára iji ti iji guedé cacadi yui jeta chise ñane iji uté uécha uñai.

²³ Enga aramísaraño tábla uñéngo aja ajidedie jnese jne iji yiguíjna puyai quigade.

²⁴ Ga tábla piramísarajane udore pésu ga uacorai que cho cocho, cochóguiji gaté uje chisapise uacapesudedie angoroinie udire gu iji gatajidode uje uacadíyoja ñane ome.

²⁵ Jecute a gadióguiji ti uacapesudode tábla ome yiguíjna puyai quigade, ga jé basa uacapesudedie cutádei a 16 u jne ujetiga aráño táblade dugudie aja udire jne. Uje dugudie gare iji tábla chojmarai jne jecute gare uacapesudérigui cutádei to ome tábla chojmarai jne.

²⁶ Ga apéso tábla peque jne jeta chejna yijmanai ome uacorai dosate chojmarai jne ga chacája uacapesudedie angoroinie jnese jne aja eruei. Ga a tábla uté gãrapié jé u poria to jne uje i tu acácia.

²⁷ Ga adi jé upome ujoi uécha uña jeta jé apésopo ujórigo tábla jne rĩ jeta chejna yijmanai ga a aramísaraño ujoi uécha uña jne. Enga a 5 upome gatẽrasui jeta apéso gajnetígo to iji guedé cacadi yui.

²⁸ Ga a yoríco uñeque jne ga a anícho tábla peque uñai uté aja táblade udore gatócoropise jne jeta chacája uacapesudedie angoronei ga quítequiguíji udore uéchade jnese.

²⁹ Ga a ameso uacapesudode udore tábla gáyode jnese jne ome óro ga a aráño uacapesudode tábla peque aja udire gãrai jne. Ga uacapesudode tábla peque udore ga ameso gai ome óro to jne. Jé basa angoroinie ga apéso udire iji óro ga uacapesudode tábla peque udore ore chacája udire ga quítequiguíji táblade udore uéchade jnese.

³⁰ Ujeta e amácho uacapesudi uté yiguíjna puyaque jne, enga a jé chopise uqué casica uje e yingo ua iji cucarani ójo uje cucarani uté i tu Sinaí.

³¹ Ga apéso borapetique jne ujetiga achayo yiguíjna puyai ajé gárerigo ujai, ga jé u ujetiga ore eruéode pijoque ome uté. Enga borapeque cuchábi uté a pipesute iji ore acai uje i tu líno ga ore uruchachade cãra rome ñane jne ga utata uneroque uñai, jé basa ga carataque uneroque uñai, jé carataguipise uñai. Ga agayo udore aja ñane jne ga a oyo joride iji uté aja ajé uñai. Enga agayo gaté unirísõre gáningo ore orérigui aja uté jne ga a ueradipíso uacapesudode udore jne uje ujnóngone cuse jnese gu.

³² Apéso tábla peque gagájniringo jne iji poria uje i tu acácia enga ojnaque ditajatígo ca chimoque tábla péode udore gatajidode jnese uje ojnaque ditajatígo udore pipesucho iji óro jne. Enga a adíyo borapei uté aja udore jne jeta jé amácho ga chaco ajé uñai uté gai jne, ga yiguíjnai ajé gárerigo eruéode pijógome borapei uté. Ga a ameso uacapesudode udore tábla gáyode jnese ome óro, ga apésopo cutáderigui iji udore údode to rĩ jeta pláta upúsu ga táblade chacája uacajochadíe udire gatajidode jne.

³³ Enga borapei jogotodie angoronei chacája uacapesudíso ojnaque ditajío iji uacapesudode tábla ucode eruéode. Ga jé u uje pijoque yiguíjna puyai eruéode ome uacapesudode udore borapecho. Enga achayo yuru iyiejájnane pi cajo aja borapei tuté uécha uñai jne. Enga a ojnichome ajé uñai uté jne Dupade Iguíjna Ajé Pirosobádejnai U Udé.

³⁴ Ujeta e amácho yuruode pi aja jogadi jne iji yiguíjna ajé pirosobádejnai enga be ga aco joride gai jne.

³⁵ Iji borapeque cuchábi uté uécha uñai ga achayo yiguíjnai gajnéone cucha uñane aja ajé uñai uté jne. A acha mésa aja casaque garani yui jne. Jé basa ga a achayo uacorai aja umusoi yui jne uje uacapósode gajneque uacorai uté diríca, ga achayo uté aja mésa iquei.

³⁶ Apéso borapeque cuchátigo ome uacapesudi uté yiguíjna puyaque piagoi jne rĩ jeta déji ore pípidi. Enga a agayo borapéode aja ñane ome uté uje utata uneroque uñeque, jé basa ga a carataque uneroque uñai, jé basa ga carataguipise uñai, jé uñai póroropise ga pipesute uté iji ore acai uje i tu líno. Enga a apéso irárarigui iji uté údode jnese ga a cho daparagádu uacapesudedie udire irárai jne iji dabai.

³⁷ Ga ameso uacapesudode tábla peque uñéngo gáyode jnese ome óro uje táblade udore chejna yijmanai uje uacajugucho udore iji poria uje i tu acácia. Enga jé ca uacapesutique ojnaque ditaji chimoque tábla udore eruéode jne jeta óro u iji gatajidode jnese. Enga a apéso táblade cutáderigui iji bronce jne jeta tábla péode udore dugudie chacája uaquejopiériguiji cutádedie udire gatajidode. Ga adíyo uacagagode borapecho aja udore jeta oyo yiguíjna puyai joride iji udore jne.