Éxodo 25 - Dupade Uruode

Israélgosode ore tẽrája cuchade ome Dupade ujetiga pipesute iguíjnai nanique

¹ Pangarádejnai Dupade catecãrápoi Moisés rĩ enga chojninga:

² "Angome barasade israélgose ore jne ga ore tẽrája cuchade ome yu jne. Mu jé ca apuse barasade udore ore jnese aja jne, gusu udore ore jeta ore tẽrája yu uje ore potapísa yúringárique pijnoraque ome ore. Ga jé ca udore ore u to jne uje que ore juéga datígo ome yu gu ga ore chijnóra dadode ga que ore áyipieraque déji yúringárique pisi.

³ Ga a ore guẽrapáidode u udojo ome yu jne: Órodie, jé aja plátadie, jé aja guebeque nanganatágode uje orerã́cho to uje i tu cobre.

⁴ Jé aja borapeque utata uneróngone, jé aja borapeque carataque uneróngone, jé aja borapeque carataguipísode, jé aja borapeque póroro diríjabode to uje i tu líno, jé aja áyasa quedéjnane ojode uje ore pésu borapéode iji to.

⁵ Jé aja áyasa choquíode aode to uje ore chaca iji cucha caratade, jé aja cuchisode uñane aode uje ueracho. Jé aja ore ajugugode tábla uje ore chajúguiji poria uje i tu acácia.

⁶ Jé aja aceite ome ore apósode dabiocho uje ore chijose dabiogode bisidi nanique iji pore ade uje poria i tu olívo. Jé aja perfume to uje ore chanire aceite aja to ga ore chimesẽre Dupade gajnéone cucha gáyode ome nanique ga udore úringane puyácho e jogadi tu jne. Jé aja cucha ai unéri uje ore chãru iji guijnatajéode ga chusaque ore iguíjnane ajéode.

⁷ Jé aja cucarané utatadie uje quiríngape jé nanganata to uje i tu cornalína, jé aja cucaranépitábidie to uje oréremí sudire to. Yutṍri uágome cucaranépitábidie udire gu jeta ore chugája yirógode ore asutépise iguidedie, uje iguidedie udire íode u efod, pectoral ore.

⁸ Apésobu yiguíjna cuchábi ome yu jeta yopise yidai iji uaquedai tudé to.

⁹ Moisés á, beyoi yojningane cucha jnese jne, enga aráñopisaja quigode jne uje a yopise yiguíjnai iji uté uacapesudi. Jé aja yiguíjnai gajnéone cucha ore jnese jeta beyoi yojningane cucha udojo quigode jnese uje a yingo ua jne.

Bajai tu Dupade uruode pi cajo uje Dupade cho quique ome Moisés jeta ore pésu

¹⁰ Apéso yuruode pi cajo uté iji ore ujnungungué pore péode uje i tu acácia. Enga a uacapesutique cajo uté chise un métro 10 centímetros jne iji umaningai. Jé basa ga 65 centímetros iji pajei jne. Jé basa 65 centímetros umaningai aja ójo jne.

¹¹ Anícho óro aja uacapesudi uté ajei jnese jne, jé aja gai iji guesi to. Enga a óro ueque uté jne. Jeta e amácho ga apéso eruéode jne ga amesome órodie jne rĩ uacapesudi uté eruéode jnese.

¹² Apéso angoronéringui jne ga gagájni jne jeta déji ajidedie jnese. Uacapesudedie angoroinie a óro upúsu to jne. Ga aníchoja dugudie gáyode jne angoroinie udaji. Gare iji uécha uñai ga garapóji ujoi uécha uñai.

^13-14 Apéso ore ajugugode tábla peque to jne jeta gare uacapesutígo ome uacapesudi cajo uté angoroinie jeta aráñoja ga asayóji quedéjnane ome uté jne. Ga a poria uje i tu acácia ga a pecho udore jne. Ga a ameso udore gai to jne ome óro.

¹⁵ Enga jé ca ajnícho udore iji jogadode jne, ga jé jogate uté dosadode gatuaque.

¹⁶ Enga anire yuru iyiejnane aja uté ajei jne, uje a yẽrame ua jne.

¹⁷ Enga apéso joríderaque jne enga eduyopise órodie ome jne. Joride uaté umaningai chise un métro, 10 centímetros jne, jé basa 65 centímetros iji joride uaté pajei.

¹⁸ Iji joride uaté gatajidode apéso gaté unirísõre gáningo ore orérigui jne ga ore ujnótigo déji ore jne. Ga a ore cháguena uté eruéode jne. Apéso udore jne enga eduyo óro ome jne ga apéso ore ujnóngone enga chisa ñane iji uacapesudi uté cajo gai jne. Jé basa ga ore toji uté gai iji dádi. Enga ajéyo aramanie eruéode ome martílloraque jeta apéso aja quigode jne, jé aja edodie, ate uñane ore jnese.

¹⁹ Gaté unirisórone udore jé ore chojmára iji jnumi iji ore ipesudi uté joride ga ajei jé chojmára iji jnumi. Uje gaté unirísõre orerane udore ore cháguena gatajidode jnese.

²⁰ Ga gaté unirísõre gárode udore uje ore déji gatajidode jnese ga ore chajire joride iji dádi ga ore toji gai jnese iji jnumi. Ga ore tajia ñane yúode. Ga ore chaco dajnóngone uté gai jnese.

²¹ Anícho yuru iyiejájnane aja cajo uté ajei jne uje a yẽrachome uaque, enga quene uacanícho joride aja to.

²² Enga a yingongara yu aja ua jne iji uté joride gai iji gaté unirísõre orerane udore ore ujai gatuaque jne. Ga a yicatecã́ri ua iji yijogadi uté jne enga a yingo yajegaidode cucha ome barasade israélgoso ore jeta jé basa angopo yuru quigode udore ome ore to gatuaque rĩ.

Dupade e cho quique mésa adode ome Moisés to uje arurégode jecucha jogate mésa uaté gai

²³ Apéso mésaraque iji poria uaté péode jne uje i tu acácia. Ga a umaningai chise 90 centímetros jne, jé basa a 45 centímetros iji pajei jne. Jé basa 65 centímetros aja abubíe iji gaté.

²⁴ Ameso uacapesudé uaté mésa gai ome órodie jnese to jne, enga anícho óro aja eruéode jnese to jne.

²⁵ Atingacho uacajmanai aja uacapesudé uaté mésa gai ga acáyo uacajmanai eruéode iji uaté gatócoro ga apésopo ajã́ro gatéraque iji uaté gai to rĩ ga ameso eruéode to ome órodie.

²⁶ Anícho dugúrigui aja mésa uaté to enga aníchopo angoronéringui aja dugudie udire gáyode to iji gaipísi jne uje uaqueduyo óro ome angoroinie udire.

²⁷ Enga a apésopo pite petígo to jne rĩ jeta aráñoja mésa uaté angoroinie jne ga ajnócho aja uacajesúode jne.

²⁸ Uacapesute pite péode udore uje ore ajugucho iji poria uje i tu acácia ga ameso udore gai jne ome óro to jne, jeta aráñoja uacapesudé mésa angoroinie ga a asayo udore jne iji quedéjnane.

²⁹ A apéso catíbeque querúode jne iji órodie, jé aja plátodie, jé aja jopite umarone jne, jé aja cópadie jne enga a eduyo óro ome borade udore jnese jne.

³⁰ Jecucha anícho arurétigaja pláto uaté ajei gatuaque jne iji yiquei jeta achayóji mésa gai jne.

Dupade e cho quique ore ibiotique ujetiga pipesute iji óro peque chojmarai

³¹ Apéso ore ibiotique to jne ome óro, enga eduyo órodie ome jnese jne. Enga ajéyo óro uaté ome martílloraque jeta apéso aja quigode. Yojninganie u chaqui, úcodie, pojnánguenie, gatódaode, aposepiábidie ore jnese. Enga a óro peque chojmára jne mu a jé amácho uté jnese ome.

³² Enga ajéyo chaqui jne, enga ejaque jne ga apéso uaté aja gaté jne enga chojmára iji jnumi ome uaque jne. Apéso pajei jne enga a úcorigui cuse jne ga chojmára iji tidie jne ga gadióguiji dosadode jnese.

³³ Enga apéso pojnánguenie iji úcodie udire pajéode jnese ujeta chopise pojnánguenie udire uje ore déji poria uje i tu alméndro. Ga gadioque uacapesudedie iji úco chojmara, chojmaranie pajéode jnese jne. Ga pojnánguenie jé ca gatódaoi chimoque uacapesudedie udire pojnánguei erodie.

^34-35 Mu iji uacapesudi uté gosi ga apéso pojnánguenie jne ga gagájni iji pajei jne. Uacapesudedie udire pojnánguenie a chopise poria pojnánguenie uje poria uaté i tu alméndro. Ga uacapesudedie udire iji pajei jé ca gatódaoi chimoque to. Enga pojnánguenie udire iji gosi gai a achayóji úco garedie ujai jne uje ore déji gosi uté ejode iji gaté. Ga jé ate jne ome úco uñanie jnese jé aja ore ibiotique uté chaqui.

³⁶ Ajéyo óro uaté ome martíllo jeta apéso aja quigode ga eduyo óropise jne ome pojnánguenie, úcodie ore jnese jeta chojmarápise ore ibioi uté aja jnumi.

³⁷ Enga apéso bajo ajã́tigui iji uacapesudedie udire úco gatajidábode jnese jne. Enga aníchosi ore aposepiátigui aja udire ajéode jnese jeta uacapesudábidie sudire chijñate guijnatajei ga dírecapise iji ore ibiotique uté iquénique.

³⁸ Apéso uacapósabode udore erásorone to iji óro ueque. Yojningane u tijéra quedéjnaringo, bajórigui ore jnese.

³⁹ A uacoidedie óro udire chise 33 kílos jne ome uacapesudi uté jé aja erã́sore uñane cucha uñane to.

⁴⁰ Angome ipesusórone udore ore jne, enga ore ipesudode udojo jé chopise uqué casodica uje e yingo ua ica iji cucarani ójo tudaque.