Éxodo 24 - Dupade Uruode

Israélgosode chajo raja nanique jeta ore pésu Dupade ojningane cucha jnese aja quigode

¹ Dupade catecãrápoi Moisés gaté rĩ ga chojninga: –Moisés á, ajína bayai Aarón, jé aja Nadab, Abiú ore jne, enga ajínañopo uacojode israélgose ore angaránone uñane rĩ ujeta 70 u ore jne, enga ocho yijogapi udé cucarãte to jne rĩ uje yugúsiji. Enga a uacajárique cuse ome yu jne, ga a achacho uacagataidie aja jnumi tiji yiquei jne ga a yicatecã́ri uaque to iji te.

² Mu a gusúpusu ua jne, Moisés á, jeta ajose yi, enga a jé ca bajõráiso uñeque sose gadoi to jne. Enga que yujuéga to rĩ jeta uñéngo choru cucarani udé bisideque uje que yojningane u udore to gu.–

³ Moisés doi jnumi tiji cucarani ga chingo Dupade uru quigode aja darasade ore jnese. Uje ore chudute Moisés júdode Dupade uru quicho udore ga ore tibite jnese ga ore chojninga: –Yipéjo Dupade áyipiedie udire aja quigode jnese jne enga jé ca yórangosia uñátaque jne.–

⁴ Moisés churúsãre Dupade ojningane cucha udore jnese aja quigode bajaque mu iji dire ejoi enga Moisés chobéri niriji ga pésu daseradéjnai iji cucarani údi ome Dupade. Uje chimate daseradéjnai tuté enga doi cucaranenie uje gare ore iji yirídai nanique, enga chisingare cucaranenie udire enga ore cháguena gaté iji aseradéjnai ejoi. Cucaranenie udire ore imoi u uje israélgosode ore uáguedie gare iji yirídai mu chojmára ore iji jnumi ome Dupade, ga Dupade gajnecho cucaranenie udire ga ore úringai puyaque pijógome Dupade to nanique.

⁵ Ga jé u uje Moisés chutṍri jnacarode uñane uje israélgosipíse ore jeta ore chujé aquirájna choquíode uñéngo ga ore tẽrame Dupade. Ga ore chibore aquirájnane uñane iji Moisés ipesudi daseradéjna gai ujetiga pĩroque darasade, ore isijnaringuéone. Jé basa ga ore tẽrame uñane ome Dupade gu ujetiga pajesereringai dépoji Dupade ore ome ñane rĩ.

⁶ Moisés chanire ore yugode aquirájna choquíode iyode aja bajabidie, ga chicha uñanie aja ti, jé basa ga chimesẽre daseradéjnai gai tome aquirájna iyode uñai iji bajabidie uñáminie.

⁷ Ga chisa darujna aode uje churúsãre Dupade uruode iji ica ga naráraja gai jnese iji darasade ore iquei. Ga ore chojninga: –A angoninguite guesaguipise yógome Dupade uruode udore jne, uje jé uru quichome yoque gu. Enga a yipéco ojningane cucha udore jnese jne aja quigode.–

⁸ Enga Moisés chisapo ore yuguedie aquirájna uquidé iyoi uñai te rĩ uje désiji bajabidie que, ga chimesẽre darasade ore gáyode jnese enga chojningame ore: –Piyoi udé uje yimesẽre uacabai ome ga imoi u uje Dupade áyipiedie pijoguipise ome uaque enga a chimate daruode udore quigode jnese ome uaque jne.–

⁹ Ga jé u uje Moisés, Aarón, Nadab, Abiú ore choru cucarani uté ga ore nóna dojode pangarate israélgose uñane uje 70 u ore nanique.

¹⁰ Enga Moisés, jorane udore ore chimo israélgosode ore angureni Dupa iji cucarani uté ójo. Ga ore chimo cucha nanganatáguejnai uje déji guídade údi ga chopise cucarané nanganatague orerenie uje i tu zafíro ome dáringa nanganatague. Enga uté ejode cho nánga, nánga iji charidi ga chopise ateta uje nanganata.

¹¹ Dupa pirosobádi u uté, mu que cuchárique chósi ti iji dabidigode jnanío ore iji dei. Ga ore pañaji uté ueratígajnai. Ga udore ore tagu dabosode iji uté ejoi ga ore chóji yodi iji uté ejoi to rĩ uje que cuchárique chósi tiji ore.

Dupade chisiapome daru iyiejnane uñane ome Moisés rĩ iji cucarani Sinaí ójo nanique

¹² Udojo quigade ga Dupade catecãrápoi Moisés gaté rĩ ga chojningame: –Orupo yiyaridi cucarãte jne rĩ, ga arote yu iji ójo, ga a yisi ome yuru iyiejájnane ome ua jne uje jé yurusãracho iji cucarãte uejájnane udore. Yiroquéode a déji yurusarane udore jne, jé aja yaréngone cucha ore jeta acate barasade israélgoso ore ome yurusarane udore quigode jnese jne.–

¹³ Moisés chague ga jĩraque jno ga nóna daroi Josué aja cucarani uté, ga ore choru.

¹⁴ Enga Moisés catecã́ri dajorane udore ore uje ore angarate ore to ga chojningame ore: –Ácayobíji udé jne jé aja ujetiga Josué uyoque yajningopo aja uáguiji de rĩ. Enga a Aarón, Hur ore chácariji uacari iji de jne. Jeta gosi ujuré gajnetique cucha déji jne ga catecã́ri Aarón, Hur ore jne jeta ore cho uté quique.–

¹⁵ Uje Moisés chejna daruode udojo guesi ga choru cucarani, enga jé u uje gue abuja utatájnaraque níe cucarani aja jnumi.

¹⁶ Dupade ingoningájnai, gue abuja utatájna tuaté ore níe cucarani Sinaí aja jnumi ga chejna dire chojmára iji tíode iji uté. Mu iji dire garitia ga Dupade tibidi Moisés ga uruode tṍraji gue abuja utatájna tuaté ome Moisés.

¹⁷ Ga jé u uje Moisés urasade israélgoso ore pañaji Dupade ingoningájnai, ga cho pioque ocarate gajnunie uje tṍraji cucarani ójopise ga chachẽre gatéode iji.

¹⁸ Moisés choru cucarani uté ga chacája gue abuja utatájna iji darasade israélgose ore edominone enga chácariji uté ga guejnane dire chejna ayoré gáredie, jé aja dejade uje chejna ayoré gáredie to.