Éxodo 23 - Dupade Uruode

Dupade que pota ujetiga yĩraraco yocujórique ayoré gai ujetiga yirajágo uté gosi úringai máraque

¹ Ca ajnime barúrigo ome bojórique ayoré ujetiga aguhéta cuchárique uté gai uje que uté bai u gotique. Jé cho to ujetiga baraja uje gajnareque bojórique ayoré atique enga jé ca apógu uté gosi ome eduguéjnane, enga jé ca ãrarare uté gai iji ore iquénique.

² Ujeta uacojórigo ayoré ore tṍrai dedo ome dapesutígo cucha gajnarécho jne, mu baraja uje gajnarécho ga jé ca apésu to. Mu jeta gusu ua jeta etaque udore, ga jé gusu ua jeta ca apésu, ga jé dóji ga jé ca apésu to. Ujetiga ayorérique pésu daba gajnetique cucha ga jorane ore chojninga jnese: 'Que pésu arĩa. Que pésu arĩa.' Mu baraja úringai máraque ga jé ca amíninga udore ore, ga uté jé tiógara dáringai márangome ua uje barajapise bai gu.

³ Ujetiga máraque ayoré jmatátique enga jé basa ga cho daba date gajnaréngone to. Enga jé ca osõre uté jne ome ijmátaringuéi.

⁴ Ujeta bamajósonique gachidé burica quedéjnaraque díji ua ga asa ga bo údi aja bamajósõri uté iguíjnai te rĩ. Uje cho damajo ua, mu atire gachidé uté gai. Jeta aquirájna, mu jé atire bamajósõri gai.

⁵ Ujeta gosi ajei dotãre ome ua marínga, gosi orutique burica quedéjna cṍra dagúcha iménuringo údi ga ejñúji buricai uté gai jeta chaguepo rĩ jeta jé áta betésonique ugúcha iménuringo aja. Betésõre, mu jé áta cuchade aja uté.

⁶ Ujeta ayoré jmatátique pota catecã́ri uágome dajuré gajnetígo cucha ga jé ca jĩraque ajócãcho iji uaquejode uje cáma catecãripísi uágome dajuré gajnéone cucha mu. Jmataque ayoré tuté mu jé gajnepídi u to jeta pangarate uté uru quigode to ome dajuré gajnéone cucha.

⁷ Ca angári udore ore uje ore chaguhéta dojórigo ayoré gáyode bisideque, enga jé ca asi ome pitoringai ome ayorérique uje cachi paguhéta gosi gai bisideque ome dojórigo ayoré. Chamáñaje a yorase baba udore gu ujetiga ẽrame bojórique ayoré ome pitoringárique uje que uté gosi bai u gotique.

⁸ Ujetiga gajnareque bojórique ayoré atique ga uté gosi chisírasome daplátadie ome ua, mu ca asa gueranéringui. Gajnarénguei uté áyipiedie gu. Uje cachi gaidi tu gu jeta apógu isijnaringuéone. Mu ujetiga apógu isijnaringuéone enga ja soca uté ujórique ayoré cho daba uté adode jne uje que uté bai u gotique.

⁹ Jé ca acho uaquejode ome purása quedéjnane ore iji uacajade uje uacamóño to ica iji Egípto uje purása quedéjna uágome Egípto unirisórone ore ica ga uacarajáyopise egíptogosode ore josipiedie ome uaque to ica iji dajade, ga jé ca beyoi ore isocade to ome purása quedéjnane ore iji uacajade.

Dupade cho quique siqueré puyedie ujetiga ca ore chacápo cuchade iji dajutícabidie iji udire rĩ

^10-11 Asecãcho siqueredie uje uacatãchóji uacajutícabidie iji udire. Ujetiga uacasecaranenie siquerei e chise garitia enga óraño siqueré garitia uaté aja yui jne, enga a ca acáyopo cuchade iji uaté jne. Mu jeta cuchade suéji bisideque ga jé ca ajocáso ga ayoré jmatágode ore tagu árigo bisideque jne, jé aja cuchiso aségode ga a ore tagu udore ade to jne. Ga a quene atãchópoji udojo quigade jne rĩ jeta siqueredie chisápo chojmaráitía rĩ. Mu jeta jecucha isoca ga siqueredie chise garitia ga ayáyo utáca iji uaquejnane udore. Jé aja úvadie ade jeta jé ca ajocásopo to jne rĩ iji siqueré garitidie ga gusu jmatágode ore ome. Jé aja uacacai olívo jeta jé ca ajocásopo ade to rĩ jé aja siqueré garitidie eruei.

¹² A uaquejnane díño chojmára iji ti jne jeta apéso uacapesutígo cucha jnese iji udore ga amácho uacapesutígo iji, mu oyo uacajñare iji dire garitidie jnese. Jé uacarógode, uacachidode aquirájna, burica quedéjna ore jnese cho dajñare to iji dire garitia. Bagaidi tu jeta jé ca barógode ore isatique cucha na ore aja jnumi. Jeoga purása quedéjna barótique marínga, jé dóji ga cho dajñare to iji dire garitia.

¹³ Beyopísi yojningane cucha udojo quigode jnese. Enga jé ca acota purása quedéjnane ore angurenone dupa, enga jé ca atatayo udore atígo to. Ga jé cho to ome ore íode, jé ca ẽ́care ore íode ujetiga pududique iji uacabijnanone gotique.

Dupade chiroque jnanione aja ujetiga ore doi iquei jnese iji dajnusinamánone díño ga gadioque iji siqueredie jnese

¹⁴ A jecucha ajnusináño yojningane udojo dire puyácho jne iji dire gadiógode gatuaque iji siqueré chojmaranie gatuaque jeta acatecãchoi yu iji gatuaque.

¹⁵ Dire puyaque bajai u uje uacacho arurégode iji uté uje que bisitique déji. Dire puyai tudé chise dire garitíode ome dáringai pujnusina. E uacadúcho nanique uje yingo uaque dire puyai tudé uacasocáringome ga a e arajáyo quigode. Ga jé ca amócho jeta apéso iji jogapíode udojo dire ga acotáyo yu ome udojo. Gusu arurégode iji dire puyai tudé jeta acho uje que bisitique déji. Ga eruei tu dire garitíode jeta quene ecãcho uacabotique arureque to. A uacajnusinamáni uté dire puyaque jogadi u guedosi jne uje i tu Abib. Uje uacaboyóji Egípto iji uté nanique gu. Enga a ajnáño uaquẽrapáitigo cucha jnese ome yu jne iji dire puyai uté ga jé ca uacuñeque chedo dajmanéraque aja yi jne.

¹⁶ Dire puyaque ejode u ujeta e aráño uacacade cucha a utiedie, jé aja uacarángone uacacaque eruénique jnese. Ga a ajnusináño dirode udore to jne ga a oyo uacaninaquei to iji dirode udore ome yu uje uacanínañopúsu uaque gu uje uacajnusináño yicaniratiguéode ome uaque.

¹⁷ Jnanione ore jnese a ore doi Dupade uyu yiquei jnese jne iji dire puyade udore ga gadioque jne iji siqueredie jnese.

¹⁸ Ujeta ẽcho uacachidode cuchiso ome yu mu jé ca ẽchopo arurétigo ome yu to rĩ ujetiga bisidi déji udore. Uje gajnaréngome yu gu jeta yimo uaquẽrapáidode cuchiso iyoi iji ga yimopo arurégode iji ejoi te rĩ uje uacanícho bisidi aja udore ga que yise unétique. Adi jé u ome uaquegode uacachite cuchiso íode, jé ca oyo uacajõratu udore íode ome dire ejórique.

¹⁹ Ujeta e ãra bacaque bajade ga angara bacaque omone jogadi jeta ajnája Dupade uyu yiguíjnai ajei ga ẽrame yu jeta yo yajnenguíji. Uacangureni Dupa Eyúgojmai uyu gu, ga jé tiógara jeta asíyo yu iji to. Jé ca aréñoi áyasa quedéjna abataque iji uacajoyatique iji daté irisode."

Dupade chiroque darógode gaté unirísõre uñai aja israélgosode ore yui ujetiga cho dajéode quigome ore aja daqui punire icha yúode

²⁰ Dupade qué jnopo daruode údi ga chojninga: "A yiroque yirógode gaté unirísõre uñéngaja bei jne. A uté chajire uaquéode jne enga a cho dajéode quigome ua aja baqui tuté punire yúode. Yojningai punire uté a dimane jne iji baquei uje e yipésu cuchade aja quigode ome uaque gu.

²¹ Jé ca acai siñéngome uté jne ga ajína yiroi uté aja quedéjnane jne. Ga be ojningáringo cucha ome ua jne ga jé ca otigase uru quitique jne. Uje uyu u gu uje yiroque uté aja ua ga cho jeta jé uyu upúsu uté. Ja seca uté jé ca chicadígui bate gajnaréngone jne, enga a o baba bangoninguite paritigade udore jne ujetiga jé ca angaripísi yiroi uté jne.

²² Jé ũrepise yu ome yojningai uté uje a angári uté ome cuchade jnese jne uje yuru quicho udore ome uté gu ga a yátaja ua ome bamajosórone ore jne, enga a udore ore jmongarája uaque jne mu a jé basa yijmongarája ore to jne jeta yirota uaque. Jeta ore chãraque uacaquénique ome uaque jne marínga, a uyu u jne jeta yicha yu aja udore ore yui ome uaque, enga a jé ca ore bisitique pijógome dajequigode udore ome uaque jne.

²³ Ga a yirótique gaté unirísõre jno uacádi aja punirone udojo jne uje unirisórone íode u udojo: amorréogosode, hitítagosode, ferezéogosode, cananéogosode, hevéogosode, jebuséogosode. Ga a jé ore chopise pore ujnié pijniméraque jne uje pijnimé uaté iji étasode jnese aja guesi. Ga a parané uaté aja siñeque ga a jé yisocai u ome uaque jne uje a yṍra ore aja ti yui jne ga yicha uágaja udore ore unirone udore puníño jne.

²⁴ Ga jé ca beyoi erámone unirisórone udojo ore jmapié noñánguenie to jne. Enga jé ca achacho uacagataidie aja jnumi iji ore angurenone dupa quedéjnarique iquei, enga jé ca acatecãchoi ore ome uacajegaitígo cucha to. Ujeta amóño ore anguretígo dupa gajnúo ga beyoi ore angurenone udore ga ajéyo iji jnumone, ga asũruráso aja jnumi ga jé ca pépitarique cuse. Jeoga ore angurete cucarané pecho mu ajéyo iji jnumi to.

²⁵ Eduyo uacangureni Dupapísi uyu yúringai picatecãraite enga a yatapísaja uaque jne ga a yisi ome yodi ome uaque jne jeta ójiyo, jé aja cucha pibotígo to jeta acho. Ga a yipésu uaque jne enga jé ca ejnarétacapo uaque to jne rĩ.

²⁶ Enga a jé ca jĩraque atoyoi to jne uje cáma uaqueruei u gu. Enga a jecucha yátaja chequedíe iji uacanínique to jne ga a ca uacarásaraque chequé déji jne jeta atique carujnáji bisideque, jeoga uaté goto jé ca aberé goto enga a uacarásadie ore atígui cuse jnese jne iji uacaniri údode.

²⁷ Enga a yipésu uacáringáringo pirosobácho jne jeta eso punínique jne ga a ore toji uacabai jne ome dasadodéringáringo ga a ore chacose re iji uacaquéode uje ore agutedie cho túcu, túgome dasadodéringane. Enga a uacamajosórone a ore chimo uaque jne ga a ore dosóñime uaque jne ga a ca ore pésu cucháringome uaque, ga a ore chayome uaque ga ore chisite rágaja dajesúrique uje ore dosóñime uaque gu.

²⁸ A yiroque chacase cuchátigo aja uacaquei jne jeta socárome cananéogosode ore, jé aja hevéogosode, jé aja hitítagosode ore to rĩ. Ga a ore chayome udojo jne ga jé u jeta oyo uacaniri iji ore unirone udore jne.

^29-30 A jé ca yijócãre cananéogosode ore iji siqueré chojmaráraque jne. Uje que toque jeta atãchóji jnumi tuté jne gu, uje qué garósi uágome. Ga a qué ore chichagu dajutícabidie to jne iji daniri tuté, enga a uerate uacaniri uté jne jetiga eso. Yigaidi upo rĩ jeta jé ca cuchiso aségode ore tagu uacacatígo cucha iji uacaniri uté. Uacamóño uje que ayorérique déji ga cuchade udore quérã iji te. Jecute jé ca ajnátuyo puniri uté ome uaque uje a uyu u jne jeta quĩrique, quĩrique yijnime udore ore iji ore uniri tuté, ga a oyópise uacaniri iji uté jnese jne jeta ga uacatígo ore jiei to ga a ore cháta rágaja uaque jne ome uacáringáringo utáca.

³¹ E yimate uacaniri uté eruéode aja quigode ga pajei a chise Yote Quedéjna Caratai, ga a chajuque filistéogosode ore uniri jne iji guedé cacadi yui enga a chise Yote Quedéjnai Mediterráneo jne. Jé basa ga umaningai a chise erã́petaréque cuchábi iji umusoi garani yui aja tié cuchabé iji casaque garani yui uje i tu Éufrates. A uyu u jne jeta yichajaque punirone udore unirisórone aja uacajmainie ga a óraño ore aja sañeque jne jetiga oyo uacaniri iji ore uniri uté jne.

³² Ajuso uaqueo ome puniri uté unirísõre bajade ore jne jeta jé ca arate ore atígo. Enga ca uacasutedie, ore asutedie ore cháta raja ñane ome cuchárique to. Enga jé ca acunguésõriñoi ore anguretígo dupa ejode to.

³³ Enga jé ca ajuécho jeta ore chácariji uacaniri udé to jne. A ore pota chacate uágome cucha gajnaréngone úringáringo pigaicho iji uacaniri uté, ga jé ca ajuécho uacaniri tuté ome udore ore jne. Enga uacagaidi u gu jeta jé ca apéso cucha gajnarétigo ome yu. Enga jé ca ajuécho uágome udore ore angurenone dupa quedéjna to jne. Jé soca ajicho udore to ga pésu danéningai ome uaque ga udore ore angurenone chimate rágaja uaque, ga jogadi u uje uacapéso cucha gajnaréngone ome yu. Ga udojo a ipesute uacañosoringuéone jne ga gose yu."