Éxodo 22 - Dupade Uruode

Patatagode udojo u oriechoquírigo gajnéone pujuyaquéo ujetiga ore cho daba doriquérigo

¹ Ujetiga gosi toria dojórique ayoré gachidéraque áyasa, jeoga aquirájna, enga chujé ga tagu, jeoga doi orerángome, mu ujetiga ga pirajaque jnani oriei uté jne ga oidé áyasa gachisṍri tibágui ga chutai dachidé oredie ga chojninga: 'Asi yu iji bachidedie uñáringui uje bagu yachidé áyasa diríca, ga a beranéringui gagájni jne.' Jeoga aquirájna uté oidé ga aquirájna gachisṍri utaidedie jé u aquirájnanie jeta chejna yijmanai.

² Ujeta oriechoquírique jeta déji doriquérigo gai iji dejátique, ga cuchade ugúchasṍri chujé iji dagúchade udore gai uje chajuque aguté iji dejai, mu ujeta toi ga topísi ga a jé ca cuchade ugúchasṍri cho daba dei tuté dojo ayoré gu uje dejaque ga chajuguipise aguté.

³ Mu jetiga gosi chujé oriechoqui iji diri ga cho daba dei tuté oriechoqui gu uje dire mu jé chujé. Mu jetiga oriei tuté toria cuchárique, ga chimánapo doridi cucha oredie jnese rĩ ome ugúchasṍri. Mu jeta jé ca iplátaraque cuse ga ore doi oré tome uté jeta chimate doridi oredie ome dorérigui.

⁴ Ujeta gosi chise dachidé aquirájna poridé casé ga oisṍri cho doridé uaté oré ujeta gare jeta chatire gachisṍri gai te rĩ, jeta aquirájna, jeoga áyasa, jeoga burica quedéjna mu jé ore isocai chojmarai jnumi ome dachidode udore jnese.

⁵ Ujetiga jé ca gosi chuse dachidéraque cuchiso guio iji piéraque ga chacája ayoré quedéjnarique jutícabia ga jé máraque uté gosi ome dachidé uaté adode uje que chuse guio gu. Mu jutícabia gajnesṍri chimo udore iji dajutícabia ga tibágui gachisṍri jeta chingome uje gachidedie tagu acade cucha. Ga gachisṍri cho oré, ga chatire dacade cucha gai ga uerate gueranone ome uté uje gachidedie tagu acade cucha gu.

⁶ Ujetiga gosi apótique garai tagu ujórique ayoré acatígo cucha gánique, jeoga gosi unucodé, jeoga quene sué, jeoga gosi apósejnai tagu udore to ga chimate udore oredie jnese ga cãra rome ñane mu jé isocai chojmára ome udore quigode jeta chimate.

^7-8 Ujetiga ayorérique noñome datique iji dojórique ayoré gari ujetiga suse guio, jeoga iplátai u, jeoga ate uñeque u, mu ujórique ayoré toria udore gaté iji gosi gari, ga jeta piyaque oriechoqui uté jne ga chimate doridi casé oredie ga gare. Mu jeta ca piyaque oriechoqui uté ga gosi nóna dajõrai tuté uje suse dagúcha casé guio diríca aja eduguéjnane iquei uje Dupade ichajapite udore ore aja ore úringai eduguéjna ica gu. Ga ore chiraja páyipiedie quigode, enga jĩraque chiraja uje gosi jé ipoguiete dojoi tuté ayoré adi, ga gosi jé imaningápo oredie rĩ uje ipoguiete gu. Mu chimate ga gare.

⁹ Ujetiga jnanírique ugúcharique bijna, ga ujórique ayoré chise ga chiraja dagúchai iji dojórique ayoré ga chojninga: 'Yiraja uje yugúcha casé u.' Mu ujoi ayoré chojninga: 'Jé yugúcha.' Ga ore chotigase ñane uruode ome udore ga ore chijna ñane aja eduguéjna irajatai iquei uje Dupade ipesute úringai eduguéjna gu nanique ga chirajapise cuchade quigode to. Enga uté chirajapise ũrepítiguiji udore ore. Márai tu uté gosi uje chãra cuchai gajnesṍri. Ga chatire udore ore oredie ga gare atirégode dagúcha.

¹⁰ Ujetiga bojórique ayoré noñome dachitique cuchiso iji bari ga gachidi uté toi iji quigade, jeoga ore toria, jeoga cucha ajnangoque, mu a ca o oré jne. Chamáñaje que bamo gu uje cucha dacadode udore tocade ome uté gachidi, enga que bojórique ayoré uñeque chimópo rĩ ujetiga chatata cuchade udore quitígo. Ujetiga burica quedéjna uté gachidi, jeoga aquirájna, jeoga áyasa, jeoga cuchiso uñeque, mu jé ate, a ca o baba gotique.

¹¹ Mu acatecã́ri gachisṍri enga ojningame uté: 'Bachidi casé toi bisideque que iji yiguíjnai ejoi. Dupade tangári yuruode, yujúdode úringane ũrepíso ome ua.' Ga jé u uje gachisṍri chojningame ua: 'Ejẽ́, e yiraja uje que taque ua ome baruode gotique enga qué dóji jne ga a jé ca o oré jne.' Ujetiga bajúdode u uje cuchárique chimate bojoi tuté ayoré gachidi, jeoga péro que, jeoga uacojórique ayoré orite, mu a ca togome udore gachisṍri tuté jeta chotigase baruode udore quigode. Chamáñaje bẽ́care Dupade i gu ome bojñane udore quigode ga uté chirajápo rĩ uje a taguirase ua ga bajnenguírase Dupade ujuyaquérigo ome ua jne.

¹² Mu ujetiga bamo oriechoquírigo aja ore oritique cucha bojórique ayoré gachitique iji bari, mu que ajocase udore ore, ga a o baba udore. Uje bamópise ore mu que ajocase ore gotique. Ga a o cuchisoi tuté oré jne ome gachisṍri.

¹³ Ujeta cuchiso sijnátique tagu ayoré tuté gachidi iji bari ga ango cuchiso sijnai uté atigai aja gachisṍri jne, ga chimópise to ga que potigayaque ua ome baruode udore ga que o oré gotique.

^14-15 Ujetiga gosi cachi qué oite bisidéguirase dojórique ayoré gachitique cuchiso diríca, mu gachidi uté toi iji gari ga a gosi chimate doidi casé oré te jne. Chamáñaje gachisṍri que chimo to gu uje toi. Ga adi jé upo rĩ jeta cuchárique chimániji oisṍri casé gari ga cho oré to, jeoga péro que. Mu jeta gachisṍri chimo uje isoca diríca ga que oisṍri cho oré gotique, jeoga toji dachisṍri ejoi ga que oisṍri casé cho oré gotique. Adi jé u to ujetiga ayorérique chutai dojoi ayoré gachidi ga chojninga: "A yimate ua ome yiplátadie ujetiga yijna bachidi ome yisagode cucha, ga a yatire babai jeta e yimate yisagode udore." Mu ujetiga cuchárique chósi ti iji gari mu a ca cho gachisṍri gachidi oré ome. Chamáñaje e chisi ome dapláta ome gachisṍri diríca gu.

Uje yirajágo yocúringane jnani pajnecho ome Dupade ga omi tu ujetiga yujucópise yoquisocárigo guio

¹⁶ Ujeta jnacánique pota nejéru gapu gatódataque údode uje cáma gajmasónique cuse, ga cáma moji jnacánique gari gotique, mu nejéru údode gu ujeta moji gari bisideque ga moji gari ga que ajénique déji jeta acotépise, mu gaidi u ujeta chejna guesi ga chapo rĩ. Mu gapua uaté dayé a chutai daro mochápasõri jnacare uté iplátarigui jne jeta cho dajnéngu ga chojningápome rĩ: 'Ajínasia yurábia jne. Uje e bamósiji gari gu ga jé tiógara jeta jé ca ayáyopo ñane jne rĩ.'

¹⁷ Ujetiga ca gapua dayé potame mochápasõri jnacare uté ujetiga uté cho dacoté iji, mu a mochápasõri uté jnacare cho oré gapua uaté dayé uje qué parépise uro gu, ga cáma jnacánique moji uaté gari.

¹⁸ Ujetiga chequé daijnéraque déji uacajade ga jé ca acóso uaté goto uje etingarã u pujopié uje que garani u Dupade gotique gu. Ga ajéyo uaté goto ga jé ca chapídapo to rĩ iji diri.

¹⁹ Ujetiga amóño jnanírique jeta gosi tungarája cuchiso chequéraque ga jĩraque ajéyo gosi jeta jé ca gosi chapídapo to rĩ iji uacajade. Jeoga chequéraque u uje cuchiso choquírigo tungarája goto ga jĩraque ajéyo goto to.

²⁰ Ujeta gosi pésu daseradéjnarique ome dupa quedéjnarique jne enga jĩraque ajéyo uté gosi to. Que chedu Dupa Eyúgojmai gu ome dẽrapáidode cucha gu.

²¹ Jé ca acho uaquejode ome purása quedéjnane ore iji uaquejode enga jé ca ajócãchome ore. Uje uacarajáyopise to uje iroque uáguiji Egípto to ica, ga purása quedéjna uáguiji ore ujade ica, ga ore tagu dejode ome uaque ica. Ga jé ca beyoi ore isocade udore to ome purása quedéjnane ore iji uacajade.

²² Jé ca acho uaquejode ome abai toguedie ore, jé aja disijádode ga jé ca arañíñome ore iji uaquejode.

^23-24 Ujeta oyo uacajosipié ome disijádode, abai toguedie ore jne enga a ore pota jeta yáta yu aja udore ore jne, enga a uyu u jne jeta yĩrarare ore gai. Ga a yejna yu aja guesi ome yájningajnárique jne ome uaque. Ga a yoidi u yiquesé cuchátique ome uaque gosode jne. Ga a uaque gosi acoté, abode a ore nóña ga disijate ore to jne, ga abai togué bacoté casé to.

²⁵ Ujetiga ayoré jmatátique chutai ua ome baplátaraque jeta qué chijna ga asi ome uje baraja úringai jmataguipise gu. Mu jé ca be udore ore isocade to uje ore cho derángu dojode ayoré oidé casidica dapláta uje que ore chatire ore gánique míraque, ga ore uruode dosója udore ore ga ore chojningame udore ore: 'Jeta ca amate yoque míraque jne ga a yisago petígaja gai gatuaque jne rĩ iji guedosi chojmarane, jé aja jeta ga amate udore jnese.'

²⁶ Ujeta ayoré jmatátique chojningárasome uaque gosi: 'Yiguidé diríjabia jé dóji bari jne ga a yijnápo jne rĩ jeta yimate yoidé casé bapláta.' Mu iji guedéjnoringái ga báyipie déji uje a tejnu jne iji dejai ga atire gai ga ojningame: 'Baguidé diríjabia de daque jã, ajna ga jé dóji bari uje que yijnátu boidé casidé yipláta gotique gu.'

²⁷ Ujeta jé ca atire iguidé diríjabia uté gai jne ¿ga iguitíguiráse ome tejnuringai? Ajuse beo jeta uté chutṍri yu ga a yátaja uté jne ome ijmátaringuéi jne, enga a o baba badode udore uje bã́raja tuté aja tejnuringai gu.

²⁸ Jé ca barúrique gajnaréngome Dupade ga jé ca achietáyiñome uté ome cuchade quigode jnese. Mu que gusu Dupade, mu jé ca achietáyiñome uacasutérigui to rĩ uje Dupade ichajapite ore jetiga ore chajñuru urasade israélgoso uaqueo iji uaquedáningo.

²⁹ Ujetiga e achaga bẽrapáitique cucha aja yu, ga jé ca o jṍro ome bẽrapáitique cucha ome yu ga jĩraque ẽrame yu ¡bu! Jeta aráño uacacade trígo ga jecucha asíñome péode ome yu bajaque, jé upome uacacadie úva otadi rĩ uje i tu víno, jé aja aceite uté uje tṍraji poria uaté ade uje i tu olívo to. Yajneque uéchai iji udore jnese. Ga adi jé upome jne rĩ jeta asíñome bape bajai ome yu jeta yo yajnenguíji ga jé ca ajnachoi úringárique urẽja ome yu jne.

³⁰ Jé adi u ome uacachidé aquirájna ape bajai jeta jé ca oyo jṍro ome udore jeta asi ome yu ga yo yajnéngu, jeoga áyasa abío ga ca oyo jṍro ome jeta ẽcho ome yu. Ome uacachidode cuchiso ape basugode udore ga dire garitíode uje a ore chácariji datedie gari jne, mu jetiga e chise dire gadióguijitía ga a jé u jne ujetiga ẽcho udore ome yu.

³¹ Jnanione uaque á, uacarajáyo uacáringane jnani pajnecho ome yu. Jecute jé ca óraño yuru quitique ome uaque jne. Jeta eso cuchiso sijnátique iquebétigo iji sañeque jeta tagu uacachidedie áyasa uñáraque, jeoga aquirájna, mu jé ca acho iquebéode udore to jne ga ajuchója uacachidode tamoco iquei jeta ore tagu iquebéode udore.