Éxodo 2 - Dupade Uruode

Moisés batigai isocade u udojo nanique

¹ Iji dirode udore ga jnani bajai Leví ujnié disi ejode uñai chisa darásapíseraque nanique, ga ore abode cuse to nanique.

² Ga uaté atique dépoji ajei rĩ. Ga chise diri uje uaté ica base ga chajire daca basugué, mu diyoqui ga uerate. Jé uaté chacósosi dababi ga ababi guejnane guedosi gadioque uje daté pógusu.

³ Mu uje e abi gabuji nanique ga que chirajápo dasocáringome dabi to rĩ, ga doi tujone iji tié edúdi enga chajugája jnumi ga chiro dorájnui ome dabi jeta chanı́raja ajei ga chucué erã́sori cucha chietaque iji tié urui jeta chimese dorájnui tuté ujade ome jeta ca yodi chacája ajei. Uje udore chopise ajidape enochade nanique. Chimate dorájnui ga jé u uje chanire dabi aja ajei iji tujomui ajei nanique iji tié cuchabé uaté nanique uje i tu Nílo.

⁴ Chequé tuaté noñome dababía iji dapoguiédi dape tiógarei jeta timı́ninga ape parátai aja quedéjnane iji tujomui ajei.

⁵ Udojo quigade ga edugúejna cuchábi Faraón uro chicáji tié jeta qué chẽ́sariji, mu chajire tujomui ajei tuti mu chimo ore ora canásta iji tujomui ajei. Ga uaté nóna daróguerigui ore nanique. Iróguedie qué ore chajna tié edúdode iji iqueóde. Mu uaté tibidi darógueisi uña ga chojninga: "¡Ca boji te á! Be ore ora tuaté canásta iji tujomui ajei ga ajnája guesi aja de."

⁶ Uje uaté chuchẽre ore ora gai ga chajire ajei mu chimósi disabi tiji ajei ga chisasi dabade, ga disabi agoyedie chijõrorase Faraón uro uaté. Uaté chojningame daróguedie ore: –A hebréogotodie uñáraque abape sudé.–

⁷ Disabi suté nerámia basája eduguéjnai Faraón uro iquei ga chingongara raja uaté ga chosísi tome: –¿Ja uerate ome ua ya? jeta yibidi yocujóraque hebréogoto jeta chacucãrósiape disabi suté ome ua.–

⁸ Faraón uro chojningame: –Ejẽ́. Abidi goto ga chacucãrósiape.– Ga disabía suaté quı́tequiguı́ji disabi suté daté jogadi. Ga daté tibágosi dababi to.

⁹ Faraón uro chojningame chequé uaté: –¡Disabi dési de jã! Acucãrósiape disabi sudé ome yu jne ga a amánosija gaté ome yu jne enga a yo boré ome suté jne.– Ga jé u uje disabi daté jnosi údi aja daguı́jnai ga pésusu dababi aja gaté.

¹⁰ Uje disabi e urẽjape ga chirajasi cuchade ujade ga daté chisísi ome Faraón uro casica. Faraón uro pésusu suté ga chosipísi dababi iji ga chojninga: –Yipésu írique jne enga a yĩ́care Moisés aja jne gu uje yijnimingámiji yodi nanique.–

Moisés chayome Faraón ore iji ore uniri Egı́pto nanique

¹¹ Uje e jnacare Moisés nanique ga tibágui darása cásodicáite ore jeta qué chajmita ore to. Mu chimo uje ore isagode cucha sué ore gáyode. Uje chisṍriji ore idai údode mu chimo egı́ptogosode uñai uje qué chaquesu ujoi hebréogose údode.

¹² Ga Moisés chajire dejode jeta jé ca chimo ayorérique iji dejórique. Ga jé u uje chujé egíptogosi ga chijóchame dei iji te.

¹³ Mu chise dire uñeque enga chicapóji daqui casé rĩ ga chimo dojode hebréogoso ore ga qué ore chujé ñane. Ga chojningame jõcarataque bajai: –¿Gotique gu a uje bajé barásai uté? Uje uacarása ñane ga uacáringai hebréogose jé chojmára.–

¹⁴ Hebréogosi uqué uje cho dajocaningame darasapísi ga chojningame Moisés: –¿Jé gosi iroque ua aja yoque jeta yoco yocasuté iji ua ga yicoi baru quitı́go ome yoque? ¿Ja upórasu rĩ a jeta ajire yocadode aja quedéjnane? ¿Jeoga bajéode u jeta ajépo yu to rĩ uje e bajé egı́ptogosode uñai diríca?– Uje Moisés chudute dei casé ujnomei ga quene todo uje e chiraja gu uje e pirajaque ome ore uje chujé egı́ptogosode uñai diríca.

¹⁵ Ga jé u uje Faraón chudute to uje Moisés chujé urasade uñai ga chojninga: "Acueyoi Moisés jne enga yujégo to jne." Ga Moisés chayome Faraón ore iji ore uniri Egı́pto ga chicáji punire uñai uje i tu Madián. Ga chácariji ore jopitique eruque edógai iji ore uniri tuté nanique.

¹⁶ Jnanı́rique déji ore uniri nanique uje sacerdote enga uté u uje catecãraini tu Dupade ome darasade ore iji daniri Madián. Ga uté i tu Reuel nanique, ga urórigui gare ore iji ti nanique. Uje Moisés diji ore uniri uté nanique ga jnani uté urodie ore doi yodi jeta ore chécãraja dayé gachidedie áyasai jopidode. Ga ore chise Moisés iji yodi ejoi uje chácariji dayaridi.

¹⁷ Ga jnani uñéngo uje áyasadie irodisóño ore ga ore chise gapudı́e udire iji yodi ejoi ga ore chijócãre ore iji ti. Ga Moisés chague iji dayaridi ga chicha raja jnanione udore ore yui uje ore chijócãre gapudı́e ore iji yodi ejode. Jé u uje chaningare áyasadie udire ome yodi.

¹⁸ Gapudı́e udire ore di iji dai ga ore dai chojninga: –¿Jé go uje jı̃raque uacarı́ño iji diri tudé?–

¹⁹ Ga ore chojningame dai: –Yico egíptogosi que, ga chicha raja yoqui ome jnanione uñane que uje ore chijócãre yóguiji yodi ga uté chaningare bachidedie áyasa uquidé ome que.–

²⁰ Ga ore dai Reuel chojningame darodie udire: –¿Déji rique uacojningai uté? ¿Jé go uje uacajíñopome to que? ¿Que abichoi ga tagábu yoquibosode to a?–

²¹ Ga Reuel catecã́ri Moisés jeta pota ga chácariji ore gari iji ore iguı́jnai to. Ga Moisés chimesẽre uruode, ga jé u uje chácariji ore gari iji ore iguı́jnai. Ga jnani chiroque daro aja Moisés jetiga chóji gari, ga doi dai uruode ga ore chóji ñane gari. Ga gapua uaté i u Séfora nanique.

²² Uje ore abi cuse nanique ga Moisés pésu i ga chojninga: "A yĩ́care Gersón aja jne, uje Gersón i qui u uje purása quedéjna yu iji ore ujade."

²³ Uje siqueredie e jiei iji udojo yúode ga Faraón toi uje egı́ptogosode asuté u nanique. Mu jé egı́ptogosode ore isoca dasocade ome Israel ujnié disi ejode ore iji dajade uje que ore chañuru ore guio iji dajade ome dajosipiedie. Enga ore narañime ore iroquéode ome raque ga ore poja dajesúode iji ore jmainie. Ga jé u uje Dupade chudute ore ujnacade iji ore ujade ga jé u uje chosõre ore nanique.

²⁴ Ga jé u uje Dupade áyipiedie doi Abraham, Isaac, Jacob ore, enga jnusina daru cásodicáite ome ore uje chojningame ore nanique: "A yisi ome uacanínique ome uaque jne jeta oyo uacaniri iji erã́tique ome uaque, jé aja uacape disi ejórigo ore." Jecute Dupade tangári ore uru quigode udore uje ore chatata egı́ptogosode ore josipiedie ome raque nanique.

²⁵ Enga Dupade pañaji udore ore gajnenie pijosipiei ga chojninga: "Jé ũrepise Abraham ore ujnié disi ejode udore ore uruode ome dajnenie pijosipiei ome egı́ptogosode ore."